للحب كلمة

٢

محاسن الولد دا ح يقعد معانا ولا كيف ...
ما عارفه يا يمه كدا بعدين نستفسر من خالد وحتي لو عاوز يقعد مالو ما يقعد اوضه ابوه وصالته في الحوش التاني مقفولين بخلي البنات يفتحوهم وينضفوهم ليهو ....
خالد بعد ما فطرو طلع هو ولد عمو وخالد كان مبسوط بجيه ولد عمه خاصه انو من يومه عايش براه لا صاحب ولا اخ ما صدق شاف حسام كان عاوز يعوض الفاتو مع ولد عمه وحسام مبسوط اي هو عنده اصحاب قدر شعر رأسه بس نهاي ما بكونو زي الأهل وخالد إنسان طيب شديد ...
وأتلفت حسام لي خالد الكان قاعد بشرب في قهوته في المكان المتعود يشربها فيهو ...
وقال ليهو اسمع يا خالد ...
خير يا ولد عمي ....
عاوز لي شقه ....
اتلفت عليهو خالد وهو مضايق وطوالي خت الكاسه في الطربيزه وقال ليهو شقه لشنو يا حسام انت مَش قلت جاي عشان تقعد بين اهلك ...
طبعا طبعا يا خالد بس انت ما فهمتني انا كان علي السكنه عندي شقه امي البناها ليها ابوي في عماره جدي بس انا ما عاوزها للسكنه انا عاوزها لشغل ....
خلعتني ياخي قلت في بالي انو يمكن عملنا ليك حاجه تزعلك ...
لا ياخ انتو ما قصرتو وكفايه استقبالكم لي ...
انت تستاهل يا ولد العم مرحب بيك بس انت عاوز تشتغل شنو يعني وانت دارس شنو اصلا ....
ههههه صاح انت ما بتعرف اسمع يا سيدي انا دكتور أسنان وعاوز شقه اعملها عياده متخصصه وغير كدا عندي صاحبي دكتور نساء وتوليد ح يكون معاي انا قلت اشوف الموقع عشان اجهزو و هو بعدين يرسل لينا كل الحاجات البنحتاجها للعياده ...
مشاءالله والله دي حاجه تشرف انا ولد عمي دكتور يلا يا دكتور انا عندي شقه بتنفع للقلت عليهو دا وجنب شغلي ....
طيب يلا بينا ومشي حسام مع خالد وشاف الشقه وعجبته شديد بس المشكله وين في صاحبها إنسان ثقيل وكريه علي حد وصف الزول الفاتح الدكان في نفس العماره ....
ياخ قول كلام غير كدا ....
اي والله راجل حق مشاكل شفت قبل الشهر يكمل تلقاه واقف ليك هنا ....
رد حسام وقال ليهو لالالالا من للناحيه دي اطمن انا ما عندي مشكله في الدفع وخاصه انه الشقه تستاهل وموقعها حلو ...
وهم بتكلمو وفجاه صاحب الدكان قال لو كنّا جبنا سيره مليون جنيه ما كان احسن ....
اتلفت حسام وخالد علي نفس الاتجاه الكان بعاين فيهو صاحب الدكان وشافو ليك عربيه فخمه مظله جايه عليهم حسام ما اشتغل كتير بيهو بس صاحب العربيه شافو وفرح بيهو ورجع يعاين لي للعماره ... ...
نزل صاحب العربيه وهو بضحك ومبسوط وجاي عليهم ولمن شافو صاحب الدكان انخلع معقول الراجل دا بعرف يضحك وفجاءه جاء الراجل وخت يده في كتف حسام اتلفت حسام علي الزول الخت يده فيهو واول ما شافه صرخ وقال خالي واخده بعض بالاحضان وبعد السلام الحار ولسه الخال ماسك ليهو يده وهو بقول امّك قالت انك جاي بس ما ورتنا بيوم جيتك وجيت متين ووكيف ما بتنزل في بيت جدك ....
سيد الدكان وكأنو صبت فيهو مطره الراجل طلع خاله الولد وووووب علي لساني العاوز قطعو كان في داعي للكلام القلتو .....
وعرف حسام خاله علي خالد اتلفت الخال وقال لي صاحب الدكان جيب لينا كراسي ...
وشويه وجات الكراسي وقعدو ...
يعني ما قلت لي نزلت وين ....
يا خال نزلت عند ناس عمي ودي كانت وصيه ابوي اول بيت ادخله لمن انزل السودان هو بيت جدي ...
الله يرحمه ويغفر ليهو بس الأصول تجي تسلم علي خالتك وخيلانك وجدك ....
طبعا انا كنت العصر جاي عليكم انا يا خال وصلت الصباح ،...
طيب يا سيدي انت ح تمشي معاي هسي وتتغدا عندنا .... تمام يا خال مافي مشكله وقف خالد وقال ليهو انا خلاص امشي وانت لمن تخلص تعال علي انا ما ح انوم الا لمن تجي وهم اكيد عارفين البيت ....
وقف الخال وقال ليهو وين وين تمشي علي الطلاق تمشي معانا انت ولد عّم حسام كيف ما بتمشي معانا ...
لا والله ما في داعي ...
خلاص يا خالد خالو حلف طلاق ...
يلا يا شباب علي المسجد نصلي ضهر الجمعه وبعدها نمشي علي البيت بس تعالو اسالكم انتو الجابكم هنا شنو ....
هههههه تتخيل يا خال اني كنت جاي اشوف الشقه الفوق دي عشان أجرها ...
تاجرها ليه انت ما شقتك قاعده عندنا ومفروشه مالك بالشقق تاني ...
لا يا خال انا عاوزها عشان اعملها عياده .....
ههههههه والله نسيت أنك دكتور ....
وأبشر الشقه بقت من نصيبك انا اصلا كنت ناوي اعملها عياده برضو ...
عياده ...
ايوه يا سيدي بت خالك ندي مصره يعملو ليها عياده ....
ندي قرت طب ....
ايوه قرت طب والحمدلله انك جيت تفتحو العياده سوا وتشتغلو علي الاقل بت خالك ما تكون براها ....
بس انا عندي صاحبي متفق معاه نفتح العياده سوا ...
مالو المكان كبير يشتغل معاكم وين المشكله ...
طيب مادام كدا اوكي .....
وبعد صلاة الجمعه مشو علي بيت جده الكان في المنشيه البيت من برا يفتح نفس كانت عماره من خمسه طوابق والدور الأرضي كان في حديقه كبيره محاوطه العماره وكان الجد والجده قاعدين في كراسي تحت شجره كبيره وهناك واقف بنقالي يغسل في عربيه وراجل كبير قاعد يرش في الجنينه والعرق سائل منه وحده الظاهر عليها حبشية شايله صينية فيها كاسات مويه ماشه بيها علي الجد والجده ودخل الخال وقال لي ابوه سلام يا حاج وباس علي راْسه ومشي علي امه سلم عليها وباس يدها وقال ليهم عاينو للولد داك وقولو لي عرفتو ولا .....
لبست الحبوبه نظارتها وبقت تعاين ليهو وتبتسم والجد وقف علي حيله وبقي يعاين علي الولدين الواقفين وقبل ما يتكلم قامت الحبوبه تكورك دا حسام ولد بتي امل كيفن ما بعرفو ....
وجري عليها حسام وسلم عليها وعلي جده وخلاته واولادهم أتلمو عليهم وسلمو علي حسام وقعد وسطهم وهو فرحان وبقول في نفسه كيف عشت كل السنين بعيد من لمه الأهل وحنانهم ياااااااا علي الغربه اي هو جاء كم مره مع امه زمان لمن كان صغير بس لِسَّه متزكر البيت والوشوش الحلوه دي واتغدو مع بعض وقعدو يحكي ليهم عن لندن وعن شغل امه هناك ومشاريعها وكيف هي مبسوطه وما ناويه تسيب لندن ....
ولمن جاء وقت المشي وقف حسام ومعاه خالد عشان يمشو وهنا الجد ثار وعمل عمايلو كيف يا ولدي انت تقعد بعيد عن بيتك ....
يا جدو داك كمان بيتي وانا ح أكون معاكم دائماً بس علي الاقل خليني اقعد شويه في بيت ابوي وان شاءالله بجيكم ...
يا حاج خليهو علي راحته وهو ح يمشي مننا وين نحن اهله وعزوته ...
وبكت الحبوبه بس حسام وعدها انه يرجع قريب يزورها ....
وودعهم واما بت خاله الدكتوره ندي كانت بتعاين ليهو ساي نظام ما فارق معاها وسامته وكمان بت خالته سهيله عجبها قوامه ووسامته ودا كان باين عليها في خفتها الكانت ظاهره وأولاد خاله طلعو معاهم لبرا يودعهم وكأنو مبسوطين من خالد وطيبته ...
والخال كمان عجبه خالد شديد وعجبو حياهو وخجله وهم برا ناول الخال مفتاح عربيه لي حسام وقال ليهو خليها معاك ح تنفعك وان شاءالله تعجبك بس ....
والله يا خال مافي داعي لي دا كله والله خجلتوني بتعاملكم دا ...
يا ولد انا خالك وغير كدا انا زعلان عشان انت ما ح تقعد معانا وقلت البيوت وحده وكمان ما عاوز تشيل العربيه دي ح تكون زعله كبيره ....
رد خالد وقال ليهو كلام خالك صاح والخال والد. شيل المفتاح وما تزعلو ...
ربت الخال علي كتف خالد وقال ليهو الله يكملك بعقلك يا ولدي بس خليني اسالك ان شفتك وين قبل كدا ....
ابتسم خالد وقال ليهو بتكون شفتي جنب الدكان ألفي عمارتك لاني شغال جنب عمارتك ...
بالله وانا أقول شفتك وين صحي الدنيا دي ضيقه ....
ووودعهم وركب خالد جنب حسام ومشي حسام علي وصف خالد لحد ما قربو علي البيت وبهناك القلق دب في محاسن علي ولدها وخاصه انه نسي تلفونه في البيت وخطبيته ما بطلت اتصالات علي حسب كلامها انه متفق معاها يمشو يشوفو غرفه النوم ....
واول ما وقفت العربيه كانت ساره واقفه في السطوح واول ما لمحت العربيه اتخلعت دا منو السائق العربيه ووقفو جنب بيتنا وب علي يمكن يكون جايني عريس ....
وفي خطوتين نزلت السلالم وجرت علي الباب وتفتحو تلقي ليك حسام نازل من العربيه ومعاه خالد اخوها وووب علي دا ولد عمي المزه وبقت تسألهم دي شنو العربيه الخطيره دي وب علي ما تقول حقتك يا سحس ...
ابتسم حسام ليها وانبسط شديد منها خاصه انه حسي انها بتتعامل معاه كأنها بتعرفو ليها سنين رد عليها وقال لا يا ساره ما حقتي دي حقت خالي بس طالما عجبتك كدا بكرا بجيب ليك وحده زيها انا عندي كم بت عّم ....
ضحك خالد وقال ليهو ما تهزر معاها احسن دي لصقه ح تصدق كلامك وح تجننك...
جات محاسن مارقه عليهم ...
دا شنو التأخير من الفطور تطلعو ما ترجعو الا هسي العشاء قرب يأذن ....
دي قصه طويله يا امي خلينا ندخل وبحكيها ليكم وبعد ما دخلو جرت ساره تعمل ليهو الشاي باللبن المظبوط وقعد خالد يحكي لي امه ودخل حسام الحمام ياخد ليهو حمام كارب .....
سماح كانت مع بت جيرانهم بتحكي ليها عن ولد العم الظهر فجاءه وكيف انه دخل قلبها وحست انها بتحبه حتي قبل ما تشوفه وكأنها كانت داسه كل مشاعرها ليهو هو بس لان من يومها ما عندها علاقات ولا زي البنات البحبو وبطلعو مع حبايبهم ....
ومع كل المشاعر المكبوته دي واول ما شأفته كأنها شافت فارس أحلامها الكانت بتتخيل انه ح يجيها علي حصانه الأبيض ياخدها اي هي عمرها قرب علي التلاتين وكل ألفي سنها عرس بس هي كانت منتظره الفارس المجهول واخيرا الفارس ظهر ....
قعدت قعدتها مع صحِبتها وبعدها رجعت البيت وتشوف العربيه الكبيره الكانت واقفه جنب الباب ياربي دا منو العندنا ودخلت تتسحب لقت ولد عمها وأخوها وساره محكره وقاعده جنب حسام وبتوريهو ألبوم الصور وهو شكله مبسوط وهو بتفرج علي صور ابوه وجده وعمه وقفت سماح حست بطعنه في قلبها بس في شنو يا سماح الولد يادوب رجع وما وعدك بشي مالك انتي موجوعه كدا هزت رأسها وطلعت الأفكار دي من رأسها وقررت تمشي عليهم وتثبت وجودها وقفت سلمت عليهو وقفت منتظره يعاين ليها بس رد عليها السلام وهو بعاين في الصور وهنا ساره بقت تحكي ليهو عن الدرامات الكان بعملها ابوه وابوها والكانت بتسمعها من جدّهم الله يرحمه وهو يضحك ومبسوط بطريقه كلامها وسردها للذكريات الجميله .....
حست سماح انه وجودها وعدمه واحد سحبت نفسها ومشت جوا عند امها المطبخ وسألتها اذا كان حبوبه ح ترجع من ببت خالتها ولا ح تبيت ....
خالتك اتصلت وقالت انهم ماشين شارع النيل وقالت نمشي معاهم بس انتي عارفه بولد عمك ما بنقدر نمشي عيب ....
طيب كويس بس في عربيه واقفه برا دي حقت منو .... هههههه اسكتي دي قصه طويله وبقت تحكي ليها الحكاهو ليها خالد وبقت تسمع امها و تساعدها في تجهيز العشاء وخالد واقف بعيد شغال يعتزر وبعتزر لي خطيبته وشكلها ما راضيه تتفهم الوضع ....
بس لمن عرفت بقصه ولد عمه وحياته وحياه اهل امه جرت ناعم قالت في نفسها يمكن ينوبنا من الحب جانب
ومر كم يوم وحسام بقي مع خاله وخالد في تجهيز العياده وحسام مبسوط وشويه خالد يساعده في العياده وشويه حسام يقضي لي خالد مشاويره عشان العرس قرب ....
وهنا حسام اقترح انه يعملو صيانه للبيت وخاصه عشان العرس كمان ...
بس خالد كان نفسه بس القروش ح تقصر معاه حسام حس بولد عمه خاصه وهو شايف ظروفهم وقال لي خالد انا هديتي ليك اني ح اصين البيت علي حسابي
بس يا حسام دا كتير ...
ولا كتير ولا شي
وبدو العمال يشتغلو صباح ومساء عشان مافي وقت واما النص حق ابوه ظبطه وعمله زي شقه ارضيه وركب فيها مكيفات وحتي الغرفه ألفي السطوح ظبطها والبيت بقي في اقل من شهر يجنن وهو لمن بقي عاوز يفرش البيت قرر يسوق ساره عجبو زوقها من لبسها وهي فرحانه بالعربيه البتركب فيها والولد الوسيم
وهنا هو في العربيه قال ليها اسمعي تعالي نعمل مفاجاه لي خالتو محاسن ونغير طقم الجلوس ونجيب شاشه بلازما كبيره في الصالون ....
بس دا كتير يا حسام يعني انت البيت كلها بقيتو سراميك وغير ضرب البويهيه كمان انا بقيت لمن بدخل البيت ما بعرفه بس الحاجه الوحيده البتاكد انه دا بيتنا هي حبوبه وصراخها فيني ....
هههههه بالجد حبوبتك تحفه انا عن نفسي بموت فيها ....
هي زاتها بتحبك ودي حاجه غريبه حبوبه ما بالسهوله إنها تحب ليها زول ،....:
وقفو جنب المحل ونزلو وبدو يختارو لخالتو محاسن الطقم لحد ما وقعت عينها علي طقم يجنن وقال بس هو دا واتكيف حسام معناها نظرته فيها ما خابت انها زوق وراقيه .... امي ساره وين ....
ساره طلعت مع حسام قال ماشي يجيب ليهو عفش للبيت ...
طيب طيب طيب وجرت طلعت علي شغلها وطول السكه هي ساكته ورشا وهاله يتكلّمو معاها وهي سرحانه وكأنها في دنيا غير الدنيا
وبهناك اشتري حسام واداهم العنوان عشان يوصلو لحد البيت وطلعو مشو شارع واحد واربعين عشان ياكلو ايسكريم ....
هههههه سحس انت ما ملاحظ انك بقيت تعرف الشوارع كانك كنت عايش هنا ....
شفتي كيف ولد عمك خطير ووقف العربيه وهنا جات وقفت عربيه وووووواي انا منها عربيه تهوس وهنا ضحك حسام اول ما شاف صاحب العربيه الظاهر انه بعرفه ....
نزلت ساره ومشت مع حسام علي اتجاه العربيه الكان صاحبها نزل منها ومعاه بنوته كانت مشغوله بتلفونها بتتكلم واول ما شاف حسام بقي يسلم عليهو بالاحضان ويقول ليهو ولد عمتي بقي يعرف شارع واحد واربعين وكمان جايب معاه مزه ضربه حسام في كتفه وقال ليهو اسكت ياخ دي بت عمي ساره ساره دا ولد خالي نزار
😱😱😱ما كانت هنا المصيبه المصيبه هي البت الكانت مع نزار ولد خالو لحسام