للحب كلمة

١٦

ازيك يا محاسن مشاءالله عليك زي ما انتي ما اتغيرتي ... تسلمي حبيبتي وانتي كمان مشاءلله بقيتي حلوه شديد ...ههههه دي عمليات التجميل يختي ....ههههههه والله يا خالتو انتي عسل وصريحه شديد ...والله انتي العسل ومهما الوصف الوصفو حسام لي بحس انه قليل في حقك ولدي نسي يقول لي انك زي القمر ... تسلمي يا خالتو دا بس من زوقك .... دا ما كلام ساي دي الحقيقه وأتلفت علي ام ساره وقالت ليها والله يا محاسن بالجد بناتك عسل وحلاتهم وطالعين زيك ....عيونك الحلوه حبيبتي ماهم بناتك برضو ...دا العشم وعشان كدا جيت الليله اطلب يد بتي ساره لولدي حسام رغم أنكم عندكم خبر وحسام أتقدم ليكم بس دي الأصول ودا كمان حقكم لازم كنت اجي وأتقدم ... ونحنا انتظرنا جيتك لانه بالجد كمان اشتقنا ليك وتاني شي والله نحنا لو لفينا الدنيا كلها ما بنلقي زي حسام في أدبه وأخلاقه فعلا كبرتي وربيتي .... طيب اه قلتو شنو ... مافي قول بعد قولك ونحنا ما عندنا اي مانع ... خلاص علي خير الله اه ما قلتو لي طلباتكم شنو ...طلبات شنو كمان يا اختي نحنا ما عندنا اي طلبات ...كيف ما عندكم طلبات دا حقكم وحق العروس وما تنسي دا عرس حسام وساره ولازم نجيب ليها الغالي والنفيس وعلي كلا انا جبت الشيله كامله مكمله وان شاءالله يوم الجمعه نجيبها والخميس الجاي نعمل العقد والعرس مع بعض ويسافرو طوالي يوم السبت ... ان شاءالله والله يتمم علي خير ... نطت الحبوبه وطلعت من الموضوع لانه كان في شي شاغلها اهم من عرس قاشره وقالت يختي طالما عمليات التجميل بتغير الزول كدا انا زاتي عاوزه اعمل يصلحو لي ركبي دي وسنيناتي كمان وأشد شويه واشفط شويه الكل بقي يضحك خالات حسام وأمه والكل كان مبسوط بكلام الحبوبه 😄😄😄😄

حسام بقي قاعد مع امه في بيت جده وجاء يوم الجمعه وجابو الشيله وكانت سماح قايمه بكل شي عملت لي اهل العريس بوفي مفتوح عشان تكبر اختها قدام نسابتها وجابو تلاته أطقم دهب وسته غوايش ومن كل شي تمنيه تمنيه
وكان يوم جميل جدا طلعو اهل العريس مبسوطين من الاستقبال والكرم الشافو عندهم رغم بساطه حياتهم بس قدرو يظهرو بمظهر سمح وندي الوقت كله ماده البوز ولمن رجعت البيت نادتها عمتها ام حسام علي جنب وقالت ليها مالك يا ندي قالبه خلقتك اليوم كله ....لالالالا يا عمتو مافي شي بس مصدعه عشان كدا ....وفاجاتها ام حسام بسؤالها وقالت ليها انتي بتحبي حسام صاح ....ارتبكت ندي وقالت ليها انا لا والله مافي حاجه زي دي بس حسام يستاهل وحده احسن من دي ...كيف احسن منها يعني البت فيها شي كعب ونحنا ما بنعرف بيهو ....لا يا عمتو ما القصد انا قصدي المستوي الاجتماعي يعني حسام مشاءالله عليهم وضعه غير وهم مافي مستواه ... ومالو مستواها عشان يعني انهم فقرا ....حاجه زي كدا ...بس عمره الفقر ما كان عيب العيب انه نحنا نعاين للناس من فوق وما تنسي اني عرست ابو حسام وهو ما كان عنده شي غير شهادته ورغم رفض اهلي وكلامهم لي انه ما ح اقدر يعيشني في نفس مستواي وانه ما اقدر اعيش في اقل من مستو اهلي لأنهن كانو ناس علي قدر حالهم بس نسو انه القرش ماهو كل شي في حياه الناس اهم شي العيله الطيبه والسمعه الكريمه واهو انا قدامك قروشي دي كلها واملاكي كلها من تعب راجلي واجتهاده وقرش واحد من ابوي ما شلته وربيت حسام بقروش ابوه وفي النهايه اذا في فضل بعد الله سبحانه وتعالي ح يكون لي ابو ساره لانه هو السبب انه ابو حسام يكمل تعليمه ويبقي مهندس قدر الدنيا وفي حاجه عاوزك ما تروح من بالك انه دي بت عمه ودي كانت وصيه ابوه وطول ما انا عايشه ما بخلي وصيه حبيبي وشريك عمري ما تتنفذ ...بس دي عيانه وممكن تموت في اي لحظه ... لا حولا ولا قوه الا بالله دا كلام شنو الإعمار بيد الله مافي زول ضامن بعد ساعه يحصل فيهو شنو وياريت تغيري من طريقه تفكيرك لانها ح اضرك انتي اول شي ... وسابتها ومشت وهي مصدومه علي تفكير بت اخوها رغم انها متعلمه ودكتوراه صحي الجهل مافي الناس المتعلمة الجهل الأكبر في المتعلمين العاملين نفسهم بفهمو وهم للأسف بهائم خساره يا اخوي ما ربيت وخليت بتك تربيها امها علي الحقد والأنانية
💃💃💃💃💃يوم الفرح 💃💃💃💃
الكل مشغول وساره وهناء عند مدام سوسن الخفجي و رشا وسماح عند مدام هند حمدتو وحسام ونزار وخالد مع بعض وحسام بعد الثواني عشان يقابلها ومرت الدقائق كأنها سنين طويله ولمن جاء الوقت وطلعت ساره كانت زي البدر في ليله تمامه وهنا بقي ما قادر يتحرك والكل بكورك ليهو عشان يمشي عليها بس هو مبهور بالشايفو دي ساره دي مرتي وهنا اتذكر مرضها في ثانيه وانه ممكن في اي لحظه يفقدها بس لا هو مستحيل يخلي الموت يهدم سعادتهم وحتي لو بقي في عمرها ساعه هو ح يعيشها معاها في سعاده استجمع قواه واخد نفس طويل ومشي علي بخطوات ثابته ومع كل خطوه كان بثبت فيها لنفسه انه احسن قرار اخده في حياته رغم اعتراض اهل امه وخاصه بعد ما عرفو بمرضها وانه كيف يعرس وحده عيانه ووصل عندها وهي بتعاين ليهو مبتسمه وزي الكانت حاسه بيهو وبشنو كان بفكر بس هي قالت حتي لو بموت بعد دقايق ما بهمني لاني ح اموت وانا في حضنه ودا يكفيني مد يده ومسك يدها وبأسها وقال ليها لو بيدي أهديك عمري بس عمري ما ح يكفي السعاده أيلي انا ح اعيشها معاك مبروك يا قمر بضوي في سماي يا عقد من اللولي ملفوف حولين رقبتي يا عشقي الابدي يا سعادتي ونور عيني بحبك بحبك بقدر كل لحظه عشتها معاك وح اعيشها معاك يا تاج علي راسي وعشانك يا ساره انا ح اعيش حياتي كلها في سعاده ودنقر عليها وطبع احلي بوسه فوق جبينها والكل بقي يصفق ويصفر والبنات بزغرتو وركبو كلهم العربات وبقو لافين شوارع الخرطوم والعربات تزمر وبعدها مشو علي الاستديو واتصورو مع بعض وفي اخر صوره طلبت ساره انها تتصور مع سماح ومدت ساره يدها لي اختها وقالت مين عارف يمكن ما نلحق نتصور مع بعض تاني ونزلت دمعه سماح بس ما حبت تعكر فرحه اختها وقالت ليها ان شاءالله ح نتصور وفي عرسي كمان ولا انتي ما حابه تتصوري معاي في عرسي ...تفتكري ح اعيش لحد اليوم دا يا سماح ...بعد الشر عليك حبيبتي وان شاءالله ح تعيشي و ح تتصوري كمان ومعاك بنتك ولا ولدك وبقو يضحكو واتصورو وهم في حضن بعض وطلعت احلي صوره وحسام واقف بعاين ليهم وهو مبتسم وبعدها مشو علي الفرح وبدت الزفه ودخلو الكل كان مبهور بجمالهم واي زول بيقول لائقين علي بعض وبعض الناس متآثره وبقولو بس يا خساره العروس ممكن تموت في لحظه بس اي زول كان في الحفل كان بدعي ليها أنهت تشفي وتعيش اخلي الأيام....😭😭😭😭
واشتغلت الاغنيه و رقصو عليها الاسلو وبعدها اتحركو علي الجاتو وقطعوهو وشربو بعض العصير وهم مبسوطين والحفل اشتغل والكل مبسوط وبرقص وقبل ما الحفل تنتهي بنص ساعه كانت ساره بترقص مع حسام وهي في قمه سعادتها بس المرض كان بنهش في جسمها الضعيف والالم كل ماله زايد بس سعادتها كانت أقوي من نوبات الالم الكانت بتجيها بين أللحظه والتانيه وهي بتحاول ما تظهر وجعها لحبيب عمرها كانت عاوزه تسعدو في اجمل لليله استناها من وقت بس نوبه الالم المره دي كانت اقوي بمليون مره من سعادتها ووووووو وقعت ساره واسودت الدنيا في عيونها