للحب كلمة

٢٩

ساااااااره وجرا عليها حسام وامه وراه قلبه كان بدق زي دقه الساعه وبسرعه شديده وهو بحاول يفوقها وصرخ علي الشغاله تجيب ليهو عطر وجرت الشغاله جري عشان تجيب العطر وماهي الا ثواني وكان العطر في يد حسام وبقي يفوق فيها ووين لحد ما فاقت وفتحت عيونها في شنو انا حصل لي شنو .... ولا حاجه حبيبتي ولا حاجه وشالها ومشي بيها علي السرير وختاها وبقي ماسك يديها وهو بقول انتي حسيتي بشنو ... ما عارفه فجاءه بقيت ما شايفه قدامي ... سلامتك يا بتي ...الله يسلمك يا خالتو. ان شاءالله خير ما تخاف يا ولدي .. كيف ما اخاف دي الغلا كله ... الله يخليكم لبعض قولو امين .... امين يارب ومشي جاب قاس ليها ضغطها ولقاه ما بطال بس اصر انه يوديها المستشفي عشان يطمن عليها هو خايف انها تكون انتكست ولا المرض حقها ما عارف كيف كان بفكر بس دا الجا في راْسه
بس هي ابت لكن كيف ترفض وحسام فوق راسها بنقنق ليها عشان يمشو يطمنو وفعلا مشو علي دكتورها وهناك الدكتور كشف عليها وبعدها اتلفت علي الممرضه انها تاخد عينه من الدم عشان يحللوها وجات الممرضه وأخدت العينه وحسام ماسك يدها وهي غمضت عيونها عشان كانت بتخاف من منظر الحقن من يومها خوافه وبعدها الممرضه قالت ليهم ساعتين ونتائج التحليل بتطلع وقام طلع بيها ومشو علي ا الكافتيريا وقعدها ومشي جاب ليها عصير وهو جاب ليهو قهوه وقعدو يشربو وكل شويه يسألها حبيبتي حاسه بشي ... لا يا عمري انا تمام ... حلو ... وياخد شفطه من القهوه ويرجع يسألها حبيبتي حاسه بشي ....لا يا قلبي مافيني شي ... حلو .... ويرجع ياخد القهوه وياخد شفطه ويرجعها ... ويرجع يسألها حبيبتي حاسه بشي .... لا يا عيوني انا كويسه ... حلو .... ويرجع ياخد القهوه وياخد اخر شفطه منها ويرجعها .... حبيبتي حاسه بشي .... 😭😭😭😭 حسام حرام عليك مالك انت الليله عزبتني  والله والله والله والله انا كويسه ..... حلو حبيبتي بس قلقان عليك ... ما تقلق يا عمري انا تمام التمام ... مسك يدها وباسها وقال ليها انا لو ما قلقت عليك انتي اقلق علي منو يعني انتي ما عارفه معزتك جواي قدر شنو .... ختت يدها التانيه فوق يده وقالت ليهو عارفه والله وانت كمان في قلبي قاعد ومتربع .... يا سلام عليك وعلي ريدتك والله يخليك لي يا عمري وفضل يتغزل وهي مره تخجل ومره تضحك بس كانت مبسوطه وفرحانة شديد وهي جنبه بتنسي الدنيا وما فيها ... حسام ح تكون معاي علي طول صاح ... رفع راْسه وقال ليها بعد الحب دا كله اسيبك وامشي وين وطول ما انا عايش ح تكوني هنا وأشر علي قلبه وقال ليها لو ما كفاك قلبي ح ادخلك بين ضلوعي وبقو يتونسو لحد ما قالت ساره ليهو يلا يا حسام نمشي نشوف النتيجه بتكون طلعت ..... طيب يا عمري يلا وساقها ويده في يدها ومشو ودخلتهم الممرضه واول ما قعدو سال الدكتور بي لهفه اه يا دكتور وهو كان خايف يقول شي عن مرضها وبقي زي المنتظر نتيجه تحليله هو وهنا الممرضه جات ومعاها النتايج وشالها وبقي يقرا فيها وهنا بقي حسام قلبه يدق ويده بترجف حست ساره برجفه يده وهي مسكاها ربتت بيدها التانيه علي يده اتلفت عليها هزت ليهو برأسها وهي مبتسمه كانت انسانه قويه ابتسم ليها وأتلفت لي الدكتور وقال اه بشر يا دكتور في حاجه بتخص مرضها طلع نضارته وخت الورق وقال ليهو انا صراحه كنت شاكي بشي بس حبيت أتأكد من التحليل والتحليل اثبت شكي ...هنا قلبه وقع من رجوله... بس الدكتور قال ليهو لازم تدخل المستشفي فورا .... بلع ريقه بصعوبه ووشه اتغير هي حست بان في حاجه شدت علي يده بقوه لمن هو حسي بيها اتلفت عليها وابتسم ابتسامه عشان يطمنها .... وبعد لحظه من الصمت اتكلم حسام وقال لي الدكتور خير يا دكتور في شنو وانت شاكي بشنو بالضبط .... بعد الاشعه المقطعية ح اقدر اتكلم معاك .... وأتكلم مع الممرضه انها تدخلها علي الفور علي الاشعه ولاحظت ساره علي التوتر الحاصل ولأنها ما فاهمه هم بقولو شنو بقت تقول ليهو في شنو يا حسام بقول ليك شنو الدكتور .. اتلفت عليها وقال مافي شي اطمني يا عمري بس هم عاوزين يعملو ليك أشعه وتحاليل عشان يطمنو بس ما اكتر من كدا وكان بحاول يطمنها وهو محتاج اصلا لي البطمنو .... بس ساره عرفت انه في حاجه بس حبت تبقي عاديه عشان هي حاسه انه حسام مجرس اكتر منها رغم انه هو ما ظهر ليها بس هي عارفهو وجات الممرضه وساقتها ومشي حسام معاها وجهزوها وهو لبسو برضو عشان يدخل معاها ودخلو وعملو الاشعه وبعدها جات مارقه وهنا دخلوهم غرفه ورقدها وطلع بعد ما استأذن عشان يمشي يكلم امه ويرجع واول ما طلع انفجر بالبكاء كان خايف من البقولو ليهو الدكتور ومسح دموعه ومشي عشان يقابل الدكتور بعد ما اتصل بي امه ولمن وصل ليهو قال ليهو خير يا دكتور الاشعه فيها شنو ..... للأسف يا مستر حسام السرطان انتشر في الغدد اللمفاوية والطحال ... رجع لوراء واستند مع الحيطه وانهار الدنيا بقت سوداء قدّامه طلع وهو ما عارف يعمل شنو ولا يقول شنو بس لازم يكون قوي ويدعمها اكتر لانه دا الوقت ال هي محتاجه ليهو فيهو. قعد في الكرسي وخاتي يده في راْسه ومسافه وهو علي نفس الوضع لحد ما جاته امه تجري واول ما شافته مشت عليهو وهي دمعتها علي خدها البت لِسَّه صغيره كَر علي امي شفتي الحصل علي ليه يا امي اي حاجه بحبها بتروح مني ليه يا امي ليه .... استغفرالله يا ولدي استغفر ربك .... استغفرالله وحضنته عليهو وقعد يبكي وهو في حضن امه وولمن هدا شويه قام مشي دخل علي ساره اول ما شافته عرفت من وشه الكان ما مفسر .... ساره كيفك هسي ... انا الحمدلله يا خالتو ....وقَعَدت جنبها ومسكت يدها وحسام واقف بعيد ومنزل راْسه عاينت ليهو وقالت حسام حسام حسام .... اه حبيبي نعم ... تعال مالك واقف بعيد .... لالالالا ما واقف بعيد ولا شي بس وسكت ... بس
طيب شنو قال ليك الدكتور ... سكت ما رد ... قال اني ح أموت صاح ... لالالالا ما تقولي كدا بعد الشر عليك وجاء جاري عليها ومسك يدها وقال ليها ان شاءالله يومي قبل يومك ... رفعت يدها وقفلت ليهو خشمه وقالت ليهو بعد الشر عليك يا حبيبي ... يلا يلا بطلي دلع وقومي انتي مافيك شي .... ههههه ياريت أقوم وأجري واعمل كل النفسي فيهو بس انا حاسه انا عضمي مكسر وحتي ما قادره امشي ... ليه حبيبتي انتي مَش هسي كنتي كويسه لمن كنّا في الكافتيريا .... ما عارفه والله بس لمن سبتني ومشيت واتاخرت علي كنت ناويه أجيك بس ما قدرت أقوم ... بعد الشر عليك يا عمري دا بس من تأثير الادويه البتاخديها .... يمكن برضو بس ما قلت لي الاشعه فيها شنو .... مافيها حاجه هو قال دا امر طبيعي لازم يعملو عشان يشوفو تتطور المرض والحمدلله لقو مافي اي شي انتي بس ارتاحي .... وفجاءه مسكت خشمها هو اتخلع عليها وقال ليها مالك حبيبتي حاسه بشنو .... ما عارفه حاسه باني عاوزه ارجع ... دا احساس طبيعي ... وجرا جاب السله بس ورجعت العصير الشربته كله وبعدها جات الممرضه أدتها علاجات ورقدت نامت بعدها من تأثير الادويه والام مشت البيت عشان تجيب شنطتها لساره عشان الغيارات وحسام قاعد قصادها ما سابها نهاي 
ومرت الأيام والحاله بقت تسوء اكتر وكل ما اَهلها يكلموها وما تقدر ترد يكتب حسام ليهم بالواتس ويقول ليهم انها كويسه بس الدكتور منع منها استخدام الأجهزه لانها ضاره مع العلاجات البتاخدها وكل يوم بمر وحسام معاها ما فارقها نهاي بدخلها الحمام بحميها وما بخلي ممرضه تدخل عليها عشان تساعدها وكان بتوجع كل ما يلقي شعرها نازل في المخده ودمعته ما وقفت نهاي 
وفي يوم كالعاده دخلها الحمام ولبسها وجاء رقدها ولبسها طاقيه وهي بس تبتسم ليهو وكل ما كان المرض ينهش في جسمها كل ما كانت ابتسامتها بتكبر عشان ما تحسس حسام بوجعها وكانت تتقلب علي الجهه التانيه من السرير وتعضي علي المخده من كتر الالم وفي نفس اليوم دا اشتد عليها شديد لدرجه بقت تغيب عن الوعي احيانا وترجع حسام بقي قلبه ما مطمن وهو شايفها كدا مشي للدكتور عشان يسأله ليه العلاج ما جايب نتيجه نسي انه دكتور بس كان متزكر ساره والالم البتشعر بيهو
مستحيل يا دكتور مستحيل .... للاسف المرض رجع بقوه وهاجمها بشده ومسك الكبد والغدد اللمفاوية وفي رأي العلمي ما هي الا مسأله ايام او ساعات .... ساعات او ايام ويفقدها لا مستحيل نزل عليهو الكلام زي القنبله وما قدر يستحمل وقع حسام من طوله المره دي في كل مره كان بتشجع وبقول ح تعدي زي ما عدت المره الفاتت بس المره دي رجع هاجمها بطريقه شرسه وعلي طول تم إسعافه ولقو الضغط مرتفع جدا حاولو يظبطو ليهو الضغط ومر اليوم كله وهو راقد واول ما حس انه قادر يقيف علي حيله مشي ليها لقاها ممده طويل في السرير وشبه ما ظاهره من السرير من الضعف والهزل ووصل وزنها لي ٣٣ وشعرها كله انتهي الا كم شعره بالأطراف ملامحها اتغيرت مشي عليها ووقف جنبها حست بيهو وفتحت خشمها بالقوه وقالت حسام انت جيت يا حبيبي ... ايوه يا عمري انا جنبك اطلبي تدللي بس نفسك في شنو .... اه يا عمري نفسي اشوف امي امي وسكتت وغابت عن الوعي تاني .... اتلفتت عليهو الام وقالت ليهو قال ليك شنو الدكتور .... عض علي شفايفه وقال ليها مسأله وقت يا امي ... لا حولا ولا قوه الا بالله خلاص سفرها يا ولدي تشوف امها سفرها طالما مافي امل و وبقت تبكي .... نزلت دمعته زي الجمر علي خده طلع ومشي للدكتور وكلمه بانه يسفرها للسودان ... وافق الدكتور وفعلا طلع منه وقطع تزاكر ليهم عن طريق الانترنت علي اول رحله والسفر كان بعد اربعه ساعات مشي كلم امه وطوالي مشت جهزت شنط ساره وشنطتها وشنطه ولدها ومشت علي المستشفي واتصلت علي حسام عشان ينزل فقال ليها انه ح يمشي بالإسعاف لحد المطار وطلب منها انها تمشي قبله عشان تعمل الإجراءات حقت المغادرة وتنتظره و اتحركت الام بعد ما اتصلت علي احمد تكلمه بسفرها وعشان يجيها المطار وفعلا احمد دور عربيته ومشي .... واتصلت هدي علي نزار وأخوها وكلمتهم انه يجيبو اهل ساره المطار لانه مافي وقت دخلها حسام الحمام وبعدها لبسها ولف ليها راسها بالطرحه وونزل تحت ولبسها جزمتها وقام قعد جنبها منتظر يجو ياخدوها وهي في كتفه قالت بصوت تعبان نحنا ماشين وين .... ح نمشي عند ماما محاسن ... بالجد يا حسام ... اي حبيبتي انتي مَش طلبتي انك تشوفيها اه انا ح أوديك ليها .... يااااا الله لك الحمد والشكر بس تفتكر يا حسام ح أشوفها ... وهو دموعه نازله وبقول ليها ح تشوفيها ان شاءالله انتي بس قولي يارب ... يارب يارب يارب يارب .... وهو ببكي وهنا جات شرين ووسام يزورها كالعاده كل يوم والتأني كانو بجو عليها واول ما شافوهم كدا جرت عليها شرين ودموعها نازله ساره ساره فتحت عيونها وهي لِسَّه مسنوده علي كتف حسام وقالت شريييين انا ماشه عند امي وكنت خايفه ما الحق اشوفك الحمدلله انك جيتي .... الحمدلله الحمدلله وان شاءالله تصلي بالسلامه وتشوفيها ... ادعي لي الحق أشوفها لي اخر مره وسام ما قدر يسمع انينيها وهي بتتكلم كدا طلع علي طول وقف برا ... وبقي يدعي ليها من جوا قلبو .... وهنا جاء طاقم من الأطباء ومعاهم مساعدين واشرفو علي حالتها وهم بنقلوها وركبت الإسعاف معاها حسام ووسام وشرين لحقاهم بعربيتهم واول ما وصلو المطار طوالي دخلو ولقو الام واقفه ومعاها احمد ومشي عليهو احمد وبقي يدعي ليهو وودعتهم شرين ووسام واحمد وركبو الطياره ومشو 
والوقت كله هو مرقدها في حضنه زي الإبو الحاضن بته 
😭😭😭😭😭😭😭😭😭😭😭😭😭😭😭😭
امي اتصبري مالك شفقانه كدا خلاص الطياره قربت تجي .... خالد جيب الجماعه وتعالو ح نتظرها عند الطياره برا .... ليه ما ننتظرها هنا هم لمن ينزلو بجو طالعين براهم .... بس المره دي صعبه .... في شنو يا نزار جيتك لينا كدا فجاءه وإصرارك علي الكل يجي المطار دا فيهو أنا ... نزل راْسه لتحت وقال ليهو بصراحه خالتي اتصلت علي وطلبت مني كدا ... ليه في شنو ساره حصل ليها شنو بالضبط .... والله ما عارف أقول ليك شنو ...نزار قول البتعرفو ساره ماتت ... لا بس الدكاتره قالو ماهي الا مسأله ساعات دا علي حسب كلام خالتي .... خالد اختل توازنه وقرب يقع .... شعرت سماح الكانت بتراقب فيهم من بعيد وهي قاعده مع امها وحبوبتها قامت مشت عليهم ولمن وصلت ليهم وشافت حاله خالد بقت تقول في شنو يا خالد
ماله يا نزار اخوي
مالك يا خالد في شنو ... ساره يا سماح ساره .... مالها ساره ... ساره بتموت بتموت ...اسكت اخرص ولا كلمه اختي كويسه هي بس تعبانه شويه وحسام قال انها ممنوعة من الكلام في التلفون وكل يوم بكلمنا ولا كان بكدب علينا واحد يرد علي هو يا خالد مَش البكون بتعالج بالإشعاع ولا شنو ما بعرف ما بخلو يتكلم بالجوالات عشان بتأذي ولا شنو يا نزار وهنا يسمعو عن وصول الرحله الفيها ساره سأبتهم وجرت لي امها وبتقول ساره جات جات جات يا امي يلا وهنا لحقهم نزار وطلب منهم يمشو برا يشوفوها ويستقبلوها قدام الطياره ... وقامو معاه وخالد وشه لا يفسر والآم تعاين لي بتها شويه ولي ولدها شويه .... انت يا خالد مالك انت وسماح في شنو انتو في حاجه حصلت لاختكم ... اه لا يا امي بس في حاجه دخلت في عيني وبقي يدعك في عيونه ما إطمنت محاسن بس سكتت وعاينت لسماح بس سماح عشان ما تسالها مشت بسرعه لي برا مع نزار .... الحمدلله يا روحي وصلنا وح تشوفي امّك ... ابتسمت وقالت ليهو الحمدلله وكان الإسعاف واقف برا نزار محضرو وهنا يتفتح باب الطياره ويرفض حسام اي مساعده ويشيلها ويمشي بيها 
سجمي يا امي الإسعاف دا لمنو ... يابتي يمكن في زول عيان ولا حاجه ولا وحده بتولد .... الله يستر الله يستر .... حسي بيها بترجف شديد .... مالك يا روحي مالك اه وصلنا باب الطياره واول ما نزل علي اول سلمه عاين ليها وقال شوفي امّك وسماح وخالد والمفاجاه المحضرها ليك شوفيها حبوبه منتظراك ... ما قادره اشوف من بعيد يلا نزلني ... ... ديلك حسام وساره ماله شايلها كدا بتي فيها حاجه ولا شنو ما تتكلمو الكل ساكت ... يمكن يا بتي ساره حامل وحسام بدلع فيها وما عاوزها تتعب اصبري كدا شويه .... ونزل بيها واول ما بقي فاضل كم سلمه نفسها قام شديد وقالت بصوت متقطع ضمني ع ع ع ع عليك شددددديد ما ح الحق أشوفهم عاوزه اموت وانا في حضنك حضنها شديد وبقي يقول ليها ح تلحقي حبيبتي وحسي بدمعتها نازله وهو بس يبكي و بقت ترجف وفجاءه وقف الرجف .... ساره ساره ساره ساره ردي علي رجعها عليهو بس كانت ساره فارقت الحياه
ساره تموتي ساره ردي علي بطلي الهزار دا ردي علي ياخي ... انتو ليه حسام وقف ليه وقف ببتي .... وجرت محاسن وراها خالد وسماح ولمن وصلو كان حسام نزل ووهو شايلها وهي يدها نازله اول ما وقفت محاسن قدام بتها وشافت دموع حسام غمضت عيونها شديد ما عايزه تشوف صغيرتها واخر عنقودها كدا وسماح بقت تكلمها ساره ساره انا سماح انا اختك عاينت لحسام وقالت ليهو هي نايمه صاح جات ام حسام من وراه وهي بتبكي .... الام مغمضه عيونها لِسَّه ما عاوزه تشوف بقت تقول انا في كابوس صاح اي دا حلم فتحت عيونها ولقتها كأنها نايمه حسام برك علي رجوله وهو ببكي .... سماح بقت تصرخ عليهو وتقول رد علي اختي نايمه صاح وهنا صرخ بي اعلي صوت ويقول ويقول ساره ماااااااتت مااااااتت وهنا الام بقت تصرخ وتخبط في نفسها والحبوبه تكورك واترمت في الارض وبقت تتدردق والنَّاس أتلمو فيهم وحسام في الارض وهي في حضنه وخالد ماسك امه وحاضنها وحاضن سماح وبصرخو وببكو والام فكت شعرها وبقت تقطع فيهو وجو الرجال وبقو يقولو لا اله الا الله يا جماعه اكرام الميت دفنه وعاوزين يشيلوها وهو بكورك ويحضنها عليهو اكتر ويقول ابعدو مني ابعدو مافي زول ح يشيلها من حضني هي مكانها هنا في قلبي مستحيل ازحها مني ... يا زول استغفر الله لازم تسيبها عشان اكرام الميت دفنه ... خلاص ادفنوني معاها ايوه انا ما بقدر اعيش من غيرها انا وعدتها اني ما ح اسيبها نهاي نهاي وجاء خاله طائر بس وصل متاخر ويلقاهم ويلقي الخبر وبقي قاعد لي ولد اخته في الارض يقنعو انه البعمل فيهو دا حرام ... والام تتكلم معاه بس هو كل ما جو ياخدوها بحضنها اكتر كان نفسه يدخلها بيت ضلوعه ما عاوز يخلي زول يمسكها وهو وعدها بانه ح تكون في قلبه وبين ضلوعه