#الجزء_28
احم احم ربيع واش مباغيش تنتاقم هنا عرفت بلي هاد السيد مسول عليا بقيت غي ساكت قالي جاوب واش مباغيش تنتاقم ، لاش باغي توصل أ الحاج ، بغيت نرد منك راجل نيت من النهار اللول ليك هنا و نتا باينا فيك دكي بزاف و صحيح زكرياء البوص ديال الحبس فرشختيه و بينتي أنك واحد مكاينساش الخير نهار عتقتيني من دوك الجوج كتفكرني براصي من كنت صغير أ ربيع و بسباب هادشي كامل قتليهم يجمعو ليا الخبار ديالك و عرفت بلي راك باغي تنتاقم من عمك بسباب داكشي ل دار ليك فالصغر و عاد هو سبابك فالحبس . بشوية بشوية بديت كنرطاب قتليه أش المطلوب مني أ أسامة جيني من اللخر و هو يجاوبني و لكن ف نفس الوقت خلاني ضارني راصي ، ربيع مغتكملش 10 سنين كاملة هنا غتبقا غي 3 سنين و غتمشي فين غتكبر و تربي الريش و موراها غنجي عندك تماك ، سولتو فين قالي مزال الوقت من تجي اللحضة غنقوليك و فهاد 3 سنين غنعلمك بزاف ديال الحوايح ل غتحتاجهم و دابا فكر مزيان عاد جاوب غندخل ندوش و من نخرج نبغي الجاواب ديالك أه أو لا . و خرج . ديك المدة كاملة و أنا كنخمم العرض ديالو زوين 3 حسن من 10 و لكن معارفش فين غنمشي و لا شنو المهمة ديالي و معارفش شكون هاد خونا واش قتال و لا مافيوزي و لا شنو حرت بزاف معرفتش شنو ندير و لا باش غنجاوب ها هو خرج عندي قالي ربيع شنو بان ليك بقيت ساكت واحد المدة و ختاريت أه حنت هو الأمال ديالي الوحيد باش نخرج من هنا و خا غادي لعالم مجهول ، الحاج فرح بزاف و هنا غتبدا قصة خرا طول هاد 3 سنين تعلمت من الحاج بلي الإنتقام ماشي هو القتل الإنتقام هو تجرح العدو ديالك و تخليه حي و كيتعدب علمني بلي نقطة الضعف ديالنا حنا الرجالا هي الفتاتش و لا بغيتي توصل لداكشي لبغيتيه قصح قلبك من جيهتهم تعلمت منو بلي منبقاش نتيق فشي واحد كما كان نوعو علمني كفاش نقرا الواحد من عينيه و نعرفو باغي يغضرني علمني بزااااااف ، و شديت الإنجليزية حنت قالي غتحتاجها ، فالحبس و لا كلشي كايحتارمني حنت عرفوني دراع الحاج ليمنا طول هاد المدة و أنا معاه بلا منعرف قصتو و لكن اليوم كنشوف ف وجهو بان لي مبدل كنا فالدار ديالو أنا كنتفرج و هو داوي مع شي حد فالسكايب قاليه صافي ربيع راه واجد واش وجدتو ليه الوريقات ، غدا غيوصلو أه صافي . عيط ليا ولدي ربيع أجي جا الوقت فين خصك تعرف لاش كنت كنوجد فيك هاد المدة كاملة . -ربيع ختاريتك باش تكون نائب عليا ف روسيا غنوكلك على كاع الشركات ديالي تماك -هادشي هانيا، الشركات ديالاش -صناعة ديال الحديد - وايلي البحر ديالي هادا -هادشي راه هانيا ، عندي أكبر شركات ديال الصناعة ف روسيا و المافيا ل تماك بغاوني نخدم معاهم باش يوليو يهربو الغبرة بالطونوبيلات ل كنصوب و أنا مقبلتش ، و راهم قتلو ليا مرتي و وولدي داكشي لاش هربت هنا ، و قبل منهرب وقفت جميع الحسابات ديالي بمعنا جمدتها و الشركات وقفو على الخدمة يعني ضريت بالمصلحة ديال المافيا و وليت مستهدف و داكشي لاش حاولو يقتلوني هنا ، دابا نتا غتمشي تماك و غتحاول دير غسيل أموال ل كاع الممتلكات ديالي و تحولهم ليا هنا راني درتك وكيل ديالي كاع داكشي لكنملك نتا ل تصرف فيه ، أه و نسا سمية ربيع حنت فبلادك غتولي بالنسبة ليهم ميت و سميتك الجديدة غتلقاها فالباسبور ل غاتاخدو . روسيا مغامرة جديدة و ربيع غيمشي لبلاد عمرو عرف عليها شي حاجة ، مورا سيمانة دارو الإجراءات باش نخرج جا عندي الحاج و قالي عندك شهر باش تقدي هاد الغراض و حاول تخدم بالسكات تحد مخصو يسيق الخبار و لا غتعرض راسك للخاطار و ديك المافيا خايبة بزاف دابا غتمشي لكازا و عطاني واحد الورقة فيها العنوان ديال السيد ل غيعطيني الباسبور و لاكارط ديالي الجديدة ، تعانقنا و بداو المخازنية غادين بيا جيهت الباب ديال الحبس الله الحرية زينة ، مشيت ديريكت للمحطة شديت الكار ديال كازا غي وصلت شديت طاكسي داني للعنوان لعطاني أسامة هادا راجل كبير شويا ، سلام سلام ربيع هادا أه دخلني للفيلا ديالو و مشينا للبيرو جبد ليا الباسبور و لاكارط و الڤيزا ديالي ، السمية الجديدة ديالي هي يوسف (ههههه باراكا عليه من الخلعة) قالي الصباح غنمشيو للماطار باش تقلع. فموسكو غتلاقا السيد ل داير فيه الحاج التيقة ديالو و غيكون هو إيدك ليمنا تماك داكشي ل كان دوزت الليلة عندو الصباح وصلني للماطار كنت خايف نحصل مي داز كلشي على خير طلعت للطيارة و غي وصلت كنت عارف بلي هادشي مغايكونش ساهل ...يتبع
======================================
