#الجزء_التامن
مشيت حدا البحر و بديت كنبكي و طفيت التيليفون باش مايصدعني حد، الواليدة مسكينة طيحات من قيمتها و مشات طلبات عليا داك الديب باش مندخلش للحبس ، تفو محملتش راصي و معنديش الوجه ليشوف فيها، دموعي و تقول واش بغاو ينشفو ل داز من حدايا كايبقا يشوف ، ماشي كل نهار غتشوف واحد طول و عرض و ارتفاع كايبكي و لكن ملي يبكي الراجل عرف بلي داكشي فات القياس. جبدت التيليفون شعلتو باش نشوف الساعة لقيتها وصلات 12 ، شفت لي زابيل الواليدة 24 خالي 12 ، ميساج فيه أنا السيمو ها نمرتي راه خديت نمرتك من عند مك ، جاوبتو أوك غنقيدها . من تفشيت عاد بديت محرك للدار وصلت ملقيتش مي سولت حفصة قاتلي راه مشات للمارشي، دخلت لبيتي و تكيت دخلات حفصة تكات حدايا عنقاتني و بدات كتبكي كنسولها مالك مكتجوبش غي البكا و التنخسيس مسحت ليها دموعها و قلت ليها مالك قاتلي عافاك أ ربيع متبقاش تخلينا بوحدنا راه ملي تعطلتي سحابتك متي حتا نتا ، متبقاش تعاود هادشي شوكاتني الصرحة عنقتها و قلت ليها وخا و جبدت 10 دراهم قلت ليها سيري شري ليك شي حاجة و سدي عليا الباب . أنا بغيت غي نعس و لكن مقديتش بقيت كنخمم شنو ل ناقصني و مخليني محكور فهاد البلاد و بلا ما نفكر بزاف عرفت شنو ، الفلوس وسخ الدنيا فهاد البلاد شحال مكان عندك فجيبك شحال مكتسوا ولا بقيت فهاد الحرفة مغندير والو و غنبقا ديما محكور ، بديت كنفكر فطريق الحرام و درت مع راصي ل جاني شي بلان فيه اللعاقة منزكلوش كما كان ، ها الواليدة دخلات ربيع ولدي نوض عندي عنقاتني و جهدات عليا و بدات كتبكي و أنا كنبوس ليها ف راصها و أيديها و كنقول ليها سمحي ليا أ ميمتي مرتك معايا ، مسحت ليها دموعها و قلت ليها من هنا القدام غتعيشي مزيان أ ميمتي كنواعدك. وجدات الغدا قصيت بغيت ندوش و نحيد هاد الوسخ مي مع الخياطة خصني نصبر سيمانة ، غسلت غي راصي و حسنت اللحية حنت غوفلت بزاف. و هبطت للمحال وخا معطوب طرف الخبز صعيب بزاف. دازت 2 سيمانات على هادشي وليت غي الخدمة و الدار مبقيتش كنخرج بزاف باش منضاربش و لا نتلاقا مع عمر تاني . ليوم ماشي نهار عادي ليوم 14/3 و بحال هاد النهار هادي 6 سنين مات الواليد ،سمعت الواليدة فايقة مع الفجر صلات و من سلات بدات كتبكي ، أنا تفكرت نهار موتو و طار عليا النعاس تخيلت كون مماتش عبد الرحيم (الواليد) كون دابا راني بحالي بحال الدراري لوخرين ، كنقرا و هاد العام كان غيكون عندي الباك و لا نجحت نفرحو و نفرح ميمتي مي الوقت ل بغات ليا هاد التمرميد، بقيت فايق تال 7.30 عيطات عليا الواليدة ربيع نوض تفطر مشيت غسلت و جيت ريحت معاها هي عينيها حمرين بالبكا و مزال مأترة و لكن مباغاش تبين ليا ، كليت أنا و هي مقرباتش ليه بديت خارج و هي تغوت ليا ربييييع تلفت عندها قاتلي الله إحل عليك بيبان الخير ، الله على دعوة ف هاد الصباح النهار غادي مع الخدمة و صلات 12 ها خالي دخل ربيع ، نعام المعلم، هز الدوزان ل غايخصك و غتمشي عند مولات التوارك للڤيلا ديالها راه صبحات ساكتة ليهم اليوم ، جمعت الدوزان و خديت من عندو العنوان ، مشيت حدا صوبريجا باش نشد طاكسي ، شيرت و قف واحد خونا قلت ليه الڤيلات ديال أسيما صافي بدينا غادين كنطلب باش ريم متكونش ما حاملش نتلاقا معاها هانا وصلت هههه مول الطاكسي تا هو ضاربت معاه بغا يحسب ليا 10 دراهم و أنا حلفت بلي غيدي غي 8 و نيت داها غي هي ، صونيت فالأنطيرفون وي مدام ربيع هادا ، وخا هاما جايين يحلو عليك بقيت كنتسنا ها الباب كيتحل تفو ريم هادي...يتبع
