لعبة الكذب

الجزء 11

اترددتا ..

جات تقوي جمبي مسكتني من يدي و فتحت باب العربيه ، ركبناا ،، همست لي 

( في حاجات بنكون دايرنها شديد من جوة قلوبنا ، لكن ترددنا وخوفنا من خطوة وحدة وحدة بتخلينا نندم لقدام اننا م اتخذناها ،، عشان كدا للحظة وحدة خلي مشاعرك تسوقك ) ... سكت 

لان فعلا مترددة وكل شي ف حياتي بوزنو بي عقلي ،، اتحركنا و اصلو م اتكلم ،، م انكر الولد دا انا بحس بيهو مهموم رغم ابتسامته لكن كتوم ،، لدرجة في شيب في مقدمة رأسه ، بس مخليهو وسيم اكتر .. 

المهم ،، انا الكنت بعاين ليهو من المراية 

لمن وصلنا ،، كافتيريا م مكشوفه يعني زي مطعم ( بدون زكر اسامي ) ..

دخلنا اشر لينا علي طاولة ، قعدنا قدامه وكان بتكلم مع الجرسون وبسلم عليهو سلام معرفه ، او هو كدا شخص حبوب م عارفه بدخل في الناس بسرعه .. قعدنا انا وتقوي لمن جاا ..

قالينا ،، 

_ اسف اتأخرتا عليكم 

* لا عادي 

_ انا بمشي الطاوله الجمبكم دي 

_ لالا طاولة شنو خليكي انتي زولة اختنا والداير اقولو داا م حاجه بتندسا 

* خليكي ي تقوي في شنو ي بت 

_ طيب انا طلبت وجبة خفيفه كدا ناكل و بعداك نتكلم براحتنا 

*لالا اكل شنو دي بتهزر ساي 

_ وااي بلال انا قلتا كدا بس عشان اديكم فرصه تتكلمو والله كنت بهزر ياخ بالغتا

_ شنو انتو الاتنين عملتوهو موضوع ، انا جعان اكلو معاي 

* ههه طيب 

_خلاص اسمعو كلامي خلوني اقوم م بزح منكم شديد

*يا بت انتي مالك متحسسة كداا

_ طيب بمشي الحمام واجي

_ والله انتي شكلك مصرة ،، خشي من الباب داك ، و ما تتأخري 

_ طيب .. ( مشت )

_ ترااااااجي يا ترااجي ، خبرك ياخ 

* بخير والله حمدلله 

_ اها والشغا ماشي كيف

*مرتاحه والله وحابه شغلي دا شديد 

_ مجالك حلو ولايق علي شخصيتك زاتو

*وانت شغلك ماشي كيف ؟

_ والله يا تراجي ، الشغل دا انا كبيت فيهو دم قلبي ،، و المفروض اننا شركاء بس السغل كلو فوق راسي انا ،، المهم انسي اسي م وقتو 

* والله يا حليلك 

_ تراجي !

*نعم

_ انا #بحبك ، بحبك لدرجة انتي ما حتتخيلها 

*.............

_ عارفك م حتردي ، بس انا حاسي ان في حاجه جواكي لي ، 

والله لو قليله انا راضي بيها وحعمل المستحيل عشان تكوني لي 

* لا انا م حأسكت ، فعلاا انا مرت علي لحظات كنت بحاول استوعب مشاعري تجاهك م كنته قادرة افهما بالضبط،، بس ...

_ بس شنو ؟

* انا كمان #بحبك يا بلال 

_ اللهم لك الحمد والشكر ،،اقسم بالله انا ما زي الاولاد البتسلو بالبنات و ...الخ 

انا بشتريمي بنور عيوني ، بس كل الطالبو منك تلاتة شهور ، واصل بيتكم ،، و بالاضافه لكداار في حاجة مهمه عني لازم تعرفيها و ما عارف اذا حتأثر علي حبك لي ولا ........

( قاطعني اتصال من امي ، و ف نفس اللحطو جات تقوي ) .... رديت 

*ايوة يا امي

_ ايوووة يا تراجي انتي وين ( بقوت عالي ونفس قايم )

*انا في مشوار معاي تقوي 

_حصليني ، يا بتي تعالي 

*بسم الله يا امي طيب وريني في شنو انا اعصابي باظت مالك بتبكي

_ ووووواي يا تراااجي ووووااي ووووااي من ناري ،

وااااااااي ،،،

*يا امي استهدي بالله في شنو 

م حسيت الا بدموعي دي نازله زي النار في خدي و ما كنت عارفه ان الدمعه دي حتجر وراها دمووووع و وجع ......

يتبع ....