لعبة الكذب

الجزء 07

اها واطاتنا اصبحت بس ما عارفه اذا علي خير ولالا ...

طبعا متعودين زي ما وريتكم انا وابوي بنشرب الشاي سوااا ،، اليوم دا لقيت امي و معز وابوي والشاي جاهز ،، طلعت صبحت عليهم بعد خلصتا اموري ..

قعدت شربتا ، وكانت الساعه 9 استغربت قلت لامي انتي ما مشه المدرسه ، و ابوي م عوايدك تقعد للزمن داا ،،

و معز مالكم انتو الليله ؟؟

ابوي قالي شربتي ؟

قلت ليهو ايوة حمدلله , ( بصراحه اتوترتا)

قالي طيب اسمعيني للاخر ... قلت لبهو جداً يا ابو ي ( ف اللحظة دي تقوي جات صبحت و قعدت امي كبت ليها شاي ) ..

قلت لابوي اتفضل سامعاك ..

_قالي ، تتذكري المشكله الكلمتك عنها ؟؟

* ياتا مشكله يا ابوي

_بقصد مشكلتي انا بتاعت البضاعه

* اهااا ايوة ايوة

_طبعا انا طلعت بخسائر و مديون

*لاحول ولاقوة الا بالله

_و الزول الوحيد البقدر استلف منه مبلغ يسد حوجتي مؤقتاً لمن شغلي يستعدل و اسد المبلغ هو ، ود خالي ، اللي هو يعتبر عمك اب جلابيه سمنيه الكانو عندنا و طبعا ديك زوجتو ..

* قلت ليهو طيب يا ابوي دي حاجه كويسه شديد والله م اتخيلتا ان ف زول بقدر يساعدك كدا لله ف لله و كمان من اهلك و بمبلغ قدر دا ، والله كتر خيروو ( عاينت لامي) قلت ليها ، ان شاءالله يا امي نمشي ليهم تاني طوالي و نواصلهم ، والله انا ساي قلبي اباهم و حكمت عليهم كدا من غير ما اعاشرهم ، دي مشكلة البني آدم ، بياخد بالمظهر، لكن اوعدك ي ابوي نخاول نخصص يوم الجمعه دا للاهل و بأذن الله رجلنا ما بتقطع منهم ....

( للحظة حسيت الجو صاني و انا الوحيدة البتكلم براي و ساكتين سكوت غريب )

قلت ليهم ، ممم ممم م مالكم انتو ( بتمتمة وتوتر ، جد اتوترتا منهم ، مفروض يكونو فرحانين ) ...

_ ابوي قالي انا ما تميت كلامي

*اسفه قاطعتك ، اتفضل

_ في البدايه انا فرحت زيك كداا ، ان الدنيا لسه بخير ، و رغم انه بقولو الاهل ما بيخدمو ، لكن زعلت من نفسي اني ظنيت كداا ، المهم ، في ليله اليوم الاصبح كان ظهرت ليكي فيهو الزايدة ، انا ود خالي دا دق لي تلفون ،، من شفت المكالمة م ارتحت ، بس قلتا بكون داير يعتزر انه ما حيقدر يديني المبلغ الطلبتو منه ، المهم رديت اتفاجات قال داير يسجل لينا زيارة

*قلت ليهو ايوة فعلا معتمر وقت كان سايقني للشغل كلمني ان نصرالدين قال اظن ولدو كلمو انهم جايننا ، وبسبب الحصل لي ما جو

_قالي بالضبط كداا انتي كدا اختصرتي علي شديد

* اهاااا

_ جاني من يومين ف المحل ، و قالي انه ...

*هااا

_ قال داير يعرسك لي ولدو

اقسم بالله انا لمن قمته ناطة ، قلت لابوي يعني مامن غير مقابل ،، دا المقابل عشان يديك القروش ، يعرسني لي ولدوو ،،

قالي هو ما قال كداا ،، قلت ليه بس الحصل بيدل علي كداا ، اسي يا ابوي جرب ترفض قوليهو بتي ما موافقه ، شوف ردة فعلوو

انا متأكدة حيجي بعد يومين و يقوليك والله قروشي حاليا م متوفره ، ولا يومين شنوو

دا حيقولها ليك في لحظتاا ....

قعدت ، وقلت ليهو شوف يا ابوي ، انحنا كلنا بشغلنا حمدلله و مرتباتنا معقوله ، و عندنا بيت جدي ف الجزيرة ، و الله لا يحوجنا لي زول ، انا مستعده اشتغل الورديتين في الصيدليه ،

و اخواني كمان ما بيقصرووو ...

قالي : فيها شنو لو انتي وافقتي ؟؟

يتبع .....