لعبة الكذب

الجزء 13

علي قعدة وحدة ،، لمن الشمس دي شرقت علينا ،، بس منتظرين يقولو لينا فتح 

جات الساعه 10 شفنا عمي دا داخل علينا و معاهو ولدين واحد سمعت معمر اخوي سلم عليهو سلام حار عرفتو دا ( نصرالدين) انما التاني دا بارد كداا راسو م رفعو فينا زي الحا وصلهم ونزل ، لكن هيئتو م غريبه علي ، واظن ياهو زاتو الآقانا انا وامي مارقين من بيتهم وسلام م رفعو فينا ... اها هو فات 

، يلا عمي دا مسك معز علي جمب وسوس معاهو قريب النص ساعه .. بعدها طلع ورقه وقلم و معز وقع اظن لي فيهاا ..

بعدها اتونسوو ، لمن جات 12 ظهر ،، الدكتور قال ابوي فتح ، وحات الله من الفرح لمن بركتا في الواطه بقيت ابكي ،، ابيت اخش اشوفو بالجد ما حتحمل منظرو ما بقدر والله

.... 

عمي دا واقف من بعيد بعاين فيني بنظرة وحات الله انا كان مت و انبعثت للحياة دي تاني ف زمن تاتي ، م ظنيت انسا نظرة عمي دي ... 

ف اللحظة دي اتصل بي بلال ، واتاري هو شايل الليل دا كلو اتصال وانا ما جايبه خبر ،، طبعا ارد دي صعبه شديد ،، كتبت ليهو رساله ورجعت التلفون مكانه ،، جاتني تقوي فرحانه قالت لي حمدلله ربنا استجاب لينا ، ابوي بقا بخير ( والله بتنادي ابوي ، بي ابوي )..ّ

بالجد قالو في محنتك و انكسارك وحاجاتك ، بتعرف حقيقه الناس ، بشوف فيها اختي النا لقيتا والله ،،

قعدت اقوليها حمدلله ، حمدلله ورفعنا يدينا لربنا و بقينا نشكر فيهو ونردد حمدلله وشكراً ليك يا ربنا شكررررر ...

جا علينا معمر ، قالينا بعد دا اطمنتو علي الحاج ، معز قالي اوصلكم وامي معاكم ، قلت ليهو حاج في عينك انت عارفو ما بيحب كلمة حاج دي ، قوليهو ابوي ياخ ،، قالي طيب ابوي ،، قومو يلااا ... 

تقوي قالت لي خشي شوفي ابوكي ، قوي قلبك طمني قلبك عشان تمشي وانتي مرتاحه .. فعلا خشيت ،، من بعيد بس بعاين كل م اقرب دموعي بتغلبني وتنزل غصب عني ،، ناس امي واقفين زاتهم من بعيد لانها غرفه انعاش ،، بقيت بأشر ليهو من بعيد ،، 

بعدها طلعناا ، من الغرفه ..

و معز قال الا نمشي ،، المهم ،، نازلين لمن وصلنا حوش المستشفي ،، الا عيني تقع علي بلال من بعيد قاعد و متمحن بي ملابسو الامس ،، اصلي م قدرت اقنع روحي انه كان قاعد كل الوقت دا هناا ومبيت معانا ..

مسكت يد تقوي ضغطتا عليها .. لمن عاينت ليهو ،، وهو شافنل ، اشرت ليهو علي التلفون ،، لمن طلعنا برا المستشفي و ركبنا العربيه 

طلعت تلفوني ،، لقيتو طافي شحن ...

هنا غلبني التصرف م عندي خل الا انتظر لمن نوصل البيت ..

ساكتين بس و ندعي ربنا يتمم شفاء ابونا علي خير ... 

وصلنا البيت اول حاجه عملتها ، ختيت تلفوني ف الشاحن ، و دخلنا استحمينا وغيرنا ، و جهزت لي اكل خفيف ، ( تونة ، بيص ، جبنه، شعيريه ..الخ ) . .. و الله من غير نفس بس اللهم حاجه لازم تدخل البطن ..

قمت خليتهم بياكلو ،، مشيت علي التلفون 

جاتني رساله انه خالد اتصل علي ،، و بلال كمية مكالمات ورسايل ما تتعداااا .. انا من بعد شفتو قاعد بمنظرو دا والله حبي ليهو بقا اضعاف، لحد اخر لحظة كنت بقول انه مجرد اعجاب ولا حب خفيف ،

لكن بالجد انا اتاكدت اني بحبو دي قليله شديد بالنسبه لاحساسي بيهو ....

رجعت لخالد اول حاجه ،، كل كلامه كان عن الشغل ،واني م جيت ،، اعتزرتا ليهو و وزيتو ظروفي ( رغم انه وجودي بقا ما مطمني في الصيدليه دي ) .. قلت اصبر عشان لقدر اساعد ابوي ... بعده

رجعت لي بلال .... مكالمة 

* بلال

_اطمني كل شي بخير 

*قصدك ابوي

_وضعك عامتاً يا تراجي انا جمبك قبل تحتاجي لي وتناديني حتلقيني سبقتك وجيت

*انت بايت من امس ؟

_ليه مفروض كان ارجع بيتنا بقلب بارد !!

* م بقصد بس تعب عليك

_عمري كله نايم ، وابوكي ابوي ، كان علي اشيل من عافيتي واديهو يا تراجي

*الله م يحرمني منك

_ولا يحرمني منك ي رب 

_يلا ي قلبي ، م عايزك تفكري في شي ، نوووومي عشان ابوي محتاج ليكم

*حاضر وانت كمان تنوم 

_اصلا ماشي علي البيت قربتا اصل 

*خلاص خلي بالك عليك انا تلفوني دا لسه م شحن كويس ، حقفلو واخلي يشحن عشان لمن امشي المستشفي اقدر اواصلك 

_خلاص يلا حبي ، لا اله الا الله 

*سيدنا محمد رسول الله ....

يتبع .....