لعبة الكذب

الجزء 04

بقا يقول لي تراجي بسم الله في شنو اسي كنتي كويسه ، بسم الله كدي فتحي عيونك ديل ، في شنو بطنك ولا جمبك ، بقوليهو بس سوق سرعه رجعني البيت ، ببكي بدموعي ،

مسكين بقا متلخبط و جايط شديد ..

ساقني ، و م نزلني من العربيه ، دخل جوة بنادي في ناس البيت ، جا معز و ابوي جارين مخلوعين ، في شنو البت مالها ، قاليهم بس فجاه بقت تصرخ و بتقولي رجعني البيت بطنها ولا جمبتها ما عارف ، ابوي قاليهو طيب كان توديها اقرب مستشفى ليك و تتصل بينا كان كسبت زمن ، بس جا معز ركب العربيه اتزكر حفيان والله و ابوي دا بالعراقي حقو بفتش في مركوبو ، وبقو جايطين شديد و معز يقوليهو استعجل يا ابوي ، بس لبس سفنجه وجا ركب ، و معز دور وابوي خاتي يدو في كتفي لانو قاعد ورا ، و معتمر مسين ييقول لي استغفري ،

بالجد انا م عارفه المسكني شنو ولا الدخل فيني دا شنو ،، اها جاي جاي ، وصلنا مستشفي ، دخلوني في قسم الطوارئ و ريحة المستشفي دي قلبت لي بطني اكتر بقو علي الم و طمام ، و بعدها م متذكرة اي شي ، بس اللهم مرقدة في السرير و امي دي جات متين ما بعرف ، بس فتحت كداا حاسه بحمة والم ما عادي ،، قلت ليهم حصل شنو وليه الوجع دا ما فات مني ،، ابوي جاا علي قالي دي زايده ، و محتاجه عمليه ،،

المفروض ارفض واكورك واخاف بس من الالم الجواي قلت ليهو يا ابوي طيب متين حيعملوها لي استعجلهم ، قالي ادوكي مسكن م عمل حاجه ، قلت ليهو لا بس خليهم يجو يعملوها يريحوني ، مساككين امي دي تقول لي يا ريت لو اقدر اشيلو منك واختو فيني وجعك دااا ،، معز قاليهو يمة قولي بسم الله المؤمن مصاب ، ادعي ليها بس حمدلله طلعت زايدة و ربنا يعافيها ،،،

ف اليوم دا بالضبط الساعه 9:00 انا دخلوني العمليات ، لمن طلعوني لحد تاني يوم الظهر انا ما واعيه ، لمن فتحت ، شوية قدرت اشم نفسي ، وبالجد حمدلله علي نعمة الاهل ، انا اخواني الاربعه فوق راسي وامي وابوي ما فارقوني لحظة مدة اليومين في المستشفي

،، طلعت بعد يومين ، تميت الباقي في البيت ، و معز يطلع يخش ابوي ، ابوي يطلع تخش امي ، امي تطلع يخش معمر ....وهكذاا

ما خلوني لمن بلغت الصحه حمدلله وشميت العافيه ، تقوي علي حضرتا ياداب فكرت تجيني بس كمان مسكينه بي عذرها ،، والمزعلني فوتا علي امي العرس كمان ... اها فقتا للدنيا ورجعت فتحت تلفوني ،، و لقيت رسايل من '' الشخص المنتظر'' ..

اليوم دا بالضبط كان لي اسبوع من بعد العمليه ،، لقيت رساله ،، السلام عليكم ، السلام عليكم ، السلام عليكم علي مدار تلاته ايام ، اخر شي مالك ما جيتي للبلوزة ،، رديت السلام ، قلت ليهو كنت مارة بظروف صحيه بتمني لو تكون احتفظت بيها ، انا برسل صحبتي تجي تشيلا ، رد لي طوالي ،، مالك فيكي شنو انتي كويسه ( بلهفه كدا ) ،، قلت ليهو انا بخير ، قالي كان بخير مالك ما حتجي مع صحبتك ؟ قلت ليهو م عارفه مسموح لي بحركة اسي ولالا ، قالي عندك شنو عليكي الله ؟ قلت ليهو كانت زايده حمدلله و شلناها ،، اتاثر كدا قالي ربنا يكتب سلامتك يا ريت لو بقدر ازورك ............ و من هنا

بلال بقا رفيق يومي ، رساله الصباح ، والمسا دي اساسي ، حتي لو ماف زول فينا نكدت ليهو موضوع ...

بعد تميت الاسبوعين ، امي جاتني قالت لي بعد دا تقدري تطلعي غيري جو من البيت دا شويه، قومي اللبسي نمش نبارك للناس ديل اتلومت معاهم انا ،، قلت ليها حاضر ( م حبيت ارفض لانو بي سببي ما مشت ليهم )

فعلا لبسنا ، و طلعنا مع ابوي ، ابوي الخالو م عاجبني من فترة طويله ، لكن بطمن روحي واقول لخير .....

وصلنا لناس عمي الاول مرة حلاقيهم (حتعرفو القصه لقدام ) ..

دخلنا و سلمنا ، في حبوبه ف السرير و جات مرة و جا ولد سلم و جات بنت و جا شافع ،، انا ما منكمشه ولا سطحيه بس م مرتاحه نفسيا كداا ..

اخدنا قعدتنا و احنا طالعين ف واحد داخل ، سلام زي الناس م وقف سلم ، قال سلام عليكم وهو ماشي اصلا م وقف ..

عاينت لامي و مشينا ، كان ابوي رسل منتقي اخوي جا رجعنا ،، من ما وصلت البيت ما غيرتا زاتو قعدت اتونس مع بلال ، قريب الصبح ، نمت ...

صحيت الصباح ، و اول يوم دوام بعد مرضي م كان في حاجه تزكر غير اني كنته سعيده بي يومي دا شديد ،، بس للاسف المنتظرني في البيت كانت كارثة ......

في ختام الجزء داا ،، حأعرفكم بي

انا ما بعرف اتكلم عن نفسي ، فاشلة جدا في الحاجه دي ، بس حأقوليكم الحاجات الظاهرة في حياة اي انسان كتعريف مختصر والباقي حأخلي الاحداث تتكفل بيهو ، اسمي تراجي محمد ادم الجعلي ، عمري 24 سنة ، درست الصيدله حمدلله وخلصتا ، والعمر بخلص و القرايه في المجال دا ما بتخلص ، شغاله في صيدليه معروفه في الخرطوم و مرتاحه في شغلي و مستحيل اتخلا عنو ( من صغيرة بعاني من مشكله ، و دي حتتكفل بيها الاحداث ) ،، امي مديرة مدرسه اساس ، و ابوي عندو محل اقمشة في مكان شبه راقي ، طبعاً اتعرفتو علي معز اخوي ، دا بكر امي و ابوي التاني ، و معمر بعده طوالي ، و منتقي ، بعد منتقي طوالي كانت في مروة لكن اتوفت ، يلا في خر

افه كدا او اعتقاد عند الحبوبات ان التغير في الحروف او التسميه بالايام بتطول من عمر المولود لان امي كانت بتسقط طوالي الحمل ما بيثبت مرات بعد الاربعين بموتو قبل السماية ،، يلا بعد وفاة مروة اختي ولدتني انا و شاترت في الحروف وسمتني تراجي و بعدي معتمر ،، يلا اخواني ديل كان قلت ليكم ما حتصدقو ، معز دا اسمو (سبت) و معمر (جمعه) و منتقي (خميس) ، و معتمر( برضو سبت) ،، دي الايام الاتولدو فيها ، امي لقبت كل واحد فيهم باليوم الاتولدو فيهو ، وبقا في لقب يعني معترف بيهو في اماكن الدراسه وبين الاهل والجيران والشغل وكداا ،، و سبحان الله بعد امي طبقت كلام حبوباتي ربنا تم حملها بي معز و الباقين ،، و انا عاكست في حرفي ،، حتي اسألو اهاليكم من الموضوع دا ممكن تكون خرافه ، لكن معتقد يعني خصوصا في الغرب ( احنا م غرابه بس كمعلومة ) ....

يلا وضعنا المادي حلو ، حتي اخواني محتجين في شغلي انه ليه انتي تشتغلي و كدا يعني .. بس لاني بنت وحيده فاا ماخدة حيز في قلوبهم و مدلعه ممكن يشاكلوني لكن بنفذو لي رغباتي ....

يتبع ........