لعبة الكذب

الجزء 01

قبال خمس شهور

_ هلااا تقوى

*هلا حبي ،

_ الخبر شنو ؟ّ

*حمدلله بس ياهو ضغط الشغل

_براكي هالكة روحك يا تراجي

* شنو يا زوله انتي متفقه مع امي علي الكلام داا ، نفس الاسطوانة ، المهم انا بحب ، لا لا بحب شنو ،، قصدي بعشق مهنتي دي يا تقوى ..

_هههه والله انتي مجنونة ،طيب يا ستي انا قاعده من الضهر منتظرة منك تلفون

*والله يا تقوى ما نسيتك لكن انتي عارفه الجمعه دي غسيل و نضافه و امس رجعت من الشغل زوولة نوم بس ، هلكانه و عيني مارقه

_ خلاص انتي خليكي ، وصفي لي المحل انا بمشي برااي

*لا طبعاً ، انا انتهيت ، حألبس و نتلاقا في العالي

_سمح العالي ياتو فيهم ؟

* انحنا بنتلاقا وين يا تقوى ، ياخ العالي القديم من جمبه بنركب اي مواصلات بتنزلنا جمب المول

_خلاص ، قدامك كم ؟

*اممممم ساعه و بمرق من بيتنا

_ خلاص يعني ساعه ونص

*خلاص عديله ،، يلا ...

_لحظة اسمعيني قبل تقفلي ، انتي عملتي شنو صحي في عرس نجلاء قريبتكم دي ولا اسمها منو هي

* ااي ياها نجلاء ، والله انا مالي مزاج امشي ، انتي عارفاني اهل ابوي ديل كان لقيتهم في الشارع ما بعرفهم ، وامي جايطة دايراني امشي لكن انا راسي والحجر وااحد

_اسمعي طيب ، اعملي حسابك تشتري ليكي لبسه تحضري بيها لانو خالتو ما بتخليكي تقعدي عشان ما تتورطي احسن ليكي تجهزي من اسي

* ما ناوية والله لكن علي قولك الاحتياط واجب ، يلا عشان الحق اللبس

* يلاا نتلاقاا..

[بعد ساعة]

_ماشة وين انتي

_ اجي ! مالك مع البت يا معز

_كيف مالي يا امي ! يعني اقعد في البيت دا زي رجل الكرسي ما اسألها اي سؤال !ّ

_ ي ولدي انا ما قلت ليك ما تسألها ، لكن كمان دا اليوم الوحيد في الاسبوع بتتنفس فيهو يعني ..

*خلي يا امي عادي بجاوب ليهو وكان قام وصلني زاتو بكون ما قصر معاي

_ماشة وين انتي ؟

*ماشه السوق مع تقوى صحبتي بتكون منتظراني في العالي القديم

_طيب خشي غيري ملابسك دي بعداك بوديكي و لا تفوتي مكان دايرة

* اسي ملابسي دي مالها !ّ

_شنو مالا عايني اسكيرتيكي دا لمن داير يتفتق في جسمك و كعوب رجولك ظاهرات ، خشي اللبسي ليك حاجه احسن من دي يا تراجي ..

*حاضر ... ( مشيت لبست لي عبايه مفتوحه فوق ملابسي و طلعت ليهو ، كدا رضا )

_ ايوة كدااا ، يلا بعد دا مع السلامة

*شنو دا !! لا انت تقوم توصلني و علي فكرة انت الاخرتني

_ اللهم لا اعتراض ، طيب يا ستي اتفضلي

* فللي ههههه

( صراحه انا بحب اخواني شديد و خصوصاً معز دا ،، ما تشوفو بهرشني كداا لكن هو حنون و طبعا الراجل طبعو غالبو ، م عارفه ليه ما بيحبو يظهر حنيتهم ومشاعرهم الحقيقيه و التعبير بالنسبه ليهم حاجه كداا تقيلة ، لكن يلا شنو ، انت واحساسك ، فاا بس يعني دايماً لسان البوح بكون تقيل يعني) ...

وصلنا ، و ما نزلتا لقيت تقوي يا حليلها مسكينه منتظراني ،، معز قالي كلمي صحبتك خليها تركب انا مدام وصلت هنا ، بوصلكم بالمرة ،، المهم اشرت ليها وجات علينا ، ركبت وراا ، وياهو اتحركناا علي مول( ال ....)

قالي : انتظركم ، تقوي قالت لي ااي ااي قولي ليهو ينتظر ،، قلت ليها انتي هبله ، دا سوق ولف يعني الله اعلم نخلص متين ، قالت لي خلاص لمن نقرب ننتهي كلمي يجي يرجعنا ، لانو انا المشوار بعيد علي .. اتفقنا علي كدا ..

[دخلنا المول ]

* والله يا تقوي ، انا ما قادرة استحضر المحل دا كان في ياتو دور بالضبط !!

_ امممم طيب خليكي من الدورر، عارفه موقعه تحديداً في الدور و شكل المحل كداا !

* ايوة طبعاً ، غايتو الا كان يكون جددوه ، ولا ضربو بوهية .. وبعدين ياخ انتي فتشي في المحلات دي يمكن تلقي زيها

_ترااجي مالك انتي اسي ، مش متفقين لينا شهر اني دايرة زيهاا ،

*ياخ انا بس قصدي نحل إشكال يعني بس

_كدي نشوف الدور و الفوقو ، لو م عرفتي نفتش في المحلات دي

* طيب ، بس م ظنيت هنا .....

_سمح اطلعاكي فوق

*يلا ......

* شوفي اعتقد هو دا المحل بس ضربو بوهية بس لو شفت الولد الباع لي حتذكرو

_ يلا طيب ...

* و دخلنا المحل ......

يتبع ......