لعبة الكذب

الجزء 20

ما عارفه لكن منظرهم كان بيوتر ، لكن بالنسبه لي اعصابي بقت في تلاجة ،، معز دخل معانا جواا البيت ،، تقوي قالت ليهو مالك انت وترتني ؟

قاليهاا ، انا اتصلت بعثمان اخوكي ، و تانياً كنتو وين انتو ؟؟ قالت ليهو .. نزلنا نتمشي شوية ومنها نشوف صيدليه لي توجا 

قالي مالا صيدليه مينا ؟ قلت ليهو الشغل عندها بقا عبارة عن بضاعه و تفريغ و ترتيب ، كدا ما بقيت صيدلانيه ، بقيت فراشه دا غير النضافه ، ومرتبي ما داير يزيدو لي ، واصلا لي فترة نا نزلتا اكيد بكونو جابو بديل ،، عندي معاهم راتب شهرين بس دايراك تستلمو لي .. قالي خلاس انا بشوف ليكي شغل ،،

تقوي قالت ليهو تم لي موضوع عثمان .. 

قاليها حنمشي ليهم في البيت ، ولازم الخلاف دا يتحل ،، فجاه كدا تقوي هاجت 

قالت ليهو انا ما بمشي البيت دا تاني كفايه معاناة ، لو اموت انا ما حمشي البيت دا واشوف مرتو دي في وشي ،

كافي العملتو فيني طول السنين الفاتو ديل و كنت بسكت و بتحمل و ما بتكلم لحد ما ربنا يفرجاا ،، كان للاعتذار هما ملزمبن يجو يعتزرو لي وخصوصا عثمان ، بدل يبقا لي عون ، بقا لي فرعون ... 

قاليها طيب روقي .. اسي انا راجل قدامك و اديت كلمة لاخوكي وبراهو الوضع م متحمل انحنا دايرين نحل خلاف عشان لقدام نقدر نتم عرسنا من غير مشاكل ،

والشي التاني انتي في عصمتي اسي ومرتي مافي زول بيقدر يعمل ليكي حاجة وانا جمبك ، فهمتي ،، و بعدين امك ( امي ) واختك ( انا ) و لو عايزة اي واحد من اخوامك منتقي ولا معمر يمشو معانا كمان ، بيمشو ( عشان م تتلخبطو تقوي عادي بتنادي امي امها واخواني اخوانها وانا اختها والكلام دا كلام معز موجهو ليهاا ) ..

المهم قدر يقنعا ..

مع انه ما طايقه الدنيا باللي فيها ، لكن مشيت معاهم ، كلنا مشينا من اخواني بس معمر المعانا عشان العربيه تكفي .. 

مشوارهم بعيد مننا بس م شديد يعني ، المهم وصلنا ، كلنا نزلنا الا تقوي دي م دايرة تنزل ،، معز قاليها تخافي وانا معاكي والله زعلتيني ، قالت ليهو معز انت م بتعرف مرة اخوي دي زي ، و انا متاكدة الموضوع ما حيتحل بمجرد كلام وقعده زي م انت فاكر ،، و اكون معاك صريحه المشكله مافي اخوي ،، الحقيقه المشكله في مرتوو، خاته راسا مع راسي و متحكمة في اخوي بطريقه انت زاتك م حتتخيلا ، تقول ليهو يمين ، يمين شمال شمال ... طيب انزلي ممكن ، م صح نرقف امي كدا في الشارع .. 

خبطنا الباب ،، معز و امي دخلو بعدها انا وتقوي دخلنا متماسكين كداا ،، و معمر ورانا فتح لينا اخوها زاتو طبعا ،، 

اها خشمو ما فتحو لمن دخلنا البرندة .. قابلتنا مرتو ، التراحيب دي والسلام الحار حتي انا حضن و بوس ،، تقوي دي بقت منططة عيونا ديل عشرة عشرة ، للاسف انحنا الصدقنا وش الحنية ، لكن تقوي الوحيده الكانت عارفه حقيقتوو .. 

اغرب شي حصل ،، ان اخوها لتقوي ، قال الحصل حصل والناس كلها بتغلط بس انا داير اعرف باتت الفترة دي كلها وين ،، امي ردت قالت ليهو في بيتي انا و مع بتي ،، هنا طبعا مرتو بقت تحدر و تحمر ،، قال لامي واثق في اختي ، طبعا مرتو تحمر ليهو ،، قالت طيب ينفع بت ناس تتزوج بالطريقه دي ،، معز قاليها انتي خليتي فيها طرق ؟ حمدلله دقينا باب الله و بشرعه و لحد الان انا متبع الاصول و ما تميت عرسي مالم ارجع ليك لان الولي الوحيد ليها ، و بتمتي م اندم اني عملت ليك اعتبار ،، اختك في الحفظ والصون وانا شاريها بموية عيوني ،، و ياريت تخلي مرتك بعيدة كل البعد ........ م قعدنا اكتر من ساعه تقوي المغلغه ودايرة تمشي ، فعلا مشينا من طلعنا اتنفست زي الكاتمين علي نفسهاا بالحد مسكينة .. 

للحظة اتمنيت لو ان علاقتي بي بلال زي علاقه تقوي مع معز ، يكون واقف معاي كداا و يسندني ، لكن بلال عمل شنوو ، هه دار لي ضهرو 

بالجد انا ما قادرة استوعب هو ليه عمل كداا انا واصله لمرحله ، اسال اخواني ديل واحد واحد ، بيعرفو بلال من وين !!!!!

و ليه هو انزعج كداا ، من عرف ان دا عنوان بيتنا .... انا اتزكرت حاجه مهمه

يوم ......

،،،،،،،،توقعاتكم شنوو ؟ ،،،،،،،،

يتبع .....