سبايا بلا أغلال ( الجزء الثالث من سلسلة ألحان حوائية )

الفصل الثالث

تتهادي في مشيتها بخيلاء وعيناها تتطلعان في المكان حولها بتقزز واضح .. تنظر للجميع من عليائها كعادتها .. تنعشها نظرات الحسد التي ترمقها بها فتيات المنطقة .. تعلم أن جمالها الأخاذ مصدر قوتها .. عيناها الخضراوان وشعرها الحريري حالك السواد , ملامحها الاَسرة و جسدها الغض .. فتنة تسير علي قدمين .. ولكنها لا تعلم أن الجمال نعمة قد تنقلب لنقمة علي صاحبتها .. نفضت شعرها للخلف بكبرياء لا يليق وكيس الخضروات الذي يتأرجح بيدها .. بينما تدلف لبيت أبويها المتهالك الذي يتراقص بمجرد مرور أي قطار بجانبه .. زفرت بضيق ويداها تطرقان باب الشقة بنفاذ صبر .. ولم يتأخر الرد .. فتحت والدتها الباب متناولة كيس الخضروات من يدها بسرعة هاتفة وهي توليها ظهرها لتدخل المطبخ ,,,,,

- " أتأخرتي ليه يا بت يا صفاء "

تتبعت والدتها بعد أن أغلقت باب الشقة خلفها .. ووقفت متخصرة علي باب المطبخ لتقول بغرور واضح ,,,

- " ما انتي عارفة ياما الحارة وقرف الحارة , ورجالتها الي كأنهم مشافوش نسوان في حياتهم .. كل شوية واحد يوقفني .. عاوز أكلمك , معلش يا انسة ممكن سؤال " 

ثم حركت شفتيها بسخرية متابعة ,,,

-" ال اَنسة ال " 

ضحكت الام بصوت مرتفع وهي تطالع جمال ابنتها الفريد قبل أن تقول بغرور ,,,

-" طالعة لامك يا بت ورثتي مني كل حاجة " 

ثم تطلعت في جدران المكان التي تاَكلت حولهما وتابعت  متشدقة ,,

-" حتي الفقر "

أومأت برأسها موافقة بتجهم وهي تهتف بشرود ,,,

- " حتي في الجواز بختي منيل ياما , المحروس الي اتجوزته , مش كفاية كان مقعدني مع امه لا .. مش عارف يجيبلي كل الي نفسي فيه , فالح بس يقولي أنا بحبك واصبري عليا , هعيشك برنسيسة .. مسم ال برنسيسة ال , يا ساتر هم وانزاح .. طلع عيني لحد ما رضي يخلصني من عشرته " 

حركت الأم رأسها بعدم رضا وهي تلتف لتواجه وحيدتها لتهتف بحقد ,,,

- " يا عيني علي بختك يا بنتي , ده حتي المزعودة بنت عمتك بعد ما اتطلقت من رد السجون الي كانت متجوزاه اتجوزت مرتين وكل جوازة أنئح من الي قبلها .. مسم صحيح يدي الحلق للي بلا ودان " 

كزت صفاء علي أسنانها بغيظ وهي تنظر لوالدتها لتقول ,,,

- " فضلتي ورايا لما اتطلقت , ابعدي عنها , خافي علي جوزك منها , البت لونة وممكن تاخده منك , واديني أهو مش كان زمان علاقتي حلوة بيها ياما .. كانت عرفت تجيبلي عريس مريش من قرايب جوزها "