محمد...بعد كلمة علي الافتتاحية بالگعدة مالت الشيوخ...فهم الطرف الثاني انو احنا نقرر اللي راح يصير وانتم بس توافقون...ما الكم اي كلمة بس بالموافقة
علي...قبل يوم من خروجي من المستشفى... اجاني محمد وسولفلي كل اللي سمعه من الزلم...بالبداية كنت اگول قضاء وقدر بس من عرفت مسويها قبل ... فار الدم براسي وعرفت الفلوس مو مهمة عدهم ... خليت ناس يعرفون شي عن اهل الولد وگالو عنده اخوات ثنين بس ... بعد التفكير قررت شي..
فاروق... الله بالخير...
الكل...الله بالخير والعافية
فاروق... اليوم گعدتنا نريد نحقن بيها الدم...وما نخلي ناس مالها ذنب تروح بيها ... ابنكم دعم ولدنا وجان هو العايل...ومثل ما سمعنا هاي مو اول مرة هيج يسوي..
ابو حسين...والله عمي حقكم ...شنو تأمرون اني حاضر ...انطيكم من مليون للالف مليون...بهل الاثناء قاطعة علي...
علي...ابو حسين احنا الفلوس ما تهمنا...يهمنا يتعاقب ابنك...اخوي الصغير حالته كانت خطرة...وهسة متأذي بظهرة ورجليه ما يگدر يگوم عليهن...وجايني تگلي فلوس...
محمد...علي گاعد بصدر الديوان على كرسي متحرك... يحجي بهدوء ولسانه حاد مثل كل مرة... وحتى اعمامي يخافون من لسانه لا يذب حجاية عليهم گدام الناس ويسكتهم..وهو يحجي قاطعة ابو حسين...ورد عليه علي بكلمة تجرح الحجر
ابو حسين...(بصوت عالي)...عمي بس فهمني شنو تريدو...
علي...اولا لا تصيحلي عمي انت مو عمي تصيحلي شيخ وتحترمني...وثانيا ما تعرف الاصول محد يقاطع الشيخ؟
واحنا اهل الحگ وانت ترفع صوتك علينه...
شيخ عشيرة ابو حسين(سالم)...كان موجود بس ما حجه شي لمن رد علي على ابو حسين ...من رخصتك شيخ علي...
علي..مرخوص شيخ... آمرني...
الشيخ سالم...ما يآمر عليك ظالم شيخنا...بس احنا اجينا ومتعنين الك...سمعنا بطيبتكم وحكمتكم وما تردون طالب حاجة...احنا غلطانين بحقكم....
علي...حشاك من الغلط شيخ...انت على راسي
شيخ سالم... يسلم راسك شيخ...بس احنا نريد نوصل لحل للمصيبة اللي احنا بيها...وادري بيك ابن شيوخ وما راح تظلم احد...
علي...اني موافق...بي راح انطيكم كلمتي بس ما ارجع عليها بعد...
شيخ سالم ..آمر شيخ
علي...ما يامر عليك ظالم...احنا نريد فصل 300 مليون ...وسكتت شوية لان مو سهلة علية اكولها هل الكلمة بس مضطر عليها...
شيخ سالم...بس ال300 مليون؟؟!!
علي...لا شيخ ونريد فصلية...
محمد...من سمعو عمامي الفصلية تفاجئوا ...وعمي فاروق كان قريب على علي انتبهت عليه حجه وياه..
فاروق...(بهمس)...علي انت شجاي تحجي ما اتذكر اتفقنا على فصلية ...
علي... والله بعدين افهمك... بس انطيني مجال...
شيخ سالم...شيخ علي احنا الفلوس موافقين عليها بس الفصلية لا...
علي...شيخنا هذا آخر الكلام غيره...بس ناخذ حقنا من ابنكم بالدم
شيخ سالم...زين انطينا مجال نفكر ونرجعلك خبر...
علي...احنا موافقين شيخنا الكم يومين ترجعولي خبر...
محمد...ترخصو الناس وطلعو...وعلي گعد يفهم عمامي على اللي سواه وطلبه...
علي...عمي فاروق هذول الناس عدهم الفلوس مثل الماي ما يهتمولها...وابو الولد عنده ابنه ما يهمه شنو يسوي عباله يحل كلشي بفلوس ...واني طلبت فصلية حتى احرك گلوبهم ..بس وداعتك عمي ما راح اسوي للبنية شي ...اعرف هي ما الها ذنب بغلطة اخوها...بس كم شهر وارجعها لاهلها..
فاروق... اذا هيج وتوعدني ما تأذي البنية...اني اوافق..
مضيف الشيخ سالم
شيخ سالم... بعد ما رجعنا من الشيخ علي...هاا ابو حسين شنو رأيك بطلبهم على الفلوس والفصلية؟؟...
ابو حسين... اني اوافق شيخ...
شيخ سالم...(بعصبية) ...توافق؟ شنو توافق مو بنتك راح تروح فصلية...وانت حتى ما ترددت قبل لا تحجي...
ابو حسين... اني عندي حسين اهم من البنية ...تروحله فدوة البنية...
شيخ سالم..(بدهشة)... ما توقعتها منك هاي ابو حسين...بس هذا هو راح اتصل بشيخ علي بالليل وأخبره...
علي...بالليل واني الالم كاتلني وياكل بيا...اتصل شيخ سالم...الو شيخنا العزيز تفضل...
شيخ سالم ...السلام عليكم شيخ علي..
علي... وعليكم السلام شيخ ...
شيخ سالم...شيخ احنا موافقين على شروطكم والبنية يومين عدكم ان شاء الله...
علي...هذا هو شيخ وان شاء الله خير...سديت التلفون واني افكر...ليش وافقو بهل السرعة...كنت اظن حتى اليومين ما تكفي وافكر شلون اضغط عليهم...الشغلة مو خالية...ذولة عدهم لعبة لو اكو شي ضامينه عليه...(بصياح) آيات.. آيات
آيات...سمعت صوت علي يصيحلي رحتله...ها خوية رايد شي مني...
علي...تعالي اخذيني للاستقبال ما اگدر احرك نفسي وادية مربطة...مربطيني عبالك نعجة...
آيات...اسمع علي يحجي على روحة ومن شبه روحه بنعجة ..ضحكت بصوت شوية...وسمعني..
علي...اووف صرت مضحك لآيات...يلا ولج بطلي ضحك واخذيني...آااخ لو بس ايد وحدة اكدر احركها براحتي...كان استلمتج راجديات...
آيات...هو هيج يحجي واني اضحك عليه...بس هو مبتسم وكل شوية تتغير ملامحه من الالم...علي شنو اليوجعك يا بعد اخيتك..
علي...شبيج انگلب وجهج ...متعلم على الالم بشغلي... احصل الضربة والنطحة والعضة...هذا شي عادي اصلا...يلا اريد اشوف ضحكتج...ما اريدج معبسة.. تطلعين مثل سعد خليفة...وضحكت عليها...
آيات..(بعصبية وياها ابتسامة صغيرة)...اني سعد خليفة؟..راح اعوفك بالممر واشوف منو ياخذك للاستقبال...
علي..(بصوت شوية عالي)...تعالي ولج اتشاقة وياج...هو لو سعد خليفة ربع جمالج كان خلوه مكان مهند التركي...
آيات...من شفته هيج يتوسلي ضحكت...كتله يلا صير حباب وخليني اخذك...
علي...اي هيج ضحكي ولج...وصلتني آيات للاستقبال واتصلت بعمامي ووصيت آيات تصيح محمد واحمد يجوني... ورا ثلث ساعة تقريبا اجو عمامي...وفهمتهم بالصار واتصال شيخ سالم...
