احمد...عمي انت شتحجي...وعلي هيج وقت بالعيادة...
عمران...ولك يا عيادة...والشرطة تبحث عنه...
احمد...عمي غير تگلي شصاير...اني راح اموت من القلق...
عمران...اخوك حاول يعتدي جنسيا على مرة...ورجلها حاول يحميها وقتله...
احمد...عمي انت تتشاقة وياي مو؟...
عمران...ولك كلب هسة وقت شقة...اسمع الشرطة راح تجيكم هسة ...لا تحجي وياهم زايد ناقص...خليهم يشوفون شغلهم...ويلا بعدين اني اجيكم...
احمد...انهيت الاتصال...وسمعت دكة قوية على الباب ... نزلت اركض كلت للبنات يلبسن احجبتهن وعبيهم...لبسو وهمة ما مفتهمين شنو يصير...رحت فتحت الباب ولگيت الشرطة...
الشرطي...هذا بيت المدعو علي عامر رزاق؟...
احمد..اي هذا بيته؟..
الشرطي...سوي مجال نفتش البيت...بامر قضائي ممن القاضي الخفر...
احمد...سويتلهم مجال ودخلوا فتشو البيت كله...
الضابط...انت شتصير من المدعو...
احمد...اني اخوه...
الضابط...تعرف مكان التواجد حاليا للمدعو؟...
احمد...اللي اعرفه هسة هو بالعيادة بشغله...بس ما فهمت شنو الصاير...
الضابط... اخوك متهم بقتل المدعو....... ومحاولة الاعتداء الجنسي على زوجته...
ملاك... كاعدين اني والبنات اجا احمد يصرخ لبسن احجبتجن و عبيجن... شوية صارت دكة قوية على الباب... طلع احمد وشوية ودخلو...بعدين بدو يسألون على علي...واني كاتلني الخوف...اريد اعرف علي شبيه...سألهم احمد شكو ... جاوبوه علي قاتل واحد ومحاول يعتدي على زوجته...اني بقيت ابجي...لان ما اصدك علي يسوي هيج...هذا مستحيل...يمكن مشتبهين بيه... ما احس الا صوت واحد وكع وراي درت وجهي لگيت آيات مغمى عليها ...ركضت عليها عدلت راسها ومنى ركضت جابت مي وعطر...حتى تصحى... اجا احمد شالها لغرفتي وخلاها على فراشي...شوية صحت وبس تبجي وتعيط...
آيات...ولج ملاك راح ياخذون اخوي مني...
ملاك...آيات تبجي واحنا نبجي وياهم...واني ما مصدكة اللي يصير...سكتي مو علي اليسوي هيج... متأكدة هذا مجرد اشتباه لا اكثر...انتي تعرفين علي ما يفكر بهيج شي...
احمد...رجعت يم الضابط وسألته على علي...سيدي علي هسة وين؟...
الضابط...هذا مو شغلك وما الك حق تسأل...
الشرطي...سيدي فتشنا البيت كله وما لگيناه...
الضابط...خبر باقي الدوريات يفتشون البساتين...يمكن خاتل بيهن...
الشرطي... حاضر سيدي...
احمد...اتصلت بمحمد وفهمته على الصاير وشوية اجو كل عمامي...واجتمعنا بالمضيف...
محمد...انتو تدرون علي ما عنده هيج سوالف...حتى وهو مراهق جان عاقل...يعني مستحيل يسوي هيج...ويمكن يتجنون عليه التهمة...
محمود...لو مصطفى المسوي هيج...كلت اي يسوي...بس ما تطلع من علي واني هم متأكد منه...
عمران...انتو شتحجون عليه شهود هواي...وشافوه..علي قتل رجال وراد يعتدي على مرته...شنو تترجون من عنده...هذا ما يستحق حتى يصير منا...حتى يصير علينا شيخ...لازم نجمع اعمامنا وناخذ عطوة من الناس...
فاروق...اهدو شوية...خلونا نعرف القصة كلها قبل نسوي شي...
عمران...اني احجيلك القصة...الدكتور طلع ويا ناس...يعالج حلالهم...هناك الزلمة راح يجيب شي ...وبقى ابن اخوك والمرة...راد يمد ايده عليها...بس هي قاومته وبدت تصرخ... اجا زوجها واخوه رادو يعرفون الصار...شافوه ويا المرة رادو يضربوه بس هو دفع واحد منهم وطاح على وتد بالگاع...اجت الضربة برقبته... ومات بساعتها...وضرب اخوه الثاني وانهزم ولحد الآن ما نعرف مكانه...واكو ناس هواي سمعو صراخ المرة ووصلو لگو علي يمه...
محمد...عمي انت تصدك الناس...وما تصدك ابن اخوك بريء...
عمران...(يصرخ)...لا تگول ابن اخوي...ما عدنا هيج ابن...فاروق هذا لازم نكسر عصته...بس فهموني شنو راح تسوون بهاي الفضيحة كدام الناس...
احمد...اسمع عمي هيج يحجي على علي...اريد اكوم اضربه واسكته بعد ما اتحمل حجيه...عمي انت شجاي......
محمد...اسكت شوية احمد...عمي عمران انت ربيت علي وهو صغير وتعرف طبعه واخلاقه... ليش تحجي هيج عليه...تدري علي ما يأذي نملة...وهسة تتهمة انه حاول يغتصب مرة وقتل زوجها...
عمران...لو ادري بيه هيج ما كان ربيته ولا خليته يدخل بيتي...هذا العار...
محمود... عمران ما اسمحلك هيج تحجي على علي... انت الادرى علي ما عنده هيج...
عمران...لا ما ادري شي...لو ادري من زمان تخلصت منه...هذا نزل راسي كدام الناس...وراح اخليه ياخذ جزاءه العادل...
فاروق...كافي هذا الحجي خلو اعمامنا يجوون الصبح ويصير خير...
احمد...راحو اعمامي وبقيت بس اني ومحمد بالمضيف...محمد شفت عمي عمران...ولا تگول علي يصيحله بوية...ومعتبره مثل ابوه ويحبه اكثر واحد باعمامنا...يريد هسة يقتله ويخلص منه...حتى علاء ما حجه شي وظل ساكت...لا عبالك اخوه...
محمد...اعرف ولك...بس لسا اني ما مصدك اللي يصير...اني اعرف مو علي اليسوي هيج...بس شنو لازم اسوي حتى نخلص من هاي المصيبة ما ادري....
بالبيت...
ملاك...بقيت بس ابجي على علي... وادعي ربي يرده الي بالسلامة...آيات حالتها مو اقل مني....بس بجي ونوح...وام محمد تبجي بسكته على ابنها...اجا احمد وسولف الصار بالمضيف...
آيات...(تبجي وتصرخ)..هذا عمران ما يخاف الله...على اساس هو ما يعرف علي...ولكم انتو اخوته لعلي ليش ما سكتوه؟... هذا لو علي ما ظل ساكت ودافعلكم...بس انتو الثنين ما توصلون شعره من علي...
ملاك..(تبجي)... ولج سكتي مو هيج تحجين ويا اخوتج...ما بيدهم شي حتى يقصرون وياه...
احمد...اسمع حجي آيات ...يكطع بگلبي...كل الگالته صحيح...احنا جبناء ما ردينه على عمي من اتهم علي...ما اعرف شنو ارد عليها...باوعت لمحمد كلت هسة يرد عليها...شفت محمد يبجي بحرگة على اخوه...ما تحملت هم بجيت وياهم...
ملاك...صحيح علي جان طبعه قاسي...بس هو احن واحد باخوته...وهو جان اللي يدافعلهم ويحميهم اذا صار شي...هو اللي يسهر وياهم اذا تمرضو...ويعتبروه جبيرهم...هسة المفروض اني اساعده...من حجالي ماضيه كلت هسة دوري اساعده...بس اني عاجزه عن كلشي...بس هو يوگف وياي...وبمحنته هاي ما كدرت اوگف وياه...ربي ساعدني واحفظه الي...بقيت الليل كله انتظره...كلت يمكن يجي واشوفه...وين انت علي...وين رحت وعفتني...اذا صار بيك شي والله اموت وراك...اوووف يا گلبي ما مكتوب عليك الراحة...تطلع من وحدة تطب بالاقوى منها... مكتوب عليك بس القهر والضيم...هذا الخفت منه ساعدني وخلاني احبه...هذا الجنت حذرة منه انقذني وانطاني حياة...وهسة راح يضيع كلشي مني...بقيت حاضنه قميصة وللصبح بس ابجي...
احمد...صار الصبح وماكو احد نام...نتصل على علي وموبايله مغلق...اتصلنا بشريكه بالعيادة... وكال طلع ويا ناس الساعة 3 العصر وما رجع للمغرب يلا سمع باللي صار...للساعة 10 اجو اعمامنا وبعدها اجو اعمام المقتول واعمام المرة...
فاروق...الله بالخير...
الكل...الله بالخير والعافية...
فاروق...احنا نعرف اللي صار...بس ابنا ما يسوي هيج...وما طلعت ابد منه العيلة وكل الناس تشهدله...
شيخ المقتول...عمي ابنكم كتل ابنا واثنين عليه شهود اخوه ومرته بعد شنو ابنكم ما يسويها..
فاروق...اكو احتمال جبير ذولة الاثنين يجذبون...وما صار هيج...
شيخ المقتول...خلي الاثنين جذابين...والناس اللي شافته...هم يجذبون؟...
احمد...صار صياح بالمضيف وناس تجر بالطول وناس بالعرض..وساعتين وما وصلنا لشي...بالاخير حجة عمي فاروق...
فاروق...سمعوني يا جماعة الخير...احنا حاضرين للفلوس...بس علمود نخلص من الدم وما تروح بيها ناس...كولو شنو تطلبون...
شيخ المقتول...احنا نطلب 150 مليون وفصلية...
فاروق..اني موافق..
احمد...من كال عمي موافق ردت اكوم واحجي...بس عمي محمود لزمني...
فاروق...اني موافق على الفلوس...بس الفصلية لو اعرف تصير الدم للركب ما انطيكم فصلية...وكلكم تعرفوني وتعرفون شنو احنا...وانتو بكيفكم تريدوها دم...نسويها دم وبعد بكيفكم...
شيخ المقتول...ما نريد الفصلية...بس ناخذ 150 مليون النا...و100 مليون لاهل المرة...
فاروق...بهاي اني اوافق اذا بس فلوس...
محمد...وافقنا نطي فلوس مكان دم علي...بس بقت مشكلة هم كالو ما نتنازل عنه...تبقى الدعوة بالمحكمة...وبعدها اجتمعو اعمامنا وقررو ياخذون الشيخة من علي وينطوها لعمي فاروق...وهم قررو يتبرون من علي ويكسرون عصته...ماكو احد فرحان بهذا الوضع بس عمي عمران...يكول بيضت وجهي كدام الناس...رجعنا ويا اعمامي لبيتنا...دخلو وسلمو على امي والبنات...
محمود...السلام عليكم..
الكل ...وعليكم السلام..
محمود...شلونج ام محمد...
ام محمد...تشوف حالي ابو مصطفى ظهري انكسر على ابني...
محمود...تعوذي من الشيطان خوية...هسة يطلع الصدك ويرجع الكم علي...
احمد...سولفنا كل اللي صار...وليش ما تنازلو عن الدعوة حتى ما ياخذون فصلية...وعلي راحت من الشيخة وانكسرت عصته...
عمران...هيج احسن حتى انتو تخلصون من العار وما تتأذون بسببه...
آيات..(تصرخ بحرگة)...عمي انت شتسولف ما ادري بگلبك هيج اسود...مو هذا علي معتبرك ابوه...بس انت هسة تغلط عليه...وانتو ليش ساكتين وهذا يحجي على اخوكم...
محمد...سكتي آيات هذا عمج ما يصير هيج تحجين عليه...
آيات...ما اريد هيج عم...عفتهم وصعدت لغرفتي...
عمران...عوفها هاي ما تعرف مصلحتها...
احمد... هاي يا مصلحة تحجي عليها...تغلط وتتهم اخوها وتگلها مصلحتج...بس صدك مثل ما كالت گلبك طلع اسود...وما توقعتها منك...
فاروق..(بصياح)..احمد عيب تحجي ويا عمك هيج...اليوم شو بكيفكم تطولون لسانكم على الاكبر منكم...
محمود...عوفونا من هذا...هو الغلط من عمران ما جان المفروض يحجي هيج على علي...بس كللولي علي وين هسة؟
عمران...ما نعرف...حتى الشرطة يدورون عليه...هاا هذا اتصل الضابط يمكن حصل شي...الو...
الضابط...الو استاذ عمران...ردت ابلغك لگينه سيارة علي وهسة هي على الطريق العام... بس علي ما موجود...وراح نفتش المناطق المحيطة...
عمران...عفية عليكم...واذا لگيتوه خبروني..
الضابط...ان شاء الله...
عمران...ابشركم لكو سيارة علي...
احمد...شنو البشارة بالموضوع...اريد اگوم اضربه...
ملاك...عمو عمران...اذا لكو علي يأذوه؟...
عمران...خليهم يضربوه حتى يعرف الغلط اللي سواه...
ملاك...(تبجي)...ليش عمو هيج والله علي بريء...وانت هم تعرف...
عمران...لا ما اعرف شي...خلي نحصله اول لذاك الوقت نعرف الحقيقة...يلا اني اروح للبيت عندي شغل اكمله...
فاروق...واني هم عندي شغل...يلا محمود تعال وياي نروح...يلا نترخص في امان الله..
محمد...في امان الله...
احمد...طلعو اعمامي...ولكم هذا العمران اريد اضربه واشبع بيه ضرب...صار يكره علي عبالك قاتل ابنه...
محمد...هو جان اكثر واحد يحب علي ويمكن اجته صدمة هذا الخبر وخلاه يكرها...
احمد...حتى لو يكرها بس مو هيج يحجي بگلبه گدامنا...
ملاك...خليتهم يحجون بيناتهم ورجعت لغرفتي... بقيت ابجي وافكر بعلي وبنته اللي ببطني...بعد كم يوم وماكو خبر عن علي...اجا ابوية راد ياخذني وياه للبيت...يابة ما اطلع من بيت زوجي...اني انتظره بهذا البيت وما اعوفه...
ابو ملاك...ادري بنتي...ما اريدج تعوفينه لعلي بس تعالي عدنا ترتاحين... وانتي حامل هم خافي طفلتج...
ملاك...راحتي ببيت زوجي...وبنتي ما عليها شي...
ابو ملاك...ما اكدر اجبرج باللي تشوفينه...وبيت اهلج مفتوح متى ما تريدين...
ملاك...مشكور يابة بس هذا بيتي وما اعوفه...بدا حالي وحال كل اللي بالبيت يتغير... وبعد مرور شهرين كل خبر عن علي انقطع...عبالك الارض ابتلعته... رجع شكلي مثل ما كنت محبوسة ببيت اهلي... وصار عندي فقر دم...والدكتورة حذرتني منه ياثر على الطفلة...
آيات...بعد ما اختفى علي ملاك رجعت تنام وياي...ما نكدر نعوفها وهي حامل لوحدها...والحمل بين على بطنها صارت بصعوبة تتحرك...هسة هية بالسابع...اجيت يوم من الكلية ولگيتها بالغرفة تبجي من بطنها...خفت عليها صحت لامي...اتصلت امي على احمد أجا اخذنا للمستشفى... بعد ما دخلنا توجهنا للطوارئ...فحصتها الدكتورة...
الدكتورة...هاي عدها حالة ولادة...ابتعدو عنها...الممرضات اخذنها لصالة الولادة...
ام محمد...بس دكتورة هي بالشهر السابع...
الدكتور...تصير مرات ولادة بالسابع...بسبب التغذية مالت الام...
آيات...اخذو ملاك ودخلوها وبعد نص ساعة اجت الدكتورة...
الدكتورة...البنية تحتاج عملية قيصيرية...لازم زوجها او ابوها يوقع تعهد...
ام محمد... يمة احمد اتصل على ابو ملاك وفهمة حتى يجي يوقع...
احمد...ان شاء الله يمة...اتصلت على ابو ملاك وكلتله على طلوك ملاك ولازم عملية قيصرية ويريدون توقيعك...صدك ربع ساعة ووصل ابو ملاك وياه ام ملاك...
ابو ملاك...عمي احمد وينها ملاك؟..
احمد...عمي لا تخاف ملاك جوة بالصالة...بس يريدون توقيعك حتى يبدون...
ابو ملاك...اي اوقع اوقع...
احمد...تعال عمي منا...اخذت ابو ملاك ووقع التعهد...ودخلو ملاك للعمليات...
آيات...دخلت ملاك للعمليات وبقينا منتظرين...القلق اكل گلوبنا...وينك علي حبيبتك وبنتك يعانون...وانت مختفي...نزلت دموعي من تذكرت علي...هاي البنية ما نعرف تعيش لو تموت وابوها مختفي...طلعت الممرضة وكالت لاحمد جيب بطل دم بسرعة المريضة بدت تنزف...(تبجي)... ولج يمة ملاك راح تروح منا...
ام محمد...يمة استهدي بالرحمن وادعيلها بالسلامة...
احمد...رحت ركض جبت دم واجيت...سلمته للممرضة ودخلت...ربع ساعة وطلعت الدكتورة...
الدكتورة... حالة المريضة مستقرة...بس الطفلة حالتها تعبانة ولازم تدخل خدج...لان عمر الحمل 7 اشهر وبعده ما كامل...
آيات...طلعو ملاك من العمليات مخدريها وأخذوها لصالة ثانية...بقينة يمها بدت تصحى من التخدير...
ملاك...علي...علي...وين رحت...تعال گلبي يوجعني...لا تعوفني وحدي علي...بنتك تريدك علي...احمد وين علي...ما سأل عليه...ما گال ملاك حبيبتي شلونها...آيات اتصلي على علي حبابة...گليلة ملاك مريضة وتريدك يمها... كليله ملاك راح تموت...
آيات...بدا يروح التخدير عن ملاك...وهي بس تهذي باسم علي وتريد علي... وبقت تهذي وتبجي على علي...كطعت گلوبنا...وينك علي ملاكك مريضه ووصلت الموت وانت ما موجود...
