ابو حسين...من كعدنا بالمشية وهذا علي متكبر ويحجي كله معلك...كرهته...بس من طلب فصلية...گلت اي اجت من الله...وراح اخلص من ملاك...وشيصير بيها عدهم تظل خطيتهم...وهمة يطيحون بيها...من رجعنا من المشية بمضيف الشيخ سالم ...سألني على الفصلية گبل وافقت وهو عصب عليه...وبعدها رجعت للبيت...حسين بالبيت لان طلعته بكفالة من السجن...حتى يتنازلون عنه يلا يطلع من البيت... ولك حسين تعال وراي للاستقبال ...
حسين...رجع ابوي من المشية وصاحلي ... اجيته اريد اعرف شنو الصار وشنو اتفقو...هاا يابا بشر رضو بفلوس ويتنازلون؟؟...
ابو حسين...لا ولك احسن من الفلوس...
حسين... احسن الفلوس؟؟...يابا دوختني على شنو اتفقتوا..
ابو حسين...اتفقنا على 300 مليون وفصلية...وفرحت من طلبو الفصلية ..راح اخلص من هاي العار العدنا...
حسين...(بفرحة)...صدك بوية؟؟...همزين سويت الحادث راح نخلص منها...
ابو حسين... انجب ولك...همزين سويت الحادث فرحان...ذولة معروف عنهم ياخذون حقهم لو تنگص رگابهم...ربك ستر شيخ سالم الا مكانه عدهم...والا همة ما يتفاهمون ولا بحال الفلوس...يلا باجر راح اخلي شيخ سالم يدز ملاك الهم....واني احجي دخلت عليه ام حسين...جانت تتصنت عليه من ورا الباب...
ام حسين... سمعت سرمد يصيح لحسين...يريده بشغلة...عرفته الشغلة علمود الفصل والمشية مال حادث حسين...شفتهم دخلو بالاستقبال...فآني بسرعة رحت وكفت ورا الباب واسمع كلمة فصلية بس ما افتهمت القصة كلامهم مو واضح...بالاخير سمعته يگول يدز ملاك ...فهمت ملاك صارت فصلية مكان دم اخوها ...عصبت ودخلت عليهم بصياح وبجي ... ما كفاكم السويتو بالبنية هسة تنطوها فصلية...ولكم انتو ما تخافون الله...الله لا يطيكم بجاه الحبيب محمد...واني احجي اجا سرمد ضربني راچدي...
سرمد...يلا كافي حجي ...لا تخليني امد ايدي اكثر عليج.. يلا ولي منا..
ام حسين...والله احرگ روحي اذا اخذتو بنيتي مني..
حسين...ابوي سمع حجي امي صار نيته يضربها بعد...لزمته وحجزت بيناتهم... يمة روحي منا هذا مو شغلج ...بكيف ابوي هو اليقرر مصيرها تعيش لو تموت...
ام حسين...ااااخ منك حسين...انت راس المصايب لو ادري بيك هيج ...كان وانت ابطني كتلتك وخلصت منك...عفتهم وطلعت رحت لغرفة ملاك لگيت اختها يمها..تحاول توكلها شبگت ملاك وگمت ابجي...يمة راح ياخذونج فصلية...فوگ ما ظلموج راح ينطوج لناس ما راح يرحموج... وياخذوج مني...
ملاك...(ببرود)...شنو الفرق ...اليسمعج يكول عايشة بنعيم هنا...نفس الشي بس هناك يمكن ارحم يخلوني اموت بسرعة...مو مثلكم حتى موت اموت وارتاح ما مخليني...
ام حسين...ولج ليش تحجين يمة هيج ...اني امج واريدج ترتاحين يا يمة...
ملاك...اذا تريديني ارتاح خليني اموت...او خليني اروح فصلية يمكن يكتلوني همة...احسن من الضرب يومية من حسين لمتا ما يعجبه يطلع حركته بيا...
ام حسين...من حجت هيج...بعد ما اعرف شنو ارد عليها...ظليت بس ابجي...وبيومها بقيت الليل اصلي وادعي ربي يرحم بنتي...بقيت للفجر صليت صلاة الفحر ونمت...ثاني يوم طلعت الصبح للسوگ اشتريت ملابس لبنتي وكم شغلة ورجعت وللعصر اخذوها واخذو روحي وياها...
ملاك... اجو العصر واخذوني فصلية لبيت واحد شيخ...هو راح ياخذني...طبعا هسة يطلع شايب ومتخلف...بس مو مهم بس احصل فرصة اكتل نفسي واخلص من هل الدنيا الغبرة...بالعكس فرحت هواي بهل الشي...وصلنا لمكان شوية عن المدينة...ودخلنا شارع طويل شوية...بس المنظر حلو لو ما حالتي كان ظليت بس اباوع عليه وشفت بيوت عالية وحلو على طول هذا الشارع...الشارع مبين ملك الهم لان ببدايته بيه بوابة مو اي واحد يدخله...وصلت السيارة ووگفت نزلوني واني مدنگة...شفت زلم شياب واگفين وكم شاب وواحد كاعد على كرسي متحرك بس ما انتبهت لوجوهم...
بگلبي اكيد واحد من ذولة الشياب راح يصير زوجي...اجا ولد شاب وگالي... تعالي اختي دخلي جوة يم البنات... دخلت وشفت بنات اجت وحدة منهن حلوة...وتلگتني باستني على خدي...
أحمد...اجتي البنية وعلي گالي دخلها لجوة يم البنات...رحتلها شفتها ضعيفة وتكسر الخاطر...كلت يمكن تعبانة لان اجت فصلية...تعالي اختي دخلي جوة يم البنات...هي ما حجت ولا كلمة واجت وراي...صحت للبنات اجن واخذتها آيات...بس بگلبي حقدت على علي...گلت شوف البنية شصاير بحالها يمكن لان درت بروحها فصلية..
آيات...صاحلنة احمد...ورحنا نشوف شكو...طلع جايبين البنية...شفتها حلوة بس مبينة تعبانة وعيونها صايرة سود من جوة...كلت بگلبي شحجي عليك علي...رحت طلبت فصلية...هسة البنية شنو ذنبها بغلطة اخوها...كلتلها...كل الهلا بيج وبستها على خدها بس هي ساكتة بس هزت راسها شوية...كلت يمكن بعدها مصدومة...بگلبي اني اعلمك علي ...شوف شنو حال البنية...واخذتها وكعدتها بالصالة يم البنات...
انوار...(راح اكتب توضيح عنها بالملحق)...اجت البنية حلوة وناعمة سلمت علينة ...وهي تسلم وآيات تعرفها علينا...
آيات...هاي انوار اختي الجبيرة متزوجة وعدها طفلين ...طبعا هي اصغر من علي..
وهاي ريم اختي الثانية هم متزوجة وعدها طفل واحد وهي اكبر من احمد الولد اللي دخلج للبيت...واني آيات اصغر وحدة بالبنات حاليا...يعني صرت المدللة لعلي...وعدنا اخوة محمد الجبير وعلي واحمد وامير آخر العنقود هسة هو بالمستشفى وامي وياه...بس لسا عرفنا اسمج...
ملاك...عرفتني آيات عليهم...وشفتها طيبة وحبابة ...وانوار هم حبابة وحلوة...بس اختهم ريم من سلمت عليها مثل الضاجت مني وباوعتلي صفح بعيونها...وسألوني على اسمي...كلتلهم اسمي ملاك...
انوار... ما شاء الله اسم على مسمسى والله تجننين...بس مبين عليج التعب كله من ورا علي...ليش ولك علي هيج مسوي بالبنية...ولج آيات بس يجي اليوم الا ناكل گلبه ونخليه يكره اليوم اللي طلب بيه فصلية...
آيات ...اي والله.. شوفي البنية شصاير بحالها...
ملاك...اسمعهم يحجون علي هيج وعلي هيج...استغربت شنو علاقته هذا العلي...سالتهم...منو علي اللي تحجون عليه؟؟!!...
