ملاك...گلي قفلي الباب ...خفت اذا سويت شي غلط وما اعرف بنفسي...قفلته وصاحلي گلي كعدي على الجرباية كعدت بدون كلمة...
علي...عمه هاي ملاك مرتي وعلى ذمتي...اريدج تديرين بالج عليها...
عمة علي...(بعصبية)...انت شتحجي شنو مرتك؟..هي كلها خلك فصلية... قاطعها علي بعصبية...
علي...عمة هاي الكلمة ما اريد اسمعها منج...حتى لو عمتي ما اسمحلج تتعدين علية...هاي مرتي واي إهانة الها يعني تهينيني...
عمة علي..(تبجي)...هيج علي تحجي وياي وهاي اخت اللي اذا ولد اخوي... والله لو ما احبكم ما سويت هيج...بس ما اگدر اتحمل شوفتها ...واشوفك انت وامير متأذين بسببهم..
ملاك...من گالت علية فصلية خنكتني الحسرة...وبس يحاجيني احد اكوم ابجي...بس علي قاطعها وعصب عليها...ورد عليها بكلام خلاني احترمه اكثر...لان بدا يوفي بوعده ويحميني...بس هي بجت وكسرت خاطري...لان حقها اخت اللي وصل اولاد اخوها للموت شلون تتحملها وتحبها...لو اني بمكانها جان سويت مثلها...من بجت علي غير نبرته وياها وصار حنون عليها...
علي...عمة مو قصدي اخليج تبجين...بس صدكيني ملاك ما الها ذنب باللي صار... وهي اصلا مظلومة...
عمة علي...ماشي عمة ما راح احجي شي وياها بعد ولا أأذيها بس عندي حجاية وياك واريد نكون وحدنا...
علي...ملاك انتي روحي كملي شغلج... خلينا لوحدنا...
ملاك... اني اترخص...وطلعت بس ظل بالي عن شنو راح يحجون صار عندي فضول...بگلبي لا يا الله...ولج ملاك وهسة وقت فضول...الناس كلها ماخذة عليج نظرة ويمكن يكرهوني ويأذوني...ما اريدهم يحبوني بس اريد اجفى الشر...لان يمكن خلاصي ويا علي واهله...وبديت احب هاي العائلة...واقتنع بقراري من وافقت تكون فصلية عدهم...
علي...طلعت ملاك وسدت الباب وراها...سولفي عمة شنو العندج...
عمة علي...يعمة سمعت حجي مو زين على هاي البنية...واني ما كرهتها هيج لوحدي بس شنو تتوقع من وحدة اخوها معروف بالسقوط وطياح الحظ...النسوان يكولن هاي شردت ويا واحد...بس ابوها واخوها لزموها وحبسوها...وما كتلوها يخافون من الفضيحة...وسمعت هواي عليها...بس ما يتسولف...
علي...من سمعت عمتي هيج تسولف...گلت خلي اتأكد من قصة ملاك اذا صدگ او لا ...حتى اگدر اساعدها...بس راح اتركها لمن اگدر اگوم واطلع...واني وصيت جماعة يجيبولي معلومات عن ذولة الثنين اللي اعتدو عليها...ما اريد اظلمها بعد كل الظلم اللي صار عليها اذا قصتها صدگ...واذا كانت جذب اني اعرف اتعامل وياها...ارجعها لاصلها... عمة هذا الحجي بس اشاعات واني اعرف القصة كلها...ما اريدج تكولين لاي احد خاصة بنات عمي فاروق...فهمتي؟؟
عمة علي...بس يعمة النسوان كلها تگول صدك هيج صار...
علي...عمة الوادم تريد واحد تعلج بيه وتتلها ... حتى لو يهجمون بيته...هسة السالفة وصلت الج..واريدها توگف يمج وبس...فهمتي عمة؟؟
عمة علي...ان شاء الله عمة... اللي تريده يصير...
علي...اني راح اعرف السالفة الصدگ...اذا جانت مظلومة لو بنية ملعبة واني اتصرف وياها...
عمة علي...اي عمة...لازم تطلع حقيقتها ولو اني ما ارتاحلها...بس هم اوعدك ما راح اتدخل بيها ولا أأذيها...
علي...اي هاي عمتي اللي احبها واعزها...من كلتلها هيج ضحكت وكامت گالت اساعد البنات...قبل الساعة 12 بشوية وصل محمد واحمد وجايبين وياهم امير ...تلكوهم اهلي وتحمدو لامير على سلامته...وصار الغدا وخلص وتمت الامور بدون مشاكل ...كان خوفي من عمتي بس انحلت بهدوء ...وبنات عمي ما اعرف ليش بس كعدن بهدوء غريب وما تقربن لملاك او آيات...تعرف امير على ملاك ...وعلى ما يبدو عجبته الشيطان...لدرجه كللها طلگي علي وتزوجيني...بس اني خزرته سكت وبعد ما جاب هاي السيرة...لا تعتقدون غيرة...بس امير صغير بعده ومو صحيح يسولف بهاي الامور...وهم يمكن يسوي احراج للمقابل قصدي ملاك...للساعة 4 العصر فض كلشي...وبقت بس عائلتنا بالبيت...ما صار شي بباقي اليوم...
ملاك...خلص الغدا ونظفنا البيت ولليل يلا خلصنا شغل ...كعدنا تعشينا وظلينا نسولف...وعلي كاعد على الكرسي المتحرك وصافن...ما اعرف ليش بس اللي يشوفه بهدوءة يگول عليه ما يأذي نملة...بس الناس كلها تخاف منه...حتى عمته من حجت ورد عليها گامت تبجي...ما توقعته هيج...بس احمد سولفلي گالي سكت ابوج بالمشية وهچة...احمد عباله ضجت...بس بگلبي گلت يستاهل الظاهر علي دواه الينفع وياه... المهم خلصت الايام...وعلي خلا منى مرت محمد تاخذني للسوگ وتشتريلي ملابس واللي محتاجته...لان جان عندي ملابس بس قليلة ...لهذا البس من آيات...وعدت الايام بهدوء وموعد عملية امير قربت وبدا التوتر يبين بيهم...واني احس بذنب لان كل هذا صار بسبب حسين اخوية...
علي...قرب موعد العملية واني قلق على امير ...كملنا الحجوزات وتحددت نروح بعد يومين لاربيل يكملون الفحوصات ويحددون موعد العملية بعدها...ردت اروح وياهم بس كلها اعترضت عليه...لان ما اكدر امشي واصير ثقل عليهم...قبلت بحجيهم لان هو عين العقل...بس اني ما ظليت هيج... اتصلت على جماعتي باربيل ووصيتهم على اهلي...اللي راح يرحون محمد وامي وعلاء ابن عمي عمران وطبعا امير...ووصل يوم سفرهم لاربيل... طبعا حجزنا بالطيارة من مطار النجف ...وبقيت على اتصال وياهم...مر يوم ...اني اروح للمضيف لان لسا اكو ناس بعدهم يجوني يتحمدولي على سلامتي...بس مو مثل الاول اقل هسة...خلصت من المضيف اخذني احمد للبيت ...وكعدنا شوية بس الكعدة بدون امي ومحمد ما تنراد ... ملاك بديت اشوفها ترتاح عدنا...طبعا ما كلتلكم هي دائما محجبة بالبيت...وخليتها براحتها صحيح شفت جسمها بس ما اجتني اي افكار تعبانة لان اللي شفته بجسمها يخلي دمي يفور واريد اشرب من دم اللي اذاها...وظليت افكر بقصة عمتي وقصتها منو الصح بيهم...ولحد الان ما جابولي شي عن المعتدين حتى اكدر اتحقق...قررت أأجل مشكلة ملاك حتى اگوم واگدر امشي ...
ملاك...تواجد علي بالبيت بدا يكثر ...بس قل خوفي منه...بس ما اختفى ...اشوفه هواي ساكت ويفكر ما اعرف شنو يخطط...رغم هو هادئ بس هدوءة يخوف...آني بقت عيني عليه وافكر شنو راح يسوي ويتصرف وياي...يمكن هسة هو مقعد بس بعد ما يگوم ما اعرف يمكن يتغير ويريد جسمي...هاي الفكرة ظلت براسي ومخوفتني منه...حتى لو هو عاقل وشيخ بس يظل رجال...وجانت امي دائما تحذرني منهم...واللي شفته من اخوي ويا بنات الناس ما خله عندي ثقة باي رجال...يمكن ما اخاف من احمد او اولاد عم علي لان هو مسيطر عليهم...بس هو منو يسيطر عليه واذا راد مني شي شنو اليمنعه حتى الناس تصير وياه ويگولون هذا حقه منج...واني افكر قاطعتني آيات...
آيات...ولج ملاك ماصار عندج ملل من كعدة البيت...ما نخلي احمد ياخذنه زيارة...لابن الكاظم...لو لاحمد الغريفي...ونغير جو شنو تگولين؟؟...
ملاك...والله ما اعرف...يمكن ما يقبل علي...
آيات...خلي علي عليه...بس انتي بطلي تباوعين عليه 😉😉...صايره هواي تصفنين عليه 😁😁...
ملاك...سكتي ولج عيب...لا يسمعج ويهچنا...
آيات...رحت يم علي ... علي اريد اكلك على شي ...ماكو ملاك...من رحت يم علي ملاك تباوعلي ومن حجيت فتحت عيونها على آخر شي وتعض بشفاتها ...وتهددني بسكته😁😁...صدك علي نريد نروح زيارة لابن الكاظم لو لاحمد الغريفي...ونريد احمد ياخذنه...واريد ملاك تروح ويانا...
علي...اجتني آيات وحجت بطريقة طفولية ...وانتبهت على ملاك تغيرت ملامحها...وتهدد آيات علمود ما تحجي...بعدين سألتني تريد تروح للزيارة وتريد ملاك وياها...عبالهم اعترض عليهم...بس گلت خل اضوجهن شوية...شو انتي تحجين تريدين ملاك وياج على اساس ضامنه روحتج ست آيات...من كلتلها هيج عبست وجها...يلا روحن ماكو طلعة...آيات دمعت عينها ...اووف يمكن ثقلت بشقاي وخاصة اني ما اضحك من اتشاقة...راحت عني مشت مسافة صحتها...تعالي ولج...
آيات...(بعصبية وضوجة)...هاا شتريد...
اعتذر اليوم البارت قصير...بس من بارت 10 راح يصير شوية اطول... وحسب فراغي ....تبقى يوميا بارت واحد والقصة نوعا ما راح كون طويلة... وشكرا لكل من يدعمني بكلمة حلوة ...واتمنى لكم قراءة شيقة ❤
