علي...طلعت اركض شوية بالبستان...اتصل محمد عليه...يگلي نص ساعة ونوصل الكم...رجعت للبيت...بلغت الموجودين يحضرون غدا الهم...وبعد نص ساعة تقريبا اجو...استقبلناهم وشفت امير يمشي لوحده... احس بروحي رجعت لجسمي...فرحتي ما تنوصف...وابتسم لا اراديا ...شفت امي بعد فراق اسبوعين احسهم سنين...رحتلها بست راسها وايدها...من شافتني امشي هلهلت من فرحتها...سلمت على محمد وعلاء...والبنات سلمو عليهم...بس اكثر واحد فرح هي منى...ما مصدكة عبالك محمد تاركها سنين...الله يحفظهم لبعض...
ملاك...شفت علي فرحان كلش...ووجهة مبتسم ويضحك... صدك يصير حلو من يضحك شوية....شبيج ملاك وين راح بالج...سلمت على ام محمد...وعلى محمد وعلاء...وتحمدت لامير على سلامته...من الفرح المالي البيت...حتى اني نسيت نفسي...وطبعا ما ننسى الهدايا الجابتهن ام محمد ومحمد...اليوم ونسة غير...بس انتبهت لشي عند آيات...عيونها ما تنزل عن علاء... وعلاء كلما تلتقي عينه بآيات يستحي ويدنگ...بگلبي اني اعلمج آيات لزمتلي لزمة عليج 😁😁😁...شلون تضوجيني...بعدني افكر قاطعتني آيات...
آيات...ولج ملاك منتبهة لنفسج؟...
ملاك...خير شكو؟...سويت شي؟ ..
آيات...ما سويتي بس راح تاكلين علي بعيونج...
ملاك...اني اللي اكل بعيوني...لو انتي راح تاكلين علاء...والفقير يستحي ويدنك من وراج...عفية بنية...ولج اعتقد انتي ولد بشكل بنية...اهلج متأكدين منج بنية خاف غلطانين بيج ...
آيات...عابتلج انطيج كلمة تردينها عشرة...ولسانج طولان... اخلي علي يگصه...
ملاك...ولج علي ما يرضا عليه...لا تخافين ترجع عليج...وبقينا اني وآيات نداهر بيناتنا ...المهم خلص اليوم وبدا الجد... ثاني يوم كعدنا عزلنا البيت وحظرنا الطبخ وصارت ال11 بدو يجون اعمام واخوال علي...نفس ذيج المرة...بس هالمرة عمته ما عليها بيا...لان علي حاجاها علية...صلو الناس وتغدو...وكعدو الشباب وباقي الزلم بالاستقبال...
بالاستقبال....
مصطفى...افكر واگول هاي فرصتي...اسمع علي كلام واخليه يترك ملاك... حتى اخذها...ما دام فصلية يعني بكيفنا نتحكم بيها وماكو احد يگدر يحجي...اي احمد شلونك هل الايام ويا البنات...
احمد...يا بنات ولك...شنو سامع عني...
مصطفى...ولك مو قصدي...بس اگول عدكم بنات حلوة بالكلية...
احمد..اي عدنا...بس لا تريدلك وحدة؟...
مصطفى...لا ولك عيني على بنية...حتى ما كو احد متقربلها...صارت بس مزهرية بالبيت...بس واحد معلكها...لا هو مخليها مرته ولا هو تاركها... لو بس يعوفها....وارتاح...
علي...اسمع مصطفى يحجي...وعرفت قصده...هذا خبيث ما يكعد راحة...خلي انطيه محاضرة واهچة هم...اي استاذ مصطفى تعرف الله شلون قسم المخلوقات...
مصطفى...هااا؟...واني شمدريني...
علي...اني اگلك...الله قسمها على ثلاثة...ملائكة بس عقل...وخلق حيوان بس غريزة... وهم خلق بشر خلاهم عقل وغريزة...اذا استخدم عقله يصير اقرب للملاك...واذا استخدم غريزته يصير اقرب للحيوان...فشكرا الك ما اريد اصير حيوان مثلك... وبطل خباثة لان اعرف انت انسان مو سوي...لان دائما تفكر بغريزتك... واخيرا انجب واسكت...
مصطفى...هذا الكلب يحجي هيج ودمي يفور... اريد اضربه بس ما اكدر كدام أعمامي وابوي...خليت وطلعت من البيت كله...اني اعلمك علي اذا ما اردها الك...تفشلني كدام الناس كلها...علمود خلك فصلية...
احمد...علي هذا زعل وطلع...اروح اجيبه...
علي...اكعد خليه هذا القزوم...صايرلي قرد ويذبلي حجي...
محمود...خلوه يولي...هذا ابني تجاوز بالحجي هواي...يستاهل هذا الرد عليه...لو ما راد علي اني ارد عليه...الناقص يريد مرت غيره...عباله ما راح نعرف الحجي المن مقصود...بس خلي ارجع للبيت واني اعلمه...عمي علي اني اعتذر مكانه وامسحها بوجهي...
علي...تحجي صدك عمي...هذا اخوي الصغير الجاهل يحجي هيج...وكمت وبست عمي براسه...الله يخليك وحفظك النا عمي انته مثل الاب الي... ومصطفى اخوي الصغير حاله من حال احمد وعلاء...
محمود...الله يحفظك وليدي...والله هي المرجية منك...الله يخليك لشبابك...
علي...خلص اليوم بدون مشاكل ما عدا الغثة مصطفى...وجا الليل اجتني آيات...تريد شي...
آيات...علي عندي طلب صغير...بس لا تضوج...
علي...شنو احجي...اذا اكدر عليه تدللين...
آيات... علي ما تسويلنا سياج للحديقة ...نريد نطلع اني والبنات العصرية بالحديقة وما نگدر...لان اكو ناس بالبساتين نخاف يشوفونا...
علي... بس هذا طلبج...ولا تضوج وما اعرف ايش...من باجر الصبح راح اخليهم يسيجون الحديقة حتى العصر تكعدون بيها...
آيات...صدك علي...وبسته على خده وطلعت اركض لملاك...ولج ملاك...ولج ملاك سمعيني...علي راح يسيج الحديقة النا ...طلبت منه ووافق ....
ملاك...صدك ولج..
آيات...اي والله...وباجر العصر كال تكعدن بيها...
ملاك...اي والله يا ريت...ملل باقين بين أربع حياطين...اجا ثاني يوم والصبح اجوي ناس بدو ينصبون السياج داير البيت...قبل العصر كملوه كله...طلعت اني والبنات للحديقة تخبل...بيها فواكه وورد ما مقصر علي بالزرع بيها وجنت بس من الشباك اباوعلها...بس هسة هيج قريبة عليها تطلع احلى...طبعا الحديقة جبيرة يعني تكدر تبني بيت مثل بيت علي بيها على كبرها...
علي...كعدت الصبح اتصلت بشخص يسوي اسيجة اتفقت وياه يكمل اليوم...حتى لو يجيب عمال اكثر اني انطيه الفلوس...صدك اجو وبدو وكملو...طبعا جهزت طبلة وكراسي بالحديقة...العصر البنات طلعو...شفت الفرحة بعيونهم وشلون متونسين...بگلبي يستاهلون التعب الله يحفظهم اللي...خلص الاسبوع واني ابحث عن السكاره...وعرفت اسماءهم بس عناوينهم لا...ببالي فكرة اخذ حق ملاك واتخلص من الشائعات عليها...بس احتاج اعرف عناوينهم... بعد اسبوع البنات يومية بالحديقة واني بديت اطلع للعيادة الصبح والعصر اريد اعوض شغلي ...وهم احضر لشغلة ملاك...اخيرا عرفت الضابط المسؤول عن التحقيق وياهم...طلع صديقي وجان وياي بنفس الرحلة بالمتوسطة...عندي اتصال وياه وما كطعت عنه... فاتصلت بيه...الو محسن...
الضابط محسن...اي تفضل الضابط محسن عيوني...
علي...بطلهن ذني علية...وياك علي عامر صاحبك...
الضابط محسن...هااا ابو حسين شلونك وشلون صحتك...كالو ناطحتك بقرة ومكسرتك...
علي...ولك اذا تدري بيا مكسر ليش ما اجيتني بذات...
الضابط محسن...وداعتك ما صار كل فراغ...الشغل فوك من راسي حتى اهلي ما اشوفهم...وانت تدري ما احتاج اسولفلك...
علي...يلا اعذرك...بس احتاج خدمة صغيرة منك...
الضابط محسن... عيوني الك...آمرني ابو حسين...
علي...تسلملي عيونك...بس اكو ثنين يطلبهم اخوي فلوس هواي واريد اعرف عنوانهم... كل اللي عرفته اول العام معتدين على بنية واجو بالتحقيق يمك...تكدر تطيني عنوانهم... أسمائهم فلان وفلان...
الضابط محسن...اي عرفتهم...ذولة اتهموا بنية ظلم بشرفها...شلون ما اذكرهم...كتلتهم كتل بالتحقيق حتى يغيرون افاداتهم...تالي رجعوها مثل ما هية يم المحقق القضائي ... حيل ضجت على البنية...وفوگها واحد من الشرطة طلع السالفة كلها للناس وفضحها... وخلاني اعاقبة ونقلته لابعد سيطرة بالصحراء...لو ما عنده عائلة كان فصلته... المهم ذولة اذا تريد اني اجيبهم لعدك واخليهم ينطوك كل فلوسكم...
علي...لا خوية...ما اريد تصير جبيرة السالفة بس احجي وياهم لا اكثر....بس انطيني العنوان...
الضابط محسن...اي خوية...عنوانهم...بشارع****..بيت رقم **...اكو محل مقابيل بيتهم...
علي...مشكور خوية...تعبتك وياي....بعد ما عرفت العنوان ظليت اراقب بيتهم كلما يصيرلي فراغ من العيادة وحتى ارجع متأخر للبيت بسببهم...المهم عرفت همة ما تابوا من السجن بعدهم يطلعون الظهر وينتظرون بنات بنفس الشارع...الظاهر فترة خلو شرطة بس بعدين وخروهم من الشارع...اني ببالي فكرة شلون اتعامل وياهم...بس ما راح اگول اخليها لبعدين...بس يصير عندي فراغ...ما راح يطيرون...اريد اشرب من دمهم بس خليهم هسة براحتهم...
ملاك...علي صارت ما يتواجد بالبيت الا قليل...بعد ما تعودت عليه بالبيت كمت احس بيه فارغ...المهم باجر تجي عمة علي الثانية متزوجة بمكان بعيد وما كدرت تجي من وكت...بس من صارت عطلة نصف السنة راح تجي...وتظل كم يوم...خلص اليوم بدون اي شي يذكر...نفس كل يوم...علي بس بالليل اشوفه ومرات يجي الظهر بس يرجع يطلع...حتى كلامي ويا رغم قليل صار اقل واقل...اووووف...ثاني يوم الصبح كعدتني آيات....
آيات...ولج ملاك اليوم تجي عمتي ام عباس...هي واولادها ...يلا خلينا نعزل قبل لا يجون...
ملاك...ولج والله اخاف من عماتج...راح يسولي شي...ذيج بس دفعتني كدام الناس...ولو مو علي الله اعلم شنو راح تسوي بيا بعد...
