علي...كعدت الصبح غسلت وصليت وتريكت...شوية اجت ملاك والبنات بس يضحكن ويباوعن علية...ما اعرف شنو يخططن...بس الله اليستر هذا الثلاثي يخوف...بس على الاغلب احمد اليطيح بيها...المهم كملت ريوگي وصيت الولد احمد وعباس ومؤمل واتصلت بعلاء...يلحگوني للعيادة قررت اليوم ابدي خطتي علمود ملاك... طلعت للعيادة وللساعة بال10 اجو الشباب... خليت صاخبي بالعيادة وطلعنا لمكان شوية فارغ...هم مستغربين من تصرفاتي...بس من وصلنا حجيتلهم معانات ملاك كلها...حتى اللي گاله الضابط...
احمد...(ودموعه بعينه)...احمد تحجي صدك...كل هذا صاير واني مثل الاطرش بالزفة...واجتنا حالها تعبان ...گلت يمكن لان فصلية...واتشاقة وياها واضحك بوجها وهي كلها هم ومعانات...
علي...لا احسن شي سويت من تضحك وياها...لان انت وآيات غيرتوها ونسيتوها الصار...بس هسة لازم ناخذ حقها...
احمد... خلينا نكتلهم وناخذ حقها...
علاء...مو هيج احمد ...راح تسوي مشاكل اكثر...علي انت شنو ببالك؟...
علي...اريد كم شي تسوونه الي...احمد اخذ السيارة وطينها كلها بحيث ما ينعرف لا اللون ولا الرقم...ومؤمل انت تعرف بالانترنت وهيج امور؟...
مؤمل...اي اعرف...بس انت شتريد؟....
علي...اريدك تسوي حساب وهمي محد يعرفه...وورا من نخلص شغلنا تحذفه...
مؤمل...ان شاء الله...
علي...وعلاء اريدك تجيب اقنعة تغطي الوجه كامل...الشباب ما قصروا كملو كل المطلوب منهم...بقى بس نلزم السكاره...اللي راح اسوي اضرب عصفورين بحجر واحد...اتخلص من الشائعات على ملاك...واعاقب السكاره ويمكن يموتون... حسب رد الفعل من الناس...على الاغلب تتغير نظرتكم عني كخبيث او اي شي ثاني تتصوروني بي...بس هي هاي الحياة مو عادلة ومو بيها شي مثالي ولا راح تنفع المثالية...او تتوقعون احل المشاكل بطريقة سلمية ونعيش حياة سعيدة...لا اصحو من الاحلام الوردية...بزمنا حقك تاخذه بيدك ما كو احد ينطيكيا...المهم حضرنا كلشي وثاني يوم انتظرنا السكاره بنفس المكان اللي اعتدو بيه على ملاك ...ذولة ما يتوبون الا واحد يردهم ويعلمهم شلون الحجي يصير...طبعا لزمناهم وصعدناهم غطينا عيونهم...الي سهل شغلنا همة سكرانين...اخذناهم لمكان بعيد ومحد بيه...علاء جيب الاقنعة ولبسوهن...وانت مؤمل حضر موبايل علمود تصور من اطلب منك...عباس واحمد جيبولي عصي محضرهن بالسيارة...سوو الشباب كلشي بس لحد الان ما فاهمين شي همة...
احمد...علي كلشي سوينا بس غير تفهمنا مثل الاثول صرت...
علاء...اني همين صرت اثول غير تحجي شنو راح نسوي...
علي...بعدين اكللكم بس اصبرو علية...يلا نزعوهم ملابسهم ونيموهم على بطونهم...
احمد...نزعناهم وهمة يرافسون...بس اني وعباس نلعب حديد وكمال اجسام...يعني مو صعبين علينا هيج جرذان...ثبتناهم وبدا علي يضربهم بالعصي...لحد ما زورك ظهورهم ...اول مرة اشوف علي هيج عصبي وحاقد...حتى ملامح وجهة اول مرة اشوفها...كامو يبجون من الضرب...خلص علي وگال لبسوهم ملابسهم...لبسناهم وهمة يونون...كعدهم عدل وگاللهم تحجولي كلشي عن البنات اللي تحارشتو بيهن وحتى البنية اللي انسجنتو بسببها واليجذب ارجع اضربه مثل قبل شوية...
علي...طلبت يحجون القصة كلها ويبدون بقصة ملاك...وگلت لمؤمل يصورهم ...حجو كلشي وحتى اكو بنات حالتهن مثل ملاك...بس اهلهن سكتوا يخافون من الفضيحة...هم يحجون واني دمي يفور عليهم...بس ما راح اسوي شي...محضرلهم شي اخليهم يتمنون يموتون...طبعا سألتهم انو متندمين على اللي سويتوه....بس أجاباتهم طبعا اني حضرته على انهم ما متندمين...وما خليتهم يجيبون اي اسم بنت...حتى ما افضحهن بالغلط...يلا شباب خلونه نذب الزبالة ونرجع لاهلنا...تركناهم بمكان قريب على المدينة يعني يگدرون يوصلون مشي...اخذنا السيارة غسلناها...الاقنعة رميناها...واخذت التصوير...ورجعنا لبيت عمي عمران...مؤمل اريدك تعدل على التصوير وتغير اصواتنا وكم شغله تقطعها من التصوير...تكدر ؟...
مؤمل ...اي اكدر...سهل هذا الشي...وبعد شنو اسوي...
علي...واريدك تدزها من الحساب الوهمي...للصفحات اللي تحب الفضايح...يعني الصفحات التعبانة والمعروف عنه مشاكل...خليهم ينشرون الفيديو...
احمد...علي والله كلشي ما مفتهمين منك...احجي احنا شسوينا اذا تركناهم بس كتلناهم كتل خفيف..
علي...راح افهمكم...اول شي ردت احارب اشاعات على ملاك...اشاعات اقوى منها او هي مو اشاعة لا ...تصوير ومؤكدة... هنا راح اخلي الناس تعرف المقصود انو البنت بريئة والناس تصدك باللي تسمعه بدون ما يتأكدون...زين شلون اذا يشوفوه ويسمعوه...راح يعتبروه من المسلمات...لهذا صورتهم وهمة يعترفون وانشرهم على هيج صفحات حتى يوصل لاكبر قدر من الناس...وخليت الضرب بس على ظهورهم حتى ما يبين متعذبين بالتصوير...وبالاخير سألتهم عن الندم وخليتهم يجاوبون بلا...حتى ما تتعاطف الناس وياهم...اما عقابهم... راح نشوف ردة فعل الناس...اني حاليا متوقع يموتون...لان راح يصير تحريض عليهم من قبل الناس بالفيس...
احمد...اسمع علي يحجي واني ما مصدك شنو اللي يحجي... هذا علي اللي يسوي هيج... حتى احنا ورطنا وياه...معقولة ما يگول يمكن يسجنونه لان حرضنا على القتل...
علاء...هسة اني فهمت خطتك...بس ليش الاقنعة والطين بالسيارة وتغيير الصوت بالفيديو وهاي الامور...
علي...كلها علمود اذا بقوا ما ماتوا ما راح يعرفوكم...ولا احد يشك بيكم لان انتو كل صلة ما عدكم وياهم....وهاي كل القصة...الشباب ضاجو مني لان خليتهم يسوون هيج...وهذا حقهم ...بس لو مخبرهم من البداية على الاغلب تفشل خطتي...بس النتائج ننتظرها بالايام الجاية...
ملاك... حاليا اني ادرس للامتحان التمهيدي ...وعلي جابلي مدرسين خصوصيين للبيت...من يجون يدرسوني يكعد وياي احمد او امي ام محمد...وتعب كلش الدراسة ...كمت اشتاق لعلي اكثر يوم بعد يوم...وانطاني وعد يسويلي مفاجئة اذا نجحت...بس علاقة علي واحمد هالايام متشنجة شوية...ما اعرف ليش حتى آيات من تسألهم ما يجاوبون...المهم كم يوم واجا احمد لعلي كاله محتاجك بشي طلعو همة والشباب ...
احمد...بالفيس انتشر الفيديو بشكل مو طبيعي والناس بدت تهدد تريد تقتل السكاره...وبعدها كم يوم انتشر خبر جماعة كامشتهم وضاربيهم لدرجة واحد منهم حالته خطرة بالمستشفى بس ما مات احد...رحت اتأكدت منهم طلع الخبر صحيح... وحتى ابو حالة خطرة مستقرة حالته...اجيت للبيت واخذت علي والشباب... وسولفلتله على كلشي...بس علي مثل الما مقتنع من النتيجة... علي ليش ضايج المفروض تفرح لان هسة ملاك سمعته رجعت وعرفو الناس هي بريئة...وذولة تعاقبو ووصلو قريب الموت...
علي...تعتقد لازم افرح؟؟...هيج نماذج بس الموت يعدل طريقها...اما النتيجة اللي تتكلم عنها نعرفها بعد ما يطلعون من المستشفى...اما يبطلون يعتدون على عرض الناس...او تصير موتتهم على ايدي...وبالنسبة لسمعة ملاك مع الوقت راح تطلع براءتها للناس...بعد نقاش طويل ويا الشباب رجعنا للبيت...بس بعدني ما مرتاح منهم راح اظل اراقبهم واتصرف وياهم اذا رجعو مثل ما كانو...بس بعد ايام اجو ناس من العشائر واتفقنا نجلي السكاره واهلهم من مدينتنا حتى نخلص من شرهم للابد...طبعا بعد ما تبرأت عشيرتهم منهم...من صار هيج ارتاحيت...بقى بس احضر المفاجئة لملاك...ما اعرف ليش بس احس انو لازم اعوضها عن كل لحظة انظلمت بيها...صحيح ما اكدر ارجع حياتها مثل قبل...بس راح احاول اخليها احسن...رجعت للبيت نفس كل مرة بعد صلاة المغرب...صاحتلي امي لغرفتها...دخلت سلمت عليها وبست راسها...
ام محمد...هلا يمة شلونك وشلونه شغلك؟؟..
علي... الحمدلله يمة ماشية الامور تمام... محتاجة يمة شي مني...
ام محمد...اي والله يمة ...عندي موضوع وطلب صغير منك...
