علي...بعد ما عرفت قصة ملاك وشنو صار ظليت افكر الليل كله...وما حسيت على نفسي من نمت...ثاني يوم اجاني محمد كعدني ...طبعا اني هل الايام لا شغلي ولا المضيف اطلعلهن...المضيف خليت عمي فاروق يشيل همة... والعيادة...وياي دكتور شريكي يمشي امورها...واني راح اظل تقريبا شهرين مصبوبة رجلي... اخذني محمد للصالة لگيت امي جاية من المستشفى...وتعرفت على ملاك لگيتها تحجي وياها وتضحك وملاك مبتسمة...من شفتها تذكرت قصتها...واخذت عهد على نفسي اخذ حقها ما دام هي عندي وبيتي...دخلت سلمت والكل ردو السلام...انتبهت لملاك غيرت كعدتها وتوترت شوية.....ها يمة شلونج وشلونه امير؟؟...
ام محمد...هلا يمة...انت شلونك..
علي... الحمدلله يمة...بس كسفتني هالكعدة...وتعبت اخوتي وياي وضوجتهم...
محمد...تحجي صدك علي؟؟...اذا اخوي ما اداريه من اداري...منى ام عطوب...
الكل...يضحك...
منى...شبيها منى ...منو كتل روحه عليها بالكلية...اني اعلمك..
محمد...ولج مو قصدي طلعت بالغلط هل الكلمة...ماكو احلى منج بكل الكون...
علي...صارلي ساعة واكول اخوي..واخوي...طلع بوخة يخاف من مرته...والله يا الله...
محمد...ولك منو بوخة...ترا بعدها ملاك ما ماخذة عليك...انطيها مجال وتخليك مثلي... ماكو زلمة ما يخاف من مرته...
الكل...يضحك...
ملاك...بعد ما نمت بالليل...كعدت الصبح وكعدت آيات وياي...صلينا وغسلنا ونزلنا...لگينا مرة جبيرة بالصالة هي ومنى ...راحت آيات عليها وشبگتها وباستها براسها...عرفتها هاي امهم...بس شكلها حلو رغم كبرها...الوجه احمر ونوراني..ومبينة طيبة...بس ما اخلي املي جبير يمكن ضايجة على ابنها...وراح تأذيني او تسمعني شي مو حلو...من دخلت الصالة شافتني...وباوعتلي وابتسمت...وسألت آيات ...يمه منو هالوردة تعالي بنيتي ابوسج...رحت سلمت عليها وبستها...وكعدنا نسولف...
ام محمد...يمه شنو هالجمال...والله بالعافية على عليوي هيج بنية تاخذ النظر...ولو اجيتينا بظروف صعبة شوية...بس اذا گام عليوي بالسلامة والله الا اسويلج عرس تحلم كل بنيه بيه...
ملاك...من سولفت ويا ام محمد...كلبي ارتاح شوية وذكرت امي بيها...صحيح طلعت من يمها بارادتي بس اني ادري بيها ماكو بيدها شي من جانو يظلموني...وهي تتأذه بگدي...بس بديت اقتنع اللي سويته صح يمكن خلاصي عدهم ...واحنا نسولف دخل علي...شفته وارتبكت غيرت گعدتي هو ما حچه شي وياي سلم علينه وعلى امه وبدا يسألها عنها وعن اخوه الصغير...وبعدين صار يحجي على محمد ويقصف بيه وشفت سوالفهم حلوة ومتراهمين بيناتهم...بس رغم كل ذاك الشقة علي ما ضحك...واذا ابتسم يبتسم ابتسامة استهزاء صغيرة..من يگول شي يجرح مقابيله...بس اهله يعرفون متى يكون جاد لو يمزح...بس اني ما افرق لان نفس الوجه البارد دوم...
علي...اي يمة ما گلتي امير شلونه...
ام محمد...لا يمة اليوم امير رحمة الم عنده بس قليل والدكتور يگول اسبوع ويطلعه ..ورجليه هم احسن ان شاء الله يگوم بالسلامة..
ملاك...عدت الايام...ووضعي طبيعي وماكو احد انطاني كلمة او فعل مو حلو...علي كللهم محد يتقرب مني او يأذيني...وهمة بدون كلام علي ما راح يأذوني لان ناس طيبين...لان آيات بعمري صارت علاقتي قوية بيها ونسولف ونسهر سوا...ونحجي على مواضيع هواي...بس اكثر موضوع نحجي بيه هو علي...عرفت علي ما كان دائما هيج هادئ....صح لسانه هيج من الصغر...بس كان يضحك ويمزح مثل اي شخص...بس وفات اخته الصغيرة وابوه بعدها بأيام خلا يدخل حالة كآبة كم شهر قبل لا يتحسن شوية...حاولت اعرف ليش توفت اختهم الصغيرة وابوهم...بس آيات ما رضت تحجي...وهاا غرفة علي مو اني انظفها...تنظفها آيات وترتبها وحتى ملابسه يمها بس مرات منى هم تنظفها...هي ما ممنوعة على احد بس هم متعودين هيج وهم يخافون من علي فيچفون شره...طبعا اني بعدني ما ارتاح يم علي...بس علي بده يطلع للمضيف وللمستشفى علمود فحوصات واخوه الصغير...مر اسبوع على هل الحال...حتى وصل يوم خروج اخوهم الصغير من المستشفى ...وسوو غدا جبير عزمو بيه كل العائلة اعمامهم واخوالهم... وتكولي آيات هم علمود يتعرفون عليج ويحذرهم علي من يتقربون الج او يأذوج...
علي...ضجت من كعدة البيت واشوف ملاك ما ترتاح واني موجود ما اعرف ليش تخاف مني هيج...وهم ظليت افكر شلون ارجع حقها بس بدون ما اذكر الناس بحادثها ...قررت اطلع للمضيف واشوف الناس وهم اوصي الشباب يعرفون عن ذولة السكارى...مرت الايام هيج بدون شي جديد بس اشوف ملاك بدت ترتاح لآيات بس محد يعرف قصتها غيري وجها التعبان والحزين تغير شوية بس مو ذاك التحسن...كل ما اشوفها اتذكر قصتها وانقهر...مر اسبوع واجا يوم يطلع امير من المستشفى ...امير ما يگدر يمشي لوحده يحتاج مساندة يرتكز عليها يلا يگدر يوگف...عرفت من الاطباء الضربة صارت على اعصاب رجله اليمنى قوية ويحتاج عملية الها والعملية ناجحة ويرجع مثل قبل...بس لازم بالخارج او باربيل لان امكانات مستشفياتنا قليلة ...وبعد ما استشاريت الدكتور اكثر قررنا نسويها باربيل بعد اكثر من شهر...المهم قررت اسوي غدا واجتماع عائلي...
آيات...قبل يوم من الغدا...رحت لعلي...علوش باجر راح يجون كل اعمامك واخوالك شلون بيها ملاك...
علي...ما فهمت شنو الشلون بيها؟...
آيات...قصدي خاف يذبولها حجاية او يصيحولها فصلية...او يأذوها...
علي... لا تخافين اني كنت مقرر اعرفهم عليها واحذرهم يتقربون منها او يأذوها...فكرت قبلج بهيج احتمالات بس انتي هم ديري بالج عليها من بنات عمج..
آيات...ان شاء الله...ما راح اخليها لوحدها...بنات عمك مثل الحياية...حتى اني ما اسلم منهن..
علي... لا تخافين اني اعرف اتعامل وياهن...خلص اليوم واجا ثاني يوم والتحضيرات بدت للغدا اخواتي المتزوجات اجو يساعدون امي والبنات بالطبخ...لان عائلتنا جبيرة وهم اخوالي راح يجون...بس اني مو همي بنات عمي...بنات عمي ما يگدرن يسوون شي گدامي...همي عمتي اللي ما تسكت ابد حتى لو اني موجود او اي واحد من اخوتها...لان هي اكبر وحدة بيهم يعني حتى اكبر من ابوي...وما اگدر اردها لحدها بس لان محترمها...صحيح ما اگدر امنعها تحجي...بس قررت اخليها تحجي بمكان ما بي ناس هواي حتى اگدر اردها واسد الموضوع بدون ما تتأذى ملاك...
يمكن الواحد يتسائل ليش هيج اهتميت بملاك يمكن حبيتها...لا ما حبيتها بس لان انطيتها كلمة احميها من كل شي حالها حال اخواتي ولان اخاف تأذي نفسها...وهم بسبب شفقتي عليها وعلى وضعها اللي انظلمت بيه...
ملاك...كعدت من الصبح اني وآيات صلينا وسبحنا ونزلنا ...وبدينا نحضر للغدا من الفجر وام محمد ويانا...بالمناسبة كمت اصيح لام محمد يمة وهي كلش فرحت بيا من صحتلها يمة...وللساعة 7 اجو اخوات علي المتزوجات ..انوار وريم..انوار حبابة وتتشاقة وياي وتحبني...بس ريم ما تتقربلي وكلامها وياي بس بالضروري ما تحجي زايد ...بس هم ما كلتلي كلمة مو حلوة...يمكن لان تخاف من علي...صارت الساعة 10 كملنا اكثر الغدا وبدو اعمام علي يجون...اني شفت اعمام علي بيوم ما اجيت...بس ما عرفت اسمائهم...سولفتلي عنهم آيات ومدحت بيهم وهمة كلهم واصلين بالحكومة حتى عمها التاجر عنده معارف بالحكومة...والثاني مدير عام والثالث قاضي...بگلبي كلت لو غيرهم كان مسحو عائلتي من الوجود بس لان علي عاقل...ما رادها تصير دم...واعرف راد يقهر اهلي بيا بس صار العكس... ماكو احد انقهر بس امي واختي...اوووف تذكرتهن واشتاقيتلهن بس هنة وگفن وياي بمحنتي اريد اسمع اخبارهن...بس اخاف اكول شي لا يتغيرون عليه...شفت بنات عم علي صدك حلوات وياخذن العقل... بس يباوعلي بنظره كره ما اعرف ليش...گلت يمكن لان يحبن علي واني صرت اله غصب عليهن او هيج شي...ما يعرفن اني ما عندي اي مشاعر لعلي بس احترام وخوف لا اكثر...صارت الساعة 11 اجت عمة علي ...مرت من يمي ودفعتني عن طريقها وحتى ما سلمت عليه ودخلت غرفة علي...لان علي بغرفته...شوية واجتني آيات تگلي علي يريدج بغرفته ...استغربت صار اسبوع ما كلمني اي شي...شنو اللي يريده مني هسة... رحت اني وآيات لگيت علي وعمته يمه...استئذنت ودخلت...
علي...بيوم الغدا اجو عمامي واخوالي ...وصيت آيات على ملاك...وكلتلها اذا اجت عمتي دزيها لغرفتي وتعالي وياها...للساعة 11 اجت آيات كلتلي عمتي اجت ومن دخلت دفعت ملاك...گلت هاي ما تخلص على خير اذا ما اتصرف...دزيت على عمتي وملاك...شوية اجت عمتي وسلمت علية وسألتني عن صحتي واذا عندي الم وهيج اشياء...وراها بشوية اجت ملاك استئذنت ودخلت...ملاك قفلي الباب وراج...
