علي...ابشركم امير طلع من العملية والطبيب يگول لحد الان ناجحة بقى بس يشوفون نتائجها من يرتاح امير ويكعد من التخدير...
ملاك... انوار من الفرحة هلهلت... وكل ذاك القلق اختفى بلحظة...اني فرحت وياهم...واضحك... وشوية وصاحلي علي ....
علي...ملاك تعالي وراي....
ملاك...تفضل علي محتاج شي...
علي...لا سلامتج بس بسبب قلقي نسيت اخليج تتصلين بامج...يلا اتصلي قبل لا يرجعون ابوج واخوج للبيت...
ملاك...صدك ذكرتني من القلق نسيت هم...
علي...اتصلت على امها وانطيتها الموبايل...ظل يرن الموبايل...وملاك منتظرة..مثل عطشان منتظر الماي...ومثل حبيب ينتظر يسمع صوت حبيبه....ردت ام ملاك...
ام حسين...الو...الو شيخ علي...
علي...ملاك ساكته سمعت صوت امها... ودموعها جرت ما تسيطر على نفسها... واختفت الكلمات من لسانها...ما تعرف شنو الكلمة المناسبة تكولها لامها ...بعد لحظة هدوء و ام ملاك تحجي بالخط وتصيح شيخ...واخيرا نطقت كلمة واعتبرها افضل كلمة بعد فراق...
ملاك(تبجي)...يوم....ولج يوم اشتاقيتلج...
ام حسين...(بدت تبجي ومتفاجئة)...ولج بنيتي ملوكة يا عمري...شلونج يمة والله بالي يمج واحس روحي طلعت من أخذوج مني...يمة والله البيت فارغ واظلم بدونج...كلشي بيه يذكرني بيج...وعيوني ما نشفت من الدمع عليج...
علي...ملاك تحجي ويا امها وزاد بجيها...
ملاك...يوم لا تهيجيني اكثر اريد اشوفج والله مشتاقتلج موت... اني آسفة على كلشي كلته الج قبل لا ياخذوني... سامحيني يوم...
ام حسين...يوم على شنو اسامحج...انتي سامحيني ما كدرت احميج...واشوفج تتعذبين واني اتفرج عليج بدون حيلة...
ملاك...لا يوم لا تكولين هيج...انتي وفطوم وكفتو وياي ...رغم همة متسلطين عليكم بس دافعتي عني هواي واجت ضربات بجسمج بسببي ...وجنت اطردج من الغرفة من يجي حسين اخاف يضربج هم...مو اكرهج والله...
ام حسين... ادري بنيتي ادري باللي بگلبج...بس اني اشوف شبابج وجمالج يضيع گدامي ...اشوف بنتي تختفي يوم بعد يوم...مثل واحد يحتضر ويموت يومية هيج جان گلبي يا يمة...
ملاك...يوم والله احبج واريد اشوفج...مشتاقتلج يت رويحتي يا يوم....
آيات...علي وملاك اختفو وين راحوا....اسمع صوت ملاك تبجي بس لا علي اذاها ...خلي اركض الها....وصلت لغرفة علي وفتحت الباب...شفت ملاك تحجي بالموبايل وتبجي... علي اشرلي انو اسكت وادخل يمهم...
ملاك...يوم شلونها فطوم مشتاقتلها...
ام حسين...يمة فطومة زينة...انتي شلونج وشلونهم وياج اذوج تعبوج...تقربلج احد... كوليلي يوم لا تضمين عليه...
ملاك...لا والله يوم كلش زينين وياي ومرتاحة ...وعندي آيات واحمد ومنى ومحمد...شايليني بالصلوات... حتى كمت اضحك من گلبي عدهم...ما ناقصني شي بس شوفتج انتي وفطوم...
ام حسين... الحمدلله يمة...الله ما ينسى عبده يهيء اسباب نجاته من الظالمة...وربج خلى حسين يكون السبب بخلاصج من ظلمه هو وابوه...
ملاك.. والنعم بالله يوم....
ام حسين...يلا يمة ابوج على جية...اتصل بيج بعدين...
ملاك...اي يوم ...علي راح يجيبلي موبايل حتى اتصل عليج منه...
ام حسين... أن شاء الله يمة...وديري بالج على نفسج... وزوجج ديري بالج عليه....وعيالج هم...وصيري الهم مثل بنتهم...ما اوصيج بعد بنيتي....
ملاك...يوم لا توصين اخليهم بعيوني والله...
ام حسين....يلا يمة مع السلامة...
ملاك...مع السلامة يوم....وامي غلقت الاتصال...تمنيت احجي وياها اكثر...بس اخاف عليها من ابوي وحسين...
علي...يلا ملاك كافي بجي...سمعتي صوت امج المفروض تفرحين...
ملاك...علي انت ما تعرف شكد امي عانت وياي...ولا تتصور شكد مشتاقتلها...اريد اسمع صوتها اكثر...
آيات...اسمع ملاك هيج تحجي وتبجي...اني لوحدي كمت ابجي وياها...وصارت بگلبي حسرة وگلت لعلي... علي ليش هيج فرقتها عن امها...مو خطية ملاك وامها... لخاطر الله رجعها لاهلها...
علي...(بعصبية)...آيات لا تفتين بشي ما تعرفينه...بعد اذا سمعتج هيج تحجين يا ويلج...من حجيت هيج آيات سكتت ومبينة تريد تبجي صار وجها احمر...تندمت لان حجيت هيج...جريتها وخليتها على صدري...يلا تبجين مو قصدي ازعلج...بس اكو اسباب تخلي ملاك ما تگدر ترجع...لو ما موجودة هاي الاسباب من زمان رجعتها لاهلها....
ملاك...شفت علي شلون عاط بآيات...وبسرعة راضاها...شفت بعيونه محنة عليها ..تمنيت احد يحن عليه مثل ما علي يحن على اخواته...بس شسوي اخوي هو اللي ظلمني وظلم امي وياي...بس الحمدلله على كل حال...خلصت الايام وماكو شي بس اخبار امير جاي يتحسن يوم بعد يوم...البيت بيه فرحة ما تنوصف لاجل امير... خلصت الايام وعدت اسبوعين...قرب موعد يفتحون الصبة من رجل علي...وموعد رجعة امير واللي وياه...قرر علي يسوي ثواب بمناسبة شفاء امير...ويعزم اقاربهم...
