من أكون؟

البارت الاول...حدث مفاجئ

بسم الله

علي الديواني

اسمي علي عمري 26 سنة ...اعيش ويا عائلتي ... طبعا ممتزوج وما افكر حاليا بالزواج... اللي ما تعرفوه عني اني طبيب بيطري وشيخ بعد ما توفى ابوي قبل سنة انجبرت اخذ الشيخة بس وياي أعمامي يعاونوني على المشاكل والطلايب مالت الناس...طبعي بارد يعني مو بس مجرد هدوء برود بما للكلمة من معنى ...بين قوسين ما يفاجئني شي ولساني حاد مثل السجينة وما اخاف من احد او اعتبر لاي احد وقت الحق..عائلتنا متكونة 4 اولاد و3 بنات حاليا وامي الغالية
نبدي قصتي...بيوم من الايام كنت راجع من عيادتي المغرب بعد يوم شغل تعب...ووياي اخويا الصغير وفجاءة ضربتنا سياره من الجانب كانت طالعة من الفرع بسرعة....صارت الضربة من جهة اخوي الصغير...وفقدت الوعي ما اعرف شصار بعد...

مرحبا اسمي محمد اخو علي الاكبر اني خريج تربية ..بس ما متعين لان عندي محلات جملة ملابس واكسسوارت نسائية...ما اخذت الشيخة لان عندي عملي اهم منها ومن المشاكل... وعمري 29 سنة ومتزوج وعندي طفلة عمرها سنة
محمد.. جاسم تعال جيب الملابس من المخزن ودزهن لحجي عماد قبل لا نعزل
جاسم...صار استاذي هسة اجيبهن
محمد...بهل الاثناء اتصل بيا علي ....دوم يتصل علية يوصيني على غراض..الو ابو حسين ...
المتصل..الو السلام عليكم...
محمد...وعليكم السلام منو انت اخي
المتصل... حبيبي صاحب الجهاز مسوي حادث ونقلناه لمستشفى ال*****...وانت اخر رقم متصل بيه واتصلنا بيك
محمد...شنوووو...اخوي مسوي حادث...هسة جاييكم...من سمعت الخبر رجليه بعد ما احس بيهن وما اعرف شلون ركضت للسيارة وسقت بكل سرعتي احس الطريق ما ينتهي بعد حتى وصلت المستشفى...دخلت سألت عن اشخاص صار بيهم حادث كالولي جابو 3 اشخاص متأذين بالحادث وواحد منهم حالته خطرة...
ركضت بسرعتي لصالة العمليات بالطوارئ...ولگيت الدكتور
محمد...ها دكتور بشرني اخوي شلونه..
الدكتور ...منو حضرتك؟
محمد..دكتور اني اخو علي اللي متعرض للحادث بشرني دكتور..
الدكتور...علي حالة مستقرة بس اغماء عنده وان شاء الله بخير...بس الطفل اللي وياه حالته خطرة ولازم نراقبه لان صارت الضربة من جهته..
محمد...دكتور يا طفل؟ ادري بس علي وحده...من گلي الدكتور عن الطفل ظلمت الدنيا بعيني وتوقعت يكون اخوي الصغير وياه...واتمنيت يكون توقعي غلط بس صدك طلع امير ويا بالسيارة...گمت ادك على راسي وابجي...
خابرت احمد اخوي الثالث وفهمته ما يگول لامي اي شي ولا يبينلهم شي...
احمد..السلام عليكم اعرفكم عليه اني احمد عمري 20 سنة طالب هندسة مرحلة ثانية...اني جسمي حلو ورياضي عكس محمد اللي شوية سمين او علي اللي شوية نحيف 😂😂
يعني تگدرون تكولون اني احلى جسم عندي ...بس رغم ذلك علي كوجه احلى مني واغار منه علمود هذا الشي...البنات كاتلات نفسهن عليه 😒😒..المهم
اني انتظر العشى...واجاني اتصال من محمد
رديت عليه..
احمد..الو حمودي
محمد...احمد اسمعني راح اكلك شي ولا تگول او تبين لاهلك اي شي ...
احمد..اوك بس خير شصاير؟؟..من كلمني هيج محمد گلبي بدا ينغزني ما سامع محمد يوم صوته هيج تعبان من يوم توفى ابوي..
محمد..علي صاير بيه حادث بالسيارة هو وامير...اريدك تجيب اعمامك واولاد عمك وتجيني لمستشفى ال*****..
احمد...شنوووو...
محمد...اششش على كيفك لا يحسون اهلك بشي يلا بسرعة..
احمد...من كلي محمد هيج وجهي گام ينطي الوان...وامي انتبهت عليه تغيرت...وسألتني
ام محمد...ها يمة شبيك اشوفك ما مرتاح ... اكو شي مضوجك... مأذيك؟
احمد...لا يمة بس علي عطلانة سيارته وهو بالطريق راح اروحله واشوفه ...
ام محمد...اي يمة والله اتأخر واليوم امير وياه يريد يشوف شغل اخوك وفرحان من الصبح طلعو...وظل بالي يمه ...
احمد...لا يمة لا تخافين هسة اروح واشوفه ومحمد هم وياه واگف لا تخافين عليهم...
طلعت ورحت لعمامي كلتلهم على الصار وطلعنا كم سيارة للمستشفى..
محمد...ورا ما خابرت احمد ...رجعت للدكتور وسألته على حالة امير...
الدكتور.... امير الضربة لاحته على جانب ظهره الايمن...وعنده نزف وتهشم بالكبد ورضوض وكدمات قوية بظهره كدرنا...نوگف النزف بس الباقي يم ربك...ادعيله يگومه بالسلامة...
محمد...زين دكتور وعلي شلون حالته ؟ الله يخليك گلي
الدكتور...علي حالته مستقره...لا تخاف عليه بس عنده كسر برجله اليمنى ورضوض متوسطة وخفيفة بباقي جسمه وجرح براسه بس كلهن ما بيهن خطر على حياته..
محمد...من گلي هيج الدكتور ما اعرف افرح لسلامة علي لو ابجي على حالة امير...بعد ما اعرف اتصرف بس الدموع تجري...وبهل الاثناء دخل احمد وعمامي..وسولفتلهم كلشي..
العم فاروق....يا بوية ولد العزيز ...شلون صار هيج منو سوالهم هيج بس كلولي اليوم اخلي دمه بطوله....
محمد...اني نسيت سالفة الولد الدعمهم من ورا حالة اخوتي..والله عمي ما ادري بس اللي اعرفه جابو واحد هم بنفس الحادث وما سألت عليه... واحنا نسولف دخلو ناس يسألون عن الحادث...وعن الولد عرفنا انهم اهل الولد المسوي الحادث...احمد راد يتعارك وياهم بس عمي الصغير عمران منعه وصاح عليه...
العم عمران... احمد اكعد راحة شوية خل نشوف اخوتك شلون يصيرون وبعدين نتفاهم وياهم...
احمد...عمي شلون تريدني اكعد وبسببهم المصيبة اللي احنا بيها...واني احجي هيج رد عليه عمي الثاني محمود...
العم محمود...احمد مو همة السبب ابنهم السبب وخل نشوف ونعرف ليش صار الحادث منو السبب ....
احمد...عمي هو السبب ما سمعت يكلك ضاربهم من الجانب...وبعدك لسا تريد تعرف السبب..
العم فاروق...ولك احمد لا ترفع صوتك على عمك احجي بادب...
محمد...من صاح عمي فاروق على احمد ....احمد سكت وما حجه كلمة بعد...ورا شوية اجا رجال جبير بالعمر سلم علينا...وعرفنا انو ابو الولد...
ابو الولد...السلام عليكم...
العم فاروق والبقية ...وعليكم السلام
ابو الولد...عمي اني ابو الولد اللي سوا الحادث بولدكم واجيت اشوف شنو تأمروني واني حاضر...
العم فاروق...احنا ما راح نحجي باي شي اذا ما نعرف تالية ولدنا وبعدين نحجي بكلشي...
ابو الولد...عمي حقكم...واللي تردوه يصير ....اني اترخص منكم...
العم فاروق... مرخوص براحتك..
علي...كعدت من النوم عبالك كنت بحلم...بس جسمي كله يوجعني وخاصة رجلي...اني من النوع اللي اشوف البجي والصياح ضعف...واني بكل ذاك الالم ما صحت ولا بجيت بس ضليت اون واصك بسنوني..وصحت لمحمد واحمد..
محمد.... سمعت صوت علي يصيح عليه وعلى احمد من غرفة المرضى ...رحتله ركض ولگيته يون من الالم...
هاا خوية شلونك.. الحمدلله على السلامة.. والله وگفت گلوبنا عليك خوية...
علي...ما عليك بيا اني ما بيا شي...امير وين ...گلي امير شلونه..
احمد..من سمعت علي يصيح رحت اني وعمامي وولد عمي ورا محمد..ومن سأل على امير...احس بيه يحز بگلبي..
خوية ابو حسين ...اموري ما بيه شي بس انت گوم بالسلامة...
علي...ولك احمد من لمتة انت تعرف تجذب عليه گلي امير صار بيه شي...لا تخليني اعصب عليكم...اني احجي هيج والالم ياكل بيا...ودور هذا ما يعرف يجذب...ومن جذب خلاني كلش اقلق على امير..
العم عمران...بوية علاوي حالة اخوك شوية خطرة وهسة هو بالعناية المركزة اي شي يصير راح نگلك بس انت ارتاح شوية...
علي...بوية شلون ارتاح واخوي يريد يموت...انتو تحجون من عقلكم... خلوني اشوفه.. يلا گوموني اروحله...
محمد...بهل الاثناء واحد من ولد عمي جاب الدكتور..وضربه ابرة مهدئ حتى ينام...