زوجة للتجربة

البارت الاول

-كومن يمة كفن البيت هسة ابوجن على جية حضرن العشة بسرعة المسكين تعبان ومال من خدمة الناس يلة كومن
-اي يوم هسة بالعجل نسوي عشة
اكلج امل اليوم عليج العشة موو
-هاا خاف ماتقبلين اليوم عليج لاصيرين لوتية
-خاب شبيج سويه بدالي مابية مالي خلك حبابة
-اكيد مالج خلك من الافلام حاطة راسج بالتلفزيون من العصر الهسة
- اووف هاي شبيج حتى انتي مو كافي علية نك امي براسي لعد وين اولي ضايجة ختنكت من البيت
-كافي ولج تشكين حسوي العشة بس اسكتي
-اوي فديتج شلون اخت موووواح
-اي اصبغي بيه بهلحجي
اجة ابوية وسلمنة عليه وصبينالة عشة تعشة خطية وشرب جاي كلب بالتلفزيون شوية ونام بعد مالعب وية عبوسي حبيب الگلب
*اني امل عجيب اسمي عكس شخصي انسانة خالية من الامل اعيش ليومي فقط لا لغدي
اني يتمة ..اي بلي يتيمة كان عمري خمس سنوات وتوفت عائلتي في يوم مشؤم جانوا ناوين يزورون ابوية امي واخوية سيف عمره ثلاث سنوات شاءت الاقدار ان امرض بهذا اليوم بذات تمنيت رحت وياهم ولاقيت نفس مصيرهم ولا اعيش خالية من ريحتهم ..في يوم الراحوا بيه تمرضت وخالتي سليمة مقبلت ياخذوني كالت خطية تتعب وهي مريضة بقوهة يمي كانت بنفس منطقتنة بعد كم شارع ..راحوا اهلي وبعد مارجعوا حادث سيارة انهى حياتهم وحياتي
اني مااذكر ملامحهم بس شي قليل واحتمال مو ذاكرة انما اقتباس من صورهم القديمة
عشت بيت خالتي سليمة الي حاولت متقصر وياي وتجعلني احدى بناتهة بعد وفاة اهلي بقيت بيت جدي الي هو كان سكنه اني واهلي ساكنين بيت جدي كبير ومملي ناس بقيت يمهم للاربعين مالت اهلي واجت خالتي سليمة تشوفني من شافت وضعي جوعانة وتعبانة وصخة وكئيبة طفلة فقدت مرة وحدة اهلهة ودلالهة شلون حيكون حالي .خالتي مقبلت تبقيني يمهم تعاركت وية عماتي ونسوان عمامي واخذتني يمهة كالت من ريحة الغالية وتربة حالهة حال بناتي
وصح ربيت حالي حال بناتهة الاربعة وصرت الخامسة حتى اسميهة يوم وزوج خالتي يابة ..خالتي مكان عدهة ولد شكد حاولت ماكو جانت تموت على ريحة الولد ومن عشت يمهم بعد مدة حبلت وسبحانه الرزاق اعطاهة ولد
جانت دائما دكلي گصتج خير علية وتبوسني بگصتي
بيت خالتي بيت بسيط عائلة بسيطة ام طيبة بس من طكات قبل تحب البنات بس ماعدهة اهتمام بعدين تعرفون شلون ..زوج خالتي رجل بسيط فقير لايدنة يم المشاكل ولا يقربلهة بعد ماعشت وياهم غيروا مكانهم اخذو بيت ابسط وباقي الفلوس فتح گهوة عيشتة عليهة وعيشتنة كذلك
عشت وية بنات خالتي وحسبني اختهن ناكل سوة نام سوة نلبس نفس البس يعني ملابس الجبيرة يصيرن للازغر وهيج دبرناهة
خالتي عدهة نظام ميصير تزوج الزغيرة الا بالاول الكبيرة لازم نمشي بسرة
ازوجن ثلاثة من بنات خالتي
الكبيرة جنان اخذت موظف حكومي من منطقتهم
وخلفت بنت وهسة حامل بولد وبين يوم ويو تجينة
والثانية حنان ازوجت ابن عمهة بغير محافظة وهسة حامل
ورباب ازوجت واحد غريب عسكري عن طريق اختة بنفس منطقتنة ولسة مصار عدهة شي
واحلام بعدهة وياي ممزوجة بس حاجين عليهة بيت عمتهة ولد حباب عندة اسواق وهي فرحانة لان خوش عائلة ..هي اقرب وحدة الي بحكم العمر اكبر مني بسنتين
الحلو بطبع بنات خالتي عدا كونهن حبابات وطيبات عدهن طبع حلو ميغارن ولا وحدة تفكر بشي مو الهة هيج ربتهن خالتي وربيت وتعلمت مثلهن
خالتي سليمة حبابة وطيبة بس تفكيرهة محدود عدهة افكار متشددة ومنغلقة بشكل عدهة اهم شي البنية تعرف تشتغل ونظيفة وتقبل بكلشي لاتناقش ولاتحجي بطلت بناتهة حتى يساعدنهة بلبيت واني بطلت بثالث متوسط من شفتهن كلهن مبطلات بطلت على الواهس واني هماتين مو شي بدراسة فاجتني من الله عبالي هيج احسن الي مادري شهادتي سلاحي

ولحكايتي تتمة