زوجة للتجربة

البارت الثامن

عد الزيارة باسبوع اجتي علينة عمة جنان وامي ماقبلت اطلع
بس هي كايلة الخالتي اريد اشوفة اجتني خالتي
_يمة امولة اطلعي سلمي وارجعي لاظلين كاعدة خوش يمة
_اي يوم
دخلت شفت عمة جنان وزوجة ابنهة وجنان رحبت كلش بية المرة وكعدتني يمهة وكل شوية تباوعلي وتضحك عاد شفت خالتي خزرتني ترخصت وكمت
وتعلمت من احلام اتنصت ورة الباب هو هذا اليرافك حلووم
_عيني ام عبوسي اي رسينة على بر احنة شارين البنية وشارين عشرتكم فلا طولين علينة السالفة
_ عيني شطول البنية زغيرة ومااريد ازوجهة هسة خليهة يمي شنو مستثكلة لكمتهة اشو هي بمعزت روحي
_ فدوة العينج مو بكدهة زوجتي رباب
_ رباب وحد جانت فاهمة وخشنة هاي فقيرة واخاف عليهة
_ اكلج عمري شنو راح نحصد عليهة لو نكرب ثقي اخليه سنة سنتين مجيس شغل بالبيت ولا تسوي شي بس رايدتهة فرحة لوليدي هو هاوي البنية وجايكم من الباب
_ الله كريم يجي ابوهة وندزلكم خبر
راحوا الجماعة واني بين فرحانة لان اجت امة وخطبت وبين ضايجة خالتي مطايقتهم بليل اجة ابوية وسولفتلة سمعتة يكلهة ليش ماتنطيهة همة خوش ناس والولد خوش ولد اذا البنية قابلة انطيهة
اسمعهة دكلة غل تولي نجيبة لو تلك السما بلسانهة مانطيهة امل
كالهة والله انتن النسوان ماتنعرفن
رجعت خبر خالتي بانهم ماموافقين كم يوم ودزوا مشية زلم على ابوية وهم خالتي عاندت وكالوا ماموافقين ظلوا كل فترة يدزون مشية ونفس الشي
من تجي جنان كلبي يطير وخاصة هي متقصر لازم اذبلي حجاية يادزلج سلام يا يكول خل تصبر لازم اصير الي ومرة دزلي وردة شكد فرحت بيهة ومن معزتي الهة خليتهة بين كتاب مالت قصص قديم من الضوجة يمكن قاريتة مية مرة خليتهة بنصة حتى احافظ عليهة
بعد مدة اتفاجئت بجية مرة الخالتي خالتي عرفتهة جانت جوارين عيال جنان قبل اسمهة ام مازن هي نفسهة الشافتني بالعرس وسالت علية جنان
انصدمت من عرفت جاية تخطبني ونصدمت اكثر من عرفت خالتي موافقة بس تسألني على رأيي اجت فرحانة ورة ماراحت المرة وبس تمدح بيهة ودكول خوش ناس اولاد حمولة ..
لعد شبيهم عيال جنان وشناقصه محمد ؟
سولفت الابوية وابوية كال خل اسأل عليهم
سأل عليهم كال خوش ناس هو ابنهم الجبير بالخارج والثاني خريج معهد ميكانيكي ومفتح محل تصليح سيارات وياه بالبيت امه وابوه
خالتي كالت اني موافقة بس خل نسال امل
صاحتلي وسالتني كدام ابوية واحلام وعبوسي اني خجلت وبطبيعتي مااحجي سكتت ودنكت وطلعت بس كلش اختنكت وكمت ابجي هي ليش ماسألتني على محمد
ليش على ذول اجت تركض فرحانة
رحت للغرفة واني ابجي لحكتني احلام ولج عوبة كومي كولي مااريدة ليش ساكتة كليلهة اريد محمد
_ تخبلتي شلون اكلهة اريد محمد
_ اي قابل مسوية علاقة وياه كليلهة عجبني
_ هسة دكول عندي علاقة وياه ونوب تتخبل علية
_ لعد ظلي اعوي مثل الزعاطيط
رجعت خبر خالتي لام مازن بالموافقة واجوا مشوا بس زلم واني مشايفتة ابنهم ولا فرحانة بالخطوبة
جنان موجودة بس كلش ضايجة ومقهورة شوية ونتكابل اني وياهة ونبجي رحت للغرفة ولحكتني
_ انتي ليش مارفضتي ليش ماكلتي مااريدة
_ شكول شحجي اني ماكلت موافقة وامي حزوجني
_ عززة لعد شلون هيج سوت امي
_ مادري مادري جنان فدوة عوفيني بقهري
__ انتي اعوفج بقهرج ومحمد شسويلي تخبل من عرف بيج نخطبتي
_ صدك
_ اي والله وكسر مواعين وكام يحجي على امي اني بقيت ساكتة حقه ليش رفضتة شناقصة هو مية وحدة تتمناه بس امج عاندت
_ لا هاي العوبة متعرف تحجي والله اوكف واكول مااريدة
_ عفية حلوم الايدة بالمي البارد مو مثل الايدة بمي حار
_ ليش هيج دكولين عبالك جابريج
_ مااكدر احجي مااكدر احس نكران جميل الخالتي
_ يانكران جميل هذا مستقبلج وحياتج مابيهة جميل وبعدين انتي اختنة شنو جميل
_ عوفني فدوة لاتجي امي وتشك بينة
خلصت المشيةوحددوا موعد العقد والخطوبة
سبوع واجت ام مازن جايبة عصائر وكيك وحلويات وكالت باجر اجي اخذ امولة اعدلهة علمود الخطوبة وخالتي فرحت بام مازن وكلساع وكالت ولد حمولة
ثاني يوم اجن البنات فرحت بجيتهن ومافرحت بالخطوبة حنان ورباب كلش مشتاقتلهن ونقهرت على رباب صارلهة سنتين مزوجة وهم بعدهة بلا خلفة
الله يرزقهة ويرزق كل محروم
ولحكايتي تتمة