زوجة للتجربة

البارت ١٤

نزلت لكيت عمتي كاعدة بالهول سويتلهة جاي وكيك دائماً اسوي كيك كليجة هيج اشياء الخير هواي ونشتهي هيج اشياء
اخذت الصينية وكعدت يم عمتي
_ اكلج عمة ذول جوارينة عدهم ولد زغير
_ اي عدهم عمرة اربع سنوات
_ لا اكبر تقريباً ١٢ او ١٣
_ مصطفى لازم رجع لابوه
_ منو هذا مصطفى
_ انتي وين شفتيه
_ من صعدت لسطح شفتة راد حمامته على سطحنة
_ نوب يربي حمام
_ شبي اشو مو طبيعي
_ اي حقه يصير مو طبيعي يمة مرت ابوه شوفتة نجوم الظهر
_ خطية لعد وين امه
_ امه توفت صار بيهة ذاك المرض دخيلك ربي وماتت وهو عمره ست سنوات ومن ذاك الوكت و هو معلعل
_ شنو موزينة وياه
_ مرت ابوه وحدة وكحة استغفر الله حتى شاكين بيهة سوالف موزينة ماتنجرع وابوه يخاف منهة مادري شمسويتلة عمل مادري شنو استغفر الله اشو لاصمته لصم من بزره
_ دخيل الله شمسويتلة
_ قبل جنت اساعده ادز عليه يمنة احنة ماعدنة احد اسبحه اوكلة الكاه ميت جوع
من عرفت لعبت بية طوبة خزتني بشارع عياط وصياح ولج يمة بحياتي مشايفة هيج وحدة عرمة كامت تهز الشارع بصياحهة وهددتني هاي المرة سويتيهة مرة الثانية اندمج اني هم خفت نوب لاتبليني بسالفة عفتة الولد بس هو خطية حباب وصخي من يشوفني اجي من السوك يجيني يركض يساعدني
_ خطية الله يكون بعونه..وين جان هاي الفترة مشفتة
_ قبل عرسكم سمعنة صوتهة وصياحهة دكلة ابنك باكني ميظل بلبيت الظاهر تريد تخلص منة وتهمته الهذا المسكين وداه ابوه الخالة كلمرة يودونة الخالة فترة وخالة يرجعة الهم
_ ليش خالة مايبقيه عنده
_ يكول ليش اربي بزره وهو بعده عدل خل هو يحير بيه..انتي يمة مالج علاقة بمصطفى وحتى اذا راد شي لاتحاجيه نوب لاتبليج بلوة هاي الحية
_ ان شاء الله عمة
من سمعت قصة مصطفى نقهرت عبالي اني قصتي تقهر بس تلاشت وية طفولة مصطفى المذبوحة ..قررت اساعد مصطفى
وماهتم بعواقب الامور حسيت يحتاج من يساعده ويهتم بامره واصور هاي مسؤليتي منا وهيج
انتظرت ليث يجي من الشغل وسبح وتغدة  وطلع اني استغليت الفرصة اخذت ماعون كيك وصعدت
لكيت مصطفى بسطحهم طبعاً الستارة بين سطحهم وسطحنة كلش ناصية واحنة ستارة على ستارة خليت الماعون على الستارة وكتلة عازمتك على كيك شدكول
رفع تك حاجب شنو المناسبة اعرفج تعرفيني
_المناسبة لان سالت هواي وضوجتك وبالنسبة للمعرفة خليهة بداية تعارف شدكول مو احنة جار وحايط على حايط الي حق يمك لولا
_ اتفقنة بس لاسالين هواي
_ مااسال لان انت حسولفلي كلشي بس مو اليوم اليوم ماالحك
_ انتي شكد لزكة
_ ههههه بعدك شايف مني
_ مادام جبتي كيك خوش جارة 
_ اكل بالعافية يومية حجيبلك
_ ليش يومية راح اشوفج
_ بكيفك اذا تريد ماشوفني
_ لا بس ليش اشوفج
_ حتة ندرس سوة
_ مو كتلج مبطل
_ اني هماتين مبطلة واريد ادرس وياك مو هيج احسن
_ صدك مبطلة مو جبيرة وعيب تدرسين سادس
_ هسة انت شعليك اني اريد ادرس هاا ويومية اجيبلك اكلة شكل حتة نقرة زين اتفقنة
_ اتفقنة
طبعاً فرحت من قبل يرجع للمدرسة هو عايد السنة شجعته على الدراسة وشجعتة يطلب من المدير يسامحه على الغياب ويخليه يمتحن وبديت ادرسه يومية قبل جيت ليث ودائماً اخذ وياي اكل اعزل حصتة واخذه الة يرتاح كلش من ياكل وادرسة احس هذا الولد فاقد هواي من مقومات الحياة الله يساعد كل يتيم
_ تدرين اكلج كلش طيب من اكل اكلج اذكر اكل امي ..سكت بغصة
_ الله يرحمهة هم تذكر شكلهة
_ اي يومية انام على صورتهة بالي
_ هنيالك
_ ليش هنيالي هي وينهة
_ على الاقل تذكر شكلهة اني كلشي مااذكر بس شايفة صورة الهة قديمة
_ انتي هم ماعندج ام مثلي
_ لا ام ولا اب ولا اخ ماتوا واني زغيرة
_ يعني انتي تهتمين بية لان يتيم مثلج
_ اهتم بيك لان محتاجة اخ بحياتي وانت اخوي منا وهيج ولاخ لازم يسمع كلام اختة الجبيرة تفقنة
ضحك وكال اتفقنة
مصطفى انت لازم تغير من حالك ومتكدر تغير اذا مصير شي ذات قيمة اكبر وادرس واخذ شهادة واطلع من بيت ابوك لا ظل يم احد اعتمد على نفسك بس بالبداية انجح واثبت الهم منو مصطفى
حسيتة كلش فرح بهيج حلم وهيج طموح و وعدني حيدرس زين وينجح
اجت امتحانات مصطفى وشد حيلة وكثرت ادروسي الهة بقيت اكثر وقتي وياه حتى اعمتي من تسألني وين رحت اطلع عذر لو نايمة بالغرفة لو اسبح لو اي عذر هي فقيرة اصدك بسرعة
ولحكايتي تتمة