زوجة للتجربة

البارت الثاني

البارت الثاني

خالتي نقطة ضعفهة عبوسي كلش تحبة ومتعلقة بيه وبكد مامدللتة جاي تسوء اخلاقه وجاي يتعبهة بس هي مامهتمة عدهة هو وبس اذا كعد من النوم يصير انذار لازم نحضر ملابسه واكلة ونحضر جنطتة وحتى مرات نحل الواجب هو هسة صف سادس بشافعات جاي ينجح ومااصو عنده مستقبل دراسي
-اكلج يوم اريد اسألج سؤال
-كولي يمة شتردين
-يمة سولفيلي عن امي سمية شلون جانت
-اووف يمة ليش تهيجين وجع گلبي خليني ناسية ولج جمرتهة بگلبي متطفة
-فدوة يوم والله اتمنى اعرف عنهة شي
- اي حقج ..امج جانت حضرية مو مثلي يعني تهتم بشكلهة وبدراستهة جانت دكول اهم شي اوصل للاريدة كملت دراسة مو مثلي اني وخالتج سميرة مدرسنة امج كملت وصارت مدرسة وبالمدرسة تعرفت على ابوج وخطبهة
وابوية الله يرحمه انطاهة
- يوم يعني امي وابوي جانت بينهم علاقة
- وانتي شعليج بهلسالفة بعد ازوجوا وخلفوج
-اريد اعرف كلشي
-لا لاتعرفين كلشي يمة شلون بنات يموتن على هاي السوالف
-زين يوم وين عاشوا من ازوجوا
-سكن وية اهلة مجان عندة يطلع اي اوووف وبدت مشاكلهن وياهة العرمات شدن وياهة لان ابوج يحبهة وهي حلوة وناسكة تخبلن منهة
جانت تجمع حتى يشترون قطعة سودة علية ماتهنت ولج حتى من صار الحادث مالكيت الفلوس بغراضهة اني اعرف مضمامهة ولا لكيت ذهبهة باگنة كلة من اجيت اخذج لكيتج مريضة عمت عيني عليج بينج وبين الموت شعرة اسم الله عليج اخذتج وداريتج وديناج لطبيب طلع بيج تيفو وبقيت نايمة بيج اسبوع بالمستشفى يلة صرتي زينة من رجعت الهن عاركتهن وطالبت بفلوس اختي وذهبهة كلتلهم حق امل هذا اشو تخبلن كالن ماكو كل فلوس وانتي طمعانة بامل مو محنة على بتهة عاد ابو جنان مقبل ادخل كال هي بعد شسوي بلفلوس خليهة يمنة حالهة حال البنات
اووف ياسمية يام اطول الحلو شنسة منج جانت كل يومين توتجينة بس تضحك يمة جنت اعاملهة مثل بنتي وهي كلشي بيهة ينحب جنت اكلهة شلون صابرة على حمواتج ونسوان حموينج دكول لخاطر كرار اتحمل كلشي اهم شي نبقى سوة
ياا اشو تبجين اني هم نسيت نفسي وحجيت كلشي يلة كومي يمة غسلي وجهج وقريلهم الفاتحة
- يوم هم جانت تحبني
-ياا شلون ماتحبج جانت تشمج شم ودكول فتحت عيني وثمرة حبي
ومن اجة اخوج جانت تخاف عليج لاتغارين جانت دائماً ادزة علينة حتى تتفرغ الج ولا تغارين لان جنتي نحسة وتغارين من اخوج
-هو وينة هسة خليجي انذر عمري الة
- امر الله هذا يمة كلمن وعمره كومي غسلي وجهج وشربي مي بارد موزين على گلبج القهر
..كمت غسلت واني عبالك بغير عالم اول مرة امي سليمة تحجيلي عن امي فرفحت روحي وكمت اتخايل كل الكالتة خالتي شلون طولهة شلون شكلهة شلون تحبني كلشي مااذكر اني ليش هيج عقلي ميذكر يكولون لان تمرضت ورة وفاتهم وصخنت مكمت اذكر
اتمنى انطي كل عمري بس اشوفهم حتلو ساعة
بس شيفيد الحجي والتمني والراح شيرجعة بعد
كظيت اليوم بس صافنة ومالي خلك وخالتي تباوعلي ومقهورة
اجتي احلام تريدني اساعدهة بالعشة والبيت
خالتي صاحتلهة كلتلهة عوفي امل مالهة خلك
كظة اليل واني بي نايمة بين كاعدة عيوني نعسانات وعقلي صاحي افكر باهلي وافكر بمصيري
صار الصبح وكعدت على هوسة جنان هي من تجي تخبص البيت بالسوالف والضحك
وبتهة مسويتنة قطار حتى على روسنة داست واحنة نايمين
-ياا يمة شوبعدهن البنات نايمات
-اي يمة نايمات يومية هيج يسهرن على الافلام ويظلن نايمات لتسعة للعشرة مليت من الحجي شسويلهن
-ياا چا انا جوعانة اريد ريوك.. يلة خل اسويلهن واكعدهن مشتاقتلهن
- ولج هو كل يومين وانتي ناطة علينة شوكت شتاقيتي
- هاا يمة جنج مالة مني
- لا ولج هو اني اباوع الجيتج بس انتي قريبة علية ذنيج خواتج. بعيدات

ولحكايتي تتمة