زوجة للتجربة

البارت ٢٩ والاخير

الدكتور اكد ان علي مامكن يرجع يمشي بالوضع الحالي
_ شلون يعني دكتور يعني ابد ميكدر
_ العلاج المتوفر عدنة عالجناه بيه ومقصرنة هاي امكانيتنة اما بغير مكان عدهم اليات واجهزة مطورة احتمال اكو امل احتمال لا
جانت خالتي دكول اليبدي حياتة بتعب ميرتاح المشلوع كلبه ميرتاح صدك ياخالة ماارتاح ولا حشوف الراحة ويظل دومي خاطري مكسور
مكعدت ابجي وانوح هسة وكت عمل البجي ميسوي شي
اخذت تقارير العملية وحالت علي وبديت افتر على الاطباء اختصاص حالت علي اكثرهم اكدوا اكو علاج الحالتة بالخارج احتمال يكدر يحرك اطرافة السفلى واحتمال يكدر يمشي
اني على هذا الامل مستعدة أعمل المستحيل
بعد نصح الاطباء الي قررت اسافر ب علي للهند
طبعاً اني عندي فلوس ارث جدي علي مقبل اصرف بيهن ولا الف وسوالي حساب بالبنك وحتى ناسيتة لان محذرني افتح سيرة الارث كدامه
بعد اجه وقتة مو بس الفلوس ابيع نفسي ال علي بس يصير زين
بلغت اهلة تفاجئوا ماعدهم خبر بورثي امة سكتت ومااعترضت هي عدهة فلوس ازوجة بس ماعدهة فلوس تعالجة
كمت احضر نفسي للسفر حضرت جواز الي والة وحضرت التحويل الطبي وقدموا اوراقنة للمستشفى البلهند وقبلوا حالته
جهالي مااخذهم اريد اتفرغ ال علي حتى يصير زين
خطية هملتهم كل هاي الفترة بس شسوي مجبورة
علي عرف حنسافر بس ماكتلة على حسابنة اصور على حساب الدولة ماردت اضوجة
سافرنة للهند واستقبلونة المستشفى ودرسوا حالتة وحاجوني بوجود مترجم كالو نسبة ان يرجع يمشي مثل قبل ٥٠% تعتمد على قوة بنيتة وتقبل جسمه للعلاج
بس ان يحرك اطرافة هاي مضمونة ١٠٠%
اني فرحت اكو امل
اجروا العملية وطولت اربع ساعات
هاي الفترة من عمري بين قلق وخوف وارتباك بس مانسيت ادعي الله واندب اهل البيت ع
خلصت العملية ونجحت ولله الحمد
بقينة بالهند شهر بين علاج فيزيائي وبين مراقبة الوضع علي ...بهاي الفترة مقصرت وية علي كنت احاول اساعده باي شي هو رغم الالم ورغم المعانات بس يكلي لو ماانتي يمي مجان تحملت ومرتاح بوجودي يمه بس فراق الجهال تعبني خاصة سيوفي من اتصل يبجي يكول جيبي بابا وتعالي حبيبي شلون بيه
بداية ضربة علي،، علي مستقبل اصابته واستوعب حالتة كتئب وضاج ودخل بحالة نفسية خصوصاً من شرحوا حالتة الة بالتفصيل بالهند و وقع يلة اجرولة العملية
ميستوعب ولايريد يستوعب انه بعد ميكدر يمشي انهار وتعب
بس بمرور الوقت ومن كام يشوف حالات كلش صعبه تجي من العراق المبتورة اديه والمبتور رجليه والوضعة صعب بدة يتقبل اصابتة واني اشجعه واحفزة ان اهم شي نفسه موجود بالحياة اني على الرعب العشتة لو بس نايم بالفراش وميتحرك هم عندي حلم وممتنة
خلصنة علاج علي ورجعنة للعراق
رجع علي يحرك رجليه ويكوم بس ميكدر يمشي اكثر من خطوة
انطونة امل ان بعد اربع سنوات اذا رجع نشاطه وقوة جسم علي و العلاج الفزيائي اصيرلة عملية ثانية بالهند واحتمال يمشي هذا الخبر فرحنة وريح نفسيت علي
من رجعنة للعراق يلة عرف المبلغ مني مو من الحكومة ضاج ونقهر وعصب وبدة يصيح
اني ذبيت نفسي بحظنة وبوست اديه انت شبيك متحس بيه اني لو ابيع اولادي حتى انت تعيش ابيعهم اني احبك مااكدر اعيش لحظة بدونك
حظني وبجة على بجيي
مرت فترة وضع المعيشة مايسر علي كاعد وكعدت البيت دمرت نفسيتة وخلتة يصير عصبي
واهله ماسعدونة بشي بس مرات اخوتة يجيبون مسواك
واني عندي اطفال مترهم هيج نظل
هملنة ومالة دخل بنواقص البيت اني مشيت حالي والمصرف على الضروري بس احساس كوني وحيدة قتلني اني تعودت على علي بكلشي وعيشني ملكة شلون هسة ادبره
وضع البيت جاي يسوء لازم اشوفلي حل ميصير هيج نظل
اني بقت عندي فلوس نكدر نفتح مشروع بسيط والباقي اجيب بيهن نص قطعة للزمن بلكت نكدر نبنيهة شوية شوية واخلص من الايجار
بقيت افكر بمشروع واجة على بالي محل موبايلات
علي كلش يحب الموبايلات ويعرفلهن وهو من نوع شاطر متصعب عليه شغلة
وهسة هو كاعد ونفسيتة تعبانة بلكت اذا نشغل بمشروع نفسيتة تتحسن
فاتحتة بالموضوع وبدة يعصب بس قنعته اني وياه واحد ماكو فرق مقبل كتلة اخذهن دين ومن يصير عندك وينجح مشروعك قصدهن الي قبل
سوينة المشروع وبدة علي ينشغل بيه سوة شركة صغيرةللانترنيت و بيع المبايلات الحديثة الاصلية
شوية شوية الشغل مشة على ايدة وصاروا عنده معاميل وارتاح بالشغل ميحتاج مجهود ولايتعارض مع وضعه الجديد
تحسنت نفسيته ورجع مثل قبل يضحك ويسولف وتعايش مع اصابته بدة يهتم باولاده
اما علاقتي باهل علي بعد الحادث ماحاولت اختلط بيهم اصابة علي كانت من تهورهم واستهتارهم بارواح الناس وطبعاً ماانسى حاولت امه تهدم حياتي وتاخذ زوجي مني رادت ازوجه وحدة متستحق علي بس تحقيق الرغبتهة واعجابهة بعلي حاولت تهدم سعادتي واول عائق وكع بيه تخلت عنه وكالت بلسانهة مارتبط بانسان معاق ..هو متفهم رغبتي بابتعادي عنهم وماجبرني على التواصل وياهم
سيوفي كبر وحيدخل مدرسة هذا حدث مهم النة بدينة نجهزلة ملابس المدرسة وقرطاسيه اني وعلي فرحانين بابنه واول فرحتنة بهاي الفترة بديت ادوخ واتعب وكلش احس بنعاس وارهاق
_ شبيج حبيبتي ليش هيج تعبانة
_ ماادري حبيبي
_ روحي لدكتورة خل تفحصج اليوم
_ مااكدر اليوم مابية
_ روحي شنو مابيج لو اكدر جان اني اخذتج
_ لا حبيبي اروح وحدي مابيهة داعي تجي وياي هياتهة العيادة ..رحت وجانت الفحوصات اني حامل
هلمرة اني مردت وعلي كلش فرح كال خير ورزق من الله
_ بعدهة سرى زغيرة
_ شنو زغيرة صارت مرة
_ وشلون اكدر اروح وياك للهند للعلاج
_ مااروح الة تولدين بسلامة اخاف عليج
_ لا يمعود روح انت منتظر هذا اليوم من سنين شلون متروح ومدام فحوصاتك ايجابيه وبنيت جسمك تحسنت لازم تستغل الفرصة
_ شلون اروح اخاف عليج وانتي حامل ونوب الجهال ومدرسة سيوفي
_ روح حبيبي ماعلية شي هو شهر وترجع بسلامة واجيب خالتي يمي لايظل بالك
بعد فترة جهز علي اموره وراح للهند هو واخوه احمد مع دعواتي ودموعي الي ماوكفت طول فترة سفره كلبي يخفق من القلق عليه
هو يتصل يومية رغم تكاليف الاتصال ويحجي وياي وية الجهال ميسدة الة يطمئن علينة بس فراقة صعب حسيت البيت موحش وفارغ
مرة كعدت لكيت سيوفي مصخن كاب نار تخبلت خليتلة تحميلة سويتلة كمادات مانزلت الحرارة خالتي جبيرة وتعبانة مو مال مستشفيات فكلت اخذه وحدي لبست عباتي واجرت سيارة واخذتة للمستشفى
دخلت بيهة للطوارئ لان حالتة تعبانة
فحصه الطبيب ونطاني علاج وخلة معاون طبي يشرف على العلاج اجة معاون الطبيب يشوف العلاج اشو هذا ظل صافن علية ياالله هذا شبيه كلما اباوع الكاه صافن عليه بلة اني بياحال ضجت كتلة اخي مضيع شي
_كال العفو مو قصدي بس مشبه بيج
_لا تشبه مااعرفك ولاتعرفني وصد بغير اتجاه احسلك
_بس كليلي انتي امل
_من وين تعرفني؟!
_ اني مصطفى
_ اااه مصطفى صدك هذا انت
_ اي اني مصطفى ليش ماعرفتيني
_ مرت اسنين وماشاء الله صاير رجال وعندك وظيفة
_ هذا بفضلج اني مديون الج كل عمري
_ الفضل لله مسويتلك شي انت صرت بتعبك بس والله شوفتك هسة نستني تعبي وفرحتني
_ انتي وين وشخبارج
_ قصتي طويلة مو وقتهة
_ هذا الحلو ابنج وبيا صف
_ اي ابني بصف اول
_خل اشوفة شنو وضعة
_ اني ضحكت ودنكت
_ هاا خير ليش ضحكتي ترة هاي شغلتي واني خبير بيهة
_ لا اذكرت شي وضحكت تذكر من كتلي اصير طبيب واعالج اطفالج شوف الدنيا شلون دواره مرت سنوات وهسة تعالج ابني
_ هههه اي والله دوارة الحمد لله شفتج ولا غبتي عن بالي صورة امي وصورتج هي التخليني اعيش بامل صدك انتي امل
عالجوا سيف ومصطفى كلش اهتم بيه ومخلة دكتور مااجة شاف سيف الحمد لله طلعت شغلتة بسيطة بالعلاج صار زين مصطفى راد عنوان بيتنة يريد يتعرف على زوجي من يرجع من السفر بس كتلة مااكدر زوجي وضعه هسة مو تمام واخاف وجودك يسبب مشاكل فهم الرجل وعذرني كون فارق العمر بيناتنة مو كبير محد يفهم طبع العلاقة بيني وبين مصطفى ومحديحملهة بمحمل حسن
رجعت واني فرحانة لان شفت مصطفى متغير وصاير شخصية انسان ثاني مأجر بيت مستقل عن ابوه ويريد يزوج يارب يتوفق وينسعد ،،،
بعد كم يوم خابرني علي بعد اجراءعمليتة كال يم الله بعد فترة هم خابر بس مانطاني معلومات عن العملية ولا كلي نجحت لو لا
ظل بالي كلت اكيد فشلت لذلك ميكول
بقيت ابجي وضايجة وخالتي تهدئني التهيت بدوام سيوفي وهو فرحان بالمدرسة بس موتني يبجي مشتاق البابا
بيوم اني نايمة مااحس الة انفاس على وجهي وبوسات دافية على شفايفي مجفلت اعرف هذا الدفو واعرف هاي الانفاس فتحت عيني وحظنتة باثنين ادية حبيبي اجيت
_ اي اجيت الحياتي وحظني الدافئ اني بلياج ميت وانتي تحييني
_ لادكول هيج حبيبي الله يحفظك الي
باوعت مشفت كرسيه يم الجرباية دورت بعيوني بالغرفة ماكو
انت شلون اجيت
_ الناس شلون تجي
_ الله عليك كولهة انت تمشي
_ ليش اكول خوب شوفي بعينج
كام علي كدامي وكام يمشي صح مو كلش مشية عدلة بس يمشي بلا كرسي اني من فرحتي عطت وكمت اكمز وهو صاح بية يمعودة وليدي بطنج خرعتي
ياوليد انت تمشي اكو احسن من هاي الفرحة وبعدين شمدريك بية ولد
_ احساسي يكول ولد
عشت ايام مستقرة وهادئة وية علي واطفالي عشت وياه الحلوة والمرة تحملتة وتحملني ماكو شي كامل بس اكو اشياء نكدر نصنعهة بنفسنة حتى نعيش براحة ،،،
ماكو حياة مثالية لكن التغلب على الصعاب والتعايش مع وضعك ورضاك بنفسك يجعل منك انسان مثالي
قد تكون حكايتي خالية من الموعضة والحكمة
لكنها تبقى قصة امراءة عراقية كافحت وجاهدت لتنعم بحياة افضل
بالختام اقول اصبروا وصابروا واحتسبوا امركم لله فهو الوحيد القادر على تغيير حالكم من حال الى احسن حال
واقول ما الحياة خلقت للراحة والرفاهة انما خلقت للبلاء والامتحان وخيرنا من يخرج منها مبيض وجهه بنجاحه
واخيراً تقبلوا تحياتي وامتناني لكل من قرأ حروفي وكلماتي وارجو غفران خطأي وزلاتي الاملائية والتعبيرية

كل الحب والامتنان  لكم 💕

Zahraa ahmed