زوجة للتجربة

بارت ٢٦

بهاي الفتر قوت علاقتي بعلي اكثر وتعلقت بيه وهو هم تعلق بالبيت وبينة كام ميكدر ينام اذا مايشم سيوفي وهو لوتي بس يضحك ويناغي ومن يشوف ابوه يبدي يرفس ويصيح
صار عمر سيوفي ست اشهر وضعنة تمام ماكو شي مضوجنة طبع سيوفي حلو لا يبجي ولا يلج يرضع وينام ومن يكعد بس يضحك هيج شي مخلاني اقصر لا بالبيت ولا وية علي
جاي اشتغل بالبيت وحسيت بدوخة والم بظهري
مااهتميت كلت احتمال ضعف
واستمرت الدوخةكم يوم  وبعدين تقيئ 
اني شكيت بيه شي كلت العلي خاف علية اخذني للدكتورة والمفاجئة طلعت حامل اني استغربت لان الدورة مااجتني من الولادة كالو عادي متجي بس ماتوقعت احبل
علي ضاج كال مو وقتة سيوفي بعدة ازغير مو وقت حبالة ابد
اني بعد شبيدي رزق والله دزة بس ضجت جنت اقنع بعلي يكمل سيوفي سنة وادرس كلية بعد راحت علية

حملي هذا يختلف عن سيف احس نفسي تعبانة نهار كلة ودايخة ولعبان نفس وتقيئ
علي بالبداية عاذرني يكول مو بيدج حاولت اهتم بعلي وابينلة ماكو شي بس مكدرت حملي كلش متعب
منا سيوفي زغير ومنا بيت ومنا علي حسيت نفسي هلكانة
بدة علي يضوج بس ميحجي مرت فترة الحمل هيج بين سيف وبين علي وبين البيت
قبل لا ادخل شهري حسيت علي تغير علية مو مثل قبل
قبل جان شعلة من الرومانسية والحب هسة اختلف
كلما اكلة يكولا لا نفسي ونفس حبي بس لان حامل جيبي وارجع مثل قبل
اني صدكتة كلت يجوز لان حملي يختلف مو مثل بسيف لذالك تغير
قربت ولادتي وجبت سرى ابوهة سماهة طلعت نسخة مني بس خشمهة على ابوهة فرحت بيهة اني وعلي
ورجعت للبيت وعلي اهتم بية اول ايام بس موذاك الاهتمام اني هم كلت خل الم نفسي واكوم البيتي وجهالي وهم علي تعب
حاولت ارجع مثل اهتمامي بعلي بالبداية بس صعب مااكدر سيف حرك يمشي وباهش وسرى تبجي ولجاجة والبيت وتنظيف صعب جداً ارجع مثل قبل بس احاول رغم جهودي الجبارة اركض منا واجي منا
بس حسيت علي تغير اكثر بدة يضوج من يشوف نقص هو يحب كلشي كامل ومرتب مثل ميحب وكلشي بوقتة ماعذر عندي طفلين ازغار يحتاجون عناية واهتمام اكثر منة
_ ليش ماكويتي قميصي النيلي
_ هسة اكوي بسرعة
_ شو شكلج وكلتي هسة
_ شسوي ياحبيبي والله مدا الحك واني كاويتلك باقي قمصانك
_ اني ردت اليوم الازرك ياعيني ياامولة لاتنسين ملابسي
_ صار حبيبي من عيوني ..شنو شو حتروح ومابايسني
_ تأخرت من اجي يلة باي
_ باي ..اول مرة يسويهة ليش هيج
بدة الشك يسري بدمي بس طبعي هادئ ميبين علية
كمت ادور ملابسة احاول انتبه على شي بس ماكو
اكيد سره بجهازة
كثرت مخابراتة ومن يخابروه يطلع برة من اسأله يكول سيوفي يصيح عيب من المتصل ..حتلو سيوفي نايم هم يطلع
مرة بليل نايمة وكعدت على صوت سرى تبجي رضعتهة وانتبهت علي ماكو تصورت بالحمام باوعت شفت موبايلة ماكو نومت سرى ورحت بهدوئ ادور عليه لكيتة مدد على القنفة بالصالة ويحجي بهمس اقتربت اسمع وياريتني ماسمعت
كلام حب وغزل  و وعود وكلام مااذكره من الهبطة
جان شهكت بصوت عالي
هو فز وبسرعة سد التلفون
_شنو هذاا السمعته
_حبيبتي اموولة ماكوشي شبيج خرعتيني
_ شنو ماكو شي منو هاي الدكلهة اذوب بصوتج
_ لاتكبرين الموضوع كتلج ماكو شي
اني فقدت بديت ابجي واملخ بشعري حتة احس على نفسي بلكت حلم  هو كلش انقهر وظل لازم ادية ليش ولج تكطعينة مو اني احبه
عوفني مااريدك تحاجيني كلشي توقعت بس مال تخوني ابد ماتوقعت بعد مااظل وياك خلاص
_ تخبلتي انتي علمود اتصال تعوفيني والله اتصال عابر وهيج حجيت وياهة تكظية وكت
_ متحجي وياي لو هي غير شكل
_ وينج انتي اني شايفج من جهالج
_ هسة صاروا جهالي لعد انت مو هم ابوهم وعليك واجبات مثل ماعلية قابل اني شأصير جاي اضغط على نفسي في سبيل ارضيك
_ يلة لاتكبرين السالفة مخابرة عابرة وعدت
اني مقبلت ينام يمي بالغرفة طلعت فراشة بالصالة
وظليت ابجي واندب حظي يعني اني ميلوكلي الفرح لو اني نحس ليش مدوملي فرحة
بقيت افكر شسوي وشلون اصرف قابل ازعل واكبر السالفة لو ابقة واخليه يدوس بيه وحتلو اطلع وين اروح نوب عندي جهال
لا ابقة بيتي بس اظل ضايجة عليه ولا انطيه مجال
ظليت كاعدة لصبح حسيت عليه دخل للغرفة ياخذ ملابسة
اقترب مني سويت نفسي نايمة بوسني بخدي وبكصتي وبشفايفي ويكول اسف والله موقصدي اأذيج مجرد كلام وبس
درت وجهي ومااحجيت ولا كلمة
هو راح الشغلة كعدت بعد وين انام ريكت سيوفي وكفيت شغلي ودخلت للحمام نظفت نفسي ولبست تراك كصيف عليه ورفعت شعري وتمكيجت
قربت جيتة رحت الغرفتي بين مانومت سرى وصليت سمعت سيوفي يهوس اجة بابا
مطلعت اجة هو للغرفة
_ السلام عليكم
_ وعليكم
_ هاي شطالع حبيبي هيج زعلك عني خلاك حلووو
اني ساكتة
_ نوب شايل خشمة ياربي غير تكتلين الله عليج لا زعلين مني
عفتة وطلعت يلة ماما سيوفي تعال اسويلك عمي
_ وابو سيوفي مالة شي
سكتت رحت للمطبخ سويت الاكل خليتة كدامة ورحت للغرفة
هو ظل ينتظر مااجيتة شوية ولحكني يبوس ويعتذر  ويحلف هي ذابة روحهة علية واي شي مابيناتنة
كتلة احلف بداعت سيف مابينكم شي
حلف بسيف وبالقرآن ان بس مجرد مكالمات وهي تخابرة هو مالة نفس يخابر بس يسد الفراغ لان اني مشغولة عنة
_ يعني كلما انشغل بجهالك تروح تصادق شنو من حب
_ لا والله شبيج كتلج هيج ولا تسميهة مصادقة ولا شي وهاي كدامج بعد لا احط رمز ولا قفل بجهاز
اني كلت ليش اكبر السالفة واني احبه ليش انطي مجال الغيري رجعت احجي وياه ورجعت اهتم بنفسي واهتم بيه هو رجع مثل الاول بس كلبي مامطمئن احس مرات اكو اتصالات صدك ماحاط قفل وادور وراه مالكة شي بس كلبي دليلي
خابروا اهلة حددوا موعد الخميس زواج اخوه
اني مااحب اروحلهم بس كلبي كلي روحي لاتخلين الهن مجال
_ اكلك حبي لازم نروح نجهز ملابس الي ولجهال
_ الشنوو؟
_العرس اخوك 
_ اااه ترحون
_ ليش لا غير اخوك
_ عبالي متحبين ترحين
_ لاحبي شيكولون علية الناس زوجة علي شايلة خشمهة ومشاركهم افراحهم
_ فديتة ابو خشم شو تعالي يمي
_ شتريد موسيف كاعد
جهزنة ملابس لجهال علي ميحب يشتري الة من الراقي للمناسبات يكول الناس الهة الظاهر
اني جبت ملابس كلش ناسكة واني من فرت البيت جسمي ضعف طلعن علية  حلووات علي كلش عجبنة
رحنة بيوم الحنة طبعاً من شافني الوجوه دكلبت
وشالن خشمهن وبدة الكلام اليسم البدن همزين الجهال دمهم على دمنة وابوهم يخبل بس حظ ماعنده وغيره من الكلام اسمع  وابلع بلا كلام
انتبهت على بنية الكعدة كلهة تخز بيه وعينهة مانزلتهة مني
اني استغربت منو هاي وشبيهة وياي
هي مو بيضة بس مو سمرة حنطية فاتح طويلة ورشيقة مرتبة بس شخصيتهة قوية من تحجي واثقة من نفسهة
عرفت من الكلام هاي بنت عمهم مامزوجة بغير محافظة بس قبل كم شهر انتقلوا قريب على بيت عيالي اني سمعت من علي قبل  كم شهر بس ماهتميت
مادري ماطمئنيت الهة وحسيت اكو شي قريتة بوجه عمتي وحمواتي

ولحكايتي تتمة