زوجة للتجربة

بارت ٢٠

مشت الايام حزينة ماطلعت من البيت لان لازمة عدة قبل لا تخلص العدة اجت علينة خالتي وجنان رادتني بس اخلص العدة ارجع وياهة البيتهم
صراحة اني مااكدر ارجع عمتي تكسر الكلب متحطمة شلون اعوفهة وعمي منو يداريه وهم وضع خالتي تعبان يعني اجيهة فوك الضيم تعلاوة
عمتي ام مازن من سمعت خالتي تريد تاخذني كامت تبجي كالت من ريحة ليث ليش تاخذوهة وشلون اظل وحدي
اني قنعت خالتي كتلهة بس يجي مازن اني اجيكم
راحت وهي مامقتنعة
صارت ظروف البيت صعبة من حيث المصرف خالتي تقريباً بدت تخلص فلوسهة مازن من قبل وفاة ليث مداز مصرف لان عنده مشاكل مالية دخل بمشروع  والمشروع فشل وعليه ضرائب لذلك وقفو جوازه اله يدفع الضرائب
جان مصرف البيت كلة على ليث مناقصنة شي هسة صفة البيت بلا راعي
اني عندي فلوس بس قليلة انطيتهة العمتي مشينة بيهة حالنة كم يوم بعد مطلعت من العدة عمتي تعبت متكدر تكوم بواجبنة واحتياجات عمي من علاج واكل يرادلة خاص فكلتلي انتي روحي اسوكي السوك قريب براس الشارع
_ عمة اخاف شلون اروح
_ ليش تخافين يمة امان ماكو شي ولازم تتعلمين اني تعبانة اخاف عليوم واتكوم بشارع ولج يمة القهر هد حيلي لعد منو النة يمة الحد مايرجع مازن بعد لاطلعين 
خذت كلام عمتي وبديت اروح لسوك كلش اخاف ولا احجي ولا اعمال مرات بس ءأشر على الحاجة ومرات اكتب بورقة اليشوفني يكول مو صاحية
شوية شوية وبمرور الايام كمت اتعلم وخوفي قل وبديت اعرف الحاجة الزينة من المغشوشة جانوا يستغلون سكوتي وفقري وشكو بضاعة تلفانة ينطونياهة
صدك صرت اعرف بس بعدني اخجل ماعندي جرءة بنت سوك هيج احسن
مر على وفاة ليث ست اشهر مازن خابر كم مرة و عدنة يرجع وكدر يدزنة مبلغ بسيط واني ردت ابيع سواراتي حتى المصرف يكفي عمتي مقبلت كالت اني عندي كم قطعة ذهب ضامتهن للعوز  وهذا وكتهن
مرة خابرني رقم غريب اني مجاوبت دك اكثر من مرة ولح نوب انتبهت هذا رقم دولي كلت اكيد مازن بس شعجب داك علية مو على عمتي هو كله يخابر عمتي
_ الووو
_ الوو ياعيني ليش متردين
_ اعتذر ماخازنة رقمك
_ شعجب
_ مصارت فرصة
_ شلونكم اخباركم
_ الحمد لله ماشي الحال
_ امي شلونهة
_ نفس وضعهة تريد تحاجيهة
_ لا اني حاجيتة قبل شوية
_هاا عبالي محصلتهة
_ لا الاتصال الج مو الامي
_ خير مازن شكوو
_ ماكو شي سلامتج حبيت اسأل عليج
_ تسلم
_ قبل انطيتج رقمي ماخابرتي
_ انت كلت اذا تحتاجين شي خابري واني ماحتاجيتك
_ اهاا وهسة
_ نفس الشي مامحتاجتك بس اريد اعرف شوكت تجي
_ لعد اذا مامحتاجتني ليش ترديني اجي
_ مو الي لامك وابوك محتاجينك واني وحدي مااكدر
_ ان شاء الله عن قريب اجي واني وياج انسد اي فراغ
_ لا بس انت اني بس تجي ارجع البيت خالتي
_ ليش عيني امل قابل شبدر منة
_ مو قصة بدر شي بس وضعي موتمام هنا موصحيح
_ زين واذا صار وضعج صحيح هم تردين تعوفينة
_ شلون يصير صحيح مفهمت ليث وراح شيرجعه
_ الله يرحمه
واذا اكو بديل اليث
_ شنو بديل ليش هو قطعة غيار ونبدلة
_ لا طبعاً لا مافهمتي قصدتي شوفي امل بلا لف ولا دوران اني اريد اتقدملج انتي بنت ونعم التربية وماالكة احسن منج وشتامرين اني حاضر
_ لحظة لحظة انت شجاي تحجي يمكن دخت ومسمعتك زين
_ مجاي احجي شي حرام كلنة نعرف طبيعة زواجج من ليث وبعدين هسة ليث ماكو وانتي مو ملك احد وبعدج شابة اكيد تزوجين فليش مواني احظى بيج احسن من غيري
_طبيعة زواجي من ليث مالة علاقة بكوني زوجة اخوك شلون طاوعك قلبك هيج تطلب طلب
_ ارملة اخوية الباكر المزوجهة صارلة اربع سنوات ولا  زالت باكر ماطلبت شي لاعيب  ولا حرام اني فاتحت امي بالموضوع وكلش فرحت واني وياهة نتأمل موافقتج ياأمل
_ مع السلامة مازن مااكدر اكمل
_ مع السلامة منتظر جوابج بأمل يا أمل
من كملت الاتصال فر عقلي فر كمت مااركز وحسيت عقلي بدة يخربط ويفكر مكلوبي
شنو هذا شحجة معقولة صاحي
رحت لسوك الجنت من اضوج اروح اسوك حتى اروح عن نفسي حسيت مالي خلك ولا عندي رغبة وكظيت الطريق بس سارحة
مر اسبوع على طلب مازن قسم من فكري رافض قطعاً وقسم بسيط قابل كوني مالي احد ومازن شاب جيد جداً ومكان قابل على اهلة على ظلمهم الي وية ليث
بعد الاسبوع دك علية الرقم شفتة نفسه الرقم الدولي طبعاً ماحفظتة بالجهاز بس عرفتة لان دولي
كلت خل اجاوب واخصمهة وياه احسن
_ الوو
_ الووو امل شلونج
_ الحمد لله
_ شلون وضعج
_ تمام
_ متسألين كلت اسأل عليج
_ تسلم
_ شنو فكرتي لا
_ اي اكيد فكرت
_ اي شنو جوابج

ولحكايتي تتمة