زوجة للتجربة

بارت ١٦

طلعت ..
طلعت وسمعت اصوات عمتي ومازن بالاستقبال مفتوح عالنص بس كلامهم مامفهوم اني رحت اخذت مي بلا صوت من رجعت سمعت يحجون باسمي اخذني الفضول اريد اعرف شيتكلمون علية...

_ اني مااجيت بالعرس لان مارضي على هاي المهزلة
_يامهزلة يمة شبيك
_ كتلج ماراضي على هاي الزواجة وصدك ساعدتكم بمبلغ بس ماقابل وحتى حاجيتة ليث كال امك ورطتني هي السبب
اني نصدمت شيحجون عني تقربت اكثر..
_ ولك يمة اعذرني كلب والدة ردت احاول بلكت الله ويصير
_ تجربين بنت بيت ونوب زغيرة وحلوة شتحجين انتي الخاطر الله
_ لعد اخذلة مو حلوة كلت وحدة حلوة بلكت تدني نفسه عليهة
وهم طلعت خوش بنية ويتيمة
_ الله اكبر عليكم حتى الكفار العايش وياهم ميسون سوايتكم شنو تدني نفسة كتلج ماكو امل اني عرضت تقريرة على اكبر الاطباء بالسويد كالوا ماكو امل بس هذا الدكتور الهنا حمار ميفتهم كلج جربي بلكت يكدر شنو بنات الناس لعبة بيدج وبيد ابنج هاي صارلة سنة مزوج شنو الصار دنت نفسه لو بعدة وهاي البنية شنو ذنبهة
_ البنية حبابة وساكتة حتى اهلهة ميدرون ناس فقرة
_ يعني مستغلة ضعفهة ولان ماعدهة احد يمة اني هاي العبة السخيفة لايمكن اقبل بيهة
_ اسكت انت مالك دخل
_ خوش راح اسكت بس اني عكب باجر راجع
_ ليش ولك يمة تفرفح كلبي عليك شوف شلون فرقنة النسوان
_ لا فرقنة تفكيركم وعدم خوفكم من الله

اني بعد السمعتة رجلية كوة حملني ورجعت الغرفتي غطيت راسي بلحافي وبقيت بس فاتحة عيوني بقوتهن اريد استوعب السمعتة يعني ليث عاجز من زمان واهلة يدرون بيه ومابيه امل وزوجوني اله للتجربة
حطموا حياتي وكسروا بختي للتجربة
عشت سنة معانات مع انسان
بليد بارد الدم والمشاعر للتجربة
واني اكول ليش عمتي متسألني على طفل او مدكلي وين ملابس النوم اشو مشريهن يعني هي عرفت من يوم الزفة وحاول وطلع كلهة انه عاجز وسكتت وماحولت تسوي شي واني عبالي متدري واريد احجيلهة حتى بلكت نعالجة. ليش اني لان يتيمة لو لان فقيرة ماراح جرب وية بنت شارع ليش وياي ليش اتصدعت ونقهرت وماحسيت شلون خلص اليل واجة الصبح من ندك الباب يلة رجعت العالم الواقع
_ كومي يمة خطار جاينة بطريق عمام مازن يردون يسلمون عليه.
_ كمت بس مالي نفس اباوعلهم حسيت بنفسي دمية تافهة عدهم بس يرجع مازن اني اروح البيت خالتي وبعد ماارجع الهم وشيريد يصير خل يصير
اجوا عمامهم حضرنة شي بسيط الباقي كلة جابوه من السوك سمك ودجاج شوي
مجموعين كلنة واني كاعدة يم ليث احنة مناكل سوة بس بليل نتفرج على التلفزيون سوة شوية ونطفي بس اكل مامجموعين سوة ..
بس لان خطار موجود كعدنة سوه
جاي اكل جان ليث كلي بصوت ناصي هاي شلون هيج تاكلين
_ شلون شبيه
_ هايلكمتج شكدوتهة خوب ايدج ايد طفل
_ شنو مشايف ايدي
_ لا
_ همزين لعد تعرفني.. سكت هو ..رفعت راسي لكيت مازن يباوعلي مادري يمكن مستخطيني
واحنة ناكل سألت عمة ليث عمة
ليث ليش مصار عدكم طفل الهسة
اني باوعت اليث هو باوعلي ودنك
ردت عمتي تتلعثم لسة ما جاي رزقهم كلشي برزقة
احنة مجاوبنة عمامة كالو سولكم طفل خل يملي عليكم البيت
كال ليث ان شاء الله
ههههه ان شاء الله احبل من الهوة
ثاني يوم لكيت مازن مبدل ومحضر غراضة ويريد يسافر وعمتي تبجي جان من شوفني كالت الله لاينطي الجان السبب وراحت
ماحجيت ولاسألت مازن حيسافر لو لا

_ مردت اسافر قبل مااودعج
_ الله ويك بس ليش منتظرني
_ بس ردت اشوفج هاج هذا رقمي شتحتاجين وشيصير خابريني لادكولين ماعندج احد منا وهيج صار عندج وهاي مصرف الج وبس
_ شكراً بس مامجتاجة شي
_ الج ذن شي بسيط
راح مازن وحسبت الفلوس طلعن خمس اوراق تعجبت ليش انطاني ظميت رقمه بس مااهتميت الة

ولحكايتي تتمة