زوجة للتجربة

البارت ١٣

اجتي حلووم واجتي اسوالفهة وكاحتهة سوينة العشة اني وياهة مثل قبل واحنة نسولف ونضحك خبصنة البيت بالسوالف وخالتي تباوعلنة وتضحك دكول بيتي بلياجن اظلم وعبوسي كيف كلشوية يريدنة نسويلة حاجة لو اكلة لو ملابسة لان خالتي تعبانة خطية وظلت وحدهة البيت متعبهة بس هي تشتغل
اني عبالك جنت مااتنفس واليوم تنفست شكد اشم بالهوى واكول اريد بعد
تالي اليل كعدنة اني واحلام نسولف تعرفون بعد سوالف الزوجات تكون منفتحة منطرق للامور الحميمية بس لازم بالحجي تجي امور عن طبيعة العلاقة بين كل زوجين فبدت تسولف حلووم عن علاقتهة بزوجهة شلون يحبهة شلون مياكل الا وياهة ومن يرجع من الشغل يظل بالغرفة يمهة  يعني صدك عرسان اني ظليت صافنة هو هيج الامر الطبيعي لعد اني وضعي شنو شجاي يصير مادري
سألتني كتلهة حباب وطيب وعمي وعمتي يحبوني وجنبت اسولفلهة على علاقتنة واشوفهة كل شوية يجيهة مسج من زوجهة لو يخابر ويكضوهة ضحك
ثاني يوم خالتي كالت دزن على ازواجن يجون ياخذونجن انتن بااعداد العرايس شلون تفاركن زلمجن وانتي يمة امولة شلون اليوم ينام وانتي مو بحظنة وبعدج عروس
ضحكت بكلبي كلت عروس السعد اني
من ملحت خالتي خابرتة كتلة تعال اخذني
اجة واخذني ورجعت للبيت لكيتهم خايفين عبالهم ماارجع بس يلمحون مايصرحون
من رجعت صار عندي حافز من حجي احلام عن علاقتهة بزوجهة وشلون تشتاقلة كلت خل اكسر الحاجز بيني وبين ليث الى متى اظل هيج خل اشوف شنو المشكلة مو قصت الي رغبة بلعكس الوضع هيج عاجبني بس هذا الوضع مو صحيح
اجرءت بليل بعد ان هيئت نفسي ونزلت نمت بفراشة وحضنتة وخليت راسي على صدرة طبعاً اني ارجف من الخجل بس اضطريت وهم ردت احس عندي زوج
كعد كال هاي شجابج
كتلة اريد انام يمك
كومي امل نامي بفراشج
_هاا ليش
_هيج بلا سبب
_شلون بلا سبب مو احنة علاساس عرسان
_واذا عرسان يعني الة ذيج الشغلة
_لا بس اريد اعرف ليش هاجرني متحبني لو تحب وحدة غيري بية شي اني
_ لا مابيج شي ولا بالي وحدة وحياتي كلهة ماحب وحدة
_ لعد شكووو
_ شنو شكو حلي عني اريد انطمر
_ ليث لازم افهم شبيك وياي ليش هيج بارد
_ اآهوووو يعني ماتعوفيني الة تعرفين بابا اني مو بارد اني كتلة ثلج اني مااكدر اكون وياج رجال فهمتي ارتاحيتي
خلة وكام عصبي وركع الباب بكل قوتة
اني نصدمت من كلامه شنو يعني مو رجال لعد ليش ازوج ليش كسر بختي اني هسة شاسوي بحالي ظليت كاعدة لصبح ماكدرت انام من التفكير تعبت بس قررت اكعد واسكت وين ماتصفة تصفة قابل اطلك شكول شحجي خل انجب واسكت
ثاني يوم مااجة نام بالغرفة ظل ثلاث ايام ينام بالهول الحد ماعمتي حجت وياه وقنعتة ينام بالغرفة طبعاً هو هواي يسمع كلام امه هم خوش لان كلامهة من جانبي
رجع ينام بالغرفة نفس الاول بالكاع ولا اجيه ولا يجيني
_مشت حياتي نفس الروتين اليوم صار يومين واليومين صارن اسبوع وصارن شهر والشهر صار اشهر واني نفس وضعي تعودت عليهم وعلى البيت وليث تعودت عليه وهو هم تعود علية كشخص معاشرة مو كزوجة ماكو مشاعر بعلاقتنة
بهاي الفترة تعودت اصعد لسطح من اضوج  اباوع على السما على الطيور واسرح بخيالي مرات اتخايل نفسي بغير مكان يم اهلي واهلي عايشين مرات اتخايل نفسي حمامة وطايرة
كعدني من حلمي صوت ولد صاحلي يابنية التفت لكيت ولد بكد عبوسي بس مو مثل عبوسي مرتب لا هذا مبهذل كلش خطية على سطح جوارينة الحايط على الحايط
كتلة شتريد منو انت
كال شعليج مني بس طيريلي حمامتي على سطحكم
اي هسة اطيرهه بس انت منو خطار لو شنو
_ هذا بيتنة مو خطار
_ اشو ماشايفتك
_ جنت مو هنا شكد تسألين الخاطر الله هسة اني سألتج انتي منو مو ساكت
_ ههه علكيفك اعصابك اني جنت ام مازن
_ زوجة منو
_ ليث
_ اه زوجة ليث الفاهي
_ عيب احترم نفسك شنو فاهي
_ مو قصدي احجي بس اني هيج اسمي
_ بعد لاتهيج تسميه ولا طير حمامتك علينة التهي بدروسك راح تبدي الامتحانات
_ لاادرس ولا امتحن
_ ليش اكو واحد ميدرس وعندة امتحانات
_ اي تركتت المدرسة
_ لا  حرامات صارلك شكد من تركتهة
_ صار شهر
_ عفية ارجع تتندم بعدين وبعدك زغير على الاقل امتحن زين امك ابوك ليش هيج خلوك تبطل
_ ماعندي اهل اهلي ميتين والحمامة خليهة الج بطلت مااريدهة بس لاسألين بعد ...
ونزل من السطح عصبي حتاريت هذا شبيه ليش هيج عصبي وليش بطل من المدرسة

ولحكايتي تتمة