زوجة للتجربة

البارت الخامس

بالحفلة بقيت كاعدة يم خالتي ماتحركت بس حلومة تنسة نفسهة دكوم وية البنات وتخزرهة خالتي وترجع تكعد
اجت علية جنان ..فدوة امولة انتي واحلام تعالن وياي ساعدني اوزع البيبسي والفات
باوعت الخالتي اشرت بعينهة اروح بس جنهة ماقابلة رحت وياهة وزعت للنسوان واكو وحدة لزكت تسأل بية شسمي منو اهلي كوة خلصت منهة رجعت للمطبخ كتلهة اني احضر الجن وانتن وزعن راحن يوزعن جان مااحس الة صوت ولد بالباب يبنية انطيني علبة البيبسي التفت عليه ولد عشريني بس ماركزت عليه استحي رحت اخذت العلبة كوة تنشال جانن مصفطات بالمطبخ
انطيتهة الة بلا مااباوع اشو مااخذهة باوعتلة لكيتة يباوعلي اني نزلتهة بلكاع ومشيت هو اخذهة وكال شكرا اني كلشي ماحجيت رحت ركض وكعدت يم خالتي خفت
شوية واجت عمت جنان اني شايفتهة مرة وحدة من زمان متجينة هي وخالتي مايتوالمن
كالت هاي الكمر وين ظامتهة عنة ام جنان
_ يااا اليسمعج يكول بناتي عبيهن على روسهن ويفرفرن اني من شوكت عندي بنت تطلع كلهن ازوجن محد شايفهن
_ ونعم من بناتج مو هاي جنونة شايلة بيتي بصلوات اخلاق وادب بس هاي الحلوة كبرانة وصايرة مرة
_ اي صلوات على محمد خية دكي الخشب
_ علبختج ام جنان جا انة احسد
_ لاخية متحسدين بس هي فرفورة اخاف تتأذة
بعد مشادات ومجاملات خالتي وعمة
جنان خلصت الحفلة بسلام ورجعنة للبيت والطريق كلة خالتي تحجي على جنان لان لحت عل جيتنة للعرس
_ هاا اجيتن دتعالن صبلي لكمة متت جوع ادري لزكتن ولادكولين عندي رجال مصلوب بلمهجوم
_ اي حقك هسة بلعجل نحضرلك اكل امسحهة بوجهي ابو عبوسي
ولجن كومن حطن العشة على النار الرجال جوعان
رحنة اني واحلام سوينة العشة ونسمع خالتي اسولف الزوجهة على العرس وعلى عمة جنان واني وحلوم نضحك كلش خالتي مغثوثة من الروحة مادري ليش وخالي بس يسمع رجال فقير مالة دخل بااحد ...
بعد يومين ورة العرس اجت جنان كعدنة على هوستهة نوب اخذت خالتي وراحت بغير غرفة راحت حلوم تصنت عليهن اجيتهة كتلهة عيب ولج خاف سالفة خاصة
_ ولج تعاي اسمعهن يحجن عليج
_ علية اني شكوو اتقربت واسمعهن
_ يمة شبيج كلتيني حاصل فاصل كتلج عمتي تريد امل الحماي والله خوش ولد درة مال الله مكمل كلية ادارة واقتصاد وينتظر تعيين وجاي يشتغل وية اخوتة بالاسواق والله فرصة ماتتعوض
_ ولج شنو فرصة من حورهم عيالج اني انطي العجيبة مرة بعد امداني
_ ليش يمة عمتي خوش مرة والله لاتدخل بحياتي ولا برجلي وجد رجلي عدي بس هي متحب الملاسن ولا الخشم اليابس والله اذا صير من نصيب محمد يشيلهة بصلوات
_ كتلج لا
_ وهاي المرة الكتلج عليهة
_ منين هاي
_ اني اوزع للنسوان لفات جان تصيحلي وسألتني على امل كالت شصير منج كتلهة اختي كالت لا ماجنهة اختج هاي بيضة وانتن سمر كتلهة هاا هسة احنة موحلوات كالت لا والله تخبلن بس هاي البنية متشبهجن كتلهة بت خالتي عايشة ويانة حالهة من حالنة بس هي بيضة على ابوهة الله يرحمه
_ عرفتيهة مني
_ اي يمة جانت جارت عيالي قبل وشالت الغير منطقة اسمهة ام مازن ابنهة الجبير بالخارج بالسويد والازغر منة خريج معهد ميكانيكي ومفتح محل يعني فيتر سيارات
_ واني شعلية بيهم
_ ياا يمة مو كتلج كلت كلبي على امل
_ امل بعدهة زغيرة ماانطيهة هسة
_ فدوة العينج يمة عمرهة راح يصير ١٧ شني زغيرة بعمرهة ازوجنة
_ ولج هاي تختلف عنجن هاي ريحة اختي ماانطيهة

ولحكايتي تتمة