زوجة للتجربة

بارت ١٨

حرت باليث ليش هيج داراني ومهتم بيه وهو صخرة خالية المشاعر محسيت بيه خلال هاي السنة باي مشاعر او اهتمام
_ اكعدي اشربي علاجج
_ اي انطيني اني اشرب
_ لا خل اني اشربج
_ شنو قابل مكسرة صرت زينة
_ ظلي بعد كم يوم
_ ليش متريدني اطيب هلكد تكرهني
_ ليش اكرهج يجوز العكس
رفعت تك حاجب والله مدا اعرفك انت منو
_ شبيج ليش قابل شسويت
_ والكلام الكتلياه شنو معناه
_ اشششش رجائاً انسيه رجائاً اني مادري بنفسي شحجيت شفت موقف خلاني اتقزز من بعض النساء بس ثقي مو انتي المقصودة فياريت تنسين ونصير اصدقاء
_ فكرت خوش حل اصدقاء حل مناسب الوضعنة ..تمام اصدقاء

مرت هاي الفترة ليث شوية احسن معاملتة ،،كلامه وياي،،
بعدنة بلا مشاعر بس كاصدقاء
ممتاز هيج وضع ريحني

بعدني متابعة مصطفى باكلة بتوجيهة وتعليمة وهو شااكلة يسوي قلت مشاكلة وية زوجة ابوه وعافتة وهو هم قليل كلش متواجد بالبيت لو يشتغل عامل باسواق لو بسطح يم الحمام ويمي اني شجعتة يشتغل حتى  يفيد نفسه هم مصرف الة يهتم بنفسة
ويجمع للمستقبل ينفعنه
اجت المدارس ومصطفى صف اول متوسط استقبل السنة بحماس وبواهس اشترة ملابس من افلوسه الخاصة وبدة يحضر ويدرس تغيير كبير بحاله من ذيج السنة الهاي السنة وكلهم لاحظوا
اما بالنسبة الي مرت سنة ثانية وخلصت وثالثة وماكو شي جديد بحياتي
عدا همي الخالتي الوضعهم اصبح تعبان جداً بعد وكعت ابوية كامت خالتي تخبز للناس مع الوارد القليل اليجيهم من الكهوة بعد ان خلو بيهة عامل
والزاد تعب خالتي عبوسي صار متمرد وميسمع الكلام وصراف وميهتم بالمدرسة
كل هاي الامور خلتني قليل اروح البيت خالتي من اشوف وضعهم ارجع مريضة من القهر مابيدي شي صح كلما اروح ينطيني ليث مبلغ بلا مااطلب منة يكلي هاي الخالتج
بس ميسون شي وية علاج ابوية ومصرف البيت وعبوسي
صار مصطفى صف ثالث.. اختلاطي بيه قل لان حسيتة كبر بس اهتم بيه من بعيد لبعيد وهو يلح عليه ارجع مثل قبل وياه بس
مااكدر اكلة لان كبرت خطية اكسر خاطره
بس مرة كلي شي خلاني افكر بيه بجدية
كلي ليش مااقدم على سادس خارجي مدامني مكملة ثالث فكرت بالموضوع كلت اكيد ادبرهة

اجة ليث وفاتحتة بالموضوع هو صاير ميردلي طلب كالي اعتبري نفسج راح تمتحنين السنة اني من فرحتي كمزت عليه وحضنتة وبسرعة حسيت على نفسي و بتعدت هو بتسم وراح
قدملي على سادس وجابلي كتب وبديت ادرس لان حيمتحنوني تمهيدي لو يقبلون امتحن لو لا موتت نفسي بالقراية واجة موعد الامتحان وجنت مرتبكة بس اذكر كلام مصطفى وتشجيعة الي
اشجع ويروح الارتباك امتحنت وطلعت رسوب بمادتين انكليزي ورياضيات
وكلش ضجت ونقهرت وصارت عندي خيبت امل ليث كال اكيد ترسبين مواد صعبة عيدي السنة التجي وادخلج دورة انكليزي ورياضيات
فعلاً قدمت السنة البعدهة ودرست دراسه مكثفة ودخلت دورة بمادتين ومتحنت وجنت منتظرة النتيجة بفارغ الصبر ليث كال اني اجيبهة راح على ولد بالنت طلعهة واجاني كال اذا ناجحة شتنطيني واذا راسبة شسويلج كتلة بكيفك بس كول
كال ناجحة
اني عطت وركضت الحضنة وحضنتة قوي احبك احبك نوب سكتت
باوعلي صدك امل تحبيني
ياالله هذا شكلة هسة بعد اني فلتتهة
لعد ليش مااحبك احنة مو اصدقاء
لعد يومية هيج افرحج حتى اسمعج دكوليهة
دكلي هسة شكد معدلي
طلعتي ٦٧
_هههههه عبالي حطلع طب على القراية القريتهة
_ههههه وينج وين الطب
نجاحي كلش غير نفسيتي تمنيت اكمل كلية هيج بالي وعلاقتي بليث هم تغيرت حسيت عندة مشاعر اتجاهي كام يحب يكعد وياي نسولف سوة حتى كام يعرف يسولف ويضحكني كمت ارتاح الة هواي واحب نبقة نسولف عمتي كامت تضوج من تشوفنة هيج اني وياه نضحك وندخل للغرفة نكمل سوالف
بدة يفتحلي كلبة ويسولفلي على الحادث الخلاه عاجز كال اهلي طهروني (الختان) واني كبير بعمر ست سنوات من خوفهم علية بس بهذ العمر طهورة مو مثل من زغير بالكبر يكون صعب اثناء عملية الختان هو خايف ومتحرك فتم الختان بصورة غير صحيحة اخذوني اهلي راجعو بية مصارلي حل من كبرت وراجعت اكو دكتور سوالي عملية وكال ان شاء الله ناجحة اني بقيت فترة ماحسيت اكو فرق كرجل اعرف اكو فرق لولا من رجعنالة كال يراد نحفز مشاعرة مع مرأءة اكيد يصير تمام امي من سمعت ماصدكت او امل راحت وخطبتج الي لان كلش عجبتيهة وقنعتني اني قبلت لان الصراحة مافكرت بيج فكرت بس بنفسي وردت اسكت امي من الح علية  صارت الخطبة وشفتج متغير شي بمشاعري شفتج حالج حال اي بنية كاعدة بالحفلة مامهتم
'اني اسمع مو قصة حياتة وانما اسمع سوء حظي ونصيب اليتيمة بس استمع بصمت'
تقرب الزواج واني نفس وضعي بس من شفتج بثوب النوم عجبتيني كملنة عشة وطلعت اخذت علاج الدكتور وصاني عليه وكملت ساعة بعد العلاج واجيتج واني كلني تحفيز لكيتج نايمة كنتي جميلة جداً بس مكملت فرحتي تبين انو اني مريض وماممكن شفائي بلغت امي بجت نقهرت بس ماتغير شي فقررت ارجع الطبعي البارد
_ قصدك البليد
_ هه بضبط البليد
اشو ساكتة احجي شي
_ شحجي  كنت تجربة وبس
_ رزليني عصبي علية اي شي
_ شيفيد فات من العمر اربع سنوات الحجي شيرجع
_ اااخ امل والله شكد مااكلج اني اسف قليل بس هسة اني مااكدر اعوفج
_ ليش
_ كمت احبج احسج وية النفس تجرين
_ هاي من شوكت
_ تذكرين من تمرضتي صخنتي واني داريتج
_ اي حيل قبل كم سنة
_ اي من ذاك الوكت شعلتي بكلبي حبج
_ ليش متعترفلي
_ اخاف
_ تخاف من شنو
_ تطور علاقتنة وتبدين تحتاجين غير اشياء
_ كافي ليث بعد مااريد اسمع
اكلك
_كولي
اريد اطلب طلب
_ عيوني الج
_ اريد اكمل كلية
_ هااا
_ عفية الله يخليك
_ مادري
_ ليش
_ اخاف عليج
_ لاتخاف اني موسهلة
_ اخاف اطيرين من قفصي ومترجعين
_ لاتخاف موهسة اطير
_ يعني ناوية تعوفيني
_ انت شدكول
_ لا عفية خل امووت وبعدين صيري الغيري
_ اسم الله عليك ليش هيج دكول
_ تحبيني
_ مادري
_ لاتعوفيني
_ مااعوفك لاتخاف ..وهسة شنوو شكلت على الكلية
_ اي موافق بس بشرط بدون اختلاط
_ فدوة الله يحفظك اوعدك وعد عيوني بس يشوفنك
كلش فرح و اني هماتين فرحت وعشنة هاي الايام كلش مقربين وكام يطلعني يفرني بسوك وبالمولات وناكل بالمطاعم يعني عيشني حياة غير حياة حسيت عبالك هستونة مزوجين فرحتنة كبيرة وبدة يقدملي على اوراقي واني وياه نشتري ملابس للكلية هو اختارهن كلهن مستورات اني بالاصل لبسي مستور بس هو زيد بعد

ولحكايتي تتمة