#طوق_نجاة
الفصل2
روحت للحوش وانا مثأتر بلي سمعته
عمتي عايشة .. ان شاءالله خير يا احمد مروح بدري
انا..مافي شئ غير حسيت روحي تاعب شوي قلت شغلي انديره حتى في الحوش
عمتي عايشة.. باهي الحمدلله تبي انديرلك حاجة
انا.. نبي قهوة وجيبها ليا عند امي
عمتي عايشة .. به
انا.. السلام عليكم
امي.. وعليكم السلام
انا.. كيف حالك يا امي
امي.. كويسة ياولدي انت اللي خيرك
انا.. مافي شئ يا امي
امي.. مش على امك يا احمد مروح من الجامعة بدري عادي لكن نبرة صوتك نعرفها كويس
انا.. امي قوليلي معقولة في ام تقسى على صغارها وماتعدلش عليهم
امي .. اه في
انا.. مش مصدق ومش مصدق ان في بني ادام يرقد من غير عشاء ويعاني للدرجة هذي
امي.. احمد شنو فيه على من تحكي
انا.. مش على حد يا امي انا نحكي بالعموم
امي.. اه ياولدي في ناس مش عشاء بس اللي ترقد بلاه في ناس بالايام تقعد من غير وكال ماتشوفش روحك انت ربي منعم عليك برزق بوك وبوظيفتك الكويسة وفي ام تقسى على صغارها وماتعدلش عليهم مش لانها قاسية لا لكن لانها ام انانية ماتفكر في حد الا نفسها بس وبالذات اذا لقت من يرضي انانيتها
انا
سرحت في كلام وردة لما قالت مرات كسرة خبزة يابسة اذوبها في شاهي يعني هيا اكيد وصلت للمرحلة هذي كنهذا ماذكرتهاش معقولة البنت الذكية والاولى على دفعتها بدرجات كاملة والجدية في معاملتها واللي عمري ماشفتها تحكي مع شاب واحترام نفسها وتمسكها بدينها الواضح دائما انها ترد عليا السلام على صباح الخير معقولة تشوف في اهانة لانوثتتها بالشكل هذا من امها وراجلها معقولة في ناس هكي
امي.. وين رحت يا احمد
انا.. قاعد يا امي نفكر بس لو نبي نتصدق كيف اندير
امي.. انت بس انوي وانا نقولك نعرف عائلات واجد نقدرو نساعدوهم
انا.. خلاص يا امي من بكرة تقوليلي كم عائلة اللي تعرفيهن وشنو اولى مستحقاتهم بيش نوفرهن ليهم باذن الله الحمدلله ربي موسع الرزق وشغل المزرعة ماشي احسن مايكون وحتى حضيرة البقر كل يوم مكسبها اكبر من اللي قبله
امي.. ربي يرزقك من واسعها
انا.. ويبارك في وائل اللي لولاه ماعرفت كيف نسق اموري والحمدلله معاي ايد بايد
امي .. حتى هو رزق مرته
انا.. وائل يا امي يشتغل مع باتي الله يرحمه حتى قبل مايفكر يناسبنا ولاعمره يوم فتح موضع ورث مرته
امي.. والله ماقصدي حاجة يا احمد خيرك فهمت هكي انا قصدي بدير باله بالزايد لان رزق مرته قاعد معاه
انا.. عارفك يا امي لكن وائل عمره ماتعامل معانا كنسيب ديمة معاملته معاي كاخ وعمره مافارقني وانتي عارفة الصديق الوحيد اللي عندي
امي.. بس هكي ضيعتنا على موضوعك
انا.. موضوع شنو
امي.. اللي مخليك مضايق هكي في بنت في الحكاية
انا.. امي مافيش تو لكن لو في تو نجي ونقولك بنعدي نرقد شوي قبل الغذاء وقبل ماتجي عبير بهرجتها بيش نصحصح لي اوراقي
امي.. تمام ياولدي نوم العوافي وهرجة عبير هيا اللي محلية الحوش
انا.. اكيد يا امي عندك شك
وخشيت داري وانا نفكر ونفكر في الكلام اللي سمعته وقديش وجعتني وجعتني واجد اخرى معقولة في ناس هكي نحس في قلبي ينغص فيا وبس بسببها وحاوالت اني نهدا ماقدرتش نضت توضيت وصليت ركعتين وقريت شوي في القران بيش نهدا وفعلا هديت الحمدلله
..................
روحت وردة مع روان وبدت اتساعد في عمتها فاطمة في شغل تورتة العرس المكونة من خمس ادوار وطبعا لان وردة عشقها الرسم فكانت هي اللي تصمم في التورتات مما زاد في شهرة معمل عمتها فاطمة وبعدها روحت لحوشهم وكلت طريحة بدون سبب من راجل امها ولان عمر يلعب مع ولد جيرانهم في بلاستيشن في حوشهم طبعا مافيش حد حيهتم ويحز عليها لكن هالمرة الطريحة كانت اقوى مما يكون لانها بغل عشان المرتين اللي فاتن حز عليها عمر خوها الصغير لدرجة انها تتحرك بالغصب وناضت معاها دارت العشاء وزي المعتاد اديره وماتاكله لان راجل امها مايبهاش اتقابله على سفرة وبعد ضمت الحوسة اللي كانت اضم فيها بكل صعوبة خشت رقدت وماحست بحاجة نين الصبح لقت روان باعته ليها رسالة انها مش حتمشي للجامعة ووردة رغم تعبها من الطريحة الا انها بتمشي للجامعة لان اليوم عطلت راجل امها فناضت بالغصب وغيرت دبشها وطلعت تفكرت ان ماعندهاش فلوس بيش تركب قررت تمشي على رجليها في ايام واجدة كانت تغيب فيهن روان على الجامعة ولكن لانها كانت تاعبة واجد فتمشي اقل مايكون لدرجة انها مالحقتش على المحاضرة الاولى وطبعا انا لاحظت غيابها وماحولتش عيوني من على باب الجامعة نستنى فيها ولمحها جاية
طبعا استغربت ان وردة مش قاعدة في المحاضرة واول مرة تصير فمجرد ماطلعت من المحاضرة قعدت ندور فيها او صاحبتها بنسئلها عليها وفي نفس الوقت ماحولتش عيني من علي الباب نستنى فيها لمحتها خاشة من الباب لكن دوبك تمشي استغربت وكان خاطري نمشي ليها لكن طبعا ماقدرتش وجت محاضرتي الثانية اللي اصلا نعطي فيها وخشو للمحاضرة وتفجأت بي وردة مصبية متكية على الساس بعد السلام عليكم وردو الطلبة السلام
انا..وردة ليش واقفة عندك ليش مش في كرسيك
وردة..معليش يا استاذ محصلة طيحة على ظهري مانقدرش انقمعز
انا..ان شاءالله لاباس عليك
وردة ..ماتشوف باس يارب
وبقلبي غصة لاني اذكرت حكيها مع صاحبتها ان راجل امها يضرب فيها وقلت اكيد مش طيحة وعطيت المحاضرة وماطولتش فيها على خاطرها هيا مانبيهاش توقف واجد وطلعنا من المحاضرة وقعدت انراقب فيها وين بتمشي وشفتها ماشية لمكانها المعتاد فعديت لمكتبي اللي روشنه يقعدن حذاه بدون ماينتبهن انه فيه حد بسبب انه ديمة ستايره الحديد مسكرات وقعدت نستنى فيها ونتفرج عليها بدون ماهي تعلم وشوي وطلعت تليفون ملصق وواضح ان موديله قديم حتى عمتي عايشة دايرة احسن منه ورنت وفصلت وشوي رن فونها
وردة ..السلام عليكم
روان ..وعليكم السلام
وردة بعبرة خانقتها ..بالله حبيبة عارفاتك ماتبي تجي للجامعة لكن انا جيت لان اليوم عطلت عمي محمد لكن الحق نبيك تروحي بيا لاني لقيت روحي طالعة ماعنديش فلوس ولانه امس وعطيني طريحة الله لاتروعك مستغل فرصة عمر مش قاعد بيش ينتقم مني على اليومين اللي فاتن ماضربنيش فيهن بسبب عمر وتعرفي ماجيت الا بالغصب حتى المحاضرة الاولى فاتتني
روان ..هيا نغير دبشي ونجيك
روان
سكرت منها وحسيت بوجع كبير عليها لامتى بتعاني يارب هالبنت من ام زي امها ماهمها شئ الا تبسط روحها وراجلها ولبست بسرعة وطلعت حتى السيارة ماخليتها تسخن زين
خلوني نعرفكم بي
انا روان صديقة وردة الوحيدة واللي ديمة نتمنو لو يخلوها معانا ديمة عائلتنا بسيطة لكن ماديا مش تعبانة واجد بسبب فتح امي لمعمل حلويات وموالح ساعدنا واجد على مواجهة تغيرات المعيشة وعيلتنا اصلا مش كبيرة انا البكرية وخوي وسام واختي نوال وكلنا نحبو وردة كانها اختنا شكلي عادي مش شينة ومش جميلة لكن لو حطيت شوي رتوش نطلع سمحة شعرتي ناعمة وديمة مخليتها قصيرة نحب ولد معانا اسمه نزار في الجامعة لكن هو مايعرفش لاني زي وردة مانوقفوش مع الشباب نهائي
انا
بعد سكرت وردة قعدت نراقب فيها وهي كيف تبكي بصمت ودموعها اللي ينزلن تقول شلال مابا يوقف ولانها مقابلة الروشن بالزبط عشان الطلبة مايشوفهاش وهي تبكي لقيت روحي لاشعوريا مركز عليها نتمقل في تفاصيل وجهها
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
