#طوق_نجاة
الفصل36
وردة بتردد .. انا انا كنت
انا..كنتي شنو وردتي
وبدت وردة تبكي نين خفت عليها وقلت خيرها تمت تبكي وخذيتها في حضني
انا..اسسس خلاص وردتي كنك شنو في انتي مش قلتي مع بعض في الضراء قبل السراء
وردة .. انا كنت حامل وصار اجهاض لانه مازال في بدايته الدكتور قال كيس حمل اللي نزل لاني في البداية نسحاب مرضتي تو لان موعدها لكن الدكتور اكد ليا انه كيس حمل اللي نزل
حسيت كأن حد صب عليا اميه مصقعة لكن ماحبيتش نبين لوردة اللي فيها سادها
انا.. خلاص حبيبي مازالتي صغيرة وربي يعوضنا خير ماتعلميش الخير ربي وين داسه
وردة ..ونعم بالله بس قبل خاطري نفرحك بأني نحمل قطعة منك فيا لكن الحمدلله
انا..وردتي ربي لعله اراد خير واحسني الظن بربي وشوفي الخير وين انتي تعرفي لو قعدتي حامل مشيت فرنسا مش حتقدري تمشيها
وردة..ليش
انا..لان الطيران عندهم متشدد والحمل ديمة في اشهره الثلاثة الاولى يكون مش ثابت فيمنع الطيران ركوب الحامل اللي قبل ماتكمل الثلاثة شهور وكانت المشية حتأجل لان امي مستحيل تمشي وتخليك حامل شفتي ربي الخير وين حاطه
وردة ..الحمدلله الحمدلله
انا..وردة
وردة ..نعم
انا..ليش لما ريم نزلت وجهك تغير وعيونك قلبن على العسلي
وردة بتوتر خلاني انشك.. مافي شئ يتهايلك بس ياحبيبي
انا..كيف يتهيالي
وردة .. مافي شئ غير بس قلت لو هيا وطالعة فكرت تسلم عليا راه فطنت للي صاير ليا بس
(وهنا وردة اذكرت لما سلمت عليها ريم وهمست ليها وقالت ليها والله ماقصدي اني ناذيك وانها مانتبهتش ليها انها طاحت تسحابها شدت في سياج الدروج ورغم وردة انها ماصدقتش كلام ريم لكن سكتت )
انا .. مع اني مش مقتنع لكن مانيش ضاغط عليك
وردة لتغيير الموضوع.. امتى بتبدا ادير اجراءات السفر
انا..على طول بعتت للدكتور عشان نحجز لان الحجز هو يسهل الاوراق اللي هنا كلهن وفعلا بعتولي على الايميل الحجز بعد ثلاثة اسابيع للعملية
وردة ..يسهل الله بس انا بنكون مازالت في الجبس
انا..وكان
وردة..كيف بندير بالي على امي
انا.. امي اول اسبوع بتكون في المستشفى فمش حتستحق حاجة لانهم هما اللي بيهتمو بيها وبعدين تكوني انتي حولتي الجبس لان الدكتور قال مع التغذية الكويسة ممكن تحولي الجبس في عشرين يوم
وردة ..تمام باذن الله انكون تمام
انا..خطرها التغذية ليش الدكتور قال ان جسمك ضعيف ومحتاج تغذية هو صح انا فاطن بيك انك ضعفتي شوي لكن مش لدرجة تكوني ناقصة تغذية ليش ياوردتي
وردة ..بصراحة وماتزعلش مني
انا..مانبي الا الصراحة
وردة ..من لما جت ريم وانا مش قادرة ناكل وناكل بس مايكفيني نصبي و نار الحق والعة فيا وحتى بالبرود اللي نتعامل بيه قدام الكل لكن النار تنهش فيا بالذات من رابع يوم لما نزلت ودرت حمام هنا ومقربتنيش خذيتني في حضنك ومع الحركة اللي سمعتها في داركم فوق رغم عارفة ان ريم مرتك وعندها حق فيك زيي لكن غصبن عني
انا باستغراب.. كيف سمعتي اللي صار فوق
وردة .. انا ماسمعتش بالزبط لكن كانت في حركة في الدار اللي فوق ماسمعتهاش من لما جت ريم ولما سئلت عبير قالتلي اللي فوق جناحنا تجي دار النوم بتاعك انت وريم فعرفت ان في حاجة صارت بينك وبين ريم وانها تمت زوجتك فعليا ومعاه ريم ثاني يوم نزلت في بقعة في رقبتها صعبت عليا نفسي واجد
انا..عليش صعبت عليك
وردة .. لاني عرفت انك مازالت تحبها على خاطر انا خذيت وقت طويل بيش قربتني وهيا من رابع يوم
انا
خطر عليا هذاك اليوم اللي قررت فيه ريم تغير السرير قالت ماقدرتش ترتاح في النوم وهو في اتجاهه هكي ولانه ثقيل وتغيرته تعبتني وحسيت روحي عرقت ولاني مانبيش نعطل على وردتي نزلت دوشت تحت ومالقيتش عندي جهد لشئ
فخذيت وردة في حضني ورقدت وفعلا شفت البقعة في رقبة ريم وسئلتها عليها فقالت ليها ان حست بحكة كأن حاجة قرصتها فلما حكتها تمت هكي لكن سكتت مابيتش نوضح لوردة شئ قلت خليه في وقته
انا..ماتصعبش عليك نفسك حبيبتي ريم هذا حقها وكان لازم نعطيه ليها وانا طولت ماقربتش في الاول كنت خايف عليك بسبب فرق العمر وكنت نبي نجيك بالشوي وبعدها جن مواضيع واجد وانتي مكانتك محفوظة وسط قلبي ياعيون قلبي والله عندك شك
وردة.. ابدا ولا واحد %
انا..ربي يحفظك لي يارب هيا خوذي دواك وحاولي ترقدي بيش ترتاحي
وردة ..حاضر
ومشن الايام ووردة تما حال رجلها تمام وقعدت تمشي كويس وبعدها بعشرة ايام مشينا للمصحة بيش نحولو الخياطة
الدكتور .. هيا نفك ليك الغرز
انا..معليش يادكتور ممكن دكتورة او ممرضة تحولهن
الدكتور باستغراب ..ليش
انا..لانك راجل وزوجتي محجبة
الدكتور ..بس انا اللي اسعفتها وخيطتها وتو معترض
انا..عارف يا دكتور انك انت اللي اسعفتها وانا اكيد مش متخلف او ماعنديش قلب وانا رافع زوجتي بين ايديا ومانندريش عليها شنو صايرلها وبتفوق او لا لقدر الله وبنقعد نتشرط ونقوللكم لا جيبولي دكتورة اكيد لا لكن تو والحمدلله زوجتي حالها كويس وبصحة كويسة فبنطلب دكتورة او ممرضة لان شرع ربي قال هكي الا الضرورة والضرورة كانت لما جبتها لكن تو لا
الدكتور.. والله لو كل الناس اللي تخاف ربها تفكر زيك راه حالنا تغير للاحسن
انا باستغراب لاني تخيلت الدكتور يزيد يفور ويتنرفز ..عليش
الدكتور .. لان من يومين خسرنة مريضة ضربتها سيارة وكان لازم نسعفوها وراجلها اصر انها دكتورة تكشف عليها ونحن في هذاك الوقت الدكتورة كان عندها عملية وصعب ان انطلوعها منها وماتت للاسف ونحن نتصارعو مع راجلها اللي مخلاناش نقربوها صح هو اجلها بس راجلها كان السبب
انا بصدمة ووردة بدت تبكي ..معقولة لهدرجة تي حتى دينا يسر مش عسر لاحول ولاقوة الا بالله
وقعدت نسكت في وردة
الدكتور ..خلاص تو نكلمك الدكتورة نرجس اتجي تحول الخياطة
وفعلا جت الدكتورة وحولت الخياطة وطمنتنا ان وردة حالها تمام ودارولها تحاليل وطلعت نتيجته انها كويسة وتغذيتها تمام وطبعا بتكون تمام لاني انا مشرف عليها بروحي ومشن باقي الايام ونحن نجهزو للسفر وحجزت حتى لريم معاي ليش مش عارف ورغم اعتراضها لكن رضخت في الاخير لانها مازالت على ذمتي وفي اليوم الثاني كانت طيارتنا الساعة 10:30 في الليل لكن اليوم في العصر جاني اتصال غيرلي حياتي كلها
انا..السلام عليكم
المتصل........
انا..تفضل
المتصل........
انا..ايه وردة عبد العزيز زوجتي
المتصل..........
انا....كيف فاعل خير
المتصل.........
انا.. خلاص نستناك تعرف العنوان والله نوصفه
المتصل ..........
انا..تمام في الانتظار
وسكرت الفون وانا نقول زعمك هذا شنو يبي مني ومن وردة ومعاها فاعل خير يستر الله واستنيته نين جاء وخش للمربوعة وكان راجل كبير في العمر مش صغير بيش نقول فرخ يلعب بيا وشكله باين انه محترم عندي نظرة في البشر واللي شافاته عيني مش واحد نصاب لكن هي نشوف شنو عنده
انا..تفضل ياعمي وياريت تخش في الموضوع طول وشنو علاقته بزوجتي
الراجل .. انا ياسين فتح الله
انا..مرحبتين بيك
ياسين .. انا نعرف اب وردة الله يرحمه وكان صديق عزيز عليا
انا..الله يرحمه
ياسين ..وكنت نعز وردة واجد وحتى لما امها تزوجت وعرفت راجل امها شنو داير فيها حاوالت واجد اني ناخذها منه لكن شئ سكر راسه ولما سمعت انها تزوجت فرحت ليها واجد وبالذات لما عرفت انك انت راجلها فاطمنت اكثر عليها لكن لما سمعت انك تزوجت عليها ورغم تتبعي لاخبارك واخبار وردة عرفت انك تحبها وواجد حتى تو وانت تحكي ومتعصب وتقول زوجتي في في عيونك لمعة حب واضحة لكن حيرني زواجك الثاني وسئلت على زوجتك الثانية وعرفتها وطبعا اللي عرفته مانقدرش نسكت عليه ومن مصدر موثوق اللي جابلي الكلام هذا لاني انراقب في زوجتك الثانية من مدة هيا وولد عمها
انا باستغراب .. تراقب في زوجتي الثانية ومعاها ولد عمها ليش
ياسين .. لانهم الاثنين متفقين عليك
انا ..شنووووو
ياسين ..اصبر وانا نحكيلك كل حاجة وانت لك الخيار تصدق او تكذب
انا..تفضل
ياسين .....
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
