#طوق_نجاة
الفصل3
استغربت لون عيونها في المحاضرات كنت نشوف فيهن عسليات فاتحات واجد وصافيات لكن تو وهي تبكي لونهن رصاصي بلون الفضة سبحان الله واستغربت تغير لون عيونها خشمها كبير شوي واقف لكن مش مخرب شكلها وفمها تقول مرسوم رسم بالذات وهي تبكي شفايفها رايحات منفخات ماتفهم شئ بشرة وجهها لونها قمحية وشكلها تاعبة مافيش اهتمام واضح اصلا هيا ان شاءالله تاكل مش تهتم ببشرتها استنو شوي هيا مش قمحية داكنة لانها تو لما رفعت ايدها بيش تمسح عيونها ارتفع كم عبايتها شوي رسغ ايدها ابيض ابيض معناها هيا بشرتها بيضاء غير من الشمس منصهدة حرام بالله معقولة في ظلم هكي وشوي وجتها روان وروحت بيها بعد ماتغمرتها وبكت معاها لدرجة ماحسيتش على روحي الا ودمعة من عيني نازلة بسببها ياربي كيف انساعدها ما لي الا وائل نحكيله وهو يشور علي وطلعت من الجامعة مشيت طول للمزرعة
انا..السلام عليكم
وائل.. وعليكم السلام
كنك يا احمد فيك حاجة عمتي رقية فيها شئ رد كنك ساكت
انا.. شوي شوي وسع بالك مافينا شئ
كنك انفجعت
وائل .. مش بالعادة تجي للمزرعة في الوقت هذا وانت وجبة الغذاء شئ مقدس مع عمتي رقية
انا.. نحس في روحي مضايق مخنوق مش عارف شنو ندير قلت نجيك تقولي وبعدين اليوم عندها عبير فاتصلت بيها وقلت ليهم بنجي انا وياك
وائل ..كنك يا احمد شنو اللي مضايقك فتحت الموضوع مع ريم وماعجبكش ردها
انا بشرود ..اي ريم تحكي عليها انا نحكي على وردة
وائل ..كيف قلبك تغير ومن وردة هذي ان شاءالله مش الدحيحة اللي زيك
انا..قلبي قاعد زي ماهو يبي ريم وايه وردة الدحيحة
وائل.. انت من قبل جدي في تعاملك كيف تبي تتغير وتلعب ببنات الناس
انا.. اي بنات ناس معقولة ياوائل تحكم عليا هكي
وائل..ها امنا كيف قلبك قاعد زي ماهو يبي ريم وانت جاي مضايق بسبب وردة ارسى على بر وفهمني
انا..تو نفهمك انا قاعد نحب ريم لكن بالصدفة ياسيدي وحكيت لوائل كل شئ على وردة
وائل بصدمة..تحكي جد انت
انا..جد الجد
وائل..معقولة في ظلم هكي
انا..حتى انا زيك لدرجة والله اليوم وهي تحكي لصاحبتها ماحسيتش بروحي نين دمعتي لقيتها نازالة
وائل.. هههه احمد يدمع معجزة هذي ومن اكبر المعجزات اخرى
انا..بطل سهوكة انا نحكي جد لاني ماتخيلتش في ظلم هكي وفي ناس عايشة بالشكل هذا وزيد عليها انانية ام عمرها مادافعت عليها ولادورتها
وائل.. فعلا والله صعب الواحد يصدق ومعاها ماشاءالله ذكية ومحترمة على حسب كلامك لان كان وحدة ثانية راه قالبة الدنيا بما ان عندها من يعدل عليها او يدور فيها غير ايمانها بربها قوي
انا..فعلا متمسكة بربها واجد وهذا اللي خلاها ما اضلش طريقها لان وحدة ثانية مش بعيد راهي عاهرة (حاشكم )تو من ولد لي ولد
ومن شقة لشقة بيش تحصل فلوس وتعيش تخيل انت في وقتنا هذا وحدة من السنة الاولى لتو وهي بنفس العباية الواسعة ومعاها محرمة كبيرة نازلة لنهاية مؤخرتها
وائل..اذا مش لاقية ماتاكل بتفكر في لبس ربي يعينها ويعطيها على قد نيتها
انا..امين يارب
وائل..بديت تحبها يا احمد
انا.. لا مش حب ممكن شفقة لان قلبي مازال مع ريم وانا جيتك نبيك تشور عليا كيف نساعدها بدون مانوجعها لانها واضح انها عزيزة نفس من نوع الفطور اللي تاخذ فيه عشان ماتبيش تكلف على صاحبتها بعد ماتضغط عليها
وائل.. والله ماني عارف كيف انديرو شنو رايك نحكو لعبير وهي تصاحبها وتهتم بيها
انا.. لا لا لا عبير
وائل..كنك انفجعت
انا..ياراجل عبير طول تحكي لامي عليها وامي عارفها حنونة واجد تو تتاثر وتبدا شادتها بكاء لا فكر في حل ثاني
وائل..خلاص هيا نمشو تو بيش مانعطلوش عليهم ونفكرو كيف انساعدوها بدون مانجرحوها
انا..هي صح عطلنا عليهم
وائل
واحمد هو يحكي مش مركز على روحه مش شفقة اللي يحس بيه ناحية وردة لاني نعرف صاحبي واجد وحافظه كيف روحي هو معجب بيها من زمان من قبل مايعرف قصتها لان لما يحكي عليها في في عيونه لمعة مانشوفش فيها الا لما يحكي على وردة وشطارتها ولما تحل مسألة صعبة غير السنة اللي فاتت خشت ريم في النص وقعدت تشد وترخي معاه بمعنى تلعب فيه بكيد النساء نين تعلق بيها وحبها زي مايقول وتو هيا راخية بيه بيش يدير خطوة ويحكي ليها بصراحة واحمد لانه جدي مايبيش جو علاقات يبي زواج طول غير خايف ان ريم ماتتقبلش وضع امه وتهتم بيها لكن تو وهو يحكي على وردة شفت في عيونه نظرة حب مش شفقة زي مايقول غير صاحبي يكابر والوقت يثبت كلامي خلوني نعرفكم بيا
انا وائل صديق احمد الوحيد وراجل اخته عبير عمري 29 مهندس زراعي وكنت نخدم في المزرعة مع عمي عبدالرحمن الله يرحمه وكنت ذراعه اليمين وراجل بنته وبعد ماتوفى شديت المزرعة وحضيرة المواشي ودرت بالي من رزقهم كأن عمي عبدالرحمن حي والحمدلله نحن اصلا ماديتنا كويسة باتي تاجر وهو وخوتي متولين الموضوع لكن انا بسبب صداقتي باحمد وتعلقي بالمزرعة طلعت مخالف لخوتي وقريت هندسة زراعية بدل الاقتصاد والحمدلله نحب عبير واجد وعندي توأم هاني وهيام عمرهم اربع سنين ربي يحفظهم لي حملت عبير بيهم طول بعد زواجنا
#حياة
أنت تقرأ
طوق نجاة
Sonstigesعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
