#طوق_نجاة
الفصل27
وصلنا للحوش واستقبلتنا امي بفرحة واجدة لدرجة شكيت ان امي عارفة لكن قلت ممكن فرحانة لفرح وردة لان وردة خشت وهيا تتغزل في امي واضح السعادة في صوتها وقديش سعيد لسعادتها مع اني لما نتفكر ريم نحس بنخصة في قلبي وسبحان الله كيف يتغير الانسان في الاول كنت نحس في نخصة في قلبي باني عشمت ريم فيا ولكن تو النخصة بان اللي جاي مش خير يارب استرها من عندك
وردة.. عبير وعمتي كنكم مازالتو ماوتيتو
عبير..كنا نستنو فيك
وردة.. هيا انا شوي ونكون واتية
عمتي عفاف ..خلاص ماوتيتي نوتو حتى نحن
خشت وردة لجناحنا وانا مشيت وراها
انا..وردتي البسي حاجة طويلة وحتى محرمتك ماتحوليهاش
وردة..عليش ماتبينيش نطلع انيقة ونطلق شعري
انا.. لا حبيبي انتي حتى بعباية ومحرمة تطلعي فاتنة لكن عائلة ريم تعتبر نفسها من العائلات الfree يعني عادي توقعي تلقي جلستنا فيها بوها فهمتي عليا
وردة .. اه بس هذا حرام لانهم مش محرومين علينا
انا.. العائلات اللي فاهمة الحرية زي اهل ريم ما يهتموش بالدين
وردة .. حاضر حبيبي شنو رايك تختارلي انت اللبسة
انا.. حاضر
واخترت ليها فستان طويل لونه وردي هادي مرسوم عليه فراشات صغيرة واجدة من فوق وكل ماتنزل لنهاية الفستان تكبر الفراشات مخصر من فوق وواسع واجد من تحت من الشيفون المبطن وكمه واسع مشدود باسورة عريضة في النهاية بحيث ان الكم منفوخ وعليه محرمة كبيرة لونه وردي داكن شوي ومادارات شئ على وجهها سوى كريم ترطيب بس وطلعت زي القمر ومركز مع عيونها لكن الحمدلله ماشفتش اللون الرصاصي الحمدلله وانا اختارت ليا وردة سروال جينز اسود وقميص ابيض وجاكيت خفيف بيج وكويش بيج وطلعنا من الدار
عبير ..بسم الله ماشاءالله ربي يحفظكم من العين ويبعد عليكم كل شر
عمتي عفاف..اقسم بالله ماتقولي ماشية بتخطبي لراجلك
وردة بخجل ..تسلمو وعادي عمتي وكان مشيت نخطب لراجلي احمد مايديرش في حاجة حرام
امي..ربي يكملك بعقلك
انا..امين يارب
وطلعنا وتكيت على حلواني وخذيت طبق حلويات وباقة ورد وعلبة شوكلا قالتلي عليهن وردتي ونحن في الطريق اول ماخشينا للحي بتاعهم وردة قعدت تضحك وكلنا استغربنا
انا..كنك وردة
وردة..في الحي هذا صارلي موقف مش عادي
عبير..شنو ضحكينا معاك
وردة..مرة جانا اتصال على المعمل على اساس بنصممو تورتة لعرس وطبعا الفيلا اللي مشينا ليها تشبه القصر او هي قصر لكن صاحبتها مرا قمة التواضع والرقي وتعاملت معانا بكل احترام وحتى الضيافة هي اللي ضيفتنا ماخلتش الشغالة اضيفنا فطبعا انا وعمتي فاطمة نسحابو الناس كيف بعض مرة ثانية جينا لعنوان اخر بس في نفس الحي وفيلا اصغر فخمة بس القصر هذاك مازال افخم وطبعا فتحت لينا الباب مرا واضح كبيرة شوي في العمر لابسة بدلة رسمية تعاملنا معاها بكل احترام نسحابوها صاحبة الفيلا وقعدنا نسئلو فيها على شكل التورتة كيف تبيها وهي قاعدة كيف بترد علينا نزلت علينا مرا كبيرة لكن تبي روحها صغيرة غصبن عن الزمن اللبسة اللي لابستها ماتوحيش بانها مناسبة لعمرها ابدا لابسة لبسة حتى بنت في ثالثة اعدادي ماتلبسهاش غير باكو الالوان اللي على وجهها فلما انا قعدت نسئل طبعا هيا قعدت ترد ولانها ماسلمتش علينا حتى بالسلام عليكم وخشت طول ترد على اسئلتنا ضايقتني بعدم احترامها لينا ونسحابها الشغالة وقلت شكلها شغالة واخذة الغلبة على صاحبة الحوش فبعد تقريبا ثالث سؤال خلاص وصلت حدي فقلت ليها معليش انا نسئل في صاحبة الحوش مش انتي عدي سلم اميمتي كان عندك حاجة بضميها بري ضميها وطبعا خرارة وفاضت (حاشكم) علينا وطبعا بعد اللي صار وقلة الاحترام اعتذرنا على عدم قبول الطلبية وطلعنا وانا وعمتي فاطمة بنموتو من الضحك
عبير..من طلعت
وردة..طلعت هيا صاحبة الحوش واللي تعاملنا معاها انها صاحبة الحوش طلعت الشغالة وطبعا انا وعمتي فاطمة تقريبا كل مانذكرو الموقف نقعدو بنفطسو من الضحك وخطر عليا فيلم غزل البنات بتاع نجيب الريحاني وليلي مراد اللي كل مايجيه راجل يسحابه صاحب القصر اللي هو اب ليلى مراد في الفيلم الاول طلع الجنيني والثاني طلع رئيس الخدم والثالث يسحابه الجرسون وتعامل معاه على هذا الاساس فطلع هو الباشا
انا وعبير وعمتي عفاف نضحكو على الموقف وعلى وصف وردة للمرا وحسيتها نقت الفاظ كويسة على خاطر وردة تحشمت من عمتي عفاف لكن اللي مفرحني وردة وضحكتها اللي تهبل مع نقرة الزين الواضحة واجد ووصلنا للفيلا اهل ريم ووردة تشهق شهقة كبيرة
انا بفجعة ..كنك وردتي
وردة بصدمة .. هذي فيلا الزبونة اللي تو نحكيلكم عليها
انصدمت بعبير وعمتي عفاف كيف انفجرن ضحك وحمدت ربي ان رواشن السيارة مسكرات على خاطر التكييف
عبير بضحك ..حي عليك يا احمد مرتك دايرة كبوة كبيرة مع حماتك يستر الله
عمتي عفاف..كان ماتلزناش بعصى كله كويس
وردة.. غير ان شاءالله تقعد فهمت انها كبيرة في العمر وتلاقينا بلبسة ملايمة
انا
وعاحبني جوهن وهنا ناسيات عليش جايين لكن لازم نفطهن خلاص نحن لينا قريب عشر دقايق ونحن واقفين قدام الحوش
انا..هيا ياحناتي بطلن ضحك وخلونا ننزلو موقفنا اخيه راه
ونزلنا وفتحو لينا الباب وطبعا ماخلاش وردة وعبير وعمتي عفاف من التعليقات وزي ماتوقعت الشغالة دخلتنا كلنا لصالة استقبال وشوي نزل اب ريم وسلم علينا وشوي ونزلت ام ريم وطبعا طول خطر عليا كلام وردة شديت ضحكتي بالغصب لانها لابسة قفطان في الديكور قريب لديكور قفطان وردة غير بلون ثاني ورسم ورد بدل الفراشة مش لعمرها بكل والمكياج تقول هيا العروس وسلمت علينا وصلت لعند وردة
ام ريم .. نعرفك من قبل
وردة.. اه مرة كان حيكون بينا تعامل لكن ماسخرش ربي
ام ريم ..انتي من
انا..هذي وردة مرتي
واضح ان ام ريم انصدمت ان مرتي جاية تخطبلي واللي صدمني اب ريم
اب ريم .. ماشاءالله والله احلى من بنتي
انا معاش فيها ضحكت يسحابني ماسمعتاش
ام ريم .. غريبة جايبها معاك تخطب ليك
انا..هي جاية بكامل قناعتها لانها موافقة على زواجي الثاني من بنتكم
وطبعا بدون مقدمات انا ياعمي نتقدم نطلب ايد بنتك ريم ليا
اب ريم.. انتم والله متفقين على كل شئ وبنتي تبيك فاكيد ليا الشرف انك تكون نسيبي
انا.. بارك الله فيك
عمتي عفاف ..وين العروس امنا
شوي ونزلت ريم ومعاها خوها والحق تعقدت وبالذات لما جاء بيسلم على وردة لانها اول وحدة مقمعزة احذاي بعدها عمتي عفاف وبعدها عبير وبعدها ام ريم فلما جاء مد ايده لوردة شديت ايده وسلمت عليه ثاني
انا..معليش مرتي ماتسلمش
هيثم بصدمة .. اه قصدك هذي مرتك
انا.. اه في حاجة غريبة
هيثم .. اكيد كيف مرا تخطب لراجلها
انا.. عادي لانها موافقة على ارتباطي الثاني
والحق تميت معاش نفرز في حد حتى ريم شنو لابسة مازبطتها لان هيثم ما نزلش عينه على وردتي لدرجة كان لقيت فقعتهن ليه ووردتي من كثر هو مانزلش عيونه عليها مارفعتش راسها من الارض
انا بعصبية حاولت نخفيها.. هو معليش ممكن نقعدو منفصلين لاني مش متعود نسواني يكونو مع ذكور مافيش علاقات شرعية بينهم
ام ريم .. عليك تخلف
انا.. معليش عمتي مش تخلف اللي بيحافظ على دينه واذا مايناسبكمش عادي نروحو وريم تتفاهم معاكم وتكلمني بالفون
ريم .. لا يا احمد هيا تفضلو في الصالة الثانية
وخذت ريم عبير ووردة وعمتي وامها لدار ثانية وقعدت انا وبوها والزفت خوها وتفاهمنا على الشروط وتكلمو ان الفاتحة تو فقلت ليهم لا وسببي ان ريم بتطلع بتجهز روحها ومرات حتى تسافر وانا مستحيل انوافق مرتي تطلع بدون مانندري وهكي حنقيد ريم فخلو الفاتحة مع العرس واذا يناسبكم العرس يكون بعد اسبوعين
اب ريم ..خلاص خلينا نشوفو اروحانا ونردو عليكم
انا.. متفقين بأذن الله هيا نستأذنو
معليش نادولي على عيلتي
وطبعا الحديث اللي دار في الصالة الثانية
ريم ..انتي صار وردة
وردة.. اه انا وردة
ريم ..ماشاءالله اسم على مسمى
وردة..شكرا
ريم ..ان شاءالله مش زعلانة عشان احمد بيتزوجني عليك
وردة بثقة .. لو زعلانة ان احمد بيجبك شريكة ليا فيه مكنتش جيت لان احمد مستحيل يغصبني على حاجة
ام ريم .. انتي كنتي تشتغلي في معمل النوران
وردة..اه
ام ريم .. اذكرتك تو
وردة ......
عمتي عفاف لتغيير الموضوع .. ان شاءالله لو صار التفاهم العرس مش حيطول
ام ريم.. ان شاءالله اصلا حتى ريم مش ناقصاتها حاجات واجد بندورو حجز الصالة والفيلو بتسافر لتركيا بتجيبه
عبير .. اذا سمح ليها احمد
ام ريم ..كيف اذا سمح ليها
عبير ..لو الفاتحة انقرت تو مستحيل احمد يطلقها تسافر بدون اذنه او هو مش معاها
ام ريم بحتت في ريم .. قصدك ياريم انتي بتتزوجي واحد بالعقلية هذي
وردة..كنها عقلية احمد توزن بلاد ربي يحفظه
ريم ..امين وانا مش معترضة على طبعه
خشت الشغالة وقالت لنا احمد يستنى فينا وطلعنا
انا
كنت نستنى فيهن وانا نغلي لان الخرا هيثم مازال قاعد حذاي ماكفاشي امبدري وهو يتمقل في وردة ومازال بيكمل لما بنطلعو واكثر حاجة قعدت نفكر فيها كيف انا بنتقبل هذا خاش وطالع من حوشي بحجة اخته وهو مركز مع وردتي هكي وطلعن علينا ومانندريش على روحي حطيت ايدي على كتف وردة وجبدتها لحضني ونحن نمشو كأنه نقوله او نثبت ليه حتى وجاي ونطلب في اختك للزواج عليها لكن هيا خط احمر وركبنا السيارة وماحد فينا تكلم انا نرجى امتى نوصل لاني عارف وائل حنلقاه قدامي لانه هو اللي بيجي للصغار بعد ماعمتي عايشة بتروح ووصلنا للحوش وطول بعد السلام على امي خذيت وائل وطلعت برا
انا..بنموت يا وائل كان نلقى هالزيجة تتفركش لاهون سبب ويجي منها
وائل..خيرك شنو جد معاك كنت ماشي امورك تمام
انا..والله الطريق كلها قضيناه ضحك بسبب نوادر وردة واسئل عبير تو تحكيلك لكن هذا وين آمنت صح اني نعشق وردة وحكيت لوائل على هيثم اخ ريم
ومش عارف ياوائل كيف بندير وهو كل مرة بيجي هنا بحجة اخته وهو عينه على وردتي الا ماتحشم وانا حذاها
وائل..ساهلة يا احمد حلها
انا..كيف ساهل
وائل..لما تتزوج ريم بلغها ان خوها او بوها لما يبو يزورها تستخدم الدروج الخارجيات وهكي تضمن ان ماحد يحتك بوردة ودير جهاز انتركم لريم بيش لما يكون علي الباب واحد من اهلها تطلع تستقبلهم هيا وتنبه عليها الدروج الداخليات تسعملهن هيا بس
انا..والله ريحتني ياوائل الحق
وائل..تغار يا احمد
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
