طوق نجاة

الفصل20

#طوق_نجاة
الفصل20
انا..شنوو
وردة بنفس التوتر ..انا سمعتك لما كنت تحكي مع وائل وانك وبدن دموعها ينزلن بتتزوج
انا.. وردة اااااانا
وردة مسحت دموعها اللي نزلو .. احمد انا مش نلوم فيك ولا نعاتب فيك هذا حقك اهو قديش ليك شهر متزوجني وماقدرتش تقرب مني وهذا حقك والله ماني معترضة عليه بس خايفة
انا
هي تحكي على حقي واني ماقدرتش نقرب منها ومش عارف شنو السبب رغم انها قمة الانوثة حتى بالبيجامات النوم المستورة والارواب المستورات وانوثتتها تنطق ومع ذلك ديمة خايف اني نقربها مش لاني مانبيش لكن خايف
انا..خايفة من شنو وانا معاك
وردة بدموع .. ماهو انت لما تتزوج بتسيبني
انا بسرعة قصيت على كلامها.. مستحيل مستحيل انسيبك اصلا انا مستحيل نفكر مجرد التفكير اني نخش حوشنا ومانشوفكش قدامي مستحيل
وردة باستغراب كبير .. كيف
انا ..نحكي معاك بصراحة
وردة .. وانا مانبي الا الصراحة
انا.. وردة انتي حتكوني معاي لطول العمر يا تدفنيني ياندفنك لكن انسيبك لا ومش شفقة والله لكن انتي غيرتي فيا واجد انا طول ما انا معاك وانا نضحك وانا سعيد ممكن زي ماقلتي ماقدرتش نخليك مرتي فعليا لكن والله ماني عارف السبب ونحس في روحي كل مابنقرب من الخطوة هذي نلقى روحي خايف
وردة باستغراب ..خايف
انا..اه خايف ومش عارف من شنو لكن اللي تكوني واثقة منه اني عمري مانظلمك معاي ولا حد يقدر يقربك او يهينك ومش معناها اني بنتزوج اني بنسيبك بنعدل بينكم وربي مايخليني نقصر معاك واكيد حيجي يوم وتكوني زوجتي فعليا لكن امتى هذا اللي مش عارفه
وردة ..يعني مش حطلقني
انا.. مستحيل ومعاش تقوليها الكلمة هذي حتى لو انتي تبي انا مستحيل نخليك
وردة بهدوء.. وانا مستعدة نمشي معاك نخطبها لك
انا..مش للدرجة هذي
وردة..تبي راحتي
انا..اكيد
وردة وباصرار ..معناها نمشي معاك لما تخطبها وحتى الفرح حنضره اكيد
انا باستغراب .. عليش
وردة..انا طول عمري من لما مات بابا وتزوجت امي وهي تنظرلي الناس بشفقة حتى في الجامعة رغم انهم مايعرفوش ظروفي لكن عشان نجي بنفس العباية رغم ذكائي الا انهم ينظرو ليا بشفقة وكأن الذكاء من حق اللي يلبسو بس لكن لما تزوجتني النظرات تغيرن جيرانا اللي يحبوني فرحانين ان ربي فكني من اللي انا فيه واللي مايعدلوش عليا تغيرت نظرة الشفقة لنظرة حسد عشان خذيت راجل عنده فلوس  واخيرا افتكيت وفي الجامعة من لما تغيرت العباية  وقعدت نلبس في الدبش الحلو اللي تجيب فيه ليا وانت محافظ على حشمتي واهتمامك بيا حتى بفطوري تغيرت بين الغيرة والحسد وبين الاحترام فلم نمشي معاك وانت تخطب ولما نحضر الفرح فمستحيل انشوف نظرة الشفقة في عين حد عشان يعرفو اني موافقة وبرضاي
انا.. اه
وردة..وانا فعلا يا احمد موافقة وبرحابة صدر وبكل رضى
انا..ربي مايحرمني منك يارب
وردة..بس شنو بتقول لامي رقية
انا..مازالت مافكرت في حد لان اللي كان شاغل فكري الاول هو انتي
وردة.. بس سبب الزواج شنو بتقول وهما يسحابوك ازوجتني لانك تحبني
انا..وردة انا مانكرهكش
وردة..عارفة
انا..مش عارف ماهو قلت ليك مافكرت في شئ الا انتي
وردة.. شنو رايك تقول بسبب اني عندي مشكلة في الحمل
اناوبتردد..ماهو حيجي وقت ويصير حمل
وردة وخدودها تمو حمر.. لعندها يحلها الف حلال نقولو رحمة ربي
انا.. وردة ياريت البنات كلها زيك
وردة..وياريت الرجالة كلها زيك انت حميتني وحميت عرضي ومعاها صايني وبرغم اني مش زوجتك فعليا لكن لانك راجل صح مابيتش تكلمها او ترد عليها عشان ماتخونيش
انا.. مستحيل نتزوج ثاني وثالث ورابع لكن خيانة ابدا
وردة .. ربي يحفظك
انا..طبعا انا حنتكلم معاها في الفون عشان تعرف اني ماخليتش بيها لكن مش حندير حاجة حتى خطوبة نين تكملي امتحانات السمستر هذا
وردة..به
انا..هيا نطلبو حاجة وقت عصرية ونحن متعودين على حاجة حلوة
وردة..لا هيا نروحو نعصرو مع امي رقية اكيد مشغول بالها عليا
انا..ربي يحفظك لي ولامي خلاص حنتكو على محل ناخذو حلو للعصرية
وردة ..به احمد بنقولك حاجة
انا..تفضلي
وردة..ماتقولش حاجة لحد نين نكلم روان ونفهمها لانها لم تحمق معاش تقدر تمسك روحها فخليني نقوللها ونفهمها قبل
انا..به اللي يريحك اصلا انا مازالت مانيش حاكي مع حد تو
ووصلنا للحوش وخشت وردة على امي وقديش فرحت بشوفة ضحكة امي بمجرد ماخشت ليها وردة بضحكة
وردة.. السلام على الحلوة امي رقية
امي ..وعليكم السلام
كنكم روحتو بدري مش على اساس بتعصرو برا
وردة..ومعقولة في عصور والغالية مش منوراته نحن حسينا ان العصور ناقص بلاك فجبنا الحلو وقلنا نعصرو مع البركة كلها
امي..انتي من يقدر عليك وعلى لسانك
وردة..ماهو من كثر ما نحبك
امي..وانا نموت فيك ربي يحفظك بنيتي
انا..وانا وين من هذا كله
وردة وامي مع بعض.. في القلب
انا بضحكة ..حتى في هذي متفقين
امي..اطلع منها انت
عمتي عايشة ..هيا العصور واتي
وعصرنا ومع ضحك وردة وامي قضيت احلى وقت زي كل وقت نقضيه مع وردة وفرحان انها تقبلت موضوع زواجي
#حياة