#طوق_نجاة
الفصل18
انا بتنهيدة.. نبي ريم
وائل..كيف تبيها
انا..نبيها تكون مرتي انا مازالت نحبها
وائل..ووردة
انا..وردة كنها
وائل..كيف كنها يعني شنو بتسيبها
انا..لا مستحيل
وائل..انت بتجيب اخرتي شكلك
انا..مستحيل نطلق وردة ووردة حتكون مرتي لاخر يوم في عمري عادي يعني نتزوج ثاني
وائل..كيف
انا..شنو كيف عادي انا نقدر نتزوج وعندي امكانية اني نتزوج واكيد حنكلم وردة وناخذ رايها وصح انا نحب ريم لكن مستحيل نتزوجها بدون موافقة وردة
وائل..انا قلت نسيتها وانك بديت تحب وردة
انا.. حتى انا هكي كنت نقول ولما روحنا من لندن كنت حنتم زواجي بيها فعلا وجهزت كل شئ وبعد ماروحتو جتني رسالة من ريم خلتني معاش قدرت اندير شئ ولقيت قلبي متلخبط فقررت اني مش حندير شئ نين انتاكد من قلبي ومع رسائلها ومع شوفتي ليها اليوم كيف ذابلة وتاعبة عرفت روحي فعلا اني مازالت نحبها هي وبس
وائل..بس مش حرام الناس ماتعلمش اللي بينك وبين وردة وانت بتتزوج عليها تو الناس شنو بتقول
انا..مش تو حنتزوج انا بنخليها نين وردة تكمل السمستر هذا يكون على الاقل فاتو قريب سبعة شهور على زواجنا
وائل..انت عارفني معاك بس وردة خايف عليها تنظلم معاك
انا..عمري ماحنكون سبب ظلمها
وائل..ربي يجيب الخير
انا..امين. هيا نروحو اكيد يستنو فينا على العصرية طالما الغذاء ماجيناش
وائل..هي
روحنا للحوش ولقيت وردة تجهز في العصرية في المطبخ وامي وعبير وعمتي عايشة يهدرزو في الجنان سلمت عليهم وخشيت لوردة
انا..السلام عليكم
وردة ..وعليكم السلام
انا..كيف حالك تو سامحيني ماروحتش بيك
وردة.. عادي احمد ما ادير في بالك شئ حتى ماروحتش بيا اهو كلمتني عبير روحت بيا شنو خليتني في الشارع
انا جيت ضميتها وحطيت راسي في رقبتها نشم في ريحتها .. مستحيل نخليك وسامحيني نسيت اني بنطلعك اليوم ونسيت مافطرتكش
وردة ..عادي يا احمد والله ماني زعلانة وبعدين قضيت وقت حلو مع عبير وامي رقية وعمتي عايشة والتوأم
انا ومازالت حاضنها ونشم في ريحتها ومش عارف ليش نحس براحة كبيرة معاها .. ربي يكملك بعقلك ويحفظك لي
وردة..ويحفظك لي
انا..بعدت عليها وردتي ماتطلعيش هكي وائل برا
وردة..حاضر اصلا انت عارف في الجنان مانطلعش منغير محرمة غير تو حولته نجهز في السفرة
انا..ربي يكملك بعقلك هيا نساعدك
وردة ..هي
انا..اااايه كيكة حلوة شكلها
وردة..انا دايرتها وبالشوكلا والفراولة
انا..ياسلام
وطلعنا وعصرنا وهدرزنا وضحكنا وخشن البنات جوا لان امي صقعت وقعدت انا وائل نحكو
وائل..قلتلي على رسائل لكن شنو كاتبتلك فيهن
انا..اول رسالة ( تخيلت كل شئ الا انك تتزوج غيري احساسي كان يقولي انك تحبني وكنت نقول اكيد مسألة وقت ويجيني ويقولي نحبك كنت نعد في الوقت بالساعات عشان تجيني ولما نغيب نلقاك تزوجت انا شنو درت ليك تخلي قلبي متعلق بيك وتسيبني )
وبعدها الرسائل بنفس الطريقة لوم وعتاب
وائل..بس انت يا احمد قوي معقولة وحدة ادير فيك هكي
انا..عارف روحي ياوائل اني قوي وطبعي واعر لكن هذا القلب وانا طول عمري اني نتزوج على حب واندير علاقة زواج حلوة زي اللي كانت بين امي وباتي الله يرحمه
وائل..ياخوفي
انا..من شنو
وائل..من انك من كثر ماتبي تتزوج على حب زي باتك وامك يخليك اعمى على حاجات حلوة حذاك
وائل
انا متأكد ان صاحبي يحب وردة وقاعدك نظرة عيونه اللي يلمعو لما يحكي على وردة زي ماهيا عكس تو وهو يحكي على ريم مافيش اي لمعة لكن مشكلته من كثر مايبي يتزوج على حب زي باته وامه خلاه مايفطنش بروحه ان الحب يجي بعد الزواج او حتى يكون موجود قبل لكن مرات مانحسوش بيه
انا.. لا ماتخافش لاني ريم مش من تو نحبها
وائل.. قلت ليك من قبل انا معاك في اي شئ بس امتى بتفاتح وردة
انا.. مش عارف لكن لازم هاليومين بيش نقدر انرد على ريم لاني لتو مارديتش عليها ولا حاجة على خاطر مانبيش نكون راجل خاين حتى لو مانحبش وردة
وردة
انا كنت نبي نقول لاحمد ان عمر اتصل بيا وقالي انه يبي يجيني ولان باته مايبيش يجي لعندنا فقاله قول لاحمد يجيك وانا كنت بنقول لاحمد يمشي يجيبه لكن لقيته يحكي هو وائل وماقدرتش اني مانسمعهمش قلت بالك نفهم سبب ضيق احمد رغم انه يحاول على قد ما يقدر انه يكون معاي تمام لكن ديمة نحس فيه حاجة وسمعت كلامه مع وائل وحسيت بنخصة في قلبي خفت ايه خفت حياتي كيف بتكون معاي والله بيخلني معاه او بيطلقني وبنرجع لجحيم راجل امي من جديد وهكي حيستبيح جسمي صح طالما انا وبنت ماخافش على عرضي لابال كان نجيه مطلقة يارب كون معاي يارب
انا
كنت نحكي مع وائل انتبهت لوردة جاية شورنا لكن معاش عرفت سمعت كلامنا او لا
انا..كنك ياوردة تبي حاجة
وردة حاولت ماتبين شئ ..معليش قصيت عليكم كلامكم بس عمر اتصل بيا ويبي يجيني وباته مش فاضي فاذا ماعندكش مانع تمشي تجيبه ليا
انا.. هذي بس حتى مش فاضي نفضى على خاطرك
وردة..تسلم وربي مايحرمني منك
وفعلا ندعي فيها من قلبي ان ربي مايحرمني منه حتى لو يبي يتزوج عليا عادي هذا حقه ولانه راجل مارضاش انه يخوني وماردش عليها نين يكلمني لكن يكلمني شنو بيقولي
انا
معاش عرفت وردة سمعت كلامنا او لا لكن لما تكلمت عادي لكن لون عيونها رصاصي مش عارف شنو وطلعت جبت عمر وجيت وقديش قعدت تحضن في عمر وقديش كانت مشتاقة ليه لانها فترة الامتحانات وبعدها العطلة وبدت السمستر الثاني مامشتش عشان كان راجل امها واخذ اجازة ومقضيها طياح في الحوش
انا..هذا كله رياف علي عمر
وردة..وااااجد
عمر ..حتى انا رايفت عليك معاش تغيبي عليا هكي
وردة.. حاضر ياحبيبي حتى اذا ماجيتش نكلم احمد يجبك لي
انا.. في اي وقت وانا نجيبك انت قول بس
وقديش كلمة حبيبي طالعة منها تهبل تمنيتها ليا
عمر .. شكرا عمي احمد
انا..العفو
وردة.. هيا نخشو نسلمو على امي رقية وعبورة وتشوف توأمها زيك انت وعامر غير هيا ولد وبنت وبعدها نلعب انا وياك بلاي ستيشن
عمر بفرحة ..عندك بلاي ستيشن
وردة بحب.. اه جابه ليا احمد وجابلي دسكات واجد وحتى دسكة فيفا اخر حاجة
عمر ..هيا هيا
وعدت وردة مع عمر وقديش طفلة هيا وياه وخطر عليا فرحتها لما جبت ليها البلاي ستيشن كانت زي الطفلة اللي يجبولها قفطان العيد
وائل..وين رحت يا احمد
انا..في وردة
وائل.. عليش
انا..قديش كل مرة تسحر فيا وتسلب في عقلي في جرتها كل مرة نلقى روحي متعلق واجد بيها وكأنها حاجة مهمة لا هيا مش كأنها هيا فعلا حاجة مهمة
وائل..ووووك منك انت ادوخ فيا كيف تحب ريم وكيف وردة تسحر فيك
انا..مش عارف لكن كل شئ نتخيله الا يوم يجي و وردة مش معاي فيه
وائل..انت تحب وردة وريم مجرد تعلق وشعور بالذنب لانها تعلقت بيك وماتقولش ولا كلمة ودير اللي يريحك
انا..تعرف انا اللي ساحرني في وردة طفولتها وقلبها الابيض ونحس فيها كانها بنتي اما ريم مراءة متكاملة وحتى عمرها اكبر من وردة لانها تقريبا كان مش غالط معاودة اكثر من مرة اضني عمرها 25
وائل..بس انا مش متخيل كيف بتتفاهم معاها ريم نعرف عائلتهم اولا عيلة كل شئ عندهم free مافيش حدود واستهتار ويسحابو الدنيا كلها فلوس زي هما زي حوش عمها وعيلة مفلوتة على بعض زي البنات والله الشباب احرف من بعض
وانت يا احمد واعر وغيور واجد كيف بتحملك
انا..شوي بشوي تتغير وتمشي على طبعي
وائل..يستر الله مع اني اشك
زعمك يعطوها لك على مرا
انا..اكيد وهما يطولو يناسبو احمد عبدالرحمن
وائل..اكيد لا
انا..خلاص امنا حنكي مع وردة اليومين هذين بيش ريم تنسق مع هلها بيش ندير حاجة رسمية بعد نهاية امتحانات وردة
وردة
قعدت نلهي في روحي مع عمر ولعبت معاه واجد وفرحت بجيته لكن قلبي واجعني وخايفة خايفة يسيبني او خايفة الثانية تخيره بيني وبينها يارب فرجها من عندك
عمر..كنك وردة
وردة..مافي شئ حبيبي
عمر..لا في صح انا صغير لكن نعرفك يا اختي
جيت حضنت عمر وخانتني الدمعة ومعاش عرفت نوقفها وعمر ياروحي زاد حضني وقعد يمسد بايده على شعري الله يا وخيي على صغرك قديشك حنون عليا ربي يحفظك لي
عمر..قوليلي وردة عمي احمد دارلك حاجة نكلمه عادي راه انا راجلك بالك يسحاب انه ماعندك حد
وردة..لا يا حبيبي عمك احمد مادارلي شئ غير انا هكي مضايقة ورايفت على عمتي فاطمة ليا واجد عليها
عمر..خلاص قولي لعمي احمد يرفعك ليهم بكرة وحتى انا تو نجيك غادي عندهم
وردة ..حاضر تو نقوله
عمر..هيا كلمي عمي احمد يروح بيا ليل طولت
وردة..حاضر
وطلعت وكلمت احمد ورفع احمد عمر
عمر ..عمي احمد دير بالك على وردة راه وردة زعلانه
انا بصدمة..زعلانة من شنو
عمر..زعلانة منك
اناوعلى نفس الصدمة..مني
عمر ..اه
#حياة
أنت تقرأ
طوق نجاة
De Todoعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
