طوق نجاة

الفصل40 والاخير

#طوق_نجاة
الفصل 40 والاخير
وقعدت في الصالون نين هديت واهل ريم قعد معاهم وائل وعبير نين لمو حاجتها كلها وانا نهدي في روحي عشان نخش على وردة مانضرهاش بعصبيتي يكفي اني ضريتها بزواجة ثانية وياريتها طلعت حاجة متسقمة نبي نعاتبها مانبيش نعاركها ليش ماقالتش لي ان ريم هي اللي دفتها وانا قاعد نستهدى بالله ونستغفر خشت عليا امي
امي..احمد
انا ..نعم يا امي
امي.. خش ياولدي على وردة اكيد بعد اللي سمعاته هذا كله تكون خايفة خش عليها يا ولدي وخوذها في حضنك وبين ليها اسفك وندمك على الجيزة هذي وماتعاركهاش على انها دست عليك لانها وردة كانت مستحيل حتقولك
انا بتنهيدة..عارف يا امي لكن قاعد هنا انهدي في روحي مانبيش نخش عليها بانفعالي هذا والله يا امي ماني زعلان منها انها دست عليا لانها وردة لكن زعلان عليها وزعلان من روحي لاني انا اللي وصلتها لهكي مانسحابش انضباطي وصونت اعراض الناس ترد عليا هكي
امي.. استغفر ربك ماتقولش هكي ربي يعطيك درس وبالعكس لانك فكرت في صونت عرض ريم وقتها ربي حمالك وردة فكر لو ماتزوجتهاش كانو شنو حيديرو ربي ابتلاك وحماك استغفر ياولدي
انا بتنهيدة..استغفر الله العظيم واتوب اليه والحمدلله على كل حال الحمدلله
امي ..خش يا احمد وهدي بالها
انا..حاضر يا امي
.............
وردة
خشيت للجناح نرعش خايفة من احمد يفهمني غلط ويسحابني كنت نحكي معاه وبالذات لما سمعته كيف يضرب فيه قلت اكيد تو يجي ويضربني حتى انا ودموعي مابنش يوقفن من الخوف حتى قفطاني اللي غيرته ولبست قفطان ثاني نعول بيه ومانحبش نقعد بيه في جناحي ماغيرتاش من الخوف والدموع وانا ندعي لربي تمشي الامور على خير وبعدها قعدت نسمع في صوت احمد عالي وهو يعارك فيهم وشنو ريم كانت ناوية بدير زاد خوفي رغم اني عارفة روحي مع احمد مايجيني شئ لكن قلت ممكن يحملني كل اللي صار وزدت نرعش على الفكرة هذي لدرجة اني لما سمعته وهو يطلق في ريم ماقدرتش نفرح والخوف خلاص سيطر عليا ودموع لدرجة معاش نشوف في شئ منهن ولساني يردد في الدعاء اللطف بيا على خشت احمد عليا
انا.. وردة
وردة .. انا والله ......
قالت هالكلمتين ولو مالحقتهاش كانت حطيح على حافة السرير جيتها نجري مسكتها وقعدت نوعي فيها مابتش توعى حطيتها على السرير وجبت عطر بخيتها بيه مابتش توعى طلعت نجري لوائل
انا.. وائل اطلع ولع السيارة وردة اغمى عليها ومابتش توعى
وائل.. جهزها هيا
عبير ..استنو نمشي معاها نلبس عبابتي بس
وائل .. هيا بسرعة
خشيت لجناحنا وانتبهت لوردة شنو لابسة قفطان بتاع حوش ومبلول ووجها كيف رايح وخطوط الدموع اللي باينات على خدودها مشيت جيهت الدولاب نطلع في لبسة وانا نقول شنو دارت ياروحي في عمرها عشان يصير فيها هذا كله وبديت نغلي من روحي لاني انا اللي وصلتها هكي وغيرت قفطانها بسروال وسورية طويلة وفوقهن بشت وغطيت راسهابمحرمة ورفعتها بين ايديا ضامها لصدري نبيها تحس بدفء صدري ونبضات قلبي اللي الدقات فيه تمت اسرع من الصوت بسبب خوفي عليها وركبت السيارة معاها من الخلف ومابيتش نطلقها وعبير ركبت مع وائل من قدام وانا ندعي لربي انه يحفظها ليا ووصلنا للمصحة وتلقتني دكتورة ومابيتش نحطها على باريلا خايف نزلها معاش ترجع لحضني وحطيتها على السرير في غرفة الطوارئ وجت الدكتورة بتفحصها وطلبت مني نطلع وطلعت وانا رجليا مش قادر نوقف عليهن وجيت قمعزت على اول كرسي قابلني
عبير.. هدي بالك يا احمد حتكون بخير بأذن الله
انا بضعف..كله مني انا اللي ضريتها بجيزتي هذي مش عارف شنو درت في روحي بس
وائل..نصيب يا احمد ووردة انسانة مؤمنة وعارفة اللي مكتوب مامنه هروب
عبير ..المهم تو تفوق وردة وادير بالك منها وعوضها على كل شئ
وائل..واهم حاجة ماتعاركهاش يا احمد عشان دست عليك ان ريم طيحتها لان هذي وردة اللي ماتحبش المشاكل كانت مستحيل حتقولك
انا..تفوق بس وانا نعوضها على كل شئ
على طلعت الدكتورة جيتها نجري
ها طمنيني على مرتي
الدكتورة.. ماتخافش الاغماء في وضعها هذا طبيعي هي تعرضت لشد اعصاب نين سبب ليها هبوط في الضغط عشان هكي فقدت وعيها ووشوي حتفوق بس اهتمو بيها وبعدو عليها اي ضغوط لان كثرتهن تسبب ليها حالة اكتئاب حادة او ممكن تفقدوها لان هبوط الضغط الحاد مش ساهل راه
انا..حاضر نقدر نشوفها
الدكتورة..اه تقدر تشوفها وتروح بيها وكتبت ليها على دواء جيبوه ليها واعطوه ليها بانتظام وفي تحاليل ديروهن لزيادة اطمئنان
انا..تمام يادكتورة
وخشيت على وردة ولقيتها فايقة وتبكي وجسمها كله يرعش جيتها وشديت ايدها ومسحت دموعها
انا..عليش الدموع هذين ياقلبي
وردة بصوت دوبك طالع ..انا والله ماحكيت معاه
انا..اسسسس عارف ياقلبي وردة اللي عشقها عقلي قبل قلبي مستحيل تكلم حد تعرفني نضايق منه انا آسف ياقلبي وسامحيني ياروحي على درته فيك
وردة ..انت مادرت شئ عشان نسامحك عليه
انا..لا درت يكفي اني تزوجت عليك
وردة..لاحبيبي الزواج عليا ماهوش ذنب لان هذا شرع ربي حلله
انا..به ليش خفتي مني هكي لدرجة يغمى عليك
وردة بتردد ..خفت تضربني زيه
انا بصدمة..نضربك معقولة انا نمد ايدي على مرا ومن روحي وقلبي مستحيل
معقولة تفكري فيا هكي
وردة ..حقك عليا
انا..هيا ياقلبي نروحو
وردة ..هيا
وساعدت وردة على التصباي وروحنا بيها وتغمرتها امي وبعدين اعتذرت منهم وخشيت بيها لجناحنا وطلعت ليها لبسة وساعدتها في تغيير دبشها وخذيتها في حضني
انا..تعرفي نحس في روحي تاعب من زواجي الثاني اللي كان فوق طاقتي واني نكذب عليك ومفهمك ان زواج حقيقي وهو زواج على الورق بس هي ضحكت عليا بس الحمدلله ربي كشفها قبل مايضروني بيك الحمدلله مع اني عاتب عليك انك ماقلتيش ليا على ريم انها دفاتك لكن مش زعلان منك بقد مازعلان من روحي لاني لو فكرت شوي وشفت تسجيل الكاميرات راه عرفت الحق ورغم اني حسيت بكلامك مش مقنع على القطوسة لكن عقلي شئ مافكرش اني نشوفهن بكل
وردة..مش عقلك حبيبي اللي غاب لكن قلبك هو اللي سيطر هداك الوقت وخلاك تهتم بيا وتلهى بوجعي وماركزتش على اي حاجة اخرى
انا.. طول عمري نقولك ربي يكملك بعقلك
وردة ..نحبك واااااجد ونحبك اكثر لما تأكدت انك ماقربتش ريم
انا..هههه هديك الليلة بدلت اتجاه السرير بس
وردة ..ماهو فهمت الحكاية
انا..نحبك انتي وطول عمري حلمت بقصة حب زي امي وباتي الله يرحمه وهذا ليش لما تزوجتك مابيتش نفتح قلبي ليك طول رغم انك كنتي جوا قلبي قبل ماتكوني مرتي ولما اعترفت بحبي ليك فكان من المستحيل ان نقرب مرا اخرى مهما كانت لان قلبي وجسمي لمرا وحدة بس وهي انتي ياضي قلبي
وردة ..ياه يا احمد قديش تمنيت اني نسمع كلام زي هذا منك
انا.. عندي خبر حلو ليك وبمناسبة زوال هالغمة علينا الاسبوع الجاي بنمشو للعمرة زي ماوعدتك هدية نجاحك قبل مايبدا السمستر الجديد
وردة..بس هكي حنكونو في السعودية ويخش علينا شهر رمضان الكريم غادي
انا..اه
وردة..بس مش بايخة امي تقعد اول رمضان بروحها شنو رايك ناخذوها معانا
انا..فكرة والله خليني نشوفها كان قالت باهي تو نحجزلها معانا
وردة ..لكن تقدر تحصل حجز ليها
انا..ان شاءالله نحصل وعلى فكرة بعد يومين حتكون اول ذكرى زواج لينا
وردة.. العمر كله انا وياك
انا..امين
ورقدنا وكل منا في قلبه راحة كبيرة لكن انا مازالت في داخلي نار حقي وحق وردتي منهم مش حنسيبه وكملت الاجراءات وسافرنا للعمرة وعدت امي معانا وجبت لوردة طقم ذهب ابيض هدية ذكرى زواجنا وخش علينا الشهر الفضيل وردة كانت في قمة السعادة انها في اطهر مكان في الارض وفرحتها بزورة قبر النبي عليه الف صلاة وسلام ورجعنا واستقبلنا وائل وعمي محمد وفي الحوش كانو يستنو فينا كلهم اهل وردة وعمها ومرته وايمن وعيلة عمي عطية كلهم وكانت لمة حلوة وطبعا صار تصادم ثاني بين ايمن ونوال لدرجة دفعت ايمن يستئذن مني يبي يسئل عليها طبعا هو ماقاليش لكن وردة حكتلي بعدين
وردة..ترا اوصفها ليا
ايمن ..طولها زي طولك جسمها حلو متناسق وعيونه كبار ولونهن اسود سواد الليل ورموش خفاف وبشرة قمحية فاتحة ومحجبة بس مش زيك
وردة..هههه ولسانها طويل
ايمن..ماشفتش زي طول لسانها
هههه شكلك عرفتيها
وردة ..اه هذي اختي نوال
ايمن ..قصدك بنت عمي عطية
وردة..اه
ايمن ..معقولة عمي عطية يجيب بنت لسانها طويل هكي
وردة بمكر .. هههه ماشفتهاش امنا لما تحكي وتسب بالانجليزي عوض الله عليك
ايمن.. لكن بنت غريبة برغم لسانها الطويل
وردة..كيف السنارة غمزت
ايمن..لاغمزت لا سو غير لفتت انتباهي
وردة ..قلت لي لفتت انتباهك
ايمن..شنو عندك شك
وردة..لا ابدا انا بنشك فيك انت
على العموم هيا عندها حساب على الفيس اسمه ..... كان ترغب تتعرف عليها
طبعا وردة عطاته الحساب لان رغبة نوال عشان عجبها ايمن وزاد اعجابها لما حكتلها وردة على حكايته ومتأملين في نوال تغيره
..........
انا.. وائل شنو درت في اللي وصيتك عليه قبل مانسافر
وائل..تمام يا احمد مع انه كان تسمع كلامي تفوته خير انت الطريق هذا عمرك مامشيت فيه
انا.. عادي الانسان يتعلم وماتخافش على خوك مش معناها اني نحب التدريس يخليني مانعرفش حاجة ثانية
وائل.. به قولي كيف بتوفق تو بين التدريس وبين اللي بتنفذه
انا..بناخذ مجموعة وحدة بس نعطيها محاضرات والباقيات بنعتذر عليهن واكيد بتكون المجموعة اللي فيها وردة عشان اندير بالي منها
وائل..صار مخطط لكل شئ
انا..اكيد وحقي مستحيل انسيبه وكان ماخليته يقول حقي برقبتي مانقعد احمد عبدالرحمن
وائل..وانا معاك مستحيل نسيبك ياصاحبي
انا..ربي يحفظك لي ويحفظلك صغارك
ومشن الايام وطبعا اكتشفنا ان وردة حامل في بداية الشهر الثاني وبدت السنة الاخيرة لوردة في الدراسة وانا ماشي في انتقامي خشيت لعالم التجارة وبديت فيه بكل قوة فلوس واجدة من مدخول المزرعة ورواتبي اللي مانقرب فيهن وكل صفقة يخش فيها رامي يلقاني بالمرصاد ليه ونوقف قدامه ونربحه ومشن ايام رمضان حلوة مع تعب وردة من الحمل ويستر الله كيف بتكمل السنة هذي وكمل رمضان الكريم على خير وطبعا ثالث يوم العيد عرس روان ووردة كانت معاها خطوة بخطوة رغم تعبها وعمر اللي زاد عمره سنة لكن لعقله عشر سنين وقديش فرح بحمل اخته وفرح اكثر لما عرف ريم انها مش حتكون موجودة في حياة اخته اما امها فلا حياة لمن تنادي كل ماتجي لوردة عشان تاخذ منها فلوس او هي الساعة تقعدها معاها وتطلع ووردة لما تمشي ليها اتقضي في معظم الوقت مع خوتها وبدت الدراسة وقعدت نرفع في وردة ونجيب لان روان السمستر هذا مش حتقراه وقعدت ديمة خايف على وردة فقررت انسيب رامي الفترة هذي لان وضع وردة مايسمحش اني نكون بعيد عليها واليوم بنعدو للمتابعة الدورية بتاعتها وبنشوفو شنو نوع البيبهات اي بيبهات لان وردتي حامل بتوأم ربي يحفظهم هما وامهم
وردة ..هيا حبيبي تو نتاخرو
انا.. تعرفي والله لو ماعارف انك حامل واخرى بتوأم نقول بطنك هذي زيادة وزن ياروحي البطن مهناش بكل
وردة..ممكن بسبب وزني قبل الحمل
انا..اللي محيرني اكثر انك تاكلي في وكال ماشاءالله عليك عيني ما اضرك
وردة .. الحمدلله اني ناكل مانسمن كنهدا راه تميت زي الفيل وبعدين نبدا معاش عجباتك وادور غيري
انا جيتها وضميتها وقلت ليها
انا.. لو تبدي زي الفيل او الديناصور قلبي وعيوني مستحيل يشوفن مرا غيرك حتى لما يبدا شعرك ابيض وفمك مافيشي سنون وانا نقولك نحبك بفمي اللي سنونه كلهن مشن زي سنونك حبي ليك مستحيل يتغير
وردة بحب ..وانا طول عمري حنحبك لاخر نفس فيا ربي يحفظك ليا
انا ..هيا حبيبتي بيش مانعطلوش
ومشينا للمصحة وقالت الدكتورة ان الحمدلله صحة وردة تحسنت وانها حامل بزوز اولاد وفرحت بيهم واجد مع اني تمنيت يكونو بنت وولد عشان نحصل بنوتة نسخة من امها لكن حتى الولاد نعمة كريم يكفيني ان امهم وردة وروحنا للحوش
امي..الف مبارك بنيتي ربي يفتح عيونك على خير
وردة..امين يارب
انا..وردة انتي تو كيف خشيتي للرابع تقدري تكملي السمستر الجديد كنهدا اعتذري عليه
وردة .. اظني هكي لان اصلا بيكون المشروع بس فحنعتذر عليه والوقت اللي بنقعده في الحوش نشتغل فيه المشروع غير تطلع النتيجة ونطمن اني نجحت
انا وبفخر ..اكيد ناجحة وبمجموع كامل زي المعتاد
وردة ..يستر الله مع تعب الحمل ماظني ركزت واجد على الاسئلة وحاسة اني لخبطت واجد
انا..ابدا انا متأكد
جت وردة وقربت مني
وردة..معناها انت عرفت النتيجة صح
انا.....
وردة ..بالله طمني وريح قلبي سلم حبيبي
امي..بطل مكر يا احمد ريح قلبها
انا..اكيد ياحبي صفيتي وبمجموع كامل
وردة بفرحة وتمت بتنط جيتها مسكتها
انا..صغارك ياقلبي
وردة بفرحة ..نسيت من الفرحة
امي ..الف مبارك يابنتي
ومشن الايام وعبير اختي جابت ولد وسماته عبد المعز وفرحنا بيه واجد ومشت فترة حمل وردة بخير ويوم ولادتها كنت قريب فقدت عقلي خصوصا مع صوت عياطها وكل عيطة تطلع منها كان قلبي بيوقف وراها والحمدلله هي وياهم بصحة طيبة
انا..حمدلله على سلامتك ياقلبي
وردة بصوت ضعيف ..جبتهم حبيبي طبيعي وكنت قوية بدون عملية
انا بفرحة ..وردتي طول عمرها قوية ربي يحفظك لي
وبستها على جبينها وخشت امي وعبير شايلين العيال بين ايديهم خذيتهم وسميت واذنت في وذانهم وجبتهم لوردة
انا..ها حبيبتي شنو بتسميهم
وردة ..انا بنسميهم
انا..اكيد انتي اللي حملتي وتعبتي وعانيتي في جيابهم فاقل شئ انك تسميهم انتي
وردة ..عبد الرحمن وعبد الرحيم
انا..متاكدة ياقلبي
وردة ..اكيد باذن الله
وعدن الايام وانا رجعت بقوة لمحاربة رامي وفي نفس الوقت اهتمامي بصغاري ووردتي وامي والحمدلله كملت وردة مشروعها وتخرجت مع مرتبة الشرف وتما قبولها كمعيدة في الجامعة لكن هيا تبي تحضر ماجستير وانا شجعتها وبدت بالفعل ومع معاونتي انا وامي وعمتي عايشة وعمتي فاطمة اللي تقول هيا جدتهم ام امهم بحنانها اللي انتقل من وردة ليهم قدرت وردة تحضر الماجستير وخذاته بتفوق وكنت نبيها على طول تبدا في تحضير الدكتوراء غير قالت انها تبي وقت راحة من القراية وتبي تهتم اكثر بصغارها ومشن السنين وانا انتقامي من رامي ماهدتش ناره مشروعه ماقدرش ايديره لان اصلا معاش عنده بيش ايدير لان اي صفقة يبي يخش فيها يلقاني قدامه ومشن السنوات واحتفلنا بذكرى ميلاد صغارنا الثالث وطلعت وردة حامل وفرحت واجد بيها وجابت بنوتة زي القمر زيها خذت منها كل شئ حتى لون العيون خذت منهم اللون الرصاصي بلون الفضة وقلت ليها اني بنسميها
انا..انا هالمرة بنسميها وخصوصا انها طالعة زي وردتي
وردة.. اكيد ياقلبي بس شنو بتسميها
انا.. عشق
وردة ..عشق ليش
انا..عشان انا معاك وصلت لمراحل العشق والهيام عشان هي نتيجة حب زاد اضعاف وعشق مستحيل ينتهي
وردة ..الله يا احمد تحبني للهدرجة
انا.. فوق مما يتخيل عقلك
وردة بحب ..ربي يحفظك وانا يعلم الله بحبي لك
وطلعت وردة وانا فرحان بين امي وعيالي وعشق عشقي اللي خذت عقلي ونسيت نقوللكم ان روان حملت بعد وردة بحملها بعشق بفترة قصيرة لانها ما حملتش على طول بعد زواجها وجابت بنوتة حلوة خذت ملامح بوها وسموها ندى بعد جيبت بنتنا عشق بشهرين وفي يوم قررت نطلع انا وصغاري ووردة نتغذو في مطعم لان امي ماشية عند عبير عشان عبدالمعز اللي عمره اربع سنوات مريض قاعدة معاها وصغارها هاني وهيام قراية عندهم
ومشينا للمطعم صغاري تما عمرهم اربع سنين وعشق قريب تسكر سنة وبعد ماتغذينا خذيت انا رحمن ورحيم للحمام (حشاكم)نغسللهم ايديهم وخليت وردة توكل في عشق
وردة
طلع احمد للحمام (حشاكم) يغسل ايدين رحيم ورحمن وانا قعدت نوكل في عشق انتبهت ظل واقف عليا رفعت عيني ولقيتها ريم لكن متغيرة صح قاعدة نفس جو اللبس بس تحجبت لكن الوجه مختفي منه الحياة كأن هموم الدنيا كلها على راسها
ريم..السلام عليكم
وردة ..وعليكم السلام
ريم..كيف حالك ياوردة حلوة بنوتك
وردة..بخير الحمدلله يحلي ايامك كيف حالك انتي
ريم بحسرة ..مش كويسة ياوردة وانتي بيدك تساعديني
وردة ..انا كيف
ريم ..احمد ياوردة قلب حياتنا رأس على عقب ورامي تاعب واجد بسبب احمد
وردة باستغراب ..شنو دخل احمد
ريم ..احمد خش لعالم التجارة وقعد يحارب في رامي في اي صفقة يخش فيها وحياتنا تعبت ياوردة من لما تزوجته وانا حياتي تاعبة يكفي ان ربي عاقبتي باسوء عقاب حرمني من اني نكون ام ياوردة مايكفيشي عقاب زي هذا وانتي ربي رزقك بصغار
وردة بأسف..ربي حنان وكريم واللي يثوب على خطاءه بنية خالصة مستحيل ربي يبخل عليه
ريم ..ونعم بالله بالله عليك وردة كلمي احمد يخلي رامي في حاله مكفاشي اربع سنين وهو ينتقم منا
انا
طلعت من الحمام (حشاكم) لقيت مرا وعطتني بظهرها واقفة على وردة ووردتي تحكي بتأثر معاها وقربت منهن انا..رررريم شنو اديري هنا مش قلت ليك معاش نبي نشوف وجهك قدامي
وردة..احمد اهدء حبيبي الصغار
ريم بانكسار..اسفة حقك عليا
وعدت وانا قعدت نشوف في وردة نبي نفهم منها شنو قالت ليها ريم لكن ماقالت شئ واللي قالته لي نتكلمو في دارنا وروحنا
وردة..حبيبي سيب ريم وراجلها في حالهم يكفي اللي درته فيهم
انا..مادرت شئ غليلي نحس فيه مازال ما ارتوى
وردة..ومستحيل يرتوى حبيبي لان الانتقام ماليشي نهاية وبعدين ربي عاقبهم باسوء عقاب
انا قعدت نشوف في وردة نبيها تكمل كلامها
وردة..اسوء عقاب ان ربي حرمها من انها تكون ام في هكي من اسوء عقاب مايجي شئ قدامه عقاب ربي كبير
انا..ونعم بالله
وردة..حبيبي على خاطر لو تحبني سيبهم يكفي اللي هما فيه الانتقام لما يزيد على حده ينقلب ضده وياخوفي ينقلب عليا او على صغاري ماتحولش من مظلوم لظالم ياقلبي
انا وبعد صمت طويل وتفكير لان فعلا مافيش عقاب اكبر من ان الانسان ينحرم من شعور الابوة والامومة
انا..خلاص ياقلبي وعد ماعاد جاي شورهم
وردة جت حضنتني ومن حضن بوسات متتالية ومنها لبحر شهدي اللي مستحيل يكمل طالما وردة هيا اللي شريكتي ومشن ايام ووصغاري التوأم تما عمرهم سبع سنين وعشق اربع سنين وسيبت رامي في حاله وعيالنا وعيال روان وعيال عبير وعيال عمتي عفاف اللي بعد ميس تما عندها ادهم وسراج تعلقو ببعض واجد واليوم مروحين من عرس ايمن على نوال وكانت فرحتنا كبيرة بانه قرر يبدا في الحياة من جديد وبعد ماغيرنا دبشنا وزي المعتاد لازم نقرا قصة لعشق عشان ترقد بينما التوأم قررو انهم يلعبو مع امهم بلاي ستيشن
انا..ولما الاميرة كلت التفاحة رقدت وجاء حذاها الامير وشد ايدها فتحت عيونها
عشق..لا يابابا ماسدس (ماشدش) ايدها هو باسها على فمها
انا بصدمة..شنوووو
عشق ببراءة ..زي ما انت تبوس ماما على فمها
انا قعدت انادي على وردة اطلعني من اللي حصلت روحي فيه
انا..وردة ياوردة
عشق..انا لما نكبر نبوس معز زيك انت لما تبوس ماما
انا وصلت لدرجة الغليان .. وردة وين رحتي تعالي
عشق..خلص بابا ماتزعلس ( ماتزعلش) حتى انت تو نبوسك زي معز عسان (عشان) ماتزعلس ( ماتزعلش)
وردة
جيت من اول ما نادى عليا احمد وقعدت نسمع فيه هو وبنته وعرفت انه بيموت من الغيرة عليها فخليته بنشوف لوين يوصل معاها لكن لما قالته حتبوسه زي معز عرفت انه وصل اخره
وردة..نعم يا احمد
انا بعصبية..من بكرة علاقتك باختي تقطعيها
وردة بضحكة ..شنو من جدك يا احمد
انا..ناقصني غير ولد وائل يشاركني عشقي مش ساده واخذ لون عيونك الخضر ونقرة الزين منك من كثر عبير ماتتوحم عليك يجي يشاركني في بنتي ابدا ومعاها بنتي بتقاسم حبها ليا معاه
وردة ..هههههه به اللي تبيه
غير تعالى وين طالع تو
انا..بنمشي لوائل يشد فرخه عليا وعلى بنتي
وردة بضحك على غيرتي..تي غير تعالي الصباح رباح وخذتني في حضنها تهدي فيا على غيرتي اللي ماقدرتش انتحملها على بنتي هذي وهيا بالعمر هذا امنا تكبر كيف وبعد مارقدو صغاري خشيت جناحنا وخذيت وردة في حضني وانا ناعم باحسن راحة وحب وعشق لحبيبة قلبي وردتي
وردة..من يوم ماخشيت حياتي وانت #طوق النجاة اللي تعلقت بيه وطلع اجمل واحلى #طوق نجاة
انا..غلطانة ياقلبي في البداية ممكن كنت ليك طوق نجاة لكن من لما خشيتي حياتي وانت اللي صرتي طوق نجاتي بسبب وجودك في حياتي تغيرت مخططات رامي وريم معاي تخيلي لو انتي ماكنتيش في حياتي وتزوجت ريم على اساس اني نحبها شوفي صدمتي بعد مانكتشف خيانتها لي واتفاقها مع ولد عمها فلو واحد فينا #طوق نجاة للاخر فمعناها انتي ياقلبي كنتي #طوق نجاة لي
وردة ..نحبك
انا..نموت فيك ياطوق نجاتي
#حياة