#طوق_نجاة
الفصل4
روحت روان بوردة لحوشهم بيش ترتاح عندهم وبعد مادهنت ليها الضربات بمرهم شروه خصيصا على خاطرها ودارت ليها عمتها فاطمة وكال بيش تقدر توقف على رجليها واهتمو بيها كوردة تبي العناية وفعلا وردة بعد يومين بدت تخف اوجاعها وحكت لعمر خوها انه معاش يسيبها وحكتله كيف ضربها ورغم سنه الصغير وخافت عليه لكن اطرت انها تحكي ليه عشان هو حمايتها من راجل امها وتمشي للجامعة كل يوم وطبعا انا كل يوم نراقب فيها بدون ماهي تلاحظ ونسمع فيها كل مرة بشكوى شكل ونستنى في وائل يفكرلي في حل لمساعدتها لعند جاء اليوم اللي غير حياة وردة وانا نهائيا
روان
كنت راقدة ومحاضرتنا الساعة ثمانية ونص الصبح وطبعا بنوض بدري لكن للاسف نضت على دقات الباب او كلنا نضنا مفجوعين على دقة الباب الساعة سبعة الا ربع الصبح وفتح باتي الباب ولقاها وردة
وردة ..السلام عليكم
العم عطية اب روان ..وعليكم السلام
وردة..سامحني ياعمي جيت بدري غير راجل امي اليوم بيوصل خوتي للمدرسة بينوض بدري معاهم فهربت قبل ماينوض
العم عطية ..خشي يابنتي هذا حوشك اتجيه امتى ماتبي غير خفت صايرتلك حاجة
وخشت وردة للحوش ودارت روحها عادية لكن وجهها متغير ولاحظت روان وجه صاحبتها كيف رايح ومتاكدة ان صاير معاها حاجة غير ماتبيش تقول حاجة احذا هلها جهزت عمتها فاطمة الفطور ودارت وردة روحها تفطر وهي ماقدرتش تحط حاجة في فمها اكثر من فنجان القهوة وايدها ترعش وانتبهت روان عليها وقلبها نغصها على صاحبتها جهزت روان روحها وطلعن من الحوش الساعة ثمانية الاربع عشان تستفرد بصاحبتها وتسئلها خيرك لكن بمجرد ماركبت السيارة ووردة انهارت ببكاء بصوت عالي نين روان خافت لكن مابتش تكلمها لان احيانا الدموع والبكاء فيه راحة كبيرة وكملت الطريق ساكته نين وصلت للجامعة وطبعا في نفس الوقت انا نضت بدرى وقلبي موجوع
انا
عادتا نوض نصلي في الفجر ونرجع نرقد عادي لكن اليوم اللي صارلي صعب نشرحه حسيت بقلبي نغصني بوجع مشيت لدار امي طول ولقيتها تصلي وفرحت انها بخير لكن النغصة في قلبي مستمرة قاعدة توجع فقررت اني اندير قهوة ونقعد شوي على النت ونمشي للجامعة بدري وخلاص بالك قلبي يهدا شوي وبالفعل لما جت الساعة ثمانية الا ربع طلعت من الحوش ووصلت الجامعة لقيت سيارة روان استغربت لانهن عادتا يجن قبل المحاضرة ممكن بعشر دقايق الحق خفت وخشيت لمكتبي بخطوات شبه جري وجيت عند الروشن طول ونسمع وردة تبكي وروان تهدي فيها
روان .. اهدي ياوردة واحكيلي بالله عليك وانتي من اول ماطلعنا وانتي مابطلتيش بكاء حرام عليك
وردة ......
روان .. والله هكي تعذبي فيا به غير اشربي امية و كل حاجة ليها حل
وردة ببكاء.. الا اللي صايرلي ماليشي حل
روان .. اهدي حبيبة واحكيلي
وردة .. الحيوان
وردة تحكي بشهقة مافارقتش كلامها ولاول مرة تسب راجل امها على قد مادار فيها لكن اول مرة تسبه
انا
وجعتني وهيا كيف تبكي وواضح بكاها بحرقة من حاجة كبيرة صايرة ليها لان حتى لما كانت مضروبة ويدوبك تمشي كانت تبكي بصمت لكن تو تبكي بشهقة ومعاها اول مرة نسمعها تسبه قلبي نغصني بقوة اكثر هالمرة
روان .. كنه شنو درالك
وردة بشهقة .. هالحيوان كان يبي يعتدي عليا بيغتص وكملت بكاء
روان بصدمة ..شنو
وردة .. والله انا عارفة نضرات عيونه ليا شنو وعمري مالبست في الحوش الا القفاطين بتاعت جدتي اللي كان باتي محتفظ بيهن ذكرى من امه الله يرحمها كله عشان نصون روحي من عيونه لكن اليوم استغل فرصة عمر وعامر مرضى فراقدين مع امي وخش عليا الدار وهو ريحته لاتطاق وانا كنت كيف كملت صلاة الفجر ونقرا في جزئي اليومي من المصحف وحاول يعتدي عليا وماقدرتش حتى انعيط صكر فمي وقعد يقولي كان تعيطي نقول انتي اللي ناديتي عليا ولما جيتك بنعطيك اللي تبيه قعدتي تعيطي تتبلي عليا وشوفي من بيصدقك امك اللي مهما اندير فيك مستحيل اتكلم بتجي تو وبتصدق وانا معاش عرفت شنو اندير قعدت ندعي لربي في سري واندف فيه من عليا بكرعيا وبكل قوتي قدرت نباعده عليا وعديت نجري لدار امي درت روحي بنشوف عمر وعامر وقعدت معاهم نين عرفته رقد ودوشت على السريع بيش نحول ريحته المعفنة من عليا وقعدت نكد في جلدي نبي نحول لمساته ليا وجيتكم نجري وكملت بكاء بحرقة وضمتها روان وقعدت تبكي معاها
انا
مش مصدق اللي نسمع فيه وكيف هكي تحكي ودموعها اللي ماوقفوش بكل وكيف اضم في روحها بيديها كانها بتحمي روحها وجعتني وجعتني ومانندريش على روحي الا وانا ماشي شورهم
انا بعصبية وبشدة .. وردة وروان تعالو لمكتبي وشيرت على الروشن
وردة وروان انصدمن لما عرفن ان الروشن اللي هنا احذاه ديمة مكتب احمد
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
