#طوق_نجاة
الفصل38
انا بفجعة ..كنها امي فيها حاجة
وردة ..ماتخافش حبيبي مافيها شئ غير اتصلو قالو ان امي الضغط راقي عليها ممكن بسبب التوتر ولازم نمشولها بالك ينزل بيش ماتتاجلش العملية
انا ومصبي من على السرير .. هي حبيبي جهزي روحك مابين مامشيت شفت ريم
وردة ..حاضر
وطلعت ومشيت لجناح الثاني ودقيت عليها طولت مافتحت ففتحت بالكرت اللي عندي وخشيت عليها وعيتها
انا..صباح الخير
ريم ..صباح النور
انا ببرود..بنمشي انا ووردة للمستشفى عند امي شنو بتمشي معانا والله بتقعدي هنا
ريم ..الحق انا مانحبش المستشفيات يا احمد وحتى كان مشيت حنقعد في الجنينة
انا..احسن بس طلوع لا
ريم ..قصدك بنقعد محبوسة هنا
انا..لا عندك الفندق فيه مطعم وفيه شوي محلات ابرمي فيهن لكن طلوع برا الفندق لا
ريم ..امري لله
انا..هي سلام
وطلعت منها وجهزت روحي وطلعت انا ووردة ومشينا للمستشفى واطمنا على امي وهديناها وبعدين تفكرت ان طلعنا ومافطرناش واستئذنت امي وطلعت انا ووردة مشينا لمطعم في المستشفى وطلبنا فطور
انا ..ليش حبيبتي ماذكرتيني بالفطور
وردة ..حبيبي نحن هداك الوقت مشغولين بامي يعني في بالنا الفطور
وخطرت عليا ريم اللي مارضتش اصلا تجي معانا يارب قديش كنت ظالم روحي وظالم وردتي معاي
انا .. وردتي سامحيني
وردة باستغراب ..على شنو حبيبي انت مادرت شئ ليا غلط بيش نسامحك
انا..عشان تزوجت عليك
وردة ..حبيبي شنو خطر عليك نحن نهينا الكلام فيه الموضوع هذا ان هذا مكتوب من ربي اني نجرب شعور تكون عليا ضرة وانا راضية بلي كاتبه ليا ربي
انا..ربي يحفظك ليا يارب خطرها مش قلتي ولد عمك هنا في فرنسا
وردة ..اه
انا..باهي عندك كيف تتصلي بيه
وردة ..لا والله لان الفيس بتاعه سكره لكن نقدر نكلم عمي
انا..خلاص امنا كلمي عمك واعطيه عنوان الفندق واسمه بيش يجينا فيه
وردة بفرحة ..تمام حنكلم عمي ونقوله
به مش حيضايقك اني نشوف ولد عمي
انا..عليش بيضايقني اولا هو اصغر منك وثانيا انا عارف انتي كيف متربية ومستحيل حديري حاجة اضايقني ليش بنضايق
وردة ..ربي يحفظك لي كان تعرف قديش مشتاقة ليه لاني نحس فيه كانه خوي بالذات بعد ما بابا شاف امي كيف تعامل فيا قرر انها مايجيبش منها صغار ثانين
انا..مشتاقة ليه ياوردة
وردة بتوتر..معليش حبيبي طلعت مني
انا..صح انا نغار عليك وواجد اخرى كان نلقى ماتطلعيش من حوشي لكن تعرفي في نفس الوقت فخور بانك مرتي وكان نلقى نطلع ونقول للعالم كله هذي مرتي انا احمد عبدالرحمن
وردة .. حاجتين عكس بعض
انا..ماهو الغيرة ماليهاش حل والفخر بيك اعتزاز
وردة..وانا نفتخر اني جزء منك واني نحمل اسمك
انا..هي نمشو لامي
وطبعا امي الحمدلله ضغطها نزل ودارت العملية في الليل وعطلت العملية واجد وانا خفت واجد على امي ووردة طول الوقت هي تقرا في قرآن وتدعي ليها وبعدها طلع الدكتور وطمنا الحمدلله ان العملية ناجحة بنسبة كبيرة ولولا التأخير في دورت العملية مكانتش تأخذ الوقت هذا وقالنا الدكتور نروحو لانها مش حتنوض الا الصبح وفعلا روحنا تعبانين صح لدرجة اني انا خشيت ناخذ في دوش بيش انريح اعصابي بعد توتر اليوم طلعت لقيت وردة راقدة على السرير بدبشها غيرت ليها دبشها بالشوي وغطيتها ورقدنا ونضنا الصبح وطول مشينا لامي
انا..الحمدلله على السلامة يا امي خوفتينا عليك وانا نبوس في ايديها
وردة ..حمدلله على سلامتك يا امي الدكتور قالنا ان العملية نجحت ولله الحمد يعني لو طحت مرة ثانية نلقى من يفطن بيا
امي..بعيد السو عليك من الطياح غير يحولولي الشاش وبعدها نقولو نجحت او لا
انا..ان شاءالله على خير يارب
امي..هو امتى بيحولو الشاش
انا..ممكن بعد ثلاثة ايام تقريبا
امي ..على خير
وقضينا النهار عند امي كله وروحنا وخطرت عليا ريم نشوفها ومشيت ليها وياريت مامشيتلها لقيتها لابسة روب اقرب اني نقول عليها عريانة من انها لابسة اصلا وهبيت فيها مانفرز في شئ مش غيرة لكن لانها في الاخير مازالت حاملة اسمي وعلى ذمتي وطبعا هيا خافت لانها عمرها ماشافت وجهي هذا وقلت ليها احسن حاجة انك تروحي وتقعدي عند اهلك نين نرجع وفعلا طلعت من عندها حجزت ليها ومن حظي اني حصلت ليها ثاني يوم الصبح واتصلت ببوها بيش يلاقيها في المطار ورفعتها للمطار وافتكيت من حملها وفضيت لوردتي وامي وطبعا جاء ثالث يوم لكن الدكتور قاللنا انه مازال وامي قالت لينا اننا نطلعو ندهور بدل مانقضو اليوم كله عندها ورغم اننا اعترضنا لكنها اصرت في الاخير وفعلا طلعنا وادهورت انا ووردة وقضيت احلى جو مع حبيبة قلبي وضي عيني ولما وصلنا للفندق ونحن في الاستقبال
ايمن ..وردة
التفت انا ووردة على طول
وردة ..ايمن
عرفت انه ايمن ولد عمها
وجاء سلم عليا باحترام وبدون مايمد ايده لوردة سلم عليها وعجبني انه محترم بنت عمه ورغم عمره الصغير الا انه يبان اكبر من عمره
ايمن..كيف حالكم وحال صحكتم وحمدلله على سلامة الوالدة
انا..الله يسلمك يارب
ايمن..والله فرحت لما قالي باتي ان وردة وراجلها هنا ماصدقتش وبمجرد ماسكر مني جيت طول
وردة ..كيف حالك انت وحال صحتك باين يا ايمن حتى السفر ماريحش بالك
ايمن بحزن ..وين بيرتاح بالي وانا روحي تحت التراب
انا..الله يرحمها لكن لو هيا عايشة كانت مش حترضى بلي انت فيه
ايمن ..ماقدرتش ليا سنة هنا غاطس في قرايتي وناخذ في احسن درجات ونشتغل معاها بيش نحاول ننسى لكن قلبي قاعد ما ارتاحش
وردة ..يا ايمن ماقالكش حد انساها مستحيل تقدر تنساها ولاحد يطلب منك تنساها لكن خلي باب قلبك مردود مش تقفله بكل واكيد حتلقى من تحبك وتحترم حبك لشهد
ايمن ..صعب ياوردة قلبي يدق لغيرها
انا..مافيش حاجة صعبة على ربي ارمي حملك عليه واحسن الظن بيه بس وبعدين معقولة انت اصغر من وردة بسنة يعني تو عمرك 19 سنة باين كأن عمرك ثلاثين
عيش يا ايمن وماتنساش لكن عيش
ايمن ..حنحاول وانا فرحان والله وفرحت اكثر لما تعرفت عليك وتصدق خشيت فيا طول كأنك تعرفني ليك سنين
انا..من كثر وردة ماحكتلي عليك حسيت كأني نعرفك من زمان وعذرا على تدخلي بس صدمني شكلك وانا عارف عمرك
ايمن ..مش قصدي انك متطفل لكن قصدت انك تخش للقلب بسرعة وفرحان لوردة ان ربي عوضها بيك خصوصا بعد اللي صارلي ماقدرتش نكون مع وردة ونوقف جنبها
انا..مصائب قوم عند قوم فوائد سامحني يعني لولا مصيبتك راه انت وقفت مع وردة وماكنتش انا تعرفت عليها
ايمن بضحكة ..صار الحمدلله
وردة ..الله يا ايمن قديش ليا ماشفتك تضحك اضحك ياولد عمي وعيش حتى شهد ترتاح
ايمن بتنهيدة ..يستر الله هي نخليكم تو وان شاءالله حنشوفكم اخرى وتشرفت واجد بمعرفتك يا احمد ورد بالك على وردة
انا..وانا ليا الشرف بمعرفتك وماتخافش وردة في عيوني وحضنت وردة بيديا وقلت ليه هذي وردتي يا ايمن وردتي الغالية
ايمن..ربي يحفظكم لبعض يارب
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
