طوق نجاة

الفصل14

#طوق_نجاة
الفصل14
وردة باستغراب ..ليش
انا..عشان قلت ليه اي ورد تزين بيه مش حيكون حلو زي وردتي
وردة مازالت ما استوعبت شنو قلت
وردة.. وينها وردتك
جيت حذاها وحولت الكاب وبستها على شفايفها بوسة طويلة وهادية وحلوة اللي قديش خاطري ناخذها من اول ما شفتها وهيا مراتي بعد قراية الفاتحة وماحولتش منها الا عشان عرفت اني وهيا نبو الهواء
وردة
توقعت كل شئ لكن البوسة ابدا ماتوقعتهاش تو
انا.. انتي وردتي ياوردة اللي ان شاءالله عمرها ماحتذبل طالما هيا معاي
وردة
ماعرفتش شنو نرد على كلامه لقيت روحي ساكتة وبس وفرحانة وااااااجد
انا..وردة خشي للدار هذي وحتلقي دبشك غيري وفيها حمام توضي عشان نصلو
وردة.. حاضر
خشيت للدار ولقيتها تهبل والواضح انها دار نوم جديدة وجيت حذا السرير لقيت روب واضح انه هو اللي يبيني نلبسه ولما رفعته بين ايديا حسيت جسمي كله تما شعلة نار كيف بنطلع بيه حذاه حولت الفيلو لان كانت طريقة تحويله ساهلة ولبست الروب اللي فعلا كان كأنه لجسمي لونه وردي هادي وطويل وفيه فتحة لنص الفخذ وبسيور رقاق ومن جيهة الصدر بشكل قلب بالدانيتل ولبست فوق منه الطرف بتاعه باهي داير روحه مستور شوي وخشيت توضيت ولبست ملاية الصلاة وطلعت عليه لقيته لابس بيجامة سمائية هادية
انا
رفعت عيني عليها لقيتها لابس ملاية الصلاة تهبل طالعة بيها وهي شكلها زي الملاك خصوصا انها حولت المكياج اللي على وجهها ولان الفترة اللي فاتت اهتمت ببشرتها وباكلها فردت البشرة لطبيعتها بيضاء ناعمة
وصليت وهيا وراي وسلمت وحطيت ايدي على مؤخرة راسها ودعيت (اللهم اني اسألك من خيرها وخير ماجلبتها عليه واعوذ بك من شرها وشر ما جلبتها عليه) 
وصبيت وصبيتها معاي وحولت اسدال الصلاة وشفتها كيف طالعة بالروب تهبل
زي الحورية و خدودها اللي رايحات حمر من الحشم  وشعرها اللي نزل تقول كاب خلف ظهرها الله قديش تهبل جيت ضميتها نبي نحسسها بالامان اكثر مانبيش نقربها عشان ماتحسش اني زي اي راجل ماعنداش حاجة مهمة غير رغبته ولاني عارفها شنو فمش مستحق اثبات انها نظيفة وان ماعمرا واحد قربها
انا..وردتي مانبيكش تخافي ومش حندير حاجة نين تاخذي عليا ماشي
وردة
هزيت راسي وانا مازالت في حضنه نشم في عطره المخلط مع ريحة جسمه
انا
بعدت راسها شوي من حضني وسئلتها انا ..جعان واااجد وانتي
وردة.. شوي
انا..هيا ناكلو في عشاء واتي
وردة..وين المطبخ
انا..لما تطلعي من الدار هذي تلقي صالة تلقي المطبخ مفتوح على الصالة
وردة ..شوي ونجهزه
طلعت طبعا كانت الاستراحة دار اللي خشيت فيها جواها حمام وبعدها نطلع منها على صالة صغيرة غير فيها احمد دبشه وكانها جناح منفصل ولما طلعت لقيت ممر صغير يفتح في صالة كبيرة فيها مطبخ مفتوح بشكل بار طبعا لما خشيت ماشفتش هذا كله لان احمد دخلني من باب ثاني والحلو رغم ان الجو مسقع لكن الاستراحة دافية واجد ولقيت عشاء واتي ومجهز ولكن يبي تسخين سخنته وحطيته على الطاولة وناديت احمد وجاء تعشينا ونحن نهدرزو بكل اريحية وطبعا قالي على مفاجاءة حلوة
انا..طبعا بعد العشاء نمشو نرقدو لان الساعة7 الصبح بيجينا وائل بنمشو للمطار
وردة بفرحة ..قصدك بنسافرو
انا..اه
وانا فرحان لفرحهها الطفولي لما سمعت ان بنسافرو ومعرفتش حتى المكان
انا..ماتبيش تسئلي على المكان
وردة..انا عمري ماتخيلت نمشي للجبل الاخضر فعادي حتى تقولي المرج ماعنديش مشكلة
انا بضحكة قوية نين عيونو دمعو ..يعطيك الايام الحلوة ياوردتي لهدرجة ماعندك طموح
وردة..مش قصة طموح يا احمد قصة ان امنياتي على قدي
انا ..ومسكت ايديها بين ايديا معاي خلي طموحك كبير وعالي ياوردتي
وردة
الله محلاها كلمة وردتي منه قديش ليا ماسمعتها من لما بابا توفى 
وردة..حاضر بس انت تتحمل النتيجة
انا بضحكة.. ادللي ولايهمك
وردة..باه وين بنسافرو
انا.. لندن
وردة بصدمة .. لندن اللي هيا عاصمة الضباب اللي هيا في بريطانيا
انا بضحكة كبيرة..اه ياوردتي
وردة ..الله بس استنى انا زواجي مانندريش عليه من لما مات بابا خذاه راجل امي
انا..خذيته منه وجددته امنا كيف قدرت نحجز
وردة بصوت واطي..ربي يحفظك لي
انا..هيا نرقدو نريحو عظامنا لان حناخذو ساعات ونحن مقمعزين في الطيارة
وردة..به انلم الوكال
انا..به هيا انلمه انا وياك
ولميت انا وياهها حوسة وكالنا وخشينا للدار وطلعت بطانية وهيا قعدت واقفة
انا..كنك واقفة
وردة..مانعرفش اي جيهة تحب ترقد عليها
انا..عادي اي جيهة
وردة..انا نحب اليمين
انا..خلاص تعالي
تمددت بحشم يهبل ودك غير تاكلها هيا وحشمها وانا غطيتها بالبطانية وخشيت جو البطانية وخذيتها في حضني ورقدنا وانا نحس في شعور مش عادي وشعور قوي لدرجة قلبي دقاته قوية
وردة
غطاني بالبطانية وبعدها هو خش تحتها وما انتبهتش الا ليده تسحبني من وسطي وخذاني في حضنه وراسي على صدره الله قديش حضنه دافي ونسمع في دقات قلبه قوية زي دقات قلبي وماحسيتش بشئ الا وانا راقدة على نغمة دقات قلبه
انا
نضنا الساعة 6.5 على صوت المنبه كنت عدلته قبل مانرقد  وغيرنا دبشنا وصلينا انالبست سروال جينز ابيض وعليه فانيليا بيضاء وكبوط طويل قبل للركبة لونه ازرق كحلي ووردتي كنت مجهز ليها انا لبسة سروال بيج واسع وعليه فانيليا بيج وكبوط لونه زيتوني طويل قبل نهاية الرجل بشوي ومعاه محرمة بيج زادتها حلاوة وطبعا الكبوط خذيته ليها واسع شوي كأنه عباية
انا..عجباتك اللبسة وردة
وردة..اي حاجة جايبها ليا حلوة بس هذي ماشفتهاش ضمن الدبش اللي شريناه مع روان وعبير
انا.. دبش واجد خذيته لك بروحي تو تشوفيه في وقته ماسئلتكش تفطري انتي
وردة بصوت واطي..نفطرش الا في كباية حليب وبعدها فنجان قهوة
انا..ليش تحكي بصوت واطي
وردة.. لا مافي شئ
انا..به هيا اندير انا القهوة مابين انتي شربتي حليبك
وردة..به
وخشينا للمطبخ انا حطيت بكرج القهوة على النار وشفتها هيا ادور في الثلاجة
انا..على شنو ادوري وردة الحليب اهو احذاك
وردة بخجل وبصوت واطي.. الحق انا نحب نشرب الحليب دافي معاه كاشيك صغير عسل
انا..باه كنك تقولي فيها كأنك تقولي في حاجة كبيرة اهو فازو العسل نحن مانقعدوش بلاه لان عندنا منحلة هنا في المزرعة
وردة بفرح طفولي .. انا نموت في حاجة اسمها عسل لما يكمل الفازو اللي عندي نعطي فلوس لعمتي فاطمة تجيبلي ومرات واجدة ماتاخذش مني في فلوس ولانها عارفة مرات يكون هو قوتي ليوم كامل
انا
حسيت بكلامها في البداية بفرح طفولي على حبها للعسل لكن نهاية كلامها قالته بحزن جيت ليها وضميتها وبستها على جبينها
انا.. اي حاجة كان خاطرك تاكليها او تلبسيها او مكان تبي تمشيله قوليلي بس وانتي تأمري
وردة ..ربي يحفظك لي
وفطرنا وجاء وائل ورفعنا للمطار وطبعا وائل اول مرة يشوف وردة
وائل بصوت واطي بيش ماتسمعاش وردة .. ماتخيلتش وردة هكي
انا..شنو قصدك
وائل..شكلها هادي واجد وحتى باينة انها صغيرة بوجهه اللي معليشي حاجة
انا.. انت عارف اني اكبر منها بعشر سنين
وائل..عارف بس ماتخيلتش شكلها هكي رغم شكل جسمها لكن تبان كطفلة لما تشوف وجهها 
انا.. امنا كان تشوفها وهي تضحك او فرحانة وتشوف نقرة الزين اللي فيها لكن عقلها كبير واجد مايغركش عمرها من وضعها خلاها تكبر قبل عمرها  
وائل..ااااايه شكلنا ذايبين على الاخر
انا.. والله ماني عارف لكن وردتي لما نكون معاها مانقدرش نسيطر على روحي معاها نحس في روحي بوها ونبي نجيبلها كل شئ ونوفرلها كل شئ
وائل باستغراب.. وردتي
انا بعصبية .. وائل انا بس نقول هكي
وائل..احمد ويدلع في اسم مراء ابصر شنو صاير في الدنيا تي حتى اختك عمرك مادلعتها تقريبا الوحيدة اللي دلعتها بنت عمتك اللي عمرها ثلاث شهور
انا..مش قلت ليك وردة مش عارف شنو يصيرلي معاها
وائل..ربي يهنيك
انا..هيا بالسلامة اعلنو على الرحلة
وائل ..توصلو بالسلامة
انا..هيا يا وردة
شدديت ايدها فضغطت عليا واجد ولما شفت عيونها لقيتهن رصاصيات خفت عليها
انا..كنك وردة
وردة..خايفة
#حياة