#طوق_نجاة
لفصل33
وردة بصدمة ..انت منو وكيف خشيت هنا
رامي ..انا ولد عم ريم
وردة مشت وسيباته وخشت تجري وهو ركب لريم ووردة قعدت مع امي
امي..كنك وردة صوتك مش تمام
وردة بخوف..مافي شئ يا امي غير قطوسة فجعتني
امي.. سلامتك يابنتي ترى خشيني لداري بنمدد جسمي شوي
وردة ..حاضر يا ياامي
وخششت وردة امي للدار وقررت انها تحكي مع ريم بمجرد مايطلع ولد عمها
............
ريم ..كنك طولت ماركبت
رامي.. شفت وحدة تحت رغم ان لبسها واسع لكن وحدة ماتفهمي شئ
ريم بعصبية ..رامي انت مش منتبه لروحك شنو تقول
رامي ببرود..عادي ياريم الانسان مايقدرش يمتنع انه مايشوفش الجمال
ريم ونار الغيرة ولعت فيها لانها عرفت على من يحكي.. رامي وانا شنو اذا البسيطة هذي جميلة
رامي وفطن لنار ريم .. انتي بروحك ياقلبي مافيش حد زيك ولا في القلب غيرك
ريم ..به روح يا رامي اصلا جيتك غلط وانت عارفني بنجي نبات في حوش اهلي اليوم
رامي..ماقدرتش نصبر
ريم..به عدي ونتلاقو في حوشنا
رامي..تمام هي سلام
..................
ريم
كل شئ نتحمله الا ان وحدة زي وردة تاخذ مني رامي خذت احمد تتهنى بيه لكن رامي لا خط احمر
وشوي سمعت الباب يدق فتحت ولقتها وردة
وردة..السلام عليكم
ريم بعصبية ..وعليكم السلام
وردة ..معليش ياريم بنقولك حاجة
ريم ..خشي وبعدين ليش جاية من الدروج الخارجيات
وردة..مانبيش امي تفطن اني جيتك لاني بنقولك حاجة ومانبيش امي تسئلني في شنو نبيك
ريم بنفور .. تفضلي شنو تبي
وردة ..بنقولك غلط ياريم جيت ولد عمك واحمد مش قاعد
ريم بواقحة..حلوة هذي بتتحكمي في من يخش حوشي ومن يجيني او لا
وردة..لا والله ماقصدي انتحكم فيك لكن دينا يقول ان ولد عمك مش محرم عليك ولكن هذي حاجة ترجعلك لكن احمد لو علم بيه حيقلب الدنيا عليك وانتي مازالتي عروسة عليش اتجيبي في المشاكل ليك
ريم ..ايوه حاجة ترجعلي ولما بنخش للنار انتي مش حتخشي معاي واحمد حرة انا وياه
وردة..ربي يجيرك منها لكن احمد عارفتيه عصبي وواعر ومستحيل يرضى بحاجة زي هذي
ريم..خايفة عليا قصده
وردة..وليش مانخاف عليك انتي مرا زيي زيك
ريم ..زيي زيك من وين لوين ان شاءالله انا ريم معتوق وانتي من قدامي
وردة ووجعها الكلام .. كلنا سواسية عند ربي وبعدين ياستي انتي حرة لكن المفروض على الاقل يحترم حرمة الحوش اللي خاشله مش يخش مايديرش اي صوت نين فجعني وتخيلي في اللحظة احمد جاء شنو بيكون موقفي
وهنا ريم خلاص فقدت عقلها لما تفكرت بس ان رامي تأخر عليها وهو يتفرج على وردة فقعدت تحكي مع وردة وادف فيها
ريم بعصبية .. يعني شنو قصدك وادف في وردة يعني ولد عمي مش متربي ويبصبص عليك
وردة ...انا مش قصديـ......
دفتها ريم وكانت وردة وصلت عند الدروج ومكملتش وردة كلمتها الا لقت روحها تتكركب من الدروج ومعاش تندري على شئ وريم لان نار الغيرة عمتها ماعدلتش عليها بكل خشت وسكرت الباب وغيرت دبشها ونزلت من الدروج الداخلية وخشت على امي
ريم ..السلام عليكم
امي..وعليكم السلام
ريم ..انا ياعمتي بنعدي لاهلي السواق يستنى فيا برا
امي..احمد عنده العلم
ريم ..اكيد يا عمتي وبنبات عندهم واحمد ما اعترضش
امي..باه سلميلي على هلك
ريم ..يوصل
امي..وانتي نازالة ماشفتيش وردة
ريم بارتباك ..لا ماشفتهاش ممكن في جناحها
امي..ممكن ومرات في المطبخ لان قريب مغرب وهيا تجهز في العشاء بدري
ريم ..ماضنيش لاني ماسمعتش صوت في المطبخ به يا عمتي مانبيش نعطل على السواق
امي..في حفظ الله
.....………
وائل..كنك يا احمد كأنك زي اللي راسك داخ
انا..لا يا وائل بس نحس في قلبي نغصني ان شاءالله خير
وائل..اشرب امية هاك واستهدي بالله وان شاءالله مايصير الا كل خير
انا..تعرف انا عطلت اليوم معاك واجد والحوش مافيشي الا وردة وامي بس
وائل..ريم وعمتي عايشة وين
انا..عمتي عايشة مريضة ماجتش وريم بتعدي تبات عند هلها اليوم
وائل..تبات غريبة
انا..ليش غريبة
وائل..انت ديمة تقول ماتحبش المرا تبات في حوش اهلها وديمة تعترض حتى على عبير لما تبات عندكم وتصر عليا اني نبات معاها في دارها
انا..لاني مانعتبرش ريم مرتي وخليني تو نتصل بوردة نطمن عليها وعلى امي
رنيت مرة واثنين وعشرة ووردة ماردتش بديت نقلق واتصلت بامي
انا..امي انتي كويسة
امي..كويسة كنك يا احمد
انا..رنيت على وردة قريب عشر مرات ماردتش عليا خفت تكون صايرة معاك حاجة
امي ..تعااال يا احمد بسرعة
انا بخوف..شنو في يا امي ماهو قلتي انك كويسة
امي..وردة اكيد صايرة ليها حاجة من العصر معاش خشت عليا وطالما ماردتش على تلفونها اكيد في حاجة
انا برعب ..اهو جاي
وائل ..شنو في يا احمد وجهك كنه انصفر هكي
انا وماشي جيهة السيارة ..وردة ماخشتش على امي من العصر واتصلت بيها ماردتش عليا
وائل ..استنى جاي معاك
وطلعت انا وائل بسرعة مانندريش على روحي كيف وصلت وقديش مرة تفاديت اني مانديرش حادث وخشيت للحوش نجري حتى السيارة ماطفيتهاش ولقيت امي في الصالة وتنادي على وردة
انا ..شنو يا امي وردة وين
امي..من بدري انادي مالقيتهاش
انا
يارب وين مشت وقعدت ندور ونقول وردة مستحيل تطلع بدون اذني مهما كان السبب وقعدت نرن ونسمع في صوت رنين فونها ووائل ينادي فيا بصوت عالي
وائل..احمد يا احمد تعال الصوت هنا
وطلعت نجري جيهت ادروج شقتي الخارجيات ولقيت سيل دم نازال ولما رفعت عيني لقيت وردة طايحة على الدروج ومغمي عليها ودمها مغرقها
انا بعيطة..ووووووردة
وركبت وقعدت نحاول نوعيها مابتش توعى وخذيتها في غمري وطلعت للسيارة ركبت للخلف وهي في حضني ووائل تما يسوق
انا..وردتي نوضي ردي عليا ماتسيبينيش انا لقيت حياتي معاك نوضي يا دنيتي نوضي ياقلبي
انوض فيها ونبوس في كل مكان فيها مش عارف الدم منين وشنو اللي صارلها ووصلنا على المصحة طول خذوها مني وفي البداية مابيتش نطلقها
وائل..اطلقها يا احمد بيش يشوفوها
انا..خايف معاش ترجع
وائل..استهدي بالله
وخذو وردة وخششوها لحجرة وقعدو وقت لاباس بيه وانا بنموت من الانتظار ووائل اتصل بعبير تمشي لامي اكيد على نار حتى هيا قلبي نحس فيه بيوقف والدكتور طول ماطلع عليا والدقايق تمشي عليا تقول دهر خايف نخسر اماني وهدوئ خايف تبعد عليا راحة بالي خايف خايف بدرجة موجعة خاطري نبكي خاطري نعيط بصوت عالي ونقول وردتي ماتمشيش وتخليني وطلع الدكتور وجيته
انا..طمني يادكتور
الدكتور ..............
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
