#طوق_نجاة
الفصل 30
ريم بصدمة..قصدك تخطفها
رامي..هو انتي ان شاءالله تنجحي ومانتمناش نوصلو للمرحلة هذي
ريم..يستر الله
...........
وجت الحناية وحنت وردة وعبير وجاني وائل وقعد يحكي على الفاتحة وكبرها وكيف قايمين القدر ومظاهر واجد ماليهاش لازوم
وائل..تعرف بذخ اكثر من اللازم شريني عندي فلوس
انا..ماهو عنده فلوس مش لازم يوضح
وائل..لا يا احمد انت تو متعرفش الناس بدت عندها المظاهر اكثر من اللازم لدرجة توصل بالواحد انه يتسلف على خاطر المظاهر الكذابة
انا..فعلا صح زمان كانت الفاتحة عشاء ولحم مقوم حتى اغنى الاغنياء
وتو تمت تقول حفلة صبايا من كثر الحاجات اللي ماتناسبش الرجالة ولا والغريب ان في رجالة تمو يعاودو زي الصبايا على شنو ضيفو او لا
وائل..وانت تقول فيها والله هذاك اليوم مهندس في المزرعة نين نصدمت وهو يحكي على عزومة صاحبه نين هزبته تقول مرا تحكي حذاي
انا..خذتهم الدنيا مايسحابوش ان راحة البال اهم من كل شئ
وحولن وردة وعبير حنتهم وانا نحس بروحي اني مرايف على وردة واجد مش لحاجة لكن نبي ناخذها في حضني اللي تميت نحس في روحي تايه بلاه وخشيت جناحنا بعد مارقدت صغار عبير و وائل روح لان من لما تزوجت وردة وهو معاش يبات مع عبير في دارها وشوي وخشت عليا وردة لقتني متمدد على السرير غيرت دبشها وجتني باستني على خدي خذيتها في حضني وضميتها زين كأني كنت خايف انها تفارقني او تباعد عليا وشوي ورقدنا هي من تعب الحنة وانا من تعب التفكير
ونضت الصبح مالقيتش وردة احذاي وبعد ماغيرت دبشي لقيتها هيا وعبير يوتن في الفطور بس مانسمعش في ضحك وردة زي كل يوم او انها تغني وتتغزل في امي وصبحت على امي
امي..كنك يا احمد
انا..خايف يا امي
امي..ارمي حمولك على ربي وفترة تعدي زي ماربي كاتب
انا..ان شاءالله يا امي تعرفي اللي وجعني وردة حاسس بضيقها وحاسس بانها قديش تعاني بيش ماتبينش وانا مافي ايدي شئ بيش نريحها حاليا امي..ربي يبرد نارها يارب
انا..امين
وجهزن الفطور وقمعزنا كلنا فطرنا وحسيت بوردة مهناك فطور فطرته يادوب اطنقشت طنقيش ولا انا اصلا قدرت نبلع لقمة فطور فطورنا اليوم مش زي اي فطور حزين وكئيب ومهموم من الضيفة الجديدة اللي بتجيه وكلهم خايفين على وردة ويسحابوني انا عادي ومايعلموش بالنار اللي فيا
ومشى الوقت ورفعت وردة وعبير وعمتي للكوافيرة وبعدها روحت بيهن وكان منطر وردة يهبل بالعربي وطلعت مش عادية بيه ومن كثر خوفي عليها ارقيتها بآيات قران لحفظها وطبعا بيرفعهن وائل للصالة ويروح بيهن وبعدها انا بشوية نخش للصالة ونطلع بريم ونجو لشقتنا فوق
وردة
جهزت روحي وطلعت حلوة بالعربي واحمد عجبه واجد وانا في حسرة في قلبي لابسة ومتزينة عشان نرفع حنة ضرتي في هكي قهر ورغم ان احمد واجد قالي ماتمشيش لكن انا اصريت على اني نمشي
وجاء وائل ورفعنا وطبعا خشتنا للصالة بالذات انا صدمتهم كلهم وانا نوزع في ابتسامات عليهن وجيت لريم باركت ليها والحق طالعة حلوة لانها هي جميلة الحق وقعدنا شوي خذينا ضيافتنا وطلعنا وانا قلبي مقبوض لان عارفة احمد بيكون معاها وصلت للحوش وساعدتني عبير في تحويل العربي والذهب وانا قاعدة كيف نمسح في مكياجي تفاجئت باحمد خاش عليا وضمني زين وباسني بوسة كبيرة قاسية وحنونة ناعمة وحارة ومابعدش مني الا عشان يأخذ الهوا
انا.. سامحيني وردتي
وردة بصوت واطي..مسامحاتك ياقلبي
هي عدي هكي حتتأخر واجد عيب
انا
طلعت بدون اي كلمة لبست وجهزت روحي واتصل بيا وائل وقالي انه روح بيهن ومانندريش على روحي الا وانا ماشي شورها بدل الصالة حتى عمي محمد راجل عمتي استغرب لانه كان وراي بالسيارة بيمشي معاي للصالة وبدون اي احساس بلي حذاي لا عبير وعمتي عفاف واستغرابهن ولا بسؤال امي خشيت لجناحنا على وردتي وضميتها ليا وبستها كأني بنقوللها الحضن هذا والايدين والشفايف هذين مش لحد الا ليك بس كأني بنقوللها ماتخافيش ياروحي وطلعت للصالة وخشيت على ريم كانت جميلة زي العادة بفيلو عريان اكثر من اللزوم ولو كانت زوجتي طبيعيا كنت مستحيل نخليها تلبسه ومعاها مغيرة لون شعرها ومكياجها ثقيل واجد لكن مانقدرش ننكر انها حلوة وبدون شعور لقيت روحي نقارن بينها وبين و وردتي كيف طلعت زي الحورية يوم عرسنا كيف كانت زي الملاك وخذيت ريم وطلعت انا وياها وركبتها للسيارة وبدون اي كلمة وصلنا لحوشنا وكنت متفق مع عبير اندير رنة اطلع امي برا مانبيش وردة تشوفها وهيا خاشة وفعلا وصلنا لقينا امي تستنى فينا هي وعبير وسلمت ريم عليهن وخطر عليا وردة لما سلمت على امي باست ايدها وراسها بينما ريم سلمت عليها بالخد كانها تسلم على صاحبتها وركبنا لشقتنا من الدروج الخارجيات وخشينا لشقة
انا..نورتي حوشك
ريم بخجل مصطنع .. منور بيك
انا..ريم وشيرت شور الدار هذي بتكون دارك والثانية داري ومش لازم حد يعلم اننا نرقدو في دارين منفصلات
ريم ..حاضر
انا ..بنخش انغير دبشي خشي غيري بيش تكوني مرتاحة
وخشت ريم للدار
ريم
لهدرجة هذي مش طايقني امنا السنة اللي فاتت كان بيموت عليا وتو ولا كاني صاحبه كيف قدرت وردة تخليه يحبها سبحان الله وليش مايحبها وهيا على خاطره جت خطبتني وجت حتى اليوم للصالة اللي ترضى بضرة وهيا فاهمة ان احمد زواجي بيكون فعليا وبكل رضى ليش ماتنحب وقررت اندير جو بالك نغري احمد شوي رغم اني مستحيل نخليه يقربني انا عمري كله لرامي ومستحيل راجل غيره يلمسني حتى لو رغب احمد
ريم ..معليش احمد معرفتش نفتح السوستة بتاعت الفيلو
انا..جيت فتحت ليها السوستة بدون مانرفع عيني عليها وطلعت بسرعة من حذاها غيرت دبشها ولبست بيجامة شورت قصير ساتان وطرف عليها عريان وسيوره رقاق وبدون طرف فوقها فمتحملتش المنظر
انا..ريم معليش انتي عارفة ظروف زواجنا فا مفيش داعي للبس زي هذا بينا الليلة اللي مانكونش معاك فيها البسي اللي يريحك
ريم ..حاضر مكانش قصدي حاجة بس غير اني واخذة نلبس هكي في حوشنا
انا..حصل خير
وخشت ريم غيرت دبشها وانا مش خايف اني نضعف قدامها بلبسها العريان لكن طالما زواجي بريم مؤقت فمش لازم ننكشف على جسمها لان الوحيدة اللي سامح لنفسي انها تضعف حذاها هي وردة وقعدنا نحكو عادي انا وريم ونتفرج على tv
ريم ..معليش انا بنرقد نحس في روحي تاعبة
انا..خوذي راحتك
ريم..تصبح على خير
انا..وانتي من اهله
وخشت ريم رقدت وانا خشيت لداري قعدت سهران ماقدرتش نرقد قعدت نتقلب تقول قاعد على شواية وبعدها ولعت tv اللي في الدار ونتفرج نين اذن الفجر وخشيت على ريم نوضتها اكثر من مرة ماناضتش فتتها ونزلت لوردتي وخشيت بالشوي للجناح عشان ماتنفجعش مالقيتهاش استغربت وخشيت دار امي
امي بصدمة..احمد شنو ادير هنا
انا..........
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
