#طوق_نجاة
الفصل25
انا..وردتي ترا وريني صور تصميماتك
وردة..خش على الفيس وافتح صفحة المعمل تو تلقاهن
انا..كيف مش منزلتيهن على حسابك
وردة..لا مش منزلتهن
انا..خطرها وردة ليش ماكانش عندك حساب لا على الفيس ولا الانستا ولاتويتر رغم انك تفهمي فيهن واجد وكذا من مرة تحليلي في مشاكلي فيهن
وردة.. اولا لان راجل امي ماباش يعطيني رمز الواي فاي وثانيا كرهتني فيه امي
انا باستغراب ..كيف كرهتك فيه
وردة..لانها هيا ماتفهم فيه شئ لكن تبي ادير زي صاحبتها ففتحت ليها حساب على الفيس ومرمرت كبدي اندير كيكة تصورها ونزلها ليها ونقول ان هيا اللي دارتها عصرية هيا وراجلها وتقعد الكيكة دايرتها اصلا عشان خوتي
وكل طلعة وخشة وهيا تصور وانا نزلهن ليها ونكتب في كلام تافه على كل صورة عشان تقهر صاحبتها وعشان تقول لصاحبتها انها عايشة
انا..وانتي ليش ماتحبيش حد يحكي (وانما بنعمة ربك فحدث)
وردة ..انا معاك لكن في وقتنا تو في واجد ناس مش لاقية ربع اللي عندنا فحرام نخليها تزيد تتحسف على عيشتها اكثر ماهي متحسفة و امي غرضها تقهر صاحبتها وتفهمهم انها عايشة بالله قولي شنو هيا نعمة ربي بانها تكذب عليهن في تورتة قضيت فيها اربع ساعات وانا اندير فيها على خاطر ذكرى ميلاد عمر وعامر وهي تنزلها وتكتب انها هيا اللي دارتها المشكلة ان الناس اللي من عينة امي وللاسف هم الاغلبية استخدمو مواقع التواصل الاجتماعي بيش يقهرو بعض مش يستفيدو من بعض وحتى صفحة المعمل لما اقتنعت وفتحتها للمعمل على خاطر عرفت انها ليها فايدة للمعمل
انا..فعلا عندك حق لكن ترا قوليلي شنو ممكن الواحد يستفيده من وسائل التواصل
وردة..تكوين الصدقات الطبيعة
انا..كيف طبيعية
وردة..يعني تكوين الصدقات بين البنات مع بعض او الاولاد مع بعض مش اولاد مع بنات والعكس
تنمية الخبرات بحيث مثلا التخصص اللي تحبه تبدا ادور عليهم وتنمي وتزيد خبراتك عن طريق منشوراتهم زي مثلا في تصميم للتورتة خاطري انفذه لكن لصعوبة التصميم حاوالت واجد ماقدرناش انفدوه بحكم ان نحن التورتات خشينا عليهن بالبركة ففضل الوسائل هذين وصلت لخبير في صنع التورتات وعرضت عليه التصميم وشرح لينا كيف نطبقوه فشفت الفائدة اللي نحكي عليها
انا..ربي يكملك بعقلك باه افتحيلي صفحة المعمل خليني نتفرج
وردة..افتح فونك انا فوني في الشحن
انا
فتحت الفيس ويجيني اشعار انه تمت الاشارة لريم فقلت خليني نشوف بدافع الفضول ولما شفت معاش عرفت شنو اندير
وردة في حضني ومانبيش نحسسها بشئ لكن قلبي نخصني وحسيت بذنب كبير لكن اللي توقعته اكيد انهيار عصبي او اغماء او هبوط فدرت روحي عادي وقعدت نشوف في التعليقات نبي نفهم شنو اللي صارلها فوحدة من التعليقات لفتت انتباهي وهي تقوللها مافيش حاجة تستاهل قريب ودرتي روحك بسببها الحق لخبطني التعليق
انا..وردة رقدتي
وردة..قاعدة لكن بدا ينعس فيا النوم
انا..به شوي بنطلع اندير اتصال ونجيك
وردة..خوذ راحتك
بستها على جبينها وطلعت وحسيت بيها انها عرفت اني بنتصل بريم وماقدرتش نهدي بالها ونطمنها لاني مانبيش نكذب عليها
انا..السلام عليكم
ريم بصوت واطي وتعبان ..وعليكم السلام
انا..لاباس عليك شفت انك في المصحة شنو صارلك ان شاءالله خير
ريم بدموع ..كنت نبي نموت لكن ماخلونيش ولحقو عليا
انا بصدمة..شنو شنو درتي معقولة تفكري اديري حاجة زي هاذي لاتجي من دنيا لا آخرة ليش ياريم هكي
ريم ..مانقدرش نتخيل حياتي بلاك كيف بنقضيها والله كلام الناس اللي عرفو انك بتجي بعد بكرة وفرحتي الا انت هدمتها
انا..يا ريم صعب ماقدرتش نضحك عليك
ريم ..انا مايهمنيش معقولة ترضى ليا سمعتي تتشوه بسببك اكيد بيقولو كان يبيها وبيتزوجها على مرته وتو بطل اكيد في حاجة صارت وكبيرة خصوصا انك يا احمد معروف بكلمتك وانها مستحيل تتغير
انا
قعدت نفكر في كلامها ومش عارف شنو الحل اللي بنديره فقلت نعزق الكورة في ملعبها واللي تبيه انديره ليها
انا..شنو تبي انديرلك ياريم وانا عارف روحي اني مانحبكش حب الحبيب ممكن نكون معجب بيك لكن اكثر من هكي لا
ريم بحزن مخادع.. انا سمعتي اهم من كل شئ حتى من كرامتي كمل معاي يا احمد وحتى بعد شهرين ننفصلو ونقولو ماتفهمناش خير من انك تسيبني تو
انا.. شنو تقولي ياريم
ريم..ماهو لو انت ماعطتنيش امل ومن اتصالك اللي من فترة وانا اهلي واقاربي كلهم وصديقاتي كلهم عارفين انك بتجي تخطبني وقلت ليهم انك تحبني وتو لما بتسيبني مش حنخلص منهم وسمعتي تبدا على لسان اللي يسوا ومايسواش
لكن على الاقل كون راجل معاي و اوفي بكلمتك وحتى بعد شهرين زواج نطلقو عادي وبحكم انك واعر نقول ماقدرتش نتحملك
انا
سكتت واجد وقلت معقولة بنكرر قصة وردة وبنحط مرا ثانية على ذمتي بدون مانقربها يارب وريني الخير وين ومش عارف مانقدرش نطلع نذل مع ريم لكن بنظلم وردة وبنتزوج عليها الله غالب وردة تتحملني لاني في الحالة هذي على الاقل زواجي من ريم مش حيكون ظلم ليها لانها عارفة اني ماضحكتش عليها
انا..خلاص ياريم انتي امتى بتطلعي من المصحة
ريم ..انا دارولي غسيل معدة وقالولي بكرة نطلع
انا..معناها مازالنا على موعدنا بعد بكرة
سكرت من ريم وانا زدت تلخبطت واجد لكن القرار اللي في بالي بنفذه في هاليومين وخشيت لوردتي ضميتها ورقدت
...........
ريم ..ها تمام اتفقنا مشى على خير
رامي .. مش قلت ليك احمد عنده ضمير
ريم..مش كان نسافر اندير عملية بالك يصحله ويبي حقه الشرعي كيف ندير بعدها
رامي .. ديمة فهميه انك متزوجة بيه باتفاق وما اعتقدش احمد حيقربك خصوصا انه يحب مرته واجد
ريم ..كيف عرفت انه يحبها
رامي .. مش عارفتيني كنت نراقب فيه عشان نفهمه
ريم ..اه لكن هذي حاجة ماتبانش من المراقبة
رامي..لا يا ريم الحب يبان بالذات لما يكون الراجل عاشق مش يحب بس في الجامعة كيف خايف عليها ويغير عليها واجد اخرى حسب قصقصتي ولما يبدا يحكي معاها في لمعة مميزة في عيونه ماتشوفيهاش الا عند العاشق زي ما انا ننضر ليك
ريم ..تعشقني وترضى ان راجل اخر يتزوجني
رامي ..يتزوجك اه لكن يقربك لا
ريم .. لو احمد كان قعد يبيني زي قبل شنو كنت حدير
رامي ..كنت حنخليك تقوليله انك لازم تتعودي عليه وكل مرة سبلة نين نوصلو للي نبوه مستحيل نخلي راجل يقربك غيري انتي الكبيدة
ريم.. وانا نموت فيك
.......
جاء ثاني يوم وقررت انفذ اللي نبيه فنضت الصبح لقيت وردة سابقتني هيا وامي وقاعدات يحكن
انا..صباح الخير
امي..صباح النور
وردة..وعليكم السلام
انا..ههههه نسيت السلام عليكم
وردة.. هيا قهوتك واتية
انا..وردة نبي كابشتينو
وردة ..ههههه كابتشينو
انا.. كله واحد المهم من ابو رغوة
وردة.. ههههه حاضر حنجيبلك احلى كوب من ابو رغوة
وردة
حسيت احمد مزاجه حلو وكأنه في عقله حاجة وحسيت روحي فرحانة فحتى انا اليوم قررت اني نعترفله اني نحبه حتى لو بيتزوج عليا ثانية لكن المهم يعرف اني نحبه نبي نعبر عن حبي ليه نبي اناديه حبيبي بدون حشم حتى لو حبه لوحدة ثانية والله اعلم ممكن حبي ليه يخليه يشوفني مرا ويحبني زي مايحب ريم فدرت الكابتشينو وكتبت كلمة بحبك عليها بصوص الشوكلا
انا
نضت فرحان واجد صح بنتزوج ريم لكن لما عرفت انه زواج مؤقت تريحت واجد واللي ريحني اكثر ان زواجي من ريم مؤقت بسبب ريم مش بسببي بيش مانكونش ظلمتها معاي الحمدلله يارب لكن زعمك وردة تحبني زي مانحبها
امي ..ان شاءالله دووووم
انا..شنو يا امي
امي..فرحتك والراحة اللي في صوتك ان شاءالله دوووم
انا..امين يارب امي بنحكيلك موضوع وبناخذ رايك فيه بس بعدين لما نرفع وردة للمعمل
امي..به
وردة .. واحلى كوب من ابو رغوة لاحلى راجل في الدنيا
انا
ركزت على الكلمة وردة تتغزل فيا قلت ممكن طلعت منها عفوية وبعدها شديت الكباية في ايدي وقريت اللي مكتوب عليه نحبك قريتها مرة واثنين وثلاثة وبفرحة طلعت فوني وصورتها يا الله طلعت وردة تحبني زي ما انا حبيتها وعشقتها وجيتها ونسيت امي بكل حذاي وخذيتها في بوسة طويلة واااجد الله قديش ليا عليهن هالشفايف اللي تقول حبات فروالة من ليلة عرسنا وانا ماضقتهنش قديش كنت غبي اما انا رسمي طبعا وردة بعد ماسيبتها ناضت وسيبتني
امي .. احمد عندكم دار ياولدي
انا
معاش عرفت شنو نرد على امي والله شنو نقول فرحتي نستني ان امي صح ماتشوفش لكن السمع حاد عندها خذيت كبايتي ولحقت وردة بدون مانقول كلمة
امي .. ربي يهنيكم يارب
انا..وردتي حبيبتي
وردة
حبيبتي سمعت صح الله قديش حلوة منه
وردة بصوت واطي ..نعم
انا..اللي قريته على الكابتشينو صح
وردة..اه
انا..نبي نسمعها مانبيش نقراها بس
وجيت شديت ايديها بايدي وايدي الثانية رفعت وجهها ليا
انا..هي قوليها
وردة.. ن ح ب ك
انا.. الله محلاها من فمك اللي يهبل وخذيتها في بوسة اخرى اطول وبوسة تبعتها بوسات ومابعدتش عليها الا عشان ناخذو الهواء وبايدي الاخرى طلقت شعرها وقعدت ايدي تلعب في شعرها
انا.. وردة ارفعي عيونك فيا رفعت عيونها فيا ولونهن الاخضر اللي يهبل
انا ..نحبك لا انا نعشقك وردتي عرفت روحي متأخر صح لكن المهم اني انحبك
وردة ........
انا..نجيه الحشومي ياربي
وحضنتها كأني نبي نفتح صدري ونحطها جواه
وردة
احلى اعتراف واحلى كلمات سمعتهن منه حتى البوسة مختلفة مش زي اول ليلة عرسنا الله محلاه الشعور لما يكون متبادل لكن ريم اليوم مانيش مخربة على روحي وبكرة يحلها ربي لكن الحاجة اللي تو تهمني ان احمد يحبني وحتى بيتزوج ثانية متأكدة انه مستحيل يظلمني
انا.. هي وردة جهزي روحك بيش نرفعك للمعمل
وردة ..حاضر
مشت وردة تجهز في روحها وانا طلعت درت اتصال
انا..السلام عليكم
وائل..شنو حالم بيا في الليل امنا
انا..غير رد السلام قبل
وائل..وعليكم السلام
انا..وائل وبدون مقدمات نبيك الليلة تجو تباتو مع امي واديرلي جو حلو في استراحة المزرعة
وائل..مافهمتش
انا..مش لازم لاني انا مش فاهم لكن اللي متأكد منه اللي بنديره اليوم ابعث حد يبرملي على الاستراحة وديرلي جو شموع وتو نشري انا حاجات فطور بكرة
وائل..تمام كون هاني
انا..مانوصيكش امي
وائل..معاش تعاودها خير مايكون فيها زعل راه
انا..خلاص خلاص هيا سلام تو
ورفعت وردة للمعمل وروحت لامي
انا..اني جيت يا امي بنحكي معاك بكل صراحة
امي..وانا اصلا مانبي الا الصراحة
انا..حكيت لامي علي صار بيني وبين ريم بالزبط وطبعا مابيتش نحكي لامي ان وردة مش زوجتي فعليا لكن قلت ليها اني اتزوجت وردة من غير حب وبسبب ظروفها لكن تو انا نموت فيها
امي.. به انت تو تحب وردة وكيف بتتزوج ريم
احمد يحكيلي على وردة مايسحابش اني نعرف كل حاجة لكن مشيته زي مايبي لاني خفت يزعل من وردة وانا حاسة بشنو بيدير اليوم فدرت روحي مانعلم بشئ وفرحت ان زواجه من ريم بيكون مؤقت وبرغبتها هيا عشان ولدي مايكونش ظالم وفعلا كيف البني ادم مايعرفش شنو شعوره وبعض المواقف تاخذه وتجيبه
انا..ماهو قلت ليك يا امي ان زواجي من ريم مؤقت
امي..به بتقول لوردة
انا.. لا بعد اعترافي بحبي لوردة بنقوللها اني مانقدرش نطلع عيل وبنعدل بينكم انتم الاثنين لعند ما ينتهي زواجي بريم نحكيلها
امي..ليش لان وردة مستحيل تخبر ريم او تنظر نظرة مش تمام لريم
انا.. عارف يا امي لكن تقدري تقولي اختبار لحبنا انا ووردة انه قوي ويتحمل كل شئ
امي .. دير اللي يريحك بس بدون ماتجي على وردة
انا.. اكيد امي بنأخذ رايك في حاجة اخرى
امي..ان شاءالله خير
انا.. امي الاعمار بايد الله وانا طالما بنتزوج ريم مرات لقدر الله تصيرلي حاجة وهيا على ذمتي ومانندريش على ريم كيف بتتعامل مع وردة
امي..به
انا..بحكم ان ريم حالتها المادية مرتاحة وطبعا اللي ماديتهم مرتاحة هما اكثر اشخاص راغبين في الدنيا فمرات بمعارفها تاكل حق وردة في ورثي وبالذات ريم معارف اهلها واجد مش شوية لو صارتلي حاجة
امي.. بعيد السو يجعل يومي قبل يومك يارب
انا..بعيد السو عليك ويحفظك لي يا امي لكن الدنيا ماحد ضامن عمره فيها
فنبي نبيع ورثي كله لوردة بيع وشرا ولو صارتلي حاجة وريم على ذمتي انا متأكد وواثق ان وردة حتوزع ورثي عليك وعلى عبير وعلى ريم وعلى روحها بشرع الله
امي..دير اللي يناسبك واللي تعرفه في صالح وردة
انا.. معناها لو قدر الله وصارتلي حاجة بلغي وردة بكلامي هذا انه تعطي لكل حق حقه بما يرضي ربي
امي..بعد عمر طويل وحاضر ياولدي
وربي يهنيك ويحفظك
وخشيت لجناحنا وطلعت لبسة لوردة ودورت على الروب اللي خذيته ليها من شهور وماصارش من ليلتنا ودهشت بيش لقيته وحطيت ليها وليا غيارات داخلية ولبستين احتياط ولقيت عندها بيجامة شورت تهبل خذيتها حتى هيا مع انه ليلة لكن مش عارف نبيها تكون احلى ما يكون وحطيتهن في شنطة وحطيتها في السيارة وعديت روحت بوردة وتغذينا واستغربت وردة اللبسة على السرير فقلت ليها بنطلعو العشية
وفعلا قبل العصر بشوي جاء وائل وعبير وصغارهم فعرفت ان وائل جهز كل شئ
وردة .. الله عبورة جاية بايتة عندنا
عبير ..ماهو بكرة بيش نمشو مع بعض اظني حتى عمتي عفاف بتجي تبات معانا اليوم
انا
فهمت ان وائل مش قايل لعبير اني بنطلع انا ووردة فسكتت خليتها لعند مابنطلعو
ولقيت وردة خاشة عليا بعد ماطلع وائل
وردة..حبيبي
انا..شنو قلتي
وردة ..احمد
انا..لا عاوديها تو اللي سمعتها الاولى
وردة..حبيبي
انا..ياعيون حبيبك
وردة.. تسلم يارب قولي كيف بنطلعو وبنسيبو عبير وحتى عمتي عفاف بتجي تبات اليوم
انا.. تو امي تقوللهم بس غريبة حتى عمتي بتجي تبات
وردة بنبرة حزن.. ماهو عشان بكرة نمشو من هنا لاهل ريم
انا
جيت ضميتها وماقلت ليها شئ لاني مانبي نفكر في شئ تو
انا..عدي جهزي روحك وتو تلقي امي قالت لعبير
وردة ..به
وطلعت انا وراء وردة لعبير وامي وعبير مازال كلامها معاي بارد
عبير .. دير بالك على وردة راهي تحبك
انا..عارف يا عبير
عبير ..ودهورها كويس على الاقل تنسى اللي يستنى فيها بكرة
انا طنشت على كلامها .. وانا مانوصيكش على امي لاني انا و وردة بنعدو للمزرعة نباتو الليلة غادي
عبير..ربي يهنيكم
انا ..امين
وطلعت لوردة بيش نجهز روحي حتى انا وطبعا وردة استغربت قلبت دولابها فقلت ليها كنت ندور في تشيرت ليا قلت بالك في دولابها اقتنعت بردي
.......
عبير.. انا مش فاهمة خوي هذا بيخطب بكرة وطالع بمرته اليوم ويحكي بكل حب عليها واضح في نبرة صوته
امي..في امور انتي مش فاهمتيها ياعبورة
عبير..ايوه هو هذا اللي مش فاهمته فهميه ليا يا امي
امي..تو يجيك وقت وتفهمي ياعبورة لكن كوني واثقة في حاجة وحدة ان خوك يعشق وردة ومستحيل يظلمها وبطلي تقسي على خوك هيا مرته راضية
عبير ..ماهو انا مافيش حاجة قاهرتني الا رضاها
امي ..يجيك وقت وتفهمي
#حياة
أنت تقرأ
طوق نجاة
Aléatoireعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
