#طوق_نجاة
الفصل23
انا
توقعت كل ردود الفعل من امي الا هذي
انا..امي انتي شنو تقولي
امي ..حدد موعد بيش تمشي وردة وعبير وعمتك عفاف يخطبوها لك
انا ومازالت تحت الصدمة ..امي متأكدة من اللي تقولي فيه
امي..وليش مانكونش متأكدة
انا..امي وائل حاكيلك قبلي
امي..لا وردة حكتلي من قبل الامتحانات
واذكرت امي الحديث اللي دار بينها وبين وردة وكيف حكت ليها كل شئ بدون ما ادس عليها من بداية زواجها بيا وكيف كان راجل امها بيعتدي عليها وان انا لتو ماقربتهاش واني نحب وحدة ثانية وكيف طلبت منها ان انا مانعلم بشئ من ان قلت ليك الا سبب انه يتزوج عشان انا عندي مشكلة في الحمل وانك وافقتي عشان تبي تشوفي صغار ولدك مهما تكوني تحبيني وكيف ان وردة مايهمها شئ في الدنيا زي سعادتي وان ربي لو كاتبلها بحياة طبيعية مع انا اكيد ربي مش يبعدها عليها ولو مش كاتبلها يكفيها انه تعيش معاي حتى ولو سعيد مع غيرها وكيف هيا ترجتها ان توافق بدون ما اضايقني
انا..وين رحتي امي
امي..قاعدة
انا..كيف حكتلك وردة وقبل الامتحانات
امي ..حكتلي وقالتلي على المشكلة اللي عندها وانا صح نحب وردة ونتمنى ان صغارك يكونو منها لكن انا ام في الاخير نبي نشوف صغار وحيدي واكيد مش حنرضى اسم بوك ينتهي بيك بعد عمر طويل
انا..ربي يخليك لي يا امي
امي ..ربي يهنيك ويريح بالك ويوريك حبيبك الصح
انا..امي شنو تقصدي
امي..شئ
انا
فكرت في وردتي كل مرة تفاجئ فيا انا لو عمري كله نلف مش حنلقى زيها بس لكن انا شنو قاعد اندير بنتزوج عليها وانا مازالت ماعطيتها حقها الشرعي يارب صبرني ودلني على الخير والمشكلة اني كلمتها معاش نقدر نغير راي ونطلع عيل
.........
وردة..صحيتي عبورة عشاء يهبل
عبير..الف صحة وعافية غير ديمة نوريني هنا وانا انديرلك احلى منه
وردة..تسلمي يارب ويخليلك هاني وهيام قوليلي عبير عيلة وائل عندهم توآم لان عادتا انجاب التوآم يكون وراثة
عبير..مش عيلة وائل عيلتنا نحن
وردة باستغراب ..كيف وانتي واحمد بينكم خمس سنوات
عبير ..ماهو احمد كان معاه بنت توأم مياس لكن ماتت عند الولادة وبعد احمد بسنتين توأم اجهضتهم امي في الشهر الثالث بسبب طيحة وبعدها جيت انا فردية
وردة.. صار في عيلتكم ماشاءالله جينات باتك الله يرحمه قوية
عبير..اكيد وحتى احمد اكيد ورثها معناها ديري حسابك ان الجسم الحلو هذا حينتفخ زي البتية
وردة بحزن ..ما اضنيش
عبير..استغفر الله عليش تقولي هكي
وردة ..عبير
عبير..نعم
وردة.. الاسبوع الجاي احتمال نمشو نخطبو لاحمد
عبير ..احمد من
وردة..راجلي وخوك
عبير بصدمة ..شنوووووو
وردة.. نخطبو لاحمد بنت معاه في الجامعة بس السنة الاخيرة
عبير بعصبية..انتي تحكي جديات ولا وانتي بتمشي بتخطبي ليه انتي بعقلك والله انت مريضة
وحطت عبير ايدها على جبين وردة
عبير.. لا ماعندكش حرارة معناها مش مريضة معناها فقدتي عقلك تمام بكرة تو نكلم احمد ويحجزلك عند دكتور نفسي يشوف حالتك لانك اكيد مش طبيعية
وردة بكل هدوء.. عبورة انا طبيعية وواجد اخرى وبكل ارادتي ايه بنخطب لاحمد بيش يقدر يجيب صغار يشيلو اسمه واسم العيلة اللي انا مانقدرش نعطيهم له
عبير بصدمة اكبر .. انتي شنو تقولي كيف ماتقدريش تعطيهم له
وردة.. اه طلعت عندي مشكلة صعب اني نحمل ونجيب زي الناس ويكون عندي صغار
عبير..بس مش من اول محاولة علاج تأيسو ربي رحمته كبيرة وانتي صغيرة في العمر تقدرو تزرعو
وردة.. انا مش مقتنعة بالزرع وغير ذلك صح انا مازالت صغيرة لكن العمر يجري واحمد يكبر في العمر ومن بعدين يبدا عنده جهد يربي فالاسهل انه يتزوج ويجيب صغار وانا في نفس الوقت مانخليش روحي نجري ونعاين اكثر
عبير.. ياربي على البرود اللي عندك تقول احمد بيسافر وبيروح مش بيجيب شريكة ليك فيه
وردة.. حلال مش حرام الزواج على فكرة
عبير.. انا عارفة انه حقه حتى من غير سبب لكن اه ياربي معاش عارفة شنو نقول من البرود اللي عندك تقول انا اللي بيتزوج عليا مش انتي
وردة..هدي عبورة اللي كاتبه ربي يصير وماحد يعلم الخير وين مدسوس ليه
عبير..ونعم بالله
وردة.. اهو احمد يتصل معناها قريب يوصل وماتنسيش جهزي روحك وتو نتصل بيك ونقولك امتى نمشو انا وياك وعمتي عفاف
عبير..وعمتي عفاف راضية وامي اهم حاجة امي كيف رضت
وردة..انا قنعتهن
عبير..واااااك عليا منك اقسم بالله مش عارفة شنو نقولك المثالية اللي انتي فيها معاش منها راه فوقي ياوردة
وردة.. مش مثالية والله لكن حب
عبير..اي حب غير يفكر وائل يديرها بس نقتله قبل مايفكر انه يديرها بس
وائل خش هو واحمد
وائل..ياساتر شنو هو اللي بتقتليني قبل مانفكر فيه
عبير بعصبية ..الزواج مرة ثانية
وائل..هو اللي يزوجك يقدر يفكر يعاودها
عبير ..واااائل شنو قصدك
وائل..ابدا قصدي ان حبك جوا قلبي مستحيل يخليني نفكر في غيرك
انا ووردة نضحكو عليهم وكيف عبير عاصرة وائل
عبير..تضحكي اضحكي اضحكي وبعدين تو يتبدل بكا
وردة ..عليش ان شاءالله
عبير..لما يجيك الليل وهو مش حذاك ولما تتفكري تعرفي انه مع شريكتك الثانية فيه ولما تستحقي لحاجة ماتقدريش تقوليله في اي وقت زي تو لان في اوقات واجد بيكون معاها
انا بعصبية..عبير سادك راك زودتيها
عبير..انا مش قاهرني الا الراضية بدون ما ادافع على حقها فيك
انا..عبير هذا شئ بيني وبين وردة وان شاءالله مانظلمها معاي ولانقدر نظلمها اصلا
وائل..اهدى يا احمد عبير بس خايفة على وردة خصوصا انها تعرف وردة كويس وعارفاتها طيبة وخايفة اللي تجي الثانية تظلم وردة
انا..وانا قاعد فيش اندير مستحيل نخليها تقرب وردة مش توصل لظلمها
عبير.. خليك عند كلمتك يا احمد ويجي يوم لما نشوف دموع وردة نذكرك بيه
انا.. مستحيل اذكريني بيه لانك مستحيل تشوفي دموع وردة
وردة .. استهدو بالله هيا يا احمد تأخرنا وامي بروحها اكيد عمتي عايشة روحت
انا ..هيا تصبحو على خير
وطلعت انا ووردة ومادارش اي حديث بينا اصلا شنو بنقوللها فقلت خلي كلامي فعل وفعلا مستحيل نخلي ريم تقرب وردة حتى بكلمة
......
وائل ..كنك ياعبير اول مرة تحكي مع خوك الكبير هكي
عبير بدموع ..لاني اول مرة نشوف خوي اناني هكي
وائل ..عشان قرر يتزوج ثاني
عبير..تخيلت كل شئ الا ان احمد يتزوج على وردة الناعمة الهادية حتى الشكل ربي ماقصرش وابدع في رسمها
وائل..احمد ليه اسبابه
عبير ..اي اسباب
وائل..بينه وبين وردة هما الادرى وبما ان وردة موافقة المفروض حتى انتي تفرحي لخوك
عبير وزادت بكاء..مش قادرة مش قادرة وردة ماتستاهلش
جاء وائل وضم عبير
وائل..خلاص حبيبتي بطلي بكاء وادعي لربي يصبر وردة وتطلع الثانية بنت حلال ماتعبهاش معاها
عبير ..يااااارب
......
وردة
روحنا من عند عبير ووائل وانا نفكر في كلام عبير صح اللي تقول فيه وانا عارفاته من غير هي ماتقوله ليا لكن هو يحبها وكانت حبيبته قبل ماحتى انا نخش حياته فمستحيل انكون انانية في حقه لان عمره ماجرحني ولاعمره هاني من يوم ماتزوجني نجي عند سعادته ونوقف اكيد لا حتى رغم اني نعرف انها معاه في الجامعة لاعمري شفته وقف مع بنت غير طالباته حتى وانا ماعنديش محاضرات عمري ماسمعت عليه حاجة مش تمام معناها صايني ومايبيش يدير حاجة الا حلال ورسمي وانا شنو نبي اكثر من هكي وخذاني احمد في حضنه زي كل ليلة ورقدت وانا نقول كيف بنرقد لما بيكون معاها يارب صبرني
وثاني يوم اتصلت بعمر وحكيت ليه عشان مايزعلش من احمد وحاولت نشرحله ليش احمد بيتزوج على حسب عمره رغم انه صدمني لما قالي اكيد في حلول ثانية بيش تحصلو صغار غير الزواج واقتنع لما قلت ليه مافيش الا الزواج وبعدها كلمت روان وقلت ليها تقول لعمتي فاطمة وعمي عطية عشان يكونو في الصورة و مع المغرب قاعدة مكسدة انا واحمد وامي رقية وسمعنا صوت جرس الباب وطلع احمد فتح الباب
وخشت عمتي فاطمة وعمي عطية وسلمو وهما خلايقهم مقلوبة
العم عطية ..معقولة هذي الامانة اللي آمناك عليها
انا..امانة شنو ياعمي
العمة فاطمة ..وردة يا احمد والله عشان ماعندهاش ظهر ولاسند لا يا احمد نحن ظهرها ونحن سندها لو كنت نسيت
امي..غير استهدو بالله بس
العمة فاطمة .. لا اله الا الله
العم عطية .. كيف تتزوج عليها يا احمد شنو دارت ليك شنو قصرت معاك فيه ونحن ناخذولك حقك منها لكن تتزوج عليها وتظلمها لا يا احمد
وردة.. معليش بعد اذنكم احمد ويا امي بنحكي مع عمتي فاطمة وعمي عطية بروحنا
انا..خوذو راحتكم
وخذتهم وردة وعدو لدار الجلوس
امي ..شفت ياولدي الناس ربي عوضها بيهم
انا..فعلا لما كانت تقول هلي فعلا هما اهلها
امي..ربي يحفظهم ليها
......
العمة فاطمة..كيف راضية يابنتي والله مش حاسبتينا هلك تجي وتشكي لينا
وردة..والله ياعمتي ماصارت انتم هلي وعزوتي لكن انا راضية والله لاني متأكدة ان احمد مستحيل يقصر معاي او يظلمني لكن انا مستحيل نظلمه معاي
العم عطية..يابنتي لكل مشكلة ليها حل وانتي صغيرة في العمر
وردة..ياعمي انا صغيرة لكن احمد تو عمره ثلاثين سنة ورحلة علاجي مش حتكون ساهلة حتاخذ وقت طويل واشبح يصير منها او لا واذا صار منها هذاك الوقت احمد بيكون عمره فات للتربية وتكبير بيبي ياعمي صدقني لو لحظة حسيت ان احمد حيضلمني كنت مستحيل انوافق
العمة فاطمة..ربي يهنيك يابنتي ويصلح حالك
وطلعو من الدار
العمة فاطمة ..سامحونا جينا من غير اتصال لكن قلبي ماتحمل الحق
امي..عيب يافاطمة حوش وردة حوشك تجي في اي وقت وطمني بالك مستحيل وردة تنظلم وانا حية
وردة..ربي يعطيك طول العمر
انا..والله عارفكم هلها وعزوتها ولو يوم جت وردة وشكت مني خوذو مني الحق اللي تبوه
العم عطية ..ربي يهنيكم ويصلح حالكم هيا عطونا الاذن
انا..كنكم مستعجلين حتى فنجان قهوة ماشربتو
العم عطية ..معليش ياولدي خليها مرة ثانية خلينا روان ونوال بروحاهن ومش عارف وسام روح او لا
انا..اللي يريحكم ياعمي
وطلعو وخشت وردة تجهز في العشاء وبدون ماتقول اي كلمة وجيت لامي
انا..امي زعمك اللي اندير فيه صح
امي..والله ماني عارفة ياولدي شنو نقولك
وتعشينا وهدرزنا شوي مع امي وبعدين امي خشت رقدت وخشيت انا وردة لجناحنا وتوقعت وردة تحكيلي اللي صار بينها وبين عمي عطية وعمتي فاطمة لكن طبعا هذي وردة تتوقع منها اللي مايخطرش في بالك
وردة.. احمد
انا..ياعيونه
وردة ..كساد صح
انا..واجد
وردة ..شنو رايك نلعبو بلاي ستيشن
انا..شنوووو
#حياة
أنت تقرأ
طوق نجاة
Aléatoireعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
