#طوق_نجاة
الفصل26
طلعت انا ووردة ودرنا برمة في البلاد ونزلنا لسوبر ماركت وخذيت حاجات وهيا تسئل فيا وانا درت روحي ماسمعتهاش وبعدها تكيت على مطعم قبل بناخذ عشاء ونطلع لكن بعدها قررت ان نتعشو في المطعم وعديت نزلت وردة
وردة..مش قلت بنتعشو على الشط
انا..لاغيرت رايي عجبني جو المطعم هادي ومافيشي عائلات واجد
وردة..اللي يريحك حبيبي
انا..ديمة قوليها وردتي ديمة نبي نسمعها
وردة..حاضر
وطلبنا العشا وقعدنا نهدرزو انا ووردة وسئلتها
انا..وردتي امتى عرفتي روحك تحبيني
وردة بخجل.. من زمان
انا..به ليش ماقلتيش
وردة.. حاجة زي هذي ماتقدرش تحدد الوقت اللي تقوله فيه تبدا شاك في مشاعرك في البداية وبعدها تبدا متأكد لكن التأكد هو اللي ياخذ وقت طويل ولما تعرف روحك متأكد 100% هذاك الوقت تخلي كل حاجة لوقتها ولمجرد ماتحس روحك تبي تقولها تقولها طول
انا..تصدقي وردة كأنك تحكي علي صار ليا بالزبط
وردة.. ماهو حبنا واحد وانت امتى عرفت انك تحبني
انا.. من وقت طويل لكن عندك علم اني شكلي كنت نحبك من لما كنتي في سنة اولى جامعة
وردة..كيف
انا..وائل قالي من لما خشيتي للجامعة وانا نحكي عليك ان في لمعة في عيوني تختلف مش زي لما نحكي على ريم
وعرفت روحي زلقت باسم ريم مش وقته بكل تو
وردة
نطق اسم ريم كانه موس انغرز فيا لكن طنشت عليه لاني المهم عندي اعترافه تو
وردة.. كيف انت كنت تحكي عليا من اول ماخشيت للجامعة
انا..طبعا من اول محاضرة معاي عرفت انك شاطرة وبالذات في مادتي عرفت ان عندك دماغ مرتب
وردة بحب .. اصلا عشق الجبر انا خشيت الرياضيات على خاطر الجبر
انا.. شنو اكثر حاجة تحبيها في الجبر
وردة.. المعادلات بتاعت المجاهيل وس وص اروع حاجة وهنا اصلا اللي حببني فيه
انا.. حتى انا نحبهن واجد
وقعدنا نتعشو ونهدرزو في كل حاجة وبعدها طلعنا ومشيت شور المزرعة بس ماقلتش لوردة
وردة.. حبيبي وين ماشيين هذي مش طريق الحوش
انا بحب..مش طالعين للحوش بنباتو برا
وردة.. نباتو برا انا مش دايرة احتياطي ماخذيتش دبش وحتى عبير وعمتي عفاف تو يزعلو
انا .. كل حاجة واتية وعبير وعمتي تو تحكي لهم امي ولانهن يحبنك حيفرحن ليك ومش حيزعلن منك
وشديت ايدها وبستها وقلت ليها
انا.. الليلة فكري انها ليلتنا فمتشغليش بالك بشئ الا بيا وبيك
وردة
زعمك الليلة حنكون مرته فعليا لكن كيف وهو بيخطب ريم مانيش مفكرة في شئ الليلة الا في نفسي وان شاءالله الليلة فعلا تكون ليلتنا زي ماقال وحسيت روحي فرحانة واجد يارب دوم عليا فرحتي يارب ووصلنا لمكان وبمجرد ماشفته عرفته طول المزرعة اللي قضينا فيها اول ليلة لكن شنو الدبش اللي زعمك جابه ليا احمد ونزلت لكن قالي احمد استني هنا نين اناديك وبعدها نادني خشيت للاستراحة لقيتها كلها شموع وريحة حلوة ومدلي احمد الشنطة وقالي خشي للدار جهزي روحك وهو فتح الشنطة حول منها بيجامة ليه
وخشيت انا للدار وفتحت الشنطة لقيت فيها هذاك الروب ففهمت ان الليلة ليلتنا وغيرت دبشي ولبست الروب وهالمرة مش متحشمة واجد زي المرة اللي فاتت لاني هالمرة عارفة انه يحبني مش لانه يبي حقه الشرعي وخلاص وطلقت شعري وتعطرت ولبست خلخالي لاني لما نطلع من الحوش نحول فيه ولبست طرف الروب وطلعت ليه
انا
غيرت دبشي ولبست بيجامتي وقعدت نستنى فيها قلت مانيش خاش عليها نين هيا تطلعلي ولعت tv وقعدت نستنى وشوي طلعت ليا وسبقها عطرها اللي بريحة الفروالة الهادية ومنظرها يهبل وسبحان الله ما ابدع في تصوير جسمها
انا..تعالي وردتي نتفرجو على الفيلم هذا ونستنو العشاء عشان نصلوه جماعة لان الجامع بعيد من هنا
طبعا انا فكري بنستنو العشاء عشان مانخليش متع الدنيا تنسيني ربي وفروضنا وفي نفس الوقت نبي وردة ماتكونش متوترة
وردة ..فيلم شنو
انا..فيلم قديم لكن مش عارف شنو انتي تحبي افلام الابيض والاسود
وردة .. انا عادي اي فيلم مايفرقش عندي شنو اسمه
انا..الوسادة الخالية لعبدالحليم
وردة بفرحة ..اه نعرفه ونحبه نحب فيه ان نهايته تغلب على حبه الاول وحب زوجته في الاخير وعرف قيمتها لما كان قريب يخسرها
انا.. باهي تعالي هنا
وقمعزت حذاي وجبدتها بايدي ضامها شوري وقعدنا نتفرجو وسئلتها
انا.. انتي مش مع الحب الاول
وردة.. لا معاه ونحب القصص اللي ينتصر فيها الحب الاول لكن انا ضد ان الانسان يوقف حياته عليه لو ضاع منه بالعكس ربي انعم علينا بنعمة النسيان عشان ننسو ونستمرو في حياتنا والحياة ماتوقفش عند حد بالذات لما الحد يكون بدلك وباعك لكن اه لو هالحبيب دار المستحيل على خاطر انك تكون ليه لكن النصيب ماوفقش بينهم اه هذاك الوقت نقول لازم الانسان يأخذ وقت طويل بيش يقدر ينساه لان الذكرى المفروض ماتكونش الا للناس اللي فرق الزمان بينهم رغم محاولة الطرفين التماسك ببعض
انا..على عمرك هذا لكن عقلك يوزن بلاد ربي يحفظك
وردة..ويحفظك صح عمري صغير لكن ربي خلاني من اللي مريت بيه نفطن لكل شئ ونتعلم من كل شئ
انا..هيا حبيبتي العشاء اذن
صليت العشاء وهيا وراي على ميمنتي وكملنا صلاتنا وجيت شديت ايدها واستغفرت على صوابعها وبعد ماكملت هيا دارت نفسي عشان نتشاركو الاجر
انا.. حطيتها في حضني وقلت ليها تعرفي باذن الله قريبا نطلع انا وياك عمرة هدية نجاحك السنة هذي
وردة بفرحة .. والله بترفعني عمرة هدية نجاحي الله استنى هنا انا نجحت لكن النتيجة مازالت ماطلعت كيف عرفت
انا.. بتطلع الاسبوع الجاي لكن لانك زوجتي بلغوني بيها واسطة طبعا وزي العادة الاول بمرتبة الشرف
وردة صبت من مكانها وقعدت تنقز من الفرحة وبعدها جت وباستني على خدي من الفرحة وحضتني زين وانا حولت اسدال الصلاة اللي مازال لابساته وحطيت ايد وراء رقبتها وايدي الثانية في ثنية ركابها وطبيتها للدار عشان تكون زوجتي فعليا وشرعا ونقوللها على حبي اللي شهور كنت اعمى ماحسيتش بيه وبعد فترة وردتي راسها على صدري في جيهة مكان قلبي تسمع لنبضات قلبي اللي تقوللها نحبك مع كل نبضة
انا..وردتي انا نحبك وفرحان واجد وقديش عرفت روحي اني غبي
وردة..حشاك من الغباء
انا.. لاني ماكنتش عارف شنو عندي تي انتي الشهد اللي كنت حارم روحي منه
وردة بخجل وصوت واطي.. المهم وصلت ليه وغرفت منه مش مهم امتى
انا .. يا احلى وردة
وعدت ليلة من اروع الليالي في حياتنا وكانت بداية جديدة لكن مازالن قدامنا اختبارات واجد لازم نخوضوها وننجحو فيها ودوشنا وصلينا الفجر وخليتها تلبس بيجامة الشورت لونها احمر ناري مع لون جسمها طلعت عليها واو وطرفها الفوق اللي كان عريان بسيور رقاق مع لمسة بسيطة من الشيفون على جيهة بداية الصدر وبانت رقبتها الطويلة وخذيتها في حضني ورقدنا احلى رقدة لان اول ليلة ليها ماحبيتش انتعبها اكثر
ونضنا قبل الظهر بشوي وجهزت وردة الفطور وفطرنا وهدرزنا وضحكنا وغيرت دبشها وطلعنا ندهورو في المزرعة حتى بيش نفتح موضوع ريم
انا..وردتي انتي عارفة اني نحبك لا مش نحبك انا نعشقك
وردة ..اكيد وحتى انا نحبك موت
انا.. لكن وعدي لريم مانقدرش نخلفه وكوني واثقة حنعدل بينكم ومستحيل تنظلمي معاي لاني مانقدرش تو نطلع عيل
وردة بنبرة فيها حزن لكن ثقة .. حبيبي انا عارفة انك مستحيل تظلمني او يظلمني حد وانا معاك واكيد راجلي وعزوتي مستحيل يطلع عيل وانا معاك في كل شئ بديره وبالعكس مرات زواجك من ريم يجي معاي
انا باستغراب ..كيف يجي معاك
وردة.. مرات يقوى حبنا لبعض ومرات ريم تطلع انسانة كويسة ونلقاها اخت ليا حتى لو بتقاسمني حبيبي
انا..مش عارف شنو نقول على العقل اللي عندك
وردة.. نكذب عليك كان نقولك اني مانبيكش تكون ليا بروحي ومايشاركني فيك حد واني نبي حبك ليا بس لكن برضو هذا حلال ربي ولو ربي كاتبلي ان تكون ليا شريكة فيك حتى لو مش ريم حتكون غيرها
انا..كل يوم معاك يزيد اعجابي بيك وحبي يكبر ويكبر
وقديش كان خاطري نقوللها حبك وقلبي مستحيل حد يشاركهن معاك كلهن ليك لكن زي ماقلت لامي ممكن زواجي من ريم يكون اختبار لحبنا انا ووردة
وردة..هيا حبيبي يا دوب نوصلو للحوش نلحق نوتي روحي وربي يعيني على عبير
انا..كوني هانية منها عبير اكيد امي حكت معاها
وردة .. ان شاءالله
ولمينا دبشنا وطلعنا للحوش وانا ووردة في قمة السعادة واللي مفرحني اكثر وردة فرحانة واجد مكانهاش بتعدي تخطب لراجلها بعد العصر
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
