انقذتني روح

البارت الثامن عشر

----انقذتني روح --بقلم انين الليل
البارت الثامن عشر
اكو مثل نتداوله بالعراق بس انا سمعته من أهل البصرة هواي
إذا واحد يضحك او يفرح يكولون ضحك خير تدرون ليش لان ماكو بالعراق ولا واحد خالي من الهموم بس الناس عايشه رغم الماسي والأحداث والحروب والحصار والأمراض بس جاي تكافح وتجاهد
وهي متمسكة باخلاقياتها وقيمها

💞💞💞💞💞💞💞💞💞💞💞💞💞💞💞💞
هدى
ما اعرف شبي وسام كان وياي هالمرة غير عن كل مرة احس بحنيته وغرامة وهو يبوسني وهو يلعب بشعري ويتشاقه وياي حسيت انو مو هو الي قبل ساعه يكل الابو انا أشك بيها ردت أحاجي واعاتبه بس ما انطاني مجال وانا بقيت صافنه على روحي ليش سكتت واتذكر من عمتي كلتلي لازم وسام يتزوجج و يشوفج شكد نظيفه وطاهرة
وأتذكر لمن دخلت علي للمطبخ جان بس انا وياها ولكتني ابجي سألتني
ليش تبجين
انا ما جاوبت بس هي أصرت علي
كتلها //عمه تدرين انا لو ممتحنه جا هسه جبت معدل ودخلت كليه حالي حال البنات
عمتي سكتت شويه بعدين لزمتني من أيدي واخذتني يم باب الترك الي يطل ع المنور جان يمه شباك حديد بس بي جام وحده من الجامات مصدوعه كلتلي عمتي وجان بكلامها حده

شوفي هدى هواي مثلج جانو يتمنون يمتحنون بس عدهم ظروف واحد يتمرض والثاني يموت له عزيز والثالث ينضرب عين والرابع الرابع يجوز واحد ما نفكر بي حتى ما يمر عليهم يكتل واحد من غير عشيره ويشيلونهم من بيوتهم او واحد متحضر ويموت وهواي لان القدر ما نكدر نغيره بس ياعمه باعي وأشارت لشباك ودكت على الصدع اسالج هاي شنو علاجها وترجع مثل قبل

انا باستغراب //عمه هاي إلا تنشمر وينجاب غيرها
يعني ما تتصلح
لا عمه ما تتصلح
خوش يا بتي كرامة الإنسان لو اكبر شهاده من تنصدع ما تصلحها
وانتي لا تفكرين بالشهادة الي راحت منج لا يمه فكري شلون تطلع
براءتج وشلون تخلين رجلج ما يستغنى عنج

جان كلام عمتي مرهم تداوي بي جروحي ومصيبتي ويه اخواني
وتصبيرتي على فراك امي

بعد مرور وقت ما نزلنه ع الغدا كام وسام سبح وطلع وانوب كمت انا
طخيت بي باوعلي كلي:: لا تتمايعين وتتحرشين لا ارجعلج مرة ثانيه وما تتخلصين مني
انا من طخيت بوسام احس بدوخه دخلت للحمام نفسي لعبت ومعدتي ما شبيها اتقيات وسام سمعني كلي شبيج انا ماحاجيته غسلت وطلعت اشو بعد هي الدوخه ولعبان النفس كلي وسام لان ما ما كله يالله ننزل انا ما كدرت انزل وسام اشوف بعينه تساؤل يعني يجوز انا حامل شفته فتح الميز و يباوع الحبوب المانع بس انا ما جاوبته لفيت راسي و اتمددت ع الجربايه وانا احس اني مو تمام صعدولنه غدا لان اليوم ما طبخنا فراح غسان جاب سمج مشوي وكانت سميه جايه دكت الباب طلع وسام كلها تعاي أخذ الصينيه وسميه كعدت شافتني متمدده او وجهي أصفر كلتلي
شبيج هدى
كتلها بالم-- معدتي وما جاي يثبت شي بيها
كامت سميه جان تكول// اللهم صل على محمد وآل محمد هداوي حامل
باوعلي وسام يستفسر انا هزيت راسي كتلها-- لا يمعود ه شنو حامل
كلتلي// يااا شبيج انشالله شنو ناقصكم شو تخبلون جنكم البخت
وسام كلي ::تحضري العصرراخذج للدكتورة وانتي سميه امشي ويانه