ماذنبي انا للكاتبة ام مصطفى

السابع

#ما_ذنبي_انا
البارت السابع
صباح الخير
هذا بارت البارحه لأن مجان عندي نت
وان شاء الله بارت اليوم بالليل انشره
القصه راح تكون بلسان بطلة قصتنا
الي هي مريم
من وكع ابوي كمنا نتصارخ علاوي ومرتضى ركضوا عليه
والجوارين اخذوه وراحوا للمستشفى
دخلوا طوارئ كبل
امي راحت وراه وخالتي ساميه همه
بقيت وحدي بالبيت الوب
وابجي اني السبب
كله من وره لساني
شجاني وهيج حجيت
هسه مال شقه هو
بقيت وحدي أريد اعرف الي صار
لابوي شنو
لليل اجت خالتي ساميه واجه مرتضى
كالو صارت عنده ذبحه صدري
وره يومين مات ابوي
جان اتعس يوم بحياتي
صدمة جبيره النه كولنه
من اجانه الخبر
كولنه تاثرنه
امي وخالتي وعلي ومرتضى
صار الصريخ واللطم
وامي تصيح من وراجن مات الرجال
ومرتضى كلما يمر مني يغلط ويريد ياكلني
انت موتي ابوي
كمت ابجي واصرخ أريد اخلص من هذا الذنب الي كام يراودني
اني السبب اني قتلت ابوي
اني ذبحته
كمت أكره نفسي كلش
مااريد اشوف أحد مااريد اسمع
حجي الناس
خصوصا امي ومرتضى
الي حملوني المسؤليه بموتت ابوي
وانت السبب وانت السبب
كرهت الحياة
بهذيج الأيام
خلصت الفاتحه وبدت الحزازيات
والمشاكل من جديد
بين خالتي وامي
اظطروا يدخلون أقاربنه
واقترحوا يبيعون البيت والمحلات وكلمن يأخذ حصته ونخلص
علاوي جان يكلي مااريد تعيشين
بغير بيت اريدج يمنا تبقين مأمن عليج يمهم
بس امي ايد متقبل بتدخله
وشدت وياي هي ومرتضى
كرهتني حتى بالدراسه
بس جان علي يكلي لاتهتمين
الهم خلي اهتمامج بدراستج
وأي شي تحتاجينه اني موجود
اني اخوج الجبير جنت احسه
كلش حنين
عبالك حنان ابوي علي
عكس مرتضى
الي دائما يصيح علي ويغلط
ويضرب
جنت أتمنى خاله ساميه امي
بكد ما جانت حنينه علي

وهم عكس امي الي جانت كلش قاسية علي
وابد ما فد يوم احتضنتني بحنانها
ولا يوم حسيت بيها تحبني

انباع البيت وكلمن أخذ حصته
وهنا بدت مرحله جديده بحياتي علاوي وخالتي اشتروا بيت ع كدهم واستقروا بيه
وأخذ محل اله وتقاسموا الباقي باعوهن ومحل ثاني هم ل مرتضى
لأن ابوي جان يملك أكثر من محل بالسوك
وعنده فلوس بالبنك
امي كدرت تلكه بيت
بمساعدة صديقتها المعلمه وياها ادوام بالمدرسه
لكيت بيت بصف بيتها
يعني صارت جارتنا المعلمه صديقة امي
سبحان الله نفس طبع امي جانت شنكه وشايله خشمها
وكل همهن الكشخه واللبس
هذيج جانت عدها اثنين بنات وحده عمرها 10 سنوات إيلاف  والثانيه 9 سولاف 
جانت حامل بشهرها
اول منزلنه  علاقتهم زادت كلش بينه
كامن يرحن سوه يرجعن سوه
للمدرسه
وباليل وحده تروح يم الثانيه
طبعا امي أبد ما مهتمتلي
جان كل همها نفسها وبس
مرتضى ترك الدراسه
وكام يطلع ويشرب ويكبسل
وي جماعته وسوه محل ابوي
ملتقى لجماعته
الي نفس طبعه
وكسر المحل كام محد يشتري منه
وامي اذا حاجته يبقى يغلط
ويصيح عليها
ومياخذ حجايتها أبد
اني كدرت أنجح من الرابع عام
وادخل آداب رغم نفسيتي التعبانه   بس بفضل الله وفضل اخوي علاوي
الي ماكطعت اتصال وياه
دائما يخابرني بله متدري امي
يكلي صيري قويه واريدج تهتمين بدروسج وتنجحين
اني هم ذبيت كل حيلي بالدراسه
فد يوم خابرني علاوي
كال باجر خطوبتي اريدج تحضرين انت وخالتي ومرتضى
كتله مااعرف والله اكللهم
من فتحت الموضوع وي امي
كامت تغلط وتسبب بي
وتحجي علي شلون خابرتي
وليش تحجين وياه كم مره منعتج منهم
وكتلج انسيهم
يمه شلون أنساه غير اخوي
ويخطب لازم نحظر
أسس وخوه الخ
. الخوتج لادكولين اخوي احنه لانعرفه ولايعرفنه
دخل مرتضى وامي اشتكتله علي
كام ظربني وظل يتواعدلي اذا مره لخ اتصلتي بي
خطب علاوي زميله وياه بالكليه
جان يحبها
وسبحان الله وافق شن طبقه
الي خطبها نفس أخلاقه وحبابه
بقيت اراسل وياه
كلش انقهر لأن ماحضرت
وبقى يواسيني يكلي ميخالف
جان كل شويه يخابرني ويدزلي صور الخطبه
جان فرحان بخطيبته وخالتي ساميه هم تبين فرحانه بالصور
اتمنيت ابوي ماميت وموجود
جان كولنه فرحنه بي وحظرنه عرسه
اووف ليش هيج صار بينه
جنه عايشين أحلى عيشه
رغم المشاكل بس
يبقى الأب خيمه
ويلم أولاده
الله يرحمك يابويه
ما طول علاوي ويزوج
وهم اجه للبيت وعزم امي وتوسل حتى احظر العرس وامي
مقبلت وطردته شكد توسلت بيها وبجيت فدوه يمه عليج الله خليني اروح
ولج الله لاشافج انت متفتهمين انسيهم معليج بيهم
طلعيهم من راسج
يمه شلون انساهم غير اخوي
تذكرين ابوي شلون جان يوصينا واحد بالثاني
ودائما يكول علاوي اخوكم الجبير
لازم تسمعون كلامه وتحترموه
اي مو ابوج غشيم مثلج
مات وماعرف ساميه وابنها ع حقيقتهم
الله يرحمك صباح جنت دوم اكلك ساميه حيه تركص من جوه الي جوه
يمه خالتي تره فقيره ليش تحجين عليها
ولج انت أريد اعرف اني امج لو هي
دوم تكفيني بصفها ودافعين عليها
شوفي روحه ماكو لو تره يجي مرتضى وخلي يصرف وياج
دخلت لغرفتي وبجيت لمن مليت
يعني يصير اخوي يعرس ومااحظر
حتى الله ميقبل
كرهت امي وحقدت عليها ليش هيج تسوي
والله علاوي اخوي عمره ماقصر وياينه ويحبنه
خابرت علاوي ابجي
كلي ميخالف مريومه هاي امج ولازم تسمعني كلامها
ولو جنت أتمنى اختي توكف بعرسي
واخوي يزفني
بس مااكول غير الله يهديهم
بقه يدزلي صور عرسهم
كل اللقطات كأنما اني حاظره وياهم
مرت الأيام ونجحت السادس
هنا مرتضى زاد بالسكر والسوالف الموزينه
وكام يغلط ويضرب امي
يموتها كتل ويكتلني
يريد يبطلني يكل لمي شنو مخليتها ادوام اني رجال وبطلت
هاي شعدها ادوام
بعد ماكو دوام سمعتي لولا
واكو واحد من اصدقائي شافج
ورادج
حظري نفسج اني وافقت عليه
وللحكايه بقيه
#ام_مصطفى