ماذنبي انا للكاتبة ام مصطفى

التاسع

#ما_ذنبي_انا
البارت التاسع
#ام_مصطفى
بقيت ع اتصال وي مينا
كل يوم اتصل بيها إلى أن كالت
بدت تتحسن حالته وضعه زين
الف الحمد لله
بقى علاوي أسبوع كامل بالمستشفى وطلع
خابرني أكثر من مره يطمني ع حالته ويحجي وياي
الف الحمد لله والشكر
امي ضلت تلح علي حاجي خلي يتنازل ع مرتضى
كتلها مالي دخل اني
وبعدين عوفيه بالسجن خلي نرتاح شويه منه
ولج انت والله صلفه تره هذا اخوج مو عدوج
يمه يا اخو هذا الي يضرب اخته
كل يوم ويريد يهدم مستقبلها
يا اخو هذا الي يريد زوج اخته
لواحد مكبسل وسكير
يمه هذا مو اخو هذا عار
خلي يتربه بالسجن
كالت شحجي شكول غاسلين مخج
علاوي وامه اووف صباح متت وارتاحيت وإني بس العذاب علي
ساعة السوده يوم شفتك وحبيتك
....
وره كم يوم انحكم مرتضى سنه
لأن علاوي ماتنازل ع حقه وكال خلي يأخذ جزائه
بلكت السجن يعدله
ويطلع ادمي ورجال يصير
بهاي الفتره اني ادوام صف سادس أدبي
امي ولايمها ولامهتمه لا الي وإلى لسجن مرتضى
تروحله للسجن كل أسبوع أو أكثر
وعادي عدها صارت الشغله
ملتهيه هي وصديقتها المعلمه
عبالك خوات توؤم طبه وطلعه
ويشترن ويخيطن ويلبسن
فد يوم كالت امي اليوم معزومين
بخطبة إيلاف بنت سوسن صديقتي المعلمه
كتلها يمه معقوله تنخطب اشو صغيره اشوفها
لأن إيلاف جانت ع طول تجينه طبه طلعه يمنه هي وامها ووحدها مرات
بس مو مال زواج مبين عليها طايشه
صدك مسويه روحه ع اساس جبيره بس مو مال زواج تعجبت
كتلها يوم شكد عمرها إيلاف كالت
12 سنه
ياااا وتريد تزوجها امها اي لعد شعدها كاعده البنيه اول ع تالي تزوج
خوما مثلج 👐
والله اني أهم شي دراستي شكو مزوجه من هسه
اكلج يوم والي خطبها شكد عمره
عمره 16 سنه
يا هم صغير
اي ابن عمها يحبها دكول أم أيلاف يموت عليها
وحتى راد ينتحر ع مودها
اصلا اخوه الأكبر منه لسه ممزوج
بس هو يلح ع أهله وكتل نفسه عليها
كمت اضحك أمداني اي والله
هاي هالكدوته هيج مخبله الولد
امي كالت لعد عبالج مثلج عوبه
دكومي كومي نروح للنيشان اليوم
مسوينه هو خطبه هو نيشان
وعازمتنه
يمه روحي شكو رايحه اني
امشي ولج وياي عيب
اروح وحدي
بعدين همه بصفنه حايط ع حايط عيب مترحين
اوكي امري لله
دخلت فتحت الكنتور
شلبس شلبس
اووف حيره هسه شكو رايحه
اووف
آخر شي لبست بنطرون
وكب طويل جوه الركبه
مااخلي مكياج اني
لبست شال بلون الكب رصاص
جان الكاب وبي وردي مربعات
لبست شال وردي
وامي تصيح يله
راح يجون الخطابه وانت بعدج
هسه وإني شكو اوووي
رحنه للخطبه
والله طالعه حلوه إيلاف
لشويه اجوي أهل العريس
وعقد السيد الهم
ودخل الولد خطيبها اسمه اسامه
لأن سمعتهم يكولون فوت اسامه
يااا والله حلو
جان طويل وضخم
بس مو سمين لا جسمه حلوه
عنده عضلات ملامحه حلوه عيونه مكحله كبار
وحواجبه متخالطه
يباوع عليها ومكيف بيها
طاير فرح بيها
عبالك ممصدك
وأم إيلاف هم مكيفه وطايره فرح
وخلصتها تصفك وتهوس عبالك ابنها المزوج مو بنتها 
خلصت الخطبه
ورجعت للبيت جانت عطلة نصف السنه
خلصت العطله ورجعت ادوام
ذبيت حيلي وجهدي كوله بالدراسه
لازم اجيب معدل زين أريد ادخل حقوق
أريد اصير محاميه
علاوي جان دائما يتصل بيه
ويشجعني ع الدراسه
يكلي اريدج تطلعين معدل زين
وخلي بالج وفكرج بس يم دروسج
اكوله أن شاء الله بس انت ادعيلي
تقربت الامتحانات
وتزوجت إيلاف ابن عمها اني التهيت بالدراسه كمت مااطلع من الغرفه بس للمدرسه وارجع اكابل كتبي وأكعد
امي بحالها ممهتمه اصلا الي
صح احنه كاعدين بنفس البيت
بس أحس اكو حواجز ومسافات بينه جبيره
ولا عبالك يمي هي ولا فد يوم سئلتني شمحتاجه شرايده
شلونج بالدراسه
أبد عايشه بغير عالم وهي ومعلماتها وصديقتها بي

امتحنت والحمد لله جاوبت زين وجبت معدل ادخل كلية قانون
والله فرحتي شكبرها
وخابرت علاوي بشرته
خطيه كيف وفرحلي هواي
رجعت فرحانه للبيت
وبشرت امي
صح احسها فرحت بس يعني
عادي مو ذيج فرحة الأم عبالك
وحده غريبه ونجحت
اجتنه أم أيلاف
امي كللتلها نجحت مريم
ياا خاله الف مبروك حبيبتي
يوم زواجج
خاله مو هسه من اخلص كليه
أن شاء الله خاله
بقت تسولف
اني اغسل مواعين
واسمعها تسولف ع بنتها لأمي
دكلها صار 3 دكتوراه أخذها
ع الحباله
وكولهن يكولن بعدها صغيره هسه
وهي تريد وزوجها يريد والله تعتني
هزيت أيدي طبعا متحبل
زعطوطه ومزوجيها عمرها 12 سنه وتريدها تحبل
والله يا الله شنو من بشر وشلون عقل عدهم مزوجين طفله
لا وجماله مكبرتها امها
عفتهن يسولفن ورحت لغرفتي
الله وأخيرا خلصت دراسه وبدت العطله وراح ارتاح
بقيت افكر بالكليه وأخيرا راح أدخلها الله حلم حياتي  .........
خلصت العطله وقدمت استمارة للكلية
بهاي الفتره طلع مرتضى من السجن وعساه لا طلع
طلع وبدت المصايب تطلع وياه
وللحكايه بقيه #ام_مصطفى